༄༅། །ཕྱི་ལོ་ ༢༠༢༤ ཟླ་བ་ ༨ ཚེས་ ༢༡ ཉིན་ཨ་རི་ནིའུ་ཡོག་གྲོང་ཁྱེར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་གཞུང་གི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛི་རཱ་ཛེ་ཡ་ (Uzra Zeya) མཆོག་དང་། ཨ་རིའི་སྲིད་འཛིན་གྱི་དམིགས་བསལ་ཕྱག་རོགས་དང་། མང་གཙོ་དང་འགྲོ་བ་མིའི་ཐོབ་ཐང་ཚན་པའི་འགན་འཛིན་ལྕམ་སྐུ་ཀེ་ལི་ ( Kelly Razzouk) མཆོག་རྣམ་གཉིས་མཇལ་བཅར་ཞུས་ཡོད་པ་རེད།
ཨ་རིའི་ཕྱི་སྲིད་ལས་ཁུངས་ཀྱིས་སྤེལ་བའི་གསལ་བསྒྲགས་ལྟར་ན། མཇལ་མོལ་གྱི་རིང་ལ་དམིགས་བསལ་བོད་དོན་འབྲེལ་མཐུད་པས་སྲིད་འཛིན་བྷ་ཌན་གྱི་ཚབ་ཞུས་ནས་༸གོང་ས་མཆོག་གི་སྐུ་གཟུགས་བདེ་ཐང་ཡོང་བའི་སྨོན་འདུན་ཞུས་པ་དང་། ཨ་རིའི་གཞུང་གི་ངོས་ནས་བོད་ཀྱི་འགྲོ་བ་མིའི་ཐོབ་ཐང་གོང་མཐོར་གཏོང་རྒྱུ་དང་། དེ་བཞིན་བོད་ཀྱི་ཐུན་མོང་མིན་པའི་ལོ་རྒྱུས་ཀྱི་གནས་བབ་དང་། སྐད་ཡིག རིག་གཞུང་། ཆོས་ལུགས་བཅས་འཛིན་སྐྱོང་སྲུང་སྐྱོབ་ཀྱི་འབད་བརྩོན་གནང་བའི་ཐད་རྒྱབ་སྐྱོར་སྔར་བཞིན་ཡོད་པ་ཞུས་ཡོད། གཞན་ཡང་། མཇལ་ཁའི་སྐལ་བཟང་འདི་བཟུང་སྟེ་༸གོང་ས་མཆོག་དང་ལྷན་དུ་བོད་པས་རང་གི་རིག་གཞུང་རྒྱུན་སྐྱོང་བྱེད་སྟངས་དང་། ཨ་རིའི་ངོས་ནས་བོད་ནང་གི་འགྲོ་བ་མིའི་ཐོབ་ཐང་ཐོག་ལས་འགུལ་མུ་མཐུད་འབད་བརྩོན་རྒྱུན་སྐྱོང་ཞུ་རྒྱུ། དེ་བཞིན་༸གོང་ས་མཆོག་དང་སྐུ་ཚབ་རྣམ་པ་དང་རྒྱ་ནག་དབར་གྲོས་མོལ་སྔར་ལམ་སྐྱར་གསོ་ཞུ་རྒྱུར་རྒྱབ་སྐྱོར་ཡོད་སྐོར་བཅས་༸སྙན་སེང་ཞུས་ཡོད་པ་རེད།
