[bod.asia]༄༅། །འདི་གར་སུད་སི་སྐུ་ཚབ་དོན་གཅོད་ནས་བཏང་གནས་ནང་འཁོད་དོན། ཕྱི་ལོ་ ༢༠༢༤ ཟླ་བ་ ༨ ཚེས་ ༢༣ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་ཨ་རིར་ཞབས་པུས་སྨན་བཅོས་ལེགས་གྲུབ་རྗེས་སུད་སིར་༸ཞབས་སོར་བདེ་བར་འཁོད་ཡོད་པ་རེད།
དེ་ཡང་མགོན་པོ་གང་ཉིད་མཆོག་ཁ་སང་སྔ་དྲོ་ཨ་རི་ནས་དམིགས་བསལ་གནམ་གྲུ་བརྒྱུད་ཕྱག་ཚོད་ ༧།༣༢ ཡོལ་ཙམ་ལ་སུད་སིའི་ཛུ་རིག་གནམ་ཐང་དུ་ཞབས་སོར་བདེ་བར་འཁོད་མཚམས་སུད་སིའི་སྐུ་ཚབ་དོན་གཅོད་འཕྲིན་ལས་ཆོས་སྐྱིད་ལགས་དང་། ཛུ་རིག་མངའ་སྡེའི་གཞུང་གི་འཐུས་མི་སྐུ་ཞབས་མ་རི་ཡོ་ཕེར་ལགས། རྒྱ་གར་གཞུང་གི་༸གོང་ས་མཆོག་གི་འབྲེལ་མཐུད་པ་སྐུ་ཞབས་ཡ་ཤི་བྷིར་སིང་ལགས། སུད་སིའི་རྒྱལ་ས་བྷན་དུ་ཡོད་པའི་རྒྱ་གར་གཞུང་ཚབ་ཁང་གི་དྲུང་ཆེ་ན་ཝིན་ཧུ་ཌ་ལགས། སུད་སིའི་༸གོང་ས་ཏཱ་ལའི་བླ་མའི་དགེ་རྩ་ཚོགས་པའི་འགན་འཛིན་བསྟན་འཛིན་སྲིད་འོད་ལགས་ནས་ཕེབས་བསུ་ཞུས་ཡོད།
དེ་བཞིན་བོད་རིགས་དང་སོག་རིགས་མི་མང་གཙོས་པའི་ཕྱི་ནང་དད་ལྡན་སེར་སྐྱ་མང་ཚོགས་ཁྱོན་ ༡༢༠༠ ཡས་མས་ནས་དགའ་དད་སྤྲོ་གསུམ་འཁོལ་བའི་ངང་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་མ་ཟད། ཕྱག་ཚོད་ ༧།༥༠ ཙམ་ལ་མགོན་པོ་གང་ཉིད་མཆོག་ཧི་ཊོན་གསོལ་མགྲོན་ཁང་དུ་ཞབས་སོར་བདེ་བར་འཁོད་སྐབས། ཕེབས་ལམ་གྱི་གཡས་གཡོན་དུ་གཉུག་མར་གནས་པ་དང་གློ་བུར་དུ་ལྷགས་པའི་བོད་མིས་གཙོས་ཕྱི་ནང་གི་དད་ལྡན་མང་ཚོགས་སྟོང་ཕྲག་དུ་མས་ཕྱག་ཏུ་དཀར་གཙང་གི་མཇལ་དར་དང་། དྲི་བཟང་བདུག་སྤོས། གྲོ་སོ་ཕྱེ་མར་དང་ཆང་ཕུད་སོགས་བསྣམས་ཏེ་བོད་ལུགས་ལྟར་དགའ་བསུའི་ཕེབས་བསུ་གཟབ་རྒྱས་ཞུས་ཡོད་པ་རེད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཛུ་རིག་ཧི་ཊོན་གྱི་གསོལ་མགྲོན་ཁང་དུ་ཞབས་སོར་འཁོད་སྐབས། རི་ཀོན་དགོན་གྱི་མཁན་པོ་དང་བླ་སྤྲུལ། བོད་མི་མང་སྤྱི་འཐུས་ཁག་གཅིག་དང་། སྤྱི་ཟུར་དང་དོན་ཟུར། གཞུང་ཁོངས་མིན་པའི་སྐུ་ཚབ། དོན་ཁང་གི་ལས་བྱེད། བོད་རིགས་སྤྱི་མཐུན་ཚོགས་པའི་ཚོགས་གཙོ་དང་རྒྱུན་ལས་སོགས་ནས་ཕེབས་བསུ་གཟབ་རྒྱས་ཞུས་ཡོད། དེ་ནས་ཕྱི་ཚེས་ ༢༤ ཉིན་སྐུ་ངལ་གསོ་རྒྱུ་དང་། ཕྱི་ཚེས་ ༢༥ ཉིན་སེར་སྐྱ་མང་ཚོགས་ལ་སེམས་བསྐྱེད་ཀྱི་ཆོས་འབྲེལ་དང་བླ་མའི་རྣལ་འབྱོར་དང་མ་ཎིའི་ལྗགས་ལུང་རྒྱུའི་མཛད་འཆར་ཡོད་པ་རེད།
