༢༠༢༢ ཟླ་བ་ ༡ ཚེས་ ༩ - ཚེས་ ༣༡
རྡ་རམ་ས་ལ་གཙོས་རྒྱ་གར་ནང་དུ་ཏོག་དབྱིབས་ནད་ཡམས་ཁྱབ་བརྡལ་ཤུགས་ཆེར་འགྲོ་བཞིན་པར་རྟེན་ཕྱི་ལོ་ ༢༠༢༢ ཟླ་ ༡ ནང་གི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དྲ་ཐོག་མཛད་འཆར་ཁག་ནད་ཡམས་སྔོན་འགོག་ཆེད་གནས་སྐབས་རིང་ཕར་འགྱང་ཞུ་རྒྱུ་ཡིན་ན་དེ་དོན་དགོངས་འཇགས་ཞུ།
༢༠༢༢ ཟླ་བ་ ༣ ཚེས་ ༡༨
བོད་རྒྱལ་ལོ་ ༢༡༤༩ རབ་གནས་ཆུ་སྟག་ཟླ་ ༡ ཚེས་ ༡༥ དང་ཕྱི་ཟླ་ ༣ ཚེས་ ༡༨ ཆོ་འཕྲུལ་དུས་ཆེན་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་རྒྱ་གར་གྱི་སྔ་དྲོའི་ཆུ་ཚོད་ ༨ པ་ཡས་མས་སུ་སྐྱེས་རབས་ཀྱི་གསུང་ཆོས་དང་། སེམས་བསྐྱེད་ཀྱི་ཆོས་འབྲེལ་བཀའ་དྲིན་སྩལ་རྒྱུ། གསུང་ཆོས་སྐབས་ཆོས་ཞུ་བ་རྣམས་ཀྱིས་ངེས་པར་དུ་ཁ་རས་གྱོན་དགོས་པ་དགོངས་འཇགས་ཞུ།
༢༠༢༢ ཟླ་བ་ ༥ ཚེས་ ༢༥
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་དཔལ་ས་སྐྱའི་ཆོས་བརྒྱུད་འཛིན་པ་ཡོངས་ནས་བརྟན་བཞུགས་བསྟར་འབུལ་ཞུ་རྒྱུ།
༢༠༢༢ ཟླ་བ་ ༦ ཚེས་ ༡ - ཚེས་ ༢
ཉིན་གཉིས་རིང་གི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བོད་རིགས་གཞོན་སྐྱེས་རྣམས་ལ་སྤྱན་རས་གཟིགས་ཀྱི་བཀའ་དབང་དང་། རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་གསུང་ཆོས་བཀའ་དྲིན་སྩལ་རྒྱུ།
༢༠༢༢ ཟླ་བ་ ༦ ཚེས་ ༡༤
བོད་ཟླ་ ༤ ཚེས་ ༡༥ ས་ག་ཟླ་བའི་དུས་ཆེན་ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཆོས་འབྲེལ་བཀའ་དྲིན་སྩལ་རྒྱུ། དེ་ཡང་ཕྱི་ཟླ་ ༦ ཚེས་ ༡༣ ཉིན་སྤྱན་རས་གཟིགས་རྒྱལ་བ་རྒྱ་མཚོའི་བཀའ་དབང་སྟ་གོན་དང་། ཚེས་ ༡༤ ཉིན་དབང་དངོས་གཞི་དང་རྗེའི་ལམ་རིམ་བསྡུས་དོན་གྱི་བཤད་ལུང་བཅས་སྩལ་རྒྱུ།
༢༠༢༢ ཟླ་བ་ ༦ ཚེས་ ༢༤
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚོགས་པ་ཁག་ཅིག་གིས་ཇི་ལྟར་སྔོན་ནས་གསོལ་བ་བཏབ་པ་ལྟར་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་བསྟར་འབུལ་ཞུ་རྒྱུ།
༢༠༢༢ ཟླ་བ་ ༧ ཚེས་ ༨ - ཚེས་ ༡༠
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དཔལ་ལྡན་རྒྱུད་སྨད་གྲྭ་ཚང་དང་སྟོད་རྒྱུད་གྲྭ་ཚང་གཉིས་ནས་ཇི་ལྟར་གསོལ་བ་བཏབ་པ་ལྟར་བཀའ་བཞེས་བཟང་པོ་སྨིན་སྩལ་གྱིས་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བདེ་མཆོག་ལཱུ་ཨི་པའི་བཀའ་དབང་བཀའ་དྲིན་སྩལ་རྒྱུ་དང་། དེ་ཡང་ཚེས་ ༨ ཉིན་གྱི་སྔ་དྲོ་བཀའ་དབང་གི་སྔོན་འགྲོའི་སྟ་གོན་གྱི་རིམ་པ་དང་། ཚེས་ ༩ ཉིན་གྱི་སྔ་དྲོ་ལཱུ་ཨི་པའི་བཀའ་དབང་དངོས་གཞི་དབུ་འཛུགས་ཞུ་རྒྱུ་དང་། ཚེས་ ༡༠ ཉིན་གྱི་སྔ་དྲོ་དཔལ་ལྡན་རྒྱུད་སྨད་གྲྭ་ཚང་དང་སྟོད་རྒྱུད་གྲྭ་ཚང་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ།
དཔལ་འཁོར་ལོ་སྡོམ་པ་ལཱུ་ཨི་པའི་བཀའ་དབང་སྐབས་ཆོས་ཞུ་བ་ཡོངས་ནས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་དོན་གཉེར་སྦྱངས་པ་ཡོད་ཐོག བྱུང་ན་ལཱུ་ཨི་པའི་བདག་བསྐྱེད་དང་། མ་མཐའ་ནའང་དག་པ་གསུམ་གྱི་རྣལ་འབྱོར་ཁ་འདོན་དུ་ཁས་ལེན་ངེས་པར་དགོས་པ་དེ་ལུགས་དབང་ཞུ་བ་ཡོངས་ཀྱིས་དགོངས་འཇགས་ཡོད་པ་ཞུ།
༢༠༢༢ ཟླ་བ་ ༧ ཚེས་ ༢༨ - ཚེས་ ༣༠
ཕྱི་ལོ་ ༢༠༢༢ ཟླ་ ༧ ཚེས་ ༢༨ དང་། ཚེས་ ༢༩། ༣༠ བཅས་ཉིན་གསུམ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནང་པའི་ཚོགས་འདུ་དང་། ལ་དྭགས་དགོན་པ་ཚོགས་པ་ཐུན་མོང་ནས་གསོལ་འདེབས་ཞུས་དོན་ལྟར་ལ་དྭགས་གླེ་ལྕོག་ལམ་ས་ཞི་བའི་ཚལ་ཕོ་བྲང་གི་གསུང་ཆོས་ར་བར་ཆོས་འབྲེལ་བཀའ་དྲིན་སྩལ་རྒྱུ།
དེ་ཡང་ཚེས་ ༢༨ དང་ ༢༩ ཉིན་གཉིས་རིང་གི་སྔ་དྲོ་སྤྱོད་འཇུག་ཆེན་མོའི་ལེའུ་དགུ་པའི་འཕྲོ་སྐྱོང་མཛད་རྒྱུ་དང་། ཚེས་ ༣༠ ཉིན་གྱི་སྔ་དྲོ་སྤྱན་རས་གཟིགས་ཀྱི་བཀའ་དབང་བཀའ་དྲིན་སྩལ་རྗེས་ལ་དྭགས་ནང་ཚོགས་དང་དགོན་ཚོགས་ནས་བརྟན་བཞུགས་བསྡུས་པ་ཞིག་འབུལ་ལམ་ཞུ་རྒྱུ།
༢༠༢༢ ཟླ་བ་ ༩ ཚེས་ ༧
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་ཀྱི་ཚོགས་སྐྱིད་ཁག་ཅིག་གིས་ཇི་ལྟར་གསོལ་བ་བཏབ་པ་ལྟར་སྔ་དྲོ་ཆུ་ཚོད་བརྒྱད་པའི་ཐོག་བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་བསྟར་འབུལ་ཞུ་རྒྱུ།
༢༠༢༢ ཟླ་བ་ ༩ ཚེས་ ༡༥ - ཚེས་ ༡༦
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལྷོ་ཤར་ཨེ་ཤེ་ཡའི་དད་ལྡན་ཆོས་ཞུ་བ་ཚོས་ཇི་ལྟར་གསོལ་བ་བཏབ་པ་ལྟར་ཐེག་ཆེན་ཆོས་གླིང་གཙུག་ལག་ཁང་དུ་ཉིན་གཉིས་རིང་དབུ་མ་འཇུག་པའི་རང་འགྲེལ་གྱི་ཐོག་ནས་བཀའ་ཆོས་བཀའ་དྲིན་སྩལ་རྒྱུ།
༢༠༢༢ ཟླ་བ་ ༡༠ ཚེས་ ༣ - ཚེས་ ༥
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐའེ་ཝན་གྱི་དད་ལྡན་མི་མང་གིས་ཇི་ལྟར་གསོལ་བ་བཏབ་པ་ལྟར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་ཉིན་གསུམ་རིང་རྒྱ་གར་ནཱ་ལེནྡྲའི་སློབ་དཔོན་ཆེན་མོ་དཔལ་ཆོས་ཀྱི་གྲགས་པས་མཛད་པའི་ཚད་མ་རྣམ་འགྲེལ་གྱི་ལེའུ་གཉིས་པའི་གསུང་ཆོས་བཀའ་དྲིན་སྩལ་རྒྱུ།
༢༠༢༢ ཟླ་བ་ ༡༠ ཚེས་ ༢༦
སྔ་དྲོ་ཆུ་ཚོད་ ༨།༠༠ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་ཕྲུག་ཁྱིམ་སྡེའི་ལས་སློབ་ངོ་ཟུར་ཡོངས་དང་། བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་བཅས་ཀྱིས་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་བསྟར་འབུལ་ཞུ་རྒྱུ།
༢༠༢༢ ཟླ་བ་ ༡༡ ཚེས་ ༢༥ - ཚེས་ ༢༦
ཉིན་གཉིས་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཀོ་རི་ཡའི་ནང་པའི་རྗེས་འཇུག་པ་ཚོས་ཇི་ལྟར་གསོལ་བ་བཏབ་པ་ལྟར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་དབུ་མ་རྩ་བ་ཤེས་རབ་ཀྱི་བཀའ་ཆོས་བཀའ་དྲིན་སྩལ་རྒྱུ།
༢༠༢༢ ཟླ་བ་ ༡༡ ཚེས་ ༣༠
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དཔལ་ལྡན་འབྲས་སྤུངས་སྒོ་མང་གྲྭ་ཚང་དང་། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ་ཐུན་མོང་ནས་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་བསྟར་འབུལ་ཞུ་རྒྱུ།
