༄༅། །ཕྱི་ལོ་ ༢༠༢༤ ཟླ་ ༨ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་ཀང་ར་གནམ་ཐང་དུ་༸ཞབས་སོར་བདེ་བར་འཁོད་པ་དང་། གནམ་ཐང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག བདེ་སྲུང་བཀའ་བློན་རྒྱ་རི་སྒྲོལ་མ་མཆོག་སོགས་ཀྱིས་གཙོས་དགོན་སྡེ་ཁག་གི་དགེ་འདུན་པ་དང་བཙུན་མ། ཧིན་དྷི་དང་ཡི་ཤུ། ཁ་ཆེ། ནང་པ། སུག་བཅས་ཀྱི་ཆོས་ལུགས་ཁག་གི་སྐུ་ཚབ་དང་། བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཁག་གི་སྐུ་ཚབ། རྒྱ་གར་བྱང་ཤར་ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་གཙོས་པའི་མོན་ཡུལ་གྱི་དགོན་སྡེ་ཁག་དང་མི་མང་ཡོངས་ཀྱི་སྐུ་ཚབ་སོགས་མི་མང་བརྒྱ་ཕྲག་བརྒལ་བས་ཕེབས་བསུ་ཞུས་ཡོད།
གནམ་ཐང་ནས་ཆིབས་འཁོར་བརྒྱུད་བཞུགས་སྒར་ཕོ་བྲང་དུ་ཆིབས་བསྒྱུར་སྐབས་ཕེབས་ལམ་གཡས་གཡོན་དུ་དད་ལྡན་སེར་སྐྱ་མི་མང་གིས་དཀར་གཙང་ཁ་བཏགས་དང་མེ་ཏོག བདུག་སྤོས་བཟུང་ནས་ཕེབས་བསུ་ཞུས་པ་དང་། ཕོ་བྲང་རྒྱལ་སྒོ་རུ་རྣམ་གྲྭས་སྤོས་སྣེས་མདུན་བསུ་དང་། བོད་མི་མང་སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་དང་། ཁྲིམས་ཞིབ་པ་གཞན་བསྟན་འཛིན་ལུང་རྟོགས་མཆོག ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག བོད་མི་མང་སྤྱི་འཐུས་རྒྱུན་ལས་རྣམ་པ། བཀའ་ཟུར་དང་སྤྱི་འཐུས་ཚོགས་གཙོ་ཟུར་པ་སོགས་ཁག་གཅིག གཞན་ཡང་། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམ་པ་སོགས་ནས་ཕེབས་བསུ་དང་བཅས་གཟིམ་ཆུང་དུ་༸ཞབས་སོར་བདེ་བར་འཁོད་ཡོད།
དེ་ཡང་འདི་ལོའི་ཟླ་ ༦ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་ནས་སྐུ་འཁོར་ཧྲག་བསྡུས་དང་བཅས་གྷ་གྷལ་གནམ་ཐང་ནས་མཁའ་ལམ་བརྒྱུད་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱངས་པ་དང་། ཚེས་ ༢༢ ཉིན་སུད་སིར་ཆིབས་བསྒྱུར། ཚེས་ ༢༣ ཉིན་ཨ་རིའི་ནེའུ་ཡོག་གྲོང་ཁྱེར་དུ་༸ཞབས་སོར་འཁོད་པ་དང་། ཚེས་ ༢༨ ཉིན་ཨ་རིའི་གྲོང་ཁྱེར་ནེའུ་ཡོག་ཏུ་ཞབས་པུས་སྨན་བཅོས་གནང་རྗེས་ནིའུ་ཡོག་མངའ་སྡེའི་བྱང་ཕྱོགས་སའེ་ར་ཁྱུ་སི་ Syracuse ས་གནས་ཀྱི་ནཱ་ཕཱི་གཞིས་ཀ་(Nappi Farmhouse)ལ་བདུན་ཕྲག་དྲུག་རིང་སྐུའི་ངལ་གསོ་མཛད་ཡོད།
ཟླ་ ༧ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་ནིའུ་ཡོག་མངའ་སྡེའི་བྱང་རྒྱུད་བཞུགས་གནས་སུ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་གིས་འཚམས་ཞུའི་མཇལ་བཅར་ཞུས་སྩལ་གནང་ཞིང་། ཚེས་ ༡༦ ཉིན་ཨ་རིའི་ནེའུ་ཡོག་མངའ་སྡེའི་ནང་ཡོད་པའི་ཨི་ཐ་ཁའི་(Ithaca)རྣམ་རྒྱལ་གྲྭ་ཚང་གི་ནང་ཆོས་སློབ་གཉེར་ཁང་ཞེས་པར་ཆིབས་སྒྱུར་བསྐྱངས་ཏེ་ཆོས་འབྲེལ་དང་བཀའ་སློབ་བཀའ་དྲིན་སྩལ་ཡོད།
ཟླ་ ༨ ཚེས་ ༢༠ ཉིན་གྱི་སྔ་དྲོ་ཨ་རིའི་ནེའུ་ཡོག་གྲོང་ཁྱེར་དུ་ཆིབས་བསྒྱུར་བསྐྱངས་པ་དང་། ཚེས་ ༢༡ ཉིན་ཨ་རི་ནིའུ་ཡོག་གྲོང་ཁྱེར་དུ་ཨ་རིའི་གཞུང་གི་སྐུ་ཚབ་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛི་རཱ་ཛེ་ཡ་ (Uzra Zeya) མཆོག་དང་། ཨ་རིའི་སྲིད་འཛིན་གྱི་དམིགས་བསལ་ཕྱག་རོགས་དང་། མང་གཙོ་དང་འགྲོ་བ་མིའི་ཐོབ་ཐང་ཚན་པའི་འགན་འཛིན་ལྕམ་སྐུ་ཀེ་ལི་ ( Kelly Razzouk) མཆོག་རྣམ་གཉིས་མཇལ་བཅར་ཞུས་ཤིང་། ཚེས་ ༢༢ ཉིན་བྱང་ཨ་རིར་གནས་སྡོད་བོད་མི་སྤྱི་དང་། ཨ་རིའི་ཆོ་འཕྲུལ་སྨོན་ལམ་ཚོགས་པས་གཙོས་དགེ་ལུགས་པའི་ཆོས་ཚོགས་ཁག སོག་རིགས། ཧི་མ་ལ་ཡའི་རི་རྒྱུད་ཀྱི་མི་མང་བཅས་ཐུན་མོང་གིས་ཇི་ལྟར་གསོལ་བ་བཏབ་པ་ལྟར་ཨ་རིའི་ནེའུ་ཡོག་གྲོང་ཁྱེར་གྱི་ UBS Arena ཞེས་པའི་ཚོགས་ར་ཆེན་མོ་རུ་དད་ལྡན་སེར་སྐྱ་ ༡༧༠༠༠ བརྒལ་བར་སེམས་བསྐྱེད་དང་། ཐུབ་པའི་མཚན་སྔགས། མ་ཎི་ཡིག་དྲུག་སོགས་གཟུངས་སྔགས་འགའ་ཞིག་གི་བཟླས་ལུང་བཀའ་དྲིན་སྩལ་བ་དང་། མགོན་པོ་གང་ཉིད་མཆོག་ལ་མཚོན་དོན་བརྟན་བཞུགས་བསྟར་འབུལ་ཞུས།
ཚེས་ ༢༣ ཉིན་ཨ་རི་ནས་སུད་སིར་༸ཞབས་སོར་བདེ་བར་འཁོད་པ་དང་། ཛུ་རིག་གནམ་ཐང་དུ་སུད་སིའི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། ཛུ་རིག་མངའ་སྡེའི་གཞུང་གི་འཐུས་མི་སྐུ་ཞབས་མ་རི་ཡོ་ཕེར་ལགས། རྒྱ་གར་གཞུང་གི་༧གོང་ས་མཆོག་གི་འབྲེལ་མཐུད་པ་སྐུ་ཞབས་ཡ་ཤི་བྷིར་སིང་ལགས། སུད་སིའི་རྒྱལ་ས་བྷན་དུ་ཡོད་པའི་རྒྱ་གར་གཞུང་ཚབ་ཁང་གི་དྲུང་ཆེ་ན་ཝིན་ཧུ་ཌ་ལགས། སུད་སིའི་༸གོང་ས་ཏཱ་ལའི་བླ་མའི་དགེ་རྩ་ཚོགས་པའི་འགན་འཛིན་བསྟན་འཛིན་སྲིད་འོད་ལགས་བཅས་དང་། བོད་རིགས་དང་སོག་རིགས་མི་མང་གཙོས་པའི་ཕྱི་ནང་དད་ལྡན་སེར་སྐྱ་མང་ཚོགས་ཁྱོན་ ༡༢༠༠ ཡས་མས་ནས་དགའ་དད་སྤྲོ་གསུམ་འཁོལ་བའི་ངང་ནས་ཕེབས་བསུའི་གཟབ་རྒྱས་ཞུས།
ཚེས་ ༢༥ ཉིན་སུད་སིའི་ཛུ་རིག་གྲོང་ཁྱེར་གྱི་ Hallenstadion ཚོགས་ཁང་དུ་དད་ལྡན་སེར་སྐྱ་ཆིག་ཁྲི་ལྔ་སྟོང་བརྒལ་བར་འཇམ་པའི་དབྱངས་ཀྱི་གཟུངས་སྔགས་དང་། སྤྱན་རས་གཟིགས་ཀྱི་གཟུངས་སྔགས། ཐུབ་པའི་མཚན་སྔགས་བཅས་ཀྱི་བཟླས་ལུང་བཀའ་དྲིན་སྩལ་རྗེས། སུད་སི་དང་ལེག་ཏེན་སིཊཡན་བོད་རིགས་མི་མང་གིས་མཚོན་དོན་བརྟན་བཞུགས་བསྟར་འབུལ་ཞུས་པ་སོགས་རྒྱ་ཆེ་བའི་མཛད་འཕྲིན་ཁག་ལེགས་པར་གྲུབ་རྗེས་ཚེས་ ༢༦ ཉིན་རྒྱ་གར་དུ་ཆིབས་བསྒྱུར་བསྐྱངས་ཡོད།
