༄༅། །སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གི་གལ་ཆེའི་མཛད་རྣམ་སྙིང་བསྡུས།
ཕྱི་ལོ་ ༡༩༣༣།༡༢།༡༧ བོད་ཆུ་བྱ་ལོའི་ཟླ་ ༡༠ ཚེས་ ༣༠ ཉིན་ྋརྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོ་མཆོག་དགུང་གྲངས་ ༥༨ སྟེང་རྒྱལ་ས་ལྷ་སར་དགོངས་པ་གཞན་དོན་དུ་གཤེགས།
ཕྱི་ལོ་ ༡༩༣༥ ཤིང་ཕག་ལོར་རྒྱལ་ཚབ་རྭ་སྒྲེང་རིན་པོ་ཆེས་ལྷ་སའི་ཤར་ལྷོའི་མཚམས་མལ་ལེ་ ༩༠ ཙམ་གྱི་སར་ཆོས་འཁོར་རྒྱལ་ལྷ་མོའི་བླ་མཚོ་རྩ་ཆེ་ཡོད་སར་ྋརྒྱལ་དབང་མཆོག་གི་ཡང་སྲིད་གང་དུ་འཁྲུངས་མིན་གྱི་ཡི་གེ་ཨ་ཀ་མ་གསུམ་མཚོ་གཟིགས་བྱུང་།
ཕྱི་ལོ་ ༡༩༣༥།༧།༦ བོད་ཤིང་ཕག་ལོའི་བོད་ཟླ་ ༥ ཚེས་ ༥ ཉིན་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་བསྟན་འཛིན་རྒྱ་མཚོ་མཆོག་བོད་བྱང་ཤར་ཁུལ་མདོ་སྨད་ལྟག་མཚེར་དུ་སྐུ་འཁྲུངས།
ཕྱི་ལོ་ ༡༩༣༩།༧། མདོ་སྨད་ལྟག་མཚེར་ནས་ཟླ་བ་གསུམ་གྱི་འགྱངས་ཁྱད་ཡོད་པའི་བོད་ཀྱི་རྒྱལ་ས་ལྷ་སར་ཕེབས་ཐོན་མཛད།
ཕྱི་ལོ་ ༡༩༣༩།༩ འབུམ་ཆེན་གྲོང་སྡེའི་ཉེ་འཁྲིས་དགའ་བཞི་ན་ཁར་ས་བྱི་ལོའི་ཟླ་ ༨ ཚེས་ ༡༠ ཉིན་ྋགོང་ས་ཏཱ་ལའི་བླ་མའི་ཡང་སྲིད་རིན་པོ་ཆེར་གཞུང་འབྲེལ་ངོས་འཛིན་གནང༌།
ཕྱི་ལོ་ ༡༩༣༩།༡༠།༨ བོད་ས་བྱི་ལོའི་ཟླ་ ༨ ཚེས་ ༢༥ ཉིན་མདོ་ཁམས་སྨད་ནས་ཟླ་བ་གསུམ་རིང་ཕེབས་རྗེས་བོད་ཀྱི་རྒྱལ་ས་ལྷ་སར་ྋཞབས་སོར་འཁོད།
ཕྱི་ལོ་ ༡༩༤༠།༢།༢༢ བོད་ལྕགས་འབྲུག་ལོའི་ཟླ་ ༡ ཚེས་ ༡༤ ཉིན་རྩེ་ཕོ་བྲང་པོ་ཏ་ལར་གཞུང་སྲོལ་ཐོག་གསེར་ཁྲི་མངའ་གསོལ་གྱི་མཛད་སྒོ་བསྐྱངས།
ཕྱི་ལོ་ ༡༩༤༠ དགུང་གྲངས་ ༦ ལ་ཕེབས་སྐབས་ནང་དོན་རིག་པར་གསན་བསམ་གནང་འགོ་ཚུགས།
ཕྱི་ལོ་ ༡༩༤༢ བོད་ཟླ་ ༡ ཚེས་ ༡༠ ཉིན་སྲིད་སྐྱོང་ཡོངས་འཛིན་སྟག་བྲག་རིན་པོ་ཆེའི་དྲུང་ནས་དགེ་ཚུལ་གྱི་བསླབ་སྡོམ་བཞེས།
ཕྱི་ལོ་ ༡༩༥༠།༡༡།༡༧ རྒྱ་ནག་གིས་༡༩༤༩ ལོར་བོད་ཤར་ཕྱོགས་ནས་བཙན་འཛུལ་བྱས་རྗེས་བོད་ལྕགས་སྟག་ལོའི་ཟླ་ ༡༠ ཚེས་ ༡༡ ཉིན་བོད་ཀྱི་ཆོས་སྲིད་ལུགས་གཉིས་ཀྱི་ཐུགས་འགན་གཙང་བཞེས་མཛད།
ཕྱི་ལོ་ ༡༩༥༠།༡༢།༡༦ རྒྱ་ཕྱོགས་ནས་སྐུ་སྲོག་ལ་ཉེན་འགན་འབྱུང་ཉེའི་རྐྱེན་གྱིས་ལྷ་ས་ནས་གྲོ་མོར་ཉེན་གཡོལ་དུ་ཕེབས།
ཕྱི་ལོ་ ༡༩༥༡།༡ ནས་༧ པ་བར་གྲོ་མོར་ཟླ་བ་བདུན་ཙམ་རིང་བཞུགས་བཞག་མཛད།
ཕྱི་ལོ་ ༡༩༥༡།༥།༢༣ རྒྱ་ནག་པེ་ཅིན་དུ་བཙན་ཤེད་སྡིགས་སྐུལ་འོག་བོད་ཀྱི་སྐུ་ཚབ་ཚོར་གྲོས་མཐུན་དོན་ཚན་བཅུ་བདུན་ལ་མིང་རྟགས་བརྒྱབ་ཏུ་བཅུག
ཕྱི་ལོ་ ༡༩༥༡།༧།༡༦ རྒྱ་གཞུང་གིས་བོད་ཀྱི་ཞི་དྲག་ལས་དོན་ཆེད་གསར་དུ་བསྐོ་གཞག་བྱས་པའི་སྤྱི་ཁྱབ་འགན་འཛིན་དམག་དཔོན་ཀྲང་ཅིང་ཡུས་གཙོས་རྒྱ་མིའི་སྐུ་ཚབ་ཁག་གཅིག་ནས་གྲོ་མོར་ྋགོང་ས་མཆོག་དང་མཇལ་འཕྲད་ཞུས།
ཕྱི་ལོ་ ༡༩༥༡།༧།༢༤ བོད་ལྕགས་བྱི་ལོའི་ཟླ་ ༥ ཚེས་ ༡༧ ཉིན་གྲོ་མོ་ནས་ལྷ་སར་ཆིབས་ཁ་བསྒྱུར།
ཕྱི་ལོ་ ༡༩༥༡།༨།༡༧ ལྕགས་བྱི་ལོའི་ཟླ་ ༦ ཚེས་ ༡༣ ཉིན་གྲོ་མོ་ནས་ཕེབས་རྗེས་ལྷ་སར་ྋཞབས་སོར་འཁོད།
ཕྱི་ལོ་ ༡༩༥༤ བོད་ཤིང་རྟ་ལོའི་ཟླ་ ༡ ཚེས་ ༡༥ ཉིན་ཡོངས་འཛིན་ཆེ་བ་ྋསྐྱབས་རྗེ་ཤར་ཆོས་གླིང་རིན་པོ་ཆེའི་དྲུང་ནས་བསྙེན་རྫོགས་ཀྱི་བསླབ་སྡོམ་བཞེས།
ཕྱི་ལོ་ ༡༩༥༤ ལྷ་སའི་ནོར་གླིང་བསྐལ་བཟང་ཕོ་བྲང་དུ་ྋདཔལ་དུས་ཀྱི་འཁོར་ལོའི་དབང་ཆེན་ཐེངས་དང་པོ་སྩལ།
ཕྱི་ལོ་ ༡༩༥༤།༧ – ༡༩༥༥།༦ རྒྱ་ནག་ཏུ་ཞི་བའི་གྲོས་མོལ་སླད་ཆིབས་བསྒྱུར་བསྐྱངས་པ་དང༌། དེར་རྒྱ་ནག་གི་གཙོ་འཛིན་མའོ་ཙེ་ཏུང་དང་གཞན་ཡང་རྒྱ་ནག་གི་འགོ་ཁྲིད་ཀྲོའུ་ཨན་ ལའི་དང༌། ཀྲུ་ཏའི། ཏེང་ཞའོ་ཕིང་བཅས་དང་མཇལ་མོལ་གནང༌།
ཕྱི་ལོ་ ༡༩༥༦།༡༡ ༡༩༥༧། ༣ རྒྱ་གར་དུ་སངས་རྒྱས་མྱ་ངན་ལས་འདས་ནས་ལོ་ ༢༥༠༠ འཁོར་བའི་རྗེས་དྲན་དུས་ཆེན་གྱི་སྐུ་མགྲོན་གཙོ་བོར་གདན་ཞུའི་མགྲོན་བརྡ་ཕུལ་བ་ལྟར་ཆིབས་སྒྱུར་བསྐྱངས།
ཕྱི་ལོ་ ༡༩༥༩།༢ བོད་ས་ཕག་ལོའི་ཟླ་ ༡ ཚེས་ ༡༣ ཉིནལྷ་ལྡན་སྨོན་ལམ་ཆེན་མོར་སྐྱེས་ཆེན་མཁས་དབང་སྟོང་ཕྲག་མང་པོ་འཛོམས་པའི་ དབུས་སུ་གྲྭ་སྐོར་ལྷ་རམས་མཚན་བཞེས་ཀྱི་དམ་བཅའ་མཛད།
ཕྱི་ལོ་ ༡༩༥༩།༣།༡༠ རྒྱ་ནག་གུང་ཁྲན་དམག་གི་ངན་བྱུས་འོག་ྋགོང་ས་མཆོག་རྒྱ་མིའི་དམག་སྒར་དུ་གཟིགས་མོར་གདན་ཞུ་བྱས་པར་ཕེབས་བཤོལ་སླད་དང་། ྋགོང་ས་མཆོག་གི་སྐུ་ཕྱྭར་བདོ་བའི་བྱ་ངན་ལ་གདོང་ལེན་བྱེད་ཆེད་མི་མང་སེར་སྐྱ་སྟོང་ཕྲག་མང་པོ་ནོར་གླིང་ཕོ་བྲང་གི་ཉེན་སྲུང་བྱས་པ་དང༌། ལྷ་སར་བོད་མིའི་རང་དབང་སྒེར་ལངས་ཀྱི་རྔམ་སྟོན་ཁྲོམ་སྐོར་གྱི་ལས་འགུལ་འགོ་ཚུགས།
ཕྱི་ལོ་ ༡༩༥༩།༣།༡༥ ནོར་གླིང་ཕོ་བྲང་ཕྱོགས་སུ་རྒྱ་མིའི་དམག་དཔུང་གིས་མེ་སྒྱོགས་བརྒྱབ།
ཕྱི་ལོ་ ༡༩༥༩།༣།༡༧ ནོར་གླིང་བསྐལ་བཟང་ཕོ་བྲང་ནས་མཚན་མོ་ལྷ་སའི་ཆུ་ཚོད་ ༡༠ མ་ཟིན་ཙམ་ལ་སྐུ་ཕྱྭའི་ཉེན་གཡོལ་སླད་བྲོས་བྱོལ་དུ་ཕེབས།
ཕྱི་ལོ་ ༡༩༥༩།༣ ལྷུན་རྩེ་རྫོང་དུ་གཞུང་འབྲེལ་ཐོག་བོད་གཞུང་དགའ་ལྡན་ཕོ་བྲང་པའི་གཞུང་སླར་གསོ་མཛད། བོད་གཞུང་ནས་རྒྱ་ནག་གི་བཙན་ཤེད་འོག་བཞག་པའི་གྲོས་མཐུན་དོན་ཚན་བཅུ་བདུན་དེར་ངོས་ལེན་མེད་པའི་གཞུང་འབྲེལ་གསལ་བསྒྲགས་དང་པོ་གནང༌།
ཕྱི་ལོ་ ༡༩༥༩།༣།༣༠ བོད་ནས་ཆིབས་ཐོན་གྱིས་ལམ་བར་དཀའ་ཚེགས་ཆེན་པོས་ཉིན་གྲངས་བཅུ་བཞིའི་རྗེས་རྒྱ་གར་ནང་བཙན་བྱོལ་དུ་ཕེབས།
ཕྱི་ལོ་ ༡༩༥༩།༤།༡༨ ཏི་ཛུ་པུར་དུ་རྒྱལ་སྤྱིའི་གསར་འགོད་ལྷན་ཚོགས་ཤིག་སྐོང་འཚོགས་ཀྱིས་དེར་ྋགོང་ས་མཆོག་ནས་རྒྱ་ནག་གི་བཙན་ཤེད་འོག་བཞག་པའི་གྲོས་མཐུན་དོན་ཚན་བཅུ་བདུན་དེར་ངོས་ལེན་མེད་པའི་གཞུང་འབྲེལ་གསལ་བསྒྲགས་ཐེངས་གཉིས་པ་བསྐྱངས།
ཕྱི་ལོ་ ༡༩༥༩།༤།༢༠ མ་སུ་རིར་ྋཞབས་སོར་འཁོད་པ་དང༌། དེར་བཱིར་ལ་ཧའུ་སིར་བཞུགས་ཞག་མཛད།
ཕྱི་ལོ་ ༡༩༦༠ ཟླ་ ༢ པའི་ནང་གནས་མཆོག་རྡོ་རྗེ་གདན་དུ་ཆོལ་གསུམ་བོད་འབངས་ཡོངས་ནས་མནའ་གན་མཐུ་མོ་ཆེ་འབུལ་ལམ་ཞུས།
ཕྱི་ལོ་ ༡༩༦༠།༤།༣༠ བཞུགས་སྒར་རྡ་རམ་ས་ལར་སྤོས་ཏེ་སྭརྒ་ཨཱཤ་རམ་དུ་བཞུགས་ཞག་མཛད།
ཕྱི་ལོ་ ༡༩༦༣ མ་འོངས་བོད་ཀྱི་མང་གཙོའི་རྩ་ཁྲིམས་ཟིན་བྲིས་ཡོངས་ཁྱབ་གསལ་བསྒྲགས་བསྐྱངས། བཞུགས་སྒར་རྡ་རམ་ས་ལར་སྐབས་དང་པོའི་བོད་མི་མང་སྤྱི་འཐུས་ལྷན་ཚོགས་ཀྱི་སྒྲིག་འཛུགས་གསར་གཏོད་མཛད།
ཕྱི་ལོ་ ༡༩༦༧ རྒྱ་གར་ནང་བཙན་བྱོལ་དུ་ཕེབས་རྗེས་ཕྱི་རྒྱལ་ཡུལ་གྲུ་ཉི་ཧོང་དང་། ཐའི་ལན་ཌ་ནང་ཆིབས་སྒྱུར་ཐེངས་དང་པོ་བསྐྱངས།
ཕྱི་ལོ་ ༡༩༦༨ སྭརྒ་ཨཱཤ་རམ་ནས་ད་ལྟའི་ཐེག་ཆེན་ཆོས་གླིང་ཕོ་བྲང་དུ་བཞུགས་སྤོས་མཛད།
ཕྱི་ལོ་ ༡༩༧༣ ལོར་དབུ་མའི་ལམ་གྱི་སྐོར་བཀའ་སློབ་ཐོག་མར་གནང་།
ཕྱི་ལོ་ ༡༩༧༣།༩-༡༡ ནུབ་ཕྱོགས་རྒྱལ་ཁབ་ཨི་ཊ་ལི་དང༌། སུ་ཛི་ལནཌ། ནེ་ཐར་ལནཌ། བེལ་ཇིམ། ཨ་ཡར་ལནཌ། ནོར་ཝེ། སྭི་ཌན། ཌན་མག དབྱིན་ཡུལ། ནུབ་འཇར་མན། ཨོ་སི་ཊི་ལི་ཡ་བཅས་སུ་ཆིབས་སྒྱུར་ཐེངས་དང་པོ་བསྐྱངས།
ཕྱི་ལོ་ ༡༩༧༩ བཙན་བྱོལ་དུ་ཕེབས་རྗེས་རྒྱ་ནག་མི་མང་སྤྱི་མཐུན་རྒྱལ་ཁབ་དང་མཉམ་དུ་འབྲེལ་ལམ་ཐོག་མ་དེ་བྱུང༌།
ཕྱི་ལོ་ ༡༩༨༧།༩།༢༡ ཨ་རིའི་ཝ་ཤིང་ཊོན་འགྲོ་བ་མིའི་ཐོབ་ཐང་ལྷན་ཚོགས་སུ་ལོ་རྒྱུས་རང་བཞིན་ལྡན་པའི་ཞི་བའི་གྲོས་འཆར་དོན་ཚན་ལྔ་འདོན་གནང་མཛད།
ཕྱི་ལོ་ ༡༩༨༨།༦།༡༥ ཧྥ་རན་སིའི་སི་ཏྲས་སི་བྷག་ཏུ་ཡོ་རོབ་གྲོས་ཚོགས་སུ་ལོ་རྒྱུས་རང་བཞིན་ལྡན་པའི་བོད་རྒྱ་ཞི་མོལ་གྱི་གྲོས་འཆར་གསལ་བསྒྲགས་བསྐྱངས།
ཕྱི་ལོ་ ༡༩༨༩།༡༢།༡༠ ནོར་ཝེའི་རྒྱལ་ས་ཨོས྄་ལོར་འཛམ་གླིང་ནང་ཆེས་སྙན་པར་གྲགས་པའི་ནོ་བྷེལ་ཞི་བདེའི་གཟེངས་རྟགས་འབུལ་བཞེས་མཛད།
ཕྱི་ལོ་ ༡༩༩༡།༦།༡༤ ཉིན་བཙན་བྱོལ་བོད་མིའི་བཅའ་ཁྲིམས་རིན་པོ་ཆེ་བསྐྱར་བཅོས་གཏན་འབེབས་གནང་།
ཕྱི་ལོ་ ༡༩༩༢ མང་གཙོའི་ལམ་ལུགས་དང་མཐུན་པའི་གལ་ཆེའི་བཅོས་བསྒྱུར་མཛད་གནང་ཁོངས་དེ་སྔ་འཛིན་སྐྱོང་བཀའ་ཤག་གི་བཀའ་བློན་རྣམས་ྋགོང་ས་མཆོག་གིས་ཐད་བསྐོས་གནང་གི་ཡོད་ཀྱང་། དུས་དེ་ནས་བཟུང་མི་འགྲོ་འོས་གཞིར་སྩལ་བར་སྤྱི་འཐུས་ལྷན་ཚོགས་ཀྱིས་འདེམས་བསྐོ་གནང་རྒྱུར་བསྒྱུར་བཅོས་མཛད་པ་དང༌། ཁྲིམས་ཞིབ་ཁང་ཡང་གསར་འཛུགས་མཛད།
ཕྱི་ལོ་ ༢༠༠༡ མང་གཙོའི་ལམ་ལུགས་བཞིན་བོད་ཀྱི་ལོ་རྒྱུས་ནང་ཐེངས་དང་པོ་བཀའ་བློན་ཁྲི་པ་མི་མང་གིས་ཐད་ཀར་འདེམས་བསྐོའི་ལམ་སྲོལ་གསར་གཏོད་མཛད།
ཕྱི་ལོ་ ༢༠༡༡།༣།༡༤ ཉིན་བོད་མི་མང་སྤྱི་འཐུས་ལྷན་ཚོགས་ལ་གསུང་འཕྲིན་སྩལ་ཏེ་མགོན་པོ་གང་ཉིད་ནས་བོད་གཞུང་གི་ཆབ་སྲིད་འགན་དབང་ལས་བགྲེས་ཡོལ་ཕེབས་བཞེད་དང་། འབྱུང་འགྱུར་ཆབ་སྲིད་དང་འཛིན་སྐྱོང་གཉིས་ཀའི་འགོ་ཁྲིད་མང་ཚོགས་ཀྱིས་འོས་འདེམས་བྱས་པའི་ལས་ཀྱི་སྣེ་མོ་བ་རྣམས་ལ་རྩིས་སྤྲོད་གནང་རྒྱུ་དང་། དེ་དང་ཆབས་ཅིག་རྒྱལ་རབས་ལོ་རྒྱུས་ཐོག་ནས་ཏཱ་ལའི་བླ་མར་བོད་ཀྱི་ཆབ་སྲིད་ཀྱི་འགན་དབང་ཡོད་པ་མཚམས་འཇོག་གནང་རྒྱུ། ༸རྒྱལ་བ་སྐུ་འཕྲེང་དང་པོ་བཞི་ལྟར་ཆོས་ཕྱོགས་ཀྱི་མཛད་པ་དགའ་ལྡན་ཕོ་བྲང་བརྒྱུད་ནས་སྐྱོང་བཞེད་ཀྱི་བཀའ་ཕེབས།
ཕྱི་ལོ་ ༢༠༡༡།༣།༢༩ ཉིན་ྋགོང་ས་ྋསྐྱབས་མགོན་ཆེན་པོས་བཅའ་ཁྲིམས་བསྐྱར་བཅོས་ལ་ཆོག་མཆན་སྩལ་བའི་སྒོ་ནས་ྋགོང་ས་མཆོག་གི་སྲིད་ཕྱོགས་ཀྱི་འགན་དབང་ཡོངས་རྫོགས་འོས་འདེམས་བྱས་པའི་འགོ་འཁྲིད་ཚོར་སྩལ་ཏེ་དེ་དག་གཞིས་བྱེས་བོད་མི་ཡོངས་ཀྱི་ངོ་ཚབ་དང་སྲི་ཞུ་སྒྲུབ་པའི་ནུས་ལྡན་དུ་མཛད།
ཕྱི་ལོ་ ༢༠༡༡།༩།༢༤ ལྕགས་ཡོས་ཟླ་ ༧ ཚེས་ ༢༧ ཉིན་ཡང་སྲིད་སྐོར་གྱི་ཡོངས་ཁྱབ་གསལ་བསྒྲགས་གནང་།
ཕྱི་ལོ་ ༢༠༠༥ ལོར་དགེ་བཤེས་མའི་ལམ་སྲོལ་གཏོད་གནང་།
ཕྱི་ལོ་ ༢༠༡༦།༡༢།༢༢ ཉིན་རྒྱ་གར་ལྷོ་ཕྱོགས་འབྲས་སྤུངས་ཚོགས་ཆེན་དུ་དགེ་བཤེས་མའི་ཕྱག་འཁྱེར་སྩལ།
