སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལར་སྐུ་བཞུགས་གནང་སྐབས། གཟའ་ཟླ་བ་དང་གཟའ་ལྷག་པ། གཟའ་པ་སངས་བཅས་ཀྱི་ཞོགས་པ་མང་ཚོགས་ལ་མཇལ་ཁའི་གོ་སྐབས་གནང་བཞིན་ཡོད། མཇལ་ཁའི་སྐབས་དད་ལྡན་མཇལ་ཁ་ཞུ་མཁན་རྣམས་བང་རིམ་བཞིན་དུས་ཐུང་ནང་༸གོང་ས་མཆོག་ལ་མཇལ་ཁ་ཞུ་དགོས། དད་ལྡན་མཇལ་ཞུ་བ་རྣམས་ཀྱིས་མཇལ་ཁའི་སྙན་ཞུ་ཐོ་འགོད་གློག་འཕྲིན་ཁ་བྱང་ [email protected] བརྒྱུད་ནས་དང་། དེ་མིན་དགའ་ལྡན་ཕོ་བྲང་ཡིག་ཚང་གི་སྣེ་ལེན་ལས་བྱེད་བརྒྱུད་ནས་རང་ཉིད་ཀྱི་འདྲ་པར་ཞིག་དང་རྒྱབ་ལྗོངས་གནས་ཚུལ་མདོར་བསྡུས། མཇལ་ཁའི་ཆེད་འདི་གར་འབྱོར་དུས་དང་སྡོད་ཡུན་ཇི་ཙམ་ཡོད་མེད་ཁ་གསལ་བྲིས་ཏེ་ཞུ་ཡིག་འབུལ་དགོས། སྤྱིར་དགའ་ལྡན་ཕོ་བྲང་ཡིག་ཚང་ནས་མཇལ་ཁའི་གོ་སྐབས་གང་ཐུབ་གནང་བཞིན་ཡོད་མོད། དུས་ཡུན་ཐུང་ངུའི་ནང་མཇལ་ཁ་ཞུ་མཁན་ལ་གོ་སྒྲིག་ཞུ་རྒྱུ་ཧ་ཅང་ཁག་པོ་ཡོད་པས་མཇལ་ཁའི་གོ་སྐབས་མ་ཐོབ་པ་ཡང་ཡོད་སྲིད། ཇི་ཙམ་སྙན་ཞུ་སྔ་བ་འབུལ་ཐུབ་པ་དེའི་ཚོད་ཀྱིས་མཇལ་ཁ་འཐོབ་རྒྱུའི་རེ་བ་ཡང་ཆེ་བ་ཡོད།
