༄༅། །བླ་བྲང་དགའ་ལྡན་ཕོ་བྲང་།སྔར་འབྲས་སྤུངས་སུ་རྡོ་ཁང་སྔོན་མོ་ཟེར་བ་ཞིག་ཡོད་པ་རྗེས་སུ་སྣེའུ་གདོང་དཔོན་རིགས་རྣམས་འབྲས་སྤུངས་སུ་ཕེབས་སྐབས་ཀྱི་བཞུགས་ཁང་ཡིན་པས་འབྲས་སྤུངས་དཔོན་ཁང་ཡང་ཟེར་ཞིང་ཕག་གྲུ་སྡེ་སྲིད་ཁྲི་རབས་བཅུ་གཅིག་པ་ངག་དབང་བཀྲིས་གྲགས་པ་རྒྱལ་མཚན་གྱིས་སྲིད་དབང་བཟུང་རྗེས་༧རྒྱལ་མཆོག་སྐུ་ཕྲེང་གཉིས་པ་དགེ་འདུན་རྒྱ་མཚོ་འབྲས་སྤུངས་ཀྱི་མཁན་པོ་གནང་སྐབས་རབ་བྱུང་དགུ་པའི་ས་སྟག་ཕྱི་ལོ་ ༡༥༡༨ ལོར་བཞུགས་གནས་སུ་ཕུལ་བ་བདག་གིར་བཞེས་ཏེ་གང་གི་གདུལ་བྱ་སྐལ་བ་དང་ལྡན་པ་རྣམས་དགའ་ལྡན་ཡིད་དགའ་ཆོས་འཛིན་གྱི་ཕོ་བྲང་དུ་འདྲེན་པའི་རྟེན་འབྲེལ་མཚོན་སླད། “དགའ་ལྡན་ཕོ་བྲང་”ཞེས་འདོགས་པར་མཛད།
༧རྒྱལ་དབང་སྐུ་ཕྲེང་གསུམ་པ་བསོད་ནམས་རྒྱ་མཚོ་ཡང་བླ་བྲང་དེར་བཞུགས་འཇགས་ཀྱིས་གསན་བསམ་ཐུགས་གཉེར་མཛད། རིམ་གྱིས་སོག་པོའི་རྒྱལ་པོ་ཨལ་ཏན་ཁཱང་གིས་སོག་ཡུལ་དུ་གདན་དྲངས་པ་ལྟར་ཕེབས་ཤུལ་ཕྱག་མཛོད་ཆོས་བཟང་འཕྲིན་ལས་ཀྱིས་འགན་བླངས་ཤིང་། སྐྱིད་ཤོད་སྡེ་པ་བཀྲིས་རབ་བརྟན་གྱིས་འཆར་འགོད་མཐུན་འགྱུར་འོག་ཕོ་བྲང་རྒྱ་བསྐྱེད་གནང་།
༧རྒྱལ་དབང་སྐུ་ཕྲེང་བཞི་པ་ཡོན་ཏན་རྒྱ་མཚོ་སོག་ཡུལ་ནས་བོད་དུ་གདན་ཞུས་ཀྱིས་འབྲས་སྤུངས་དགའ་ལྡན་ཕོ་བྲང་དུ་བཞུགས་འཇགས་ཀྱིས་གསན་བསམ་ཐུགས་གཉེར་གནང་རྗེས་སེ་འབྲས་ཀྱི་མཁན་པོ་མཛད། ༧རྒྱལ་མཆོག་ལྔ་པ་ཆེན་པོ་ངག་དབང་བློ་བཟང་རྒྱ་མཚོའི་སྐུ་ཚེ་སྟོད་ལ་ཕོ་བྲང་འདི་རང་དུ་བཞུགས་འཇགས་གནང་།
རབ་བྱུང་ ༡༡ མེ་གླང་ཕྱི་ལོ་ ༡༦༣༧ ལོར་སོག་རིགས་རྒྱལ་པོ་གོ་ཤྲི་ཁང་གིས་ནང་བསྟན་ལས་ལོགས་སུ་གྱུར་པའི་ཆོག་ཐུ་དཔོན་པོའི་དམག་དཔུང་ཡོངས་སུ་བཅོམ་སྟེ་ལྷ་སར་ཕེབས་སྐབས་༧རྒྱལ་མཆོག་ལྔ་པ་ཆེན་པོས་ལྷ་ལྡན་གཙུག་ལག་ཁང་དུ་སྟན་མཐོན་པོར་གཟེངས་བསྟོད་ཀྱིས་མི་རིང་བར་བསྟན་འགྲོའི་ཕན་བདེ་གྱེན་དུ་འདེགས་པའི་འཕྲིན་ལས་སུ་འགྱུར་རྒྱུའི་རྟེན་འབྲེལ་ཐོག་མར་བསྒྲིགས་པ་མཛད་པ་དེ་ནི་༧རྒྱལ་མཆོག་ལྔ་པ་ཆེན་པོ་དང་གོ་ཤྲི་ཁང་རྣམ་གཉིས་དབར་མཇལ་འཕྲད་གནང་བ་ཐེངས་དང་པོ་དེ་ཡིན་འདུག
བོད་གཞུང་དགའ་ལྡན་ཕོ་བྲང་།
སོག་པོ་གོ་ཤྲི་ཁཱང་གིས་སྡེ་པ་གཙང་པ་ཆམ་ལ་ཕབ་རྗེས། འབྲས་སྤུངས་དགའ་ལྡན་ཕོ་བྲང་ནས་༧རྒྱལ་མཆོག་ལྔ་པ་ཆེན་པོ་གཞིས་རྩེ་བསམ་གྲུབ་རྩེར་གདན་དྲངས། ཕྱི་ལོ་ ༡༦༤༢ རབ་བྱུང་ ༡༡ ཆུ་རྟ་ཟླ་ ༣ ཚེས་ ༢༥ གཟའ་སྐར་འབྱུང་འཕྲོད་ཕུན་སུམ་ཚོགས་པའི་ཉིན་གཞིས་རྩེ་རྫོང་གི་ཚོམས་ཆེན་ནང་བོད་སོག་གི་བླ་ཆེན་མི་ཆེན་བརྒྱ་ཕྲག་འདུས་པའི་བཞུགས་གྲལ་གྱི་དབུས་སུ་མི་འཇིགས་གདོང་ལྔས་བཏེགས་པའི་ཁྲི་འཕང་མཐོན་པོར་མངའ་གསོལ་ཏེ་བོད་ལྗོངས་ཆོས་སྲིད་གཉིས་ཀྱི་མགོན་༧སྐྱབས་སུ་མངའ་གསོལ་བའི་མཛད་སྒོ་ཆེན་པོ་ལེགས་པར་བསྐྱངས་ཏེ་གཞུང་དགའ་ལྡན་ཕོ་བྲང་པ་ཆེན་པོ་དབུ་བརྙེས། གོ་ཤྲི་ཁཱང་གིས་ལྷ་རྫས་ནང་མཛོད་ཀྱིས་སྣེ་དྲངས་ཏེ་འཕགས་ཡུལ་གྱི་རྒྱལ་པོ་མ་སྐྱེས་དགྲའི་ (Ajatashatru) རྟེན་སྐལ་བདག་ཅག་གི་སྟོན་པ་ཤཱཀྱ་ཐུབ་པའི་འཕེལ་གདུང་དང་། གུ་རུ་ཆོས་དབང་གིས་གཏེར་ནས་བཞེས་པའི་མཁའ་འགྲོ་ཡེ་ཤེས་མཚོ་རྒྱལ་གྱི་ཐུགས་གསལ་མེ་ལོང་ལ་སོགས་པའི་རྩ་ཆེའི་འབུལ་དངོས་རྣམས་རིམ་བསྟར་རྗེས་གོ་ཤྲི་ཁཱང་རང་ཉིད་རིགས་རྒྱུད་འཁོར་འབངས་དང་བཅས་པའང་༧རྒྱལ་བའི་ཆོས་འབངས་སུ་ཕུལ། ༧རྒྱལ་དབང་མཆོག་གིས་ཀྱང་གོ་ཤྲི་ཁཱང་ལ་༼བསྟན་འཛིན་ཆོས་ཀྱི་རྒྱལ་པོ་༽ ཞེས་མཚན་གནས་དང་ཆོ་ལོ། ཐམ་ཀ། ཕྱག་མཛོད་བསོད་ནམས་ཆོས་འཕེལ་ལ་༼སྡེ་སྲིད།༽ ཀྱི་མཚན་གནས་སྩལ།
༧རྒྱལ་དབང་སྐུ་ཕྲེང་རིམ་བྱོན་གྱིས་བསྟེན་པར་མཛད་པ་རིང་ནས་གྲིབ་བཞིན་འགྲོགས་པའི་ས་བཅུའི་དབང་ཕྱུག་དཔལ་ལྡན་འདོད་ཁམས་བདག་མོ་དང་། པེ་ཧར་དགྲ་ལྷ་སྐྱེ་གཅིག་གནས་ཆུང་རྡོ་རྗེ་གྲགས་ལྡན་གཉིས་གཞུང་བསྟེན་སྲུང་མར་བཀའ་བསྒོ་གཉེར་གཏད་མཛད། དེ་ལྟར་༧གོང་ས་ལྔ་པ་ཆེན་པོས་བོད་ཀྱི་ཆོས་སྲིད་གཉིས་ཀྱི་ཐུགས་འགན་བཞེས་རྗེས་བླ་བྲང་གི་མཚན་གཞུང་གསར་པའི་མིང་ལ་བསྒྱུར་བ་གནང་སྟེ་ ༼བོད་གཞུང་དགའ་ལྡན་ཕོ་བྲང་།༽ཞེས་འདོགས་པར་མཛད་འདུག
རྩེ་ཡིག་ཚང་།
སྔར་ཕན་༧རྒྱལ་བའི་སྐུ་དྲུང་དུ་གསེར་ཡིག་པ་ཟེར་བ་དྲུང་ཡིག་རེ་ཟུང་ཐུགས་ཉར་དང་། ཡིག་ཆ་འཇོག་ཡུལ་ལ་མིང་འདི་ཡིན་བྱུང་མི་འདུག འོན་ཀྱང་རབ་བྱུང་བཅུ་གསུམ་པའི་ལྕགས་ལུག་ཕྱི་ལོ་ ༡༧༥༡ ལོར་༧རྒྱལ་མཆོག་བདུན་པ་ཆེན་པོ་བསྐལ་བཟང་རྒྱ་མཚོ་མཆོག་ནས་ཆོས་སྲིད་ལུགས་གཉིས་ཀྱི་ཐུགས་འགན་བསྐྱེད་བཞེས་མཛད་པ་ནས་བཟུང་བཀའ་བློན་སྐྱ་བོ་གསུམ་དང་། ལས་དོན་གང་ཅི་༧གོང་ས་ཆེན་པོར་འཕྲལ་འཕྲལ་ནང་མའི་ཚུལ་གྱིས་༧སྙན་ལམ་དུ་ལྷོངས་ཆེད་བཀའ་བློན་བླ་མ་གཅིག་བཅས་བསྐོ་གཞག་དང། བཀའ་ཐམ་སྲིད་ཞིའི་བདེ་སྐྱིད་མ་གསར་བསྐྲུན་ལ་ཐུགས་སྨོན་དང་བཅས་གསོལ་སྩལ་གནང་།
དུས་དེ་ནས་བཟུང་༧རྒྱལ་བའི་སྐུ་དྲུང་དུ་རྩེ་དྲུང་ཡིག་ཆེན་མོ་ཞེས་བསྐོ་གཞག་དང་འབྲེལ་རྩེ་ཕོ་བྲང་གི་གཟིམ་ཆུང་ཁམས་གསུམ་ཟིལ་གནོན་དུ་ཡིག་ཚང་ལས་ཁུངས་གསར་འཛུགས་ཀྱིས་༼རྩེ་ཡིག་ཚང་།༽ ཞེས་མིང་འདོགས་པར་མཛད། ལས་དོན་དམིགས་བསལ་གནད་ཆེ་རིགས་ཕུད། དེ་མིན་ཁག་ཡིག་ངག་ཅི་རིགས་ནས་རྩེ་ཡིག་ཚང་བརྒྱུད་༧སྙན་སེང་གནང་ལམ་དང་། སྦུག་དམ་གྱི་དམ་སྒམ་ཕྱག་ལྡེ་སྐུ་བཅར་སྤྱི་ཁྱབ་མཁན་པོས་ཐུགས་ཉར་གནང་ལམ་བྱུང་འདུག སྤྱི་ཁྱབ་མཁན་པོ་ནི་༧རྒྱལ་བའི་སྐུ་མདུན་དུ་གཏན་སྡོད་ཀྱིས་ལས་དོན་ཆེ་ཕྲ་གང་ཅིར་གཞོགས་འདེགས་ཞུ་བ་དང་། སྐུ་སྒེར་གྱི་ཕྱག་རྫས་དོ་དམ་བྱེད།
༧རྒྱལ་དབང་སྐུ་འཚོ་གཞེས་མེད་སྐབས་༼རྒྱལ་ཚབ།༽དང་། སྐུ་ན་ཕྲ་བའི་སྐབས་ཆབ་སྲིད་ཀྱི་ཐུགས་འགན་མ་བཞེས་པའི་བར་ལ་༼སྲིད་སྐྱོང་།༽བཅས་བོད་ལྗོངས་ཚོགས་འདུས་བསྐོ་གཞག་ཐག་གཅོད་བྱེད།
སྐུ་སྒེར་ཡིག་ཚང་།
༧རྒྱལ་མཆོག་སྐུ་གོང་མའི་སྐུ་ཚེ་སྟོད་ལ་ཡིག་ཚང་གི་མིང་ལ་ནང་མ་སྒང་ཞེས་པ་དེའི་འགོ་འཛིན་བཀའ་བློན་བླ་མ་ཆང་ཁྱིམ་པ་ཐུབ་བསྟན་ཤཱཀྱ་བསྐོ་གཞག་གནང་འདུག ཕྱི་ལོ་ ༡༩༡༠ ལོ་མཇུག་རྒྱ་དམག་གིས་བོད་ལ་བཙན་འཛུལ་སྐབས་༧གོང་ས་སྐུ་ཕྲེང་བཅུ་གསུམ་པ་ཆེན་པོ་འགལ་རྐྱེན་དབང་གིས་རྒྱ་གར་དུ་ཕེབས་དགོས་བྱུང་སྟེ། ཕྱི་ལོ་ ༡༩༡༣ ལོར་ལྷ་ལྡན་དུ་༧ཞབས་སོར་འཁོད་རྗེས་དེང་དུས་ཀྱི་འགྲོ་སྟངས་སྤྱི་དང་མཐུན་པ་སྐུ་སྒེར་ཡིག་ཚང་ཞེས་མིང་བསྒྱུར་གནང་འདུག ཕྱི་ལོ་ ༡༩༥༤ ལོར་༧གོང་ས་སྐུ་ཕྲེང་བཅུ་བཞི་པ་ཆེན་པོ་ཁྱིམ་མཚེས་རྒྱ་ནག་ཏུ་གཟིགས་སྐོར་དུ་ཆིབས་བསྒྱུར་གྱིས་སླད་ལྷ་ལྡན་དུ་༧ཞབས་འཁོད་རྗེས་དེ་སྔ་༧རྒྱལ་མཆོག་སྐུ་གོང་མའི་སྐུ་དུས་སྐུ་སྒེར་ཡིག་ཚང་ཟུར་འཛུགས་མཛད་པ་དེའི་ལམ་སྲོལ་ལྟར་ནོར་གླིང་ཕོ་བྲང་གསར་པ་རྟག་བརྟན་མི་འགྱུར་ཕོ་བྲང་ཉེ་འཁྲིས་སུ་སྐུ་སྒེར་ཡིག་ཚང་ཟུར་འཛུགས་ཀྱིས་ཐོག་མའི་འགོ་འཛིན་ལྕོག་སྟེང་ཏཱ་བླ་མ་ཐུབ་བསྟན་ནོར་བཟང་དང་། ཕྱག་རོགས་སུ་རྩེ་མགྲོན་མདོ་སྔགས་མཐར་ཕྱིན་༼སྐུ་ངོ་རྟ་ར་བ།༽ མཁན་ཆུང་དུ་གནས་སྤར་དང་། ལས་བྱར་རྩེ་དྲུང་ལས་ཚན་ལྕོག་སྟེང་ངག་དབང་བསོད་ནམས་བཅས་ལ་བསྐོ་གཞག་སྩལ་འདུག
ཕྱི་ལོ་ ༡༩༥༩ ལོར་བཙན་བྱོལ་དུ་༧ཞབས་སོར་འཁོད་རྗེས་བཞུགས་སྒར་དང་པོ་མ་སུ་རིར་སྤྱི་ཁྱབ་མཁན་པོ་དང་། མགྲོན་གཉེར་ཆེན་མོ། གསོལ་གཟིམ་མཆོད་གསུམ་སོགས་སྔར་སྲོལ་གོ་གནས་དང་འབྲེལ་བའི་ཐ་སྙད་བརྗེ་བསྒྱུར་དང་བསྟུན། སྐུ་སྒེར་ཡིག་ཚང་གི་འགན་འཛིན་དྲུང་ཆེ་ཞིག་དགོས་པ་སྐུ་ངོ་རྟ་ར་བ་ལ་ལས་དོན་ཉམས་མྱོང་རྒྱུས་མངའ་ཡོད་པ་ལྟར་སྐུ་སྒེར་དྲུང་ཆེར་བསྐོ་གཞག་དང་། ཕྱག་རོགས་སུ་ས་འདུ་རིན་ཆེན་དོན་གྲུབ་དང་། ཕྲེང་རིང་ཛ་སག་འཇིགས་མེད་སུམ་རྩེན་དབང་པོ་ནས་སློབ་དགེ་དང་སྐུ་སྒེར་ཡིག་ཚང་ནང་བཀའ་ཡིག་སོགས་ཡིག་བསྒྱུར་ཞབས་ཞུ་གཅིག་ལྕོག གཡུ་ཐོག་སྲས་འཇིགས་མེད་རྡོ་རྗེ་ནས་གསུང་བསྒྱུར། ལས་བྱར་རོང་བྲག་ཆོས་ལྡན་སྒྲོལ་དཀར་བཅས་ཡིན་འདུག ཁོང་ནི་སྐུ་སྒེར་ཡིག་ཚང་ནང་བུད་མེད་ཀྱི་ཞབས་ཞུ་བ་དང་པོ་དེ་ཡིན་འདུག
སྐུ་དབང་རྩིས་སྤྲོད།
ཕྱི་ལོ་ ༢༠༡༡ ཟླ་ ༣ ཚེས་ ༡༤ ཉིན་སྤྱི་འཐུས་གྲོས་ཚོགས་སུ་བཀའ་རྩ་སྩལ་བའི་སྙིང་དོན་དུ། ཚོགས་ཆུང་ཟུར་འཛུགས་ཀྱིས་ད་ཡོད་བཅའ་ཁྲིམས་བསྒྱུར་བཅོས་ཀྱིས་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་མི་སྣས་དུས་ཡུན་ངེས་ཅན་བྱ་རྒྱུའི་ཆ་རྐྱེན་བསྐྲུན་ཏེ་ཚོགས་དུས་འདི་རང་དུ་གཏན་འབེབས་ལག་བསྟར་ཐུབ་པ་དང་འབྲེལ། དགའ་ལྡན་ཕོ་བྲང་ཞེས་པའི་མིང་བྱང་ཡང་སྐབས་བསྟུན་འགྱུར་བ་གཏོང་དགོས་སྤྱི་ཕེབས་བཞིན་མི་ལོ་བརྒྱ་ཕྲག་བཞི་ལ་ཉེ་བའི་ཁྲིམས་མཐུན་ལོ་རྒྱུས་ལྡན་པའི་བོད་གཞུང་དགའ་ལྡན་ཕོ་བྲང་པ་ཆེན་པོ་མཇུག་བསྡུས་ཏེ་མི་མང་གིས་འདེམས་ཐོན་བྱུང་བའི་བཀའ་ཁྲི་བློ་བཟང་སེང་གེར་སྲིད་སྐྱོང་གི་མཚན་གནས་དང་བཅས་དེ་ལོའི་ཟླ་ ༨ ཚེས་ ༨ ཉིན་བཀའ་ཐམ་སྲིད་ཞིའི་བདེ་སྐྱིད་མ་སྩལ་ཏེ་དམ་འབུལ་ཞུས་པ་ནས་ལོ་རྒྱུས་རང་བཞིན་ལྡན་པའི་སྐུ་དབང་རྩིས་སྤྲོད་གནང་།
ཕྱི་ལོ་ ༢༠༡༡ ཟླ་ ༥ ཚེས་ ༢༩ རྩ་ཁྲིམས་བསྐྱར་བཅོས་ཉེར་ལྔ་པའི་ཚིག་བརྗོད་གསར་པའི་ནང་༧གོང་ས་མཆོག་གི་སྲིད་ཕྱོགས་ཀྱི་འགན་དབང་ཁག་འོས་འདེམས་བྱས་པའི་འགོ་འཁྲིད་ཚོར་སྩལ་ཏེ་དེ་དག་གཞིས་བྱེས་བོད་མི་ཡོངས་ཀྱི་ངོ་ཚབ་དང་སྲི་ཞུ་སྒྲུབ་པའི་ནུས་ལྡན་དུ་རྩ་འཛིན་བྱས།
ཕྱི་ལོ་ ༢༠༡༢ ཟླ་ ༩ ཚེས་ ༢༦ ཉིན་བཅའ་ཁྲིམས་བསྐྱར་བཅོས་ཉེར་བརྒྱད་པའི་ཚིག་བརྗོད་རྙིང་པར་སྒྲིག་འཛུགས་ཀྱི་འགན་འཛིན་གྱི་དབང་ཆ་བཀའ་བློན་ཁྲི་པར་ཡོད་ལུགས་གསལ་བ། ཚིག་བརྗོད་གསར་པའི་ནང་། སྒྲིག་འཛུགས་ཀྱི་འགན་འཛིན་དབང་ཆ་སྲིད་སྐྱོང་ལ་ཡོད། ཅེས་བསྐྱར་བཅོས་གནང།
བླ་བྲང་དགའ་ལྡན་ཕོ་བྲང་སྐྱར་གསོ།
ཕྱི་ལོ་ ༢༠༡༡ ཟླ་ ༡༡ ཚེས་ ༢༤ རེས་གཟའ་ཕུར་བུའི་ཉིན་ཕྱེད་ཡོལ་ཆུ་ཚོད་གསུམ་པའི་ཐོག་མཇལ་འཕྲད་ཁང་དུ་༧གོང་ས་༧སྐྱབས་མགོན་ཆེན་པོ་མཆོག་དབུ་བཞུགས་འོག་བཀའ་ཁྲི་ཟུར་པ་ཟམ་གདོང་རིན་པོ་ཆེ་དང་། དགའ་ལྡན་ཕོ་བྲང་ཡིད་ཆེས་དགེ་རྩའི་འགན་འཛིན་ལྷན་ཚོགས་ཀྱི་ཚོགས་འདུ་ཐེངས་དང་པོ་སྐོང་ཚོགས་ལྟར་སྐུའི་གཅུང་པོ་མངའ་རིས་རིན་པོ་ཆེ་བསྟན་འཛིན་ཆོས་རྒྱལ་དང་། རྣམ་གྲྭ་མཁན་པོ་ཁྲོམ་ཐོག་རིན་པོ་ཆེ། བཀའ་ཟུར་བསྟན་པ་ཚེ་རིང་། སྐུ་དྲུང་བློ་བཟང་སྦྱིན་པ་དང་། བྲེ་སྲང་ཚེ་རིང་། འཆི་མེད་རིག་འཛིན། ཚེ་རྒྱམ། བསྟན་འཛིན་རྣམ་དག །རྩིས་ཁང་འགན་འཛིན་འཇམ་དཔལ་ལྷུན་གྲུབ་བཅས་ངོ་འཛོམས་ཐོག ༧གོང་ས་མཆོག་ནས། ཡིད་ཆེས་དགེ་རྩའི་ལྷན་ཚོགས་དང་པོ་དེ་རིང་བྱེས་ཀྱི་རྒྱལ་ས་དྷ་རམ་ས་ལར་ཚོགས་ཐུབ་པར་བརྟེན་ཚང་མར་བཀྲིས་བདེ་ལེགས་ཡོད་ཅེས་འཚམས་འདྲི་གནང་རྗེས་རྟེན་འབྲེལ་གྱི་གསོལ་ཇ་བཞེས་འབྲས་འདེགས་འབུལ་གྲུབ་མཚམས་ཡིད་ཆེས་དགེ་རྩ་དེབ་སྐྱེལ་གྱི་གན་རྒྱའི་འབྲུ་དོན་བཞིན་འགན་འཛིན་ལྷན་ཚོགས་ཀྱི་དྲུང་ཆེ་ཞིག་དགོས་པ་༧གོང་ས་མཆོག་ནས་ཐད་བསྐོས་གནང་དགོས་པར་དྲུང་ཆེ་བློ་བཟང་སྦྱིན་པས་བྱས་ན་འཐུས་རྒྱུ་ཞེས་བསྐོ་གཞག་སྩལ་རྗེས་སླད་འགན་འཛིན་ལྷན་ཚོགས་ཀྱི་ཚོགས་མི་རྣམས་ལ་ཞུ་སྒོའི་སྐོར་ལམ་སྟོན་བཀའ་སློབ་སྩལ་རྗེས་དེར་འདུས་ཚོགས་མི་ཡོངས་ལ་ལེགས་དར་སྩལ་རྗེས་སྐུ་དཔར་ལྷན་སྒྲོན་གནང་།
