༄༅། །ཕྱི་ལོ་ ༢༠༢༣ ཟླ་ ༨ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མར་ཡུལ་ལ་དྭགས་ཡུལ་གྱི་མཛད་འཕྲིནརེ་ཞིག་ལེགས་པར་གྲུབ་ནས་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱངས་ཡོད་པ་རེད།
དེ་ཡང་ཟླ་ ༧ ཚེས་ ༡༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ཡུལ་དུ་༸ཞབས་སོར་བདེ་བར་འཁོད་དེ། ཚེས་ ༡༤ ཉིན་མཛད་འཕྲིན་ཐོག་མ་གླེ་ཇོ་ཁང་དུ་གནས་མཇལ་དང་། མི་མང་ལ་བཀའ་སློབ་སྩལ་ཞིང་། ཚེས་ ༢༡ ནས་ཉིན་གྲངས་གསུམ་རིང་ཞི་བའི་ཚལ་གསུང་ཆོས་ར་བར་ཆོས་འབྲེལ་བཀའ་དྲིན་སྩལ་བར་ཉིན་དང་པོར་མི་གྲངས་ ༤༥༠༠༠ ལ་ལག་ལེན་སོ་བདུན་མའི་ཆོས་འབྲེལ་དང། ཚེས་ ༢༣ ཉིན་ལ་དྭགས་པ་དང་བོད་རིགས། ཕྱི་རྒྱལ་བ་སོགས་ཁྱོན་མི་གྲངས་ ༦༥༠༠༠ ལ་སྤྱན་རས་གཟིགས་ཀྱི་བཀའ་དབང་། ཚེས་ ༢༤ ཉིན་མགོན་པོ་གང་ཉིད་མཆོག་སྐུ་ཚེ་བསྐལ་བརྒྱར་བརྟན་ཆེད་བརྟན་བཞུགས་བསྟར་འབུལ་ཞུས་པར་མི་གྲངས་ ༥༠༠༠༠ བརྒལ་བར་བཀའ་སློབ་བཀའ་དྲིན་སྩལ།
ཚེས་ ༢༦ ཉིན་ལ་དྭགས་བོད་ཁྱིམ་སློབ་གྲྭར་བོད་རིགས་གཙོས་དད་ལྡན་མི་གྲངས་ ༥༠༠༠ ལ་བཀའ་སློབ་དང་། ཚེས་ ༣༡ ཉིན་ཏོག་ཡུལ་དུ་བཞེངས་པའི་སྟོན་པའི་སྐུ་བརྙན་ཆེན་མོར་མཆོད་མཇལ་དང་འབྲེལ་མི་མང་ ༥༠༠༠ ལ་བཀའ་སློབ། དེ་བཞིན་ཟླ་ ༨ ཚེས་ ༧ ཉིན་ལ་དྭགས་གླེ་ཡི་ལམ་སྒྲོན་སློབ་གྲྭར་མི་གྲངས་ ༡༥༠༠༠ བརྒལ་བར་ཆོས་འབྲེལ་དང་བཀའ་སློབ་སྩལ་བ་དང་། ཚེས་ ༡༢ ཉིན་ལ་དྭགས་ཨེ་མམ་བྷར་གྷ་ཁ་ཆེའི་ཕྱག་ཁང་དུ་ཆིབས་བསྒྱུར་གྱིས་ཁ་ཆེའི་ཆོས་ལུགས་ཀྱི་རྗེས་འབྲང་པར་འཇིག་རྟེན་ཞི་བདེ་དང་། ཆོས་ལུགས་མཐུན་འབྲེལ་གྱི་སྐོར་ལ་བཀའ་སློབ་སྩལ་ཡོད་ཅིང་། ཚེས་ ༡༨ ཉིན་གཤམ་ཕྱོགས་སྡེ་ཁག་མཁར་རྩེ་རི་ལྗོངས་ལ་དྭགས་དབུས་གཞུང་མངའ་སྡེ་ལ་དྭགས་ནང་པའི་ཚོགས་འདུའི་ཡན་ལག་ནས་ཇི་ལྟར་གསོལ་བ་བཏབ་པ་ལྟར་མཁར་རྩེ་རུ་ཆིབས་བསྒྱུར་གྱིས་ཕེབས་བསུའི་མཛད་སྒོར་མི་གྲངས་ ༡༥༠༠༠ བརྒལ་བར་བཀའ་སློབ་སྩལ་བ་དང་། ཚེས་ ༡༩ ཉིན་མཁར་རྩེ་ཟེར་ཐང་གསུང་ཆོས་ར་བ་རུ་དད་ལྡན་ཆོས་ཞུ་བ་ ༢༥༠༠༠ བརྒལ་བར་ཐམས་ཅད་རྣལ་འབྱོར་གྱི་སེམས་བསྐྱེད་དང་། སྒྲོལ་དཀར་ཡིད་བཞིན་འཁོར་ལོའི་ཚེ་དབང་བཀའ་དྲིན་སྩལ་བ་སོགས་ལ་དྭགས་ཡུལ་གྱི་དད་ལྡན་སེར་སྐྱ་མི་མང་ལ་ཆོས་ཀྱི་བདུད་རྩི་ཚིམས་པར་སྩལ་ཞིང་།
གཞན་ཡང་། ཚོགས་སྡེ་ཁག་ལ་བཀའ་སློབ་དང་། ཁྱོན་ཉིན་གྲངས་ ༢༦ རིང་ལ་དྭགས་ཁུལ་གྱི་བོད་མི་དང་། ལ་དྭགས་པ། ཕྱི་རྒྱལ་བ། འབྲེལ་ཡོད་ལས་བྱེད་སོགས་ཁྱོན་མི་གྲངས་ ༡༢༧༠༦ ལ་མང་མཇལ་སྩལ་བའི་ཁྲོད་ལོ་གྲངས་ ༦༠ ཡན་གྱི་བགྲེས་སོང་གྲངས་ ༥༠༤༥ དང་། ནད་པ་དང་དབང་པོ་སྐྱོན་ཅན་ ༧༨༤ བོད་རིགས་དང་། ལ་དྭགས་ཡུལ་མི། ཕྱི་རྒྱལ་བ་སོགས་ ༦༨༩༠ བཅས་ལ་མང་མཇལ་སྩལ་ཏེ་འགྲོ་བ་སེམས་ཅན་གྱི་དོན་དུ་ངལ་བ་མེད་པར་ཐུགས་བརྩེ་བ་ཆེས་པོས་རྗེས་སུ་བཟུང་ཡོད་ཅིང་། ལ་དྭགས་ཡུལ་དུ་ཉིན་གྲངས་ ༤༥ རིང་མཛད་འཕྲིན་བསྐྱངས་རྗེས་ཀྱི་དེ་རིང་ཞོགས་པའི་ཆུ་ཚོད་ ༧།༣༠ ཐོག་ཞི་བའི་ཚལ་གྱི་ཕོ་བྲང་དགེ་འཕེལ་གླིང་ནས་གླེ་གནམ་ཐང་དུ་ཆིབས་བསྒྱུར་གྱིས་མཁའ་ལམ་བརྒྱུད་རྒྱ་གར་གྱི་རྒྱལ་ས་ལྡི་ལིར་༸ཞབས་སོར་བདེ་བར་འཁོད་ཡོད།
