༄༅། །ཕྱི་ལོ་ ༢༠༢༣ ཟླ་ ༥ ཚེས་ ༣༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་ས་ནང་ཆོས་གོ་སྒྲིག་ཚོགས་ཆུང་གིས་ཇི་ལྟར་གསོལ་འདེབས་ཞུས་དོན་ལྟར་བོད་རིགས་གཞོན་སྐྱེས་གཙོ་བོར་གྱུར་པའི་དད་ལྡན་ཆོས་ཞུ་བ་ཡོངས་ལ་ཐེག་ཆེན་ཆོས་གླིང་གཙུག་ལག་ཁང་དུ་སྐྱབས་འགྲོ་ངོ་སྤྲོད་དང་སེམས་བསྐྱེད་ཀྱི་ཆོས་འབྲེལ་བཀའ་དྲིན་སྩལ་ཡོད་པ་རེད།
དེ་ཡང་ཞོགས་པ་ཆུ་ཚོད་ ༧།༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་གཟིམ་ཆུང་ནས་རྒྱལ་སྒོ་རུ་ཆིབས་བསྒྱུར་སྐབས་རྡ་ས་ནང་ཆོས་གོ་སྒྲིག་ཚོགས་ཆུང་གི་ཚོགས་མི་རྣམས་ཀྱིས་སྤོས་སྣེས་མདུན་བསུ་དང་བཅས་ཐེག་ཆེན་ཆོས་གླིང་གཙུག་ལག་ཁང་དུ་གདན་ཞུ་མཛད་པ་དང་། ཆིབས་བསྒྱུར་སྐབས་བོད་ཁྱིམ་སློབ་གྲྭའི་སློབ་ཕྲུག་རྣམས་ཀྱིས་བློ་རིག་གི་སྡོམ་ངག་སྐྱོར་དང་། བཞུགས་ཁྲིར་༸ཞབས་སོར་འཁོད་མཚམས་སློབ་ཕྲུག་ཁག་ཅིག་གིས་རྟགས་གསལ་གཟིགས་འབུལ་ཞུས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
དེ་རིང་འདིར་བོད་རིགས་གཞོན་ནུ་ཚོ་གཙོ་བོར་བྱས་ཏེ་སེམས་བསྐྱེད་ཅིག་བྱུང་ན་ཞེས་རེ་འདུན་བྱུང་བ་རེད། སེམས་བསྐྱེད་ནི་ཧ་ཅང་བཟང་པོ་རེད། སེམས་པ་བཟང་པོ་བྱེད་པ་དང་སྤྱི་སེམས་འཁུར་རྒྱུ་ནི་ཧ་ཅང་རྩ་ཆེན་པོ་རེད། ངོས་རང་ལ་ཆ་བཞག་ན་ཞོགས་པ་ཡར་ལངས་པ་དང་། སེམས་བསྐྱེད་ལ་བསམ་བློ་བཏང་སྟེ། ནམ་མཁའི་མཐའི་གཏུགས་པའི་སེམས་ཅན་ཡོངས་དང་། བྱེ་བྲག་ཏུ་འཛམ་གླིང་འདིར་ཡོད་པའི་མིའི་འགྲོ་བ་གཙོ་བོར་གྱུར་པའི་སེམས་ཅན་ཚོའི་ཆེད་དུ་སྨོན་ལམ་རྒྱག་རྒྱུ་ངོས་ཀྱིས་ཉིན་ལྟར་བྱེད་བཞིན་ཡོད། དེ་དངོས་གནས་སེམས་ལ་ཞི་བདེ་སླེབས་པ་དང་། སེམས་ལྷོད་ལྷོད་ཆགས་པ་ལ་ཧ་ཅང་ཕན་ཐོགས་འདུག ངོས་ཀྱིས་བྱང་ཆུབ་ཀྱི་སེམས་སྒོམ་རྒྱུ་གལ་ཆེན་པོར་བརྩིས་ཏེ། དེའི་གྲོགས་བྱེད་མཁན་སྟོང་ཉིད་ཀྱི་ལྟ་བ་ཡིན། དེ་ལྟར་ཉིན་ལྟར་བསམ་བློ་གཏོང་གི་ཡོད། སེམས་བཟང་པོ་བྱེད་པ་དེ་ཧ་ཅང་ཕན་ཐོགས་འདུག ངོས་ཀྱིས་སྨོན་ལམ་རྒྱག་རྒྱུ་དེ་ཡང་། ཇི་སྲིད་ནམ་མཁའ་གནས་པ་དང༌།། འགྲོ་བ་ཇི་སྲིད་གནས་གྱུར་པ།། དེ་སྲིད་བདག་ནི་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག། ཅེས་ནམ་མཁའ་མ་ཟད་ཀྱི་བར་དུ་སེམས་ཅན་གྱི་དོན་བྱེད་རྒྱུ་ཡིན་ཟེར་བའི་སེམས་ཤུགས་དེ་ནི་ཧ་ཅང་ཕན་ཐོགས་འདུག དེར་བརྟེན། ངོས་རང་ལ་ཆ་གཞག་ན། སེམས་བསྐྱེད་ནི་སེམས་ལྷོད་ལྷོད་ཆགས་པ་དང་། སེམས་ལྷོད་ལྷོད་ཆགས་པའི་རྐྱེན་ལ་བརྟེན་ནས་དགོང་མོ་གཉིད་སྐྱིད་པོ་ཁུགས་པ་དང་། སེམས་ལ་ཁོང་ཁྲོ་ཟ་བ་དང་སེམས་འཁྲུག་སྡོད་པ་ལྟ་བུ་ཁྱོན་ནས་ཡོང་གི་མི་འདུག སེམས་ལྷོད་ཤིག་ཤིག་སྡོད་ཀྱི་འདུག དགོང་མོ་ཉལ་དུས་སེམས་ལྷོད་ལྷོད་སྡོད་ཀྱི་འདུག འཕགས་པ་སྤྱན་རས་གཟིགས་ཀྱང་སྒོམ་བཞིན་ཡོད། བོད་གངས་ཅན་པའི་ལྷ་སྐལ་འཕགས་པ་སྤྱན་རས་གཟིགས་སྤྱི་བོ་ལ་སྒོམ། མ་ཎི་བགྲངས་བཞིན་གཉིད་ཀྱི་ཡོད།
དངོས་ཡོད་གནས་ཚུལ་ལ་སེམས་ལྷོད་ལྷོད་ཆགས་ཡོང་དུས། ལུས་ཀྱི་འབྱུང་བ་རྣམས་རང་བཞིན་པ་ཆགས་ནས་ཕན་ཐོགས་ཆེན་པོ་འདུག ང་ཚོ་བོད་གངས་ཅན་དམིགས་བསལ་གྱིས་འཕགས་མཆོག་ཕྱག་ན་པདྨོའི་གདུལ་ཞིང་ཟེར་གྱི་ཡོད་པ་རེད་ལ། དམིགས་བསལ་གྱིས་སྤྱན་རས་གཟིགས་ལ་འབྲེལ་བ་ཡོད་པ་ཞིག་དང་། རྒྱ་ནག་ལ་ཆ་གཞག་ན་རི་བོ་རྩེ་ལྔ་ལ་བརྟེན་ནས་འཇམ་པའི་དབྱངས་དང་འབྲེལ་བ་ཡོད་པ་བཤད་ཀྱི་ཡོད་པ་རེད། ང་ཚོ་བོད་གངས་ཅན་པ་འཕགས་པ་སྤྱན་རས་གཟིགས་དང་ཐུན་མོང་མ་ཡིན་པའི་འབྲེལ་བ་ཡོད་པས། ངོས་རང་ལ་མཚོན་ནའང་འཕགས་པ་སྤྱན་རས་གཟིགས་ལ་གསོལ་བ་འདེབས་པ་དང་། སྤྱན་རས་གཟིགས་སྤྱི་བོར་སྒོམ་བཞིན་ཡོད། ཅེས་བཀའ་སློབ་སྩལ་རྗེས་འཁྱུག་ཙམ་རིང་གསོལ་ཇའི་བར་གསེང་བ་དང་། དེ་རྗེས་ནང་ཆོས་གོ་སྒྲིག་ཚོགས་ཆུང་གི་འཐུས་མི་ཚོས་མཎྜལ་རྟེན་གསུམ་འདེགས་འབུལ་དང་། ཞབས་བརྟན་གསོལ་འདེབས་གསུང་འདོན་གནང་བ་དང་། དེ་རྗེས་སླར་ཡང་བཀའ་སློབ་སྩལ་དོན།
དེ་རིང་འདིར་བོད་རིགས་གཙོ་བོར་གྱུར་པའི་དད་ལྡན་གང་འཚམ་ཞིག་འཛོམས་པ་རེད། སང་ཉིན་འཇམ་པའི་དབྱངས་ཀྱི་རྗེས་གནང་ཞིག་ཡིན། ཤེས་རབ་ཀྱི་ལྷ་རེད། གཞོན་སྐྱེས་ཚོའི་ཤེས་རབ་གོང་ནས་གོང་དུ་འཕེལ་བ་ལ་གཙོ་བོར་དམིགས་ནས་རྗེ་བཙུན་འཇམ་པའི་དབྱངས་ཀྱི་རྗེས་གནང་བྱ་རྒྱུ་བྱེད། དེ་རིང་འདིར་སེམས་བསྐྱེད་འདོན་རྒྱུ་དང་། རྗེ་རིན་པོ་ཆེའི་ལམ་རིམ་ཆེན་མོའི་ནང་དུ་སེམས་བསྐྱེད་ཀྱི་ཆོ་ག་ཡོད་ཀྱང་དེ་ཧ་ཅང་རྒྱས་པ་ཡིན་པས་མི་དགོས་པ་བྱེད། གང་ལྟར་སྤྱོད་འཇུག་ཆེན་མོ་ལས། གང་ལ་སེམས་ཀྱི་དམ་པ་རིན་ཆེན་དེ།། སྐྱེས་པ་དེ་ཡི་སྐུ་ལ་ཕྱག་འཚལ་ཞིང་།། གང་ལ་གནོད་པ་བྱས་ཀྱང་བདེར་འབྲེལ་བ།། བདེ་བའི་འབྱུང་གནས་དེ་ལ་སྐྱབས་སུ་མཆི།། ཞེས་གསུངས་པ་ལྟར། བྱང་སེམས་གཞན་ཕན་གྱི་བློ་ཡོད་པ་དེ་ལ་མཐའ་གཅིག་ཏུ་ཕྱག་འཚལ་འོས་པ་རེད། རྒྱུ་མཚན་ནི་བྱང་ཆུབ་ཀྱི་སེམས་བཟང་པོ་ཡོད་མཁན་དེ་ལ་ཕར་གནོད་པ་བྱས་ནའང་གནོད་ལན་གནོད་པས་མི་འཇལ་བར་ཚུར་ཕན་འདོགས་ཀྱི་ཡོད་པས། གང་ལ་གནོད་པ་བྱས་ཀྱང་བདེར་འབྲེལ་བ།། བདེ་བའི་འབྱུང་གནས་དེ་ལ་སྐྱབས་སུ་མཆི།། ཞེས་གསུངས་པ་རེད།
འཛམ་གླིང་འདིར་བདེ་སྐྱིད་ཡོང་བའི་རྩ་བ་ནི་སེམས་པ་བཟང་པོ་རེད། སེམས་པ་བཟང་པོ་ཡོད་ན་སོ་སོ་ཡང་སེམས་སྐྱིད་པ་དང་། ཐ་ན་གཉིད་ཀྱང་སྐྱིད་པ། གཞན་ཉལ་བའི་སྐབས་སུ་སེམས་འཁྲུག་ནས་བསྡད་ཚེ་དབུགས་རིང་རེ་བཏང་། ཕར་ཨ་ལོག་བརྒྱབ། ཚུར་ཨ་ལོག་བརྒྱབ་ནས་མ་སྐྱིད་པ་བྱེད་ཀྱི་རེད། གཞན་ཕན་གྱི་བློ་ཡག་པོ་ཞིག་ཡོད་ཚེ་ལྷོད་ཤིག་ཤིག་སྡོད་རྒྱུ་ཡོང་གི་རེད། བྱང་ཆུབ་ཀྱི་སེམས་ནི་སངས་རྒྱས་ཀྱི་གོ་འཕང་ཐོབ་པ་ལ་ཨ་ཅང་ཅང་། འཕྲལ་དུ་ཉིན་རེ་བཞིན་དུ་སེམས་ལྷོད་ལྷོད་ཆགས་པར་ཁྱད་པར་ཆེན་པོ་འདུག རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱི།། ཞེས་གསུངས་པ་ལྟར། རང་དོན་སྒྲུབ་པ་ལའང་བྱང་ཆུབ་ཀྱི་སེམས་སྒོམ་དགོས། གཞན་དོན་སྒྲུབ་པ་ལའང་བྱང་ཆུབ་ཀྱི་སེམས་སྒོམ་དགོས། འཕྲལ་དུ་བདེ་བ་ལའང་བྱང་ཆུབ་ཀྱི་སེམས་སྒོམ་དགོས། ཚེ་རབས་ནས་ཚེ་རབས་བདེ་ཞིང་སྐྱིད་པ་དང་། མཐར་མངོན་པར་རྫོགས་པར་སངས་རྒྱས་པ་དེའང་བྱང་ཆུབ་ཀྱི་སེམས་ལ་བརྟེན་ནས་ཡོང་གི་ཡོད། བྱང་ཆུབ་ཀྱི་སེམས་ནི་སེམས་པ་བཟང་པོ་མཐར་ཐུག་པ་ཞིག་རེད། སེམས་ཅན་མཐའ་དག་ལ་སྙིང་ཁོང་རུས་པའི་གཏིང་ནས་བརྩེ་བའི་བློ་ཡག་པོ་ཞིག་སླེབས་པ་ནི་ཧ་ཅང་རྩ་ཆེན་པོ་རེད།
བྱང་ཆུབ་ཀྱི་སེམས་བཟང་པོ་ཡོད་པ་ཡིན་ན་སོ་སོའི་ངོས་ནས་མཐའ་གཅིག་ཏུ་ཕན་སེམས་བྱེད་རྒྱུ་ཞིག་ཡོད་པས་གང་ཟག་འགའ་ཤས་ཀྱིས་ཕྱིན་ཅི་ལོག་གི་གོ་བ་བླངས་ནས་དཔེར་ན། ལྷ་དང་མི་དང་། ལྷ་མ་ཡིན་གྱི་ནང་ནས་སེམས་མ་སྐྱིད་པར་བྱེད་མཁན་དེ་འདྲ་ཡོང་གི་ཡོད་ཀྱང་། དེ་ནི་སྙིང་རྗེ་བའི་ཡུལ་རེད་མ་གཏོགས་ང་ལ་མ་དགའ་བ་བྱེད་ཀྱི་འདུག་ཅེས་ཡལ་བར་དོར་བ་རྩ་བ་ཉིད་ནས་མི་འདུག སེམས་ཅན་ཀུན་ལ་མཐའ་གཅིག་ཏུ་བརྩེ་བའི་བློ་སྐྱེ་རྒྱུ་མ་གཏོགས། སེམས་ཅན་འདི་དང་འདིས་ང་ལ་མ་དགའ་བ་བྱེད་ཀྱི་འདུག ང་ལ་ཁ་གཏོང་གི་འདུག་ཟེར་བ་སོགས་ཁྱོན་ནས་མི་འདུག ད་དུང་ཁ་གཏོང་བ་དང་ངོ་རྒོལ་བྱེད་པ་སོགས་ནི་རྨོངས་པའི་དབང་གིས་བྱས་པ་ཡིན་པས་ལྷག་པར་དུ་སྙིང་རྗེ་ཆེན་པོ་སྐྱེས་པ་ཆགས་ཀྱི་འདུག དེར་བརྟེན། བྱང་ཆུབ་ཀྱི་སེམས་ཀྱི་ཕན་པའི་བསམ་པ་ཟེར་བ་ནི་ཧ་ཅང་རྩ་ཆེན་པོ་རེད། དཔེར་ན། ངོས་རང་ལ་ཆ་བཞག་ན་བྱང་ཆུབ་ཀྱི་སེམས་མང་པོ་སྒོམ་གྱི་ཡོད། ཕལ་ཆེར་བྱང་ཆུབ་ཀྱི་སེམས་ཀྱི་མྱོང་བ་གང་ལ་གང་འཚམ་ཡོད་པ་ཞིག་ཆགས་ཡོད། དེར་བརྟེན། བོད་ནང་དུ་རྒྱ་མི་གུང་བྲན་གྱིས་བོད་པ་ལ་མནར་གཅོད་བཏང་བ་ལྟ་བུ་དང་། བོད་ཀྱི་སྐུ་གསུང་ཐུགས་རྟེན་བཤིག་པ་ལྟ་བུ་བྱུང་སྐབས་ལྷག་པར་དུ་བརྩེ་བའི་བློ་སྐྱེས་པ་མ་གཏོགས་དེ་ལ་ཁོང་ཁྲོ་ཟ་བ་དང་། སེམས་མ་སྐྱིད་པར་བྱེད་པ་ཁྱོན་ནས་མི་འདུག མཐའ་གཅིག་ཏུ་བརྩེ་བའི་བློ་སྐྱེས་པ་ཞིག་རེད། དེ་ནི་ཧ་ཅང་རྩ་ཆེན་པོ་རེད།
ང་ཚོ་བོད་གངས་ཅན་གྱི་ལྗོངས་འཕགས་པ་སྤྱན་རས་གཟིགས་ཀྱི་གདུལ་ཞིང་རེད། ང་ཚོ་བོད་མིར་རང་བཞིན་ལྷན་སྐྱེས་ལ་ཆུང་ཆུང་སྐབས་ནས་འབུ་མ་གསོད་ཟེར་བ་ལྟ་བུ་དང་། སེམས་པ་བཟང་པོ་བྱེད་པ་ཆུང་ཆུང་སྐབས་ནས་གོམས་གཤིས་ཡོད་པ་རེད། ངོས་ཀྱིས་ནམ་རྒྱུན་བརྗོད་ཀྱི་ཡོད། ངོས་རང་ལ་མཚོན་ན་ཆུང་ཆུང་སྐབས་ནས་ཁྱོན་ནས་འབུ་མི་གསོད་པ་ལ་ཡིད་གཟབ་བྱེད་ཀྱི་ཡོད། དགོང་མོ་གཉིད་སྐྱིད་པོ་ཁུགས་པའི་སྐབས་སུ་དུག་སྦྲང་ཙུར་ཟེར་ནས་ཡོང་བའི་སྐབས་སུ་ལག་པ་གཡུག་གི་ཡོད། དེ་མ་གཏོགས་མཐའ་གཅིག་ཏུ་བརྩེ་བའི་བློ་བཤད་མ་ཐག་པར་ལྟར། རྒྱ་མི་རིགས་ང་ཚོ་བོད་པའི་ཐོག་ལ་སྡང་སེམས་བྱེད་མཁན་ལ་ལྷག་པར་དུ་བརྩེ་བའི་བློ་སྐྱེས་ཀྱི་འདུག དེར་བརྟེན། ཞེ་སྡང་ལངས་སའི་ཡུལ་དེ་དག་ལ་བརྩེ་བ་སྐྱེས་སྐབས་ཞེ་སྡང་ལངས་པའི་གཞི་ཁོ་རང་མེད་པ་ཆགས་འགྲོ་གི་འདུག སེམས་ལ་ཞེ་སྡང་མེད་པར་བརྩེ་བའི་བློ་ཡོད་ཚེ་དོན་དམ་པའི་ཞི་བདེའི་བློ་ཡོང་ཐུབ་པ་རེད། ང་ཚོ་ཚང་མས་བྱང་ཆུབ་ཀྱི་སེམས་ལ་དོ་སྣང་དང་། དང་དོད་བྱེད་རྒྱུ་ཧ་ཅང་གལ་ཆེན་པོ་རེད། ཅེས་སོགས་བཀའ་སློབ་སྩལ་རྗེས་སེམས་བསྐྱེད་ཀྱི་ཆོས་འབྲེལ་བཀའ་དྲིན་སྩལ་བ་དང་། མཐར་སློབ་ཕྲུག་ཁག་ཅིག་གི་དྲི་བར་བཀའ་ལན་སྩལ་ཏེ་ཉིན་དང་པོའི་ཆོས་འབྲེལ་ལེགས་པར་གྲུབ་ཡོད།
