༄༅། །ཕྱི་ལོ་ ༢༠༢༤ ཟླ་ ༩ ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་བཞུགས་སྒར་ཕོ་བྲང་དུ་ཧྥི་ལི་པིན་(Philippines)རཱ་མོན་མེག་སེ་སེ་གཟེངས་རྟགས་(Ramon Magsaysay Award)ཐེབས་རྩའི་འགན་འཛིན་ལྷན་ཚོགས་དང་། ཐེབས་རྩའི་ཚོགས་མི། རཱ་མོན་མེག་སེ་སེ་གཟེངས་རྟགས་ཐོབ་མྱོང་མཁན་རྒྱ་གར་བ་བཞི་དང་། ཧྥི་ལི་པིན་གྱི་མི་གཉིས། གཞན་ཡང་སྐུ་མགྲོན་སོགས་མི་གྲངས་ ༥༠ ལ་མགོན་པོ་གང་ཉིད་མཆོག་གིས་རཱ་མོན་མེག་སེ་སེ་གཟེངས་རྟགས་འབུལ་བཞེས་བསྐྱངས་ནས་མི་ལོ་རེ་ལྔ་འཁོར་བའི་དུས་ཆེན་དང་འབྲེལ་མཇལ་ཁ་དང་བཀའ་སློབ་སྩལ་ཡོད་པ་རེད།
དེ་ཡང་ཕྱི་ལོ་ ༢༠༢༣ ཟླ་ ༤ ཚེས་ ༢༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ལོ་ ༡༩༥༩ རེ་མོན་མེག་སེ་སེ་གཟེངས་རྟགས་ (1959 Ramon Magsaysay Award) ཕུལ་ནས་ལོ་ངོ་ ༦༤ འཁོར་བའི་དུས་དྲན་དང་བསྟུན་ཧྥི་ལི་པིན་(Philippines)རཱ་མོན་མེག་སེ་སེ་གཟེངས་རྟགས་ཐེབས་རྩའི་ཚོགས་མི་རྣམས་རྡ་ས་བཞུགས་སྒར་ཕོ་བྲང་དུ་ཆེད་བཅར་གྱིས་གཟེངས་རྟགས་དངོས་སུ་ཕྱག་འབུལ་དང་མཇལ་ཁ་ཞུས་ཡོད་པ་དང་། སྐབས་དེར་ཐེབས་རྩའི་ཚོགས་གཙོ་ནས་༸གོང་ས་མཆོག་ནི་སྐབས་དེར་གཟེངས་རྟགས་འདི་བཞེས་མཁན་གྱི་དགུང་ལོ་ཆེས་གཞོན་ཤོས་ཡིན་པ་དང་། ད་བར་གཟེངས་རྟགས་བཞེས་མཁན་ ༣༤༤ བྱུང་ཡོད། གཟེངས་རྟགས་བཞེས་མཁན་ ༣༥༠ བྱུང་མཚམས་གཟེངས་རྟགས་མཛད་སྒོ་དང་འབྲེལ་ད་བར་གཟེངས་རྟགས་བཞེས་མཁན་གྱི་ལོ་རྒྱུས་དང་། སྐུ་པར། གསུང་འཕྲིན་བཅས་ཡོད་པའི་ཆེད་དེབ་དཔར་བསྐྲུན་སོགས་ཀྱི་ལས་རིམ་ཡོད་པ་༸སྙན་སེང་དང་འབྲེལ་༸གོང་ས་མཆོག་གིས་གཞོན་སྐྱེས་ལ་དམིགས་པའི་གསུང་འཕྲིན་ཞིག་གསོལ་སྩལ་ཡོང་བའི་སྐྱབས་འཇུག་ཞུས་ཡོད་པ་དང་། དེ་རིང་པོད་བདུན་ལས་གྲུབ་པའི་དཔེ་དེབ་ "Greatness of Spirit" ཞེས་པ་ཞིག་དབུ་འབྱེད་ཀྱིས། མགོན་པོ་༸གང་ཉིད་མཆོག་ལ་གཟེངས་རྟགས་དེ་ཉིད་འབུལ་བཞེས་མཛད་དེ་ལོ་ངོ་ ༦༥ འཁོར་བའི་དུས་ཆེན་སྲུང་བརྩི་ཞུས་ཡོད་པ་རེད།
སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ངོས་རང་སྐྱེ་ས་མདོ་སྨད་ཀྱི་ས་ཁུལ་རེད། དེ་ནས་ལྷ་སར་ཡར་སླེབས་ནས་དཔེ་ཆར་བལྟས་ཏེ་སློབ་གཉེར་ཡག་པོ་བྱས་པ་ཡིན། དགེ་བའི་བཤེས་གཉེན་བསམ་གྱིས་མི་ཁྱབ་པ་ཁོང་རྣམ་པའི་ཐུགས་རྗེ་བཀའ་དྲིན་ལ་བརྟེན་ནས་ངོས་ཀྱིས་དཔེ་ཆ་དགའ་རབ་བལྟས་པ་དང་། དེ་ནས་གྲྭ་ས་ལ་གྲྭ་སྐོར་དམ་བཅའ་བཞག་པ་ཡིན། དེའི་སྐབས་སུ་དུས་འགྱུར་བྱུང་ནས་ངོས་རང་རྒྱ་གར་ལ་ཚུར་སླེབས་པ་རེད། རྒྱ་གར་དུ་སླེབས་ནས་དེ་སྔ་བོད་ནས་དཔེ་ཆར་བལྟས་ཟིན་པ་དེས་ཕན་ཐོགས་ཆེན་པོ་བྱུང་།
རྒྱ་གར་དུ་ནང་པ་ཙམ་མ་ཡིན་པར་མི་སྟེགས་པ་དང་། ལྟ་གྲུབ་འདྲ་མི་འདྲ་ཡོད་མཁན་མང་པོར་གོ་བསྡུར་བྱེད་པ་དང་། སྐད་ཆ་བཤད་པའི་ནུས་པ་ཐོབ་ནས་ཧ་ཅང་ཡག་པོ་བྱུང་། རྒྱ་གར་དུ་མུ་སྟེགས་པའི་མཉམ་དུ་མི་དང་མིའི་དབར་གོ་བསྡུར་བྱེད་པའི་གོ་སྐབས་ཡོད་པས་དེ་སྔ་བོད་དུ་དཔེ་ཆ་རྐྱང་པར་བལྟས་པ་དང་མི་འདྲ་བར་མུ་སྟེགས་པའི་ཆོས་གྲོགས་མཉམ་དུ་གོ་བསྡུར་བྱེད་པ་དེས་ཕན་ཐོགས་ཆེན་པོ་བྱུང་། དེ་དང་ཆབས་ཅིག་ཚན་རིག་པ་མང་པོར་ཐུག་གི་ཡོད་པ་རེད། ངོས་རང་ཆུང་ཆུང་སྐབས་ནས་བསླབ་པའི་ནང་པའི་གཞུང་ནས་བྱུང་བའི་རིགས་ལམ་གྱི་འགྲོ་སྟངས་དེས་ནང་པ་གཅིག་པུ་མ་ཡིན་པར་མུ་སྟེགས་པའི་གཞུང་དང་། ཚན་རིག་པ་སོགས་མང་པོར་གོ་བསྡུར་བྱེད་པའི་གོ་སྐབས་བྱུང་། གཞུང་ལུགས་དེ་དག་སྦྱང་ནས་ངོས་རང་སྤྱིར་ནང་པ་དང་། དེའི་ནང་ནས་ཐལ་འགྱུར་བ་ལ་ཞེ་ནས་དད་པ་ཐོབ་པའི་ཐལ་འགྱུར་བའི་གྲུབ་མཐའ་འཛིན་མཁན་ཆགས་ཡོད། དབུ་མ་རང་རྒྱལ་པའི་ཆོས་གྲོགས་ཤིག་ལ་ཐུག་པ་ཡིན་ན་ངོས་རང་དབུ་མ་ཐལ་འགྱུར་བ་རེད། དབུ་མ་རང་རྒྱལ་པ་དེ་ལ་ངོས་ཀྱིས་ཐལ་བ་དང་གཏན་ཚིགས་ཀྱིས་སུན་ཕྱུང་ཐུབ་ཀྱི་རེད། རིགས་པ་གཏོང་བ་ལ་ཐལ་འགྱུར་བའི་རིགས་པ་དེ་ཡག་ཤོས་རེད། ངོས་རང་གིས་ཉིན་རེ་བཞིན་དུ་སྒོམ་རྒྱག་པའི་སྐབས་སུ་ཉིན་ལྟར་ཐལ་འགྱུར་བའི་བསམ་བློ་གཏོང་གི་ཡོད། བྱང་ཆུབ་ཀྱི་སེམས་དང་ཤེས་རབ་ཀྱི་ཆ་ནས་སྟོང་ཉིད་ཀྱི་ལྟ་བ་དེ་གཉིས་པོ་ཞོགས་པ་ཡར་ལངས་པ་དང་བསམ་བློ་གཏོང་གི་ཡོད། སྟོང་ཉིད་ཀྱི་ལྟ་བའི་སྐོར་ལ་མགོན་པོ་ཀླུ་སྒྲུབ་ཀྱི་དགེ་ཕྲུག་ཅིག་གི་རྗེས་དེར་ཕལ་ཆེར་ངོས་རང་བསྡད་ཆོག་གི་རེད།
རྒྱ་གར་གྱི་ལྟ་གྲུབ་གཙོ་བོ་འཚེ་བ་མེད་པ་ནི་ཧ་ཅང་རྩ་ཆེན་པོ་རེད། ལྟ་གྲུབ་ཀྱི་ཐོག་ནས་ནང་པ་སོགས་རིགས་མང་པོ་ཡོང་གི་ཡོད་ཀྱང་། འཚེ་བ་མེད་པ་ནི་ཚང་མས་གཅིག་གྱུར་གྱིས་ལག་ལེན་བསྐྱལ་དགོས། ངོས་ལ་མཚོན་ན་ཆུང་ཆུང་སྐབས་ནས་འཚེ་བ་མེད་པར་གོམས་འདྲིས་ཆེན་པོ་ཡོད། རང་གིས་འཚེ་བ་མེད་པའི་ལམ་ཉམས་ལེན་བྱས་པ་ཙམ་དུ་མ་ཟད། ངོ་ཤེས་གྲོགས་པོ་ཚང་མར་འཚེ་བ་མེད་པ་ཧ་ཅང་གལ་ཆེན་པོ་རེད་ཅེས་བགྲོ་གླེང་དང་གོ་བསྡུར་བྱེད་བཞིན་ཡོད། དངོས་སུ་འཛམ་གླིང་གི་ས་གནས་གང་སར་སླེབས་སྐབས། འཚེ་བ་མེད་པ་ནི་ཧ་ཅང་གལ་ཆེན་པོ་རེད། འཛམ་བུ་གླིང་འདིར་ཞི་བདེ་དང་འཚེ་བ་མེད་པ་ཡོང་རྒྱུར་ཚང་མས་འབད་བརྩོན་དང་དོ་སྣང་བྱེད་ཀྱི་ཡོད། དེའི་རྩ་བ་འཚེ་བ་མེད་པ་ཧ་ཅང་གལ་ཆེན་པོ་རེད། ཅེས་བཀའ་སློབ་སྩལ་ཡོད་པ་དང་།
གཟེངས་རྟགས་འདི་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཛ་དྲག་ཆེན་པོའི་སྐབས་སུ་སྤྱི་ཚོགས་དང་ཆོས་ལུགས། རིག་གཞུང་སྲུང་སྐྱོབ་བཅས་ལ་མཆོག་གྱུར་གྱི་དབུ་ཁྲིད་གནང་བར་ཕུལ་བ་ཞིག་ཡིན་པ་དང་། ཕྱི་ལོ་ ༡༩༥༩ ཟླ་ ༨ ཚེས་ ༣༡ ཉིན་སྐུའི་གཅེན་པོ་རྒྱ་ལོ་དོན་གྲུབ་མཆོག་གིས་༸གོང་ས་མཆོག་གི་སྐུ་ཚབ་གནང་སྟེ། ཧྥི་ལི་པིན་སིའི་རྒྱལ་ས་མཱ་ནེ་ལཱ་རུ་བཞེས་གནང་ཡོད་པ་རེད།
