༄༅། །ཕྱི་ལོ་ ༢༠༢༣ ཟླ་ ༡༢ ཚེས་ ༢༣ ཉིན་གྱི་སྔ་དྲོ་གནས་མཆོག་རྡོ་རྗེ་གདན་གྱི་བྱང་ཆུབ་མཆོད་རྟེན་ཆེན་མོའི་མདུན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་རྒྱལ་སྤྱིའི་དགེ་འདུན་པའི་གླེང་སྟེགས་ཀྱི་ཚོགས་ཞུགས་པ་ཡོངས་ནས་འཛམ་གླིང་ཞི་བདེའི་སྨོན་ལམ་འཚོགས་ཡོད་པ་རེད།
དེ་ཡང་སྔ་དྲོ་ཆུ་ཚོད་༨།༢༥ཙམ་ལ་རྡོར་གདན་དགའ་ལྡན་འཕེལ་རྒྱས་གླིང་ནས་༸གོང་ས་མཆོག་གོལ་ཧྥུ་རླངས་འཁོར་(Golf cart)ལ་བཞུགས་ཏེ་མཆོད་རྟེན་ཆེན་མོར་ཆིབས་བསྒྱུར་སྐབས་ཆོས་བརྒྱུད་ཁག་གི་བླ་སྤྲུལ་མཁན་པོ་ཁག་ཅིག་དང་། རྒྱལ་སྤྱིའི་དགེ་འདུན་པའི་གླེང་སྟེགས་གོ་སྒྲིག་ཞུ་མཁན་དགའ་ལྡན་ཕོ་བྲང་གི་ལྷོ་ཤར་ཨེ་ཤེ་ཡའི་འབྲེལ་མཐུད་པ་དཔའ་རིས་སྦྱིན་པ་རྒྱ་མཚོ་ལགས་དང་། རྒྱལ་སྤྱིའི་དགེ་འདུན་པའི་གླེང་སྟེགས་གོ་སྒྲིག་ཚོགས་ཆུང་གི་དྲུང་ཆེ་ཝེ་ནེ་ལགས་སོགས་ཀྱིས་སྤོས་སྣེས་མདུན་བསུ་དང་བཅས་གདན་ཞུ་དང་། མཆོད་རྟེན་རྒྱབ་ངོས་ཀྱི་བྱང་ཆུབ་ལྗོན་ཤིང་མདུན་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་ས་སྐྱ་༸གོང་མ་ཁྲི་ཆེན་རིན་པོ་ཆེ་མཆོག་དང་། དགའ་ལྡན་ཁྲི་རིན་པོ་ཆེ། བྱང་རྩེ་ཆོས་རྗེ། ཇོ་ནང་རྒྱལ་ཚབ་རིན་པོ་ཆེ། ཀུན་བདེ་གླིང་རིན་པོ་ཆེ། གླིང་རིན་པོ་ཆེ་སོགས་དང་། གཞན་ཡང་། ཐའེ་ཝན་དང་ཐའེ་ལན་ཌི། འབྲུག སོག་པོ། མེན་མར། ཨུ་རུ་སུ། ཤྲི་ལངྒ་སོགས་ཀྱི་བླ་ཆེན་དབུ་ཁྲིད་རྣམས་༸ཞབས་སྟེགས་སུ་འཁོད་མཚམས། རྒྱལ་སྤྱིའི་ནང་པའི་ལྷན་ཚོགས་ཀྱི་ཚོགས་གཙོ་དགེ་བཤེས་ངག་དབང་བསྟན་འཛིན་རྒྱ་མཚོ་ལགས་ཀྱིས་སྨོན་ལམ་ཆེན་མོ་དབུ་འཛུགས་ཀྱི་གསུང་བཤད་གནང་བ་དང་། བླ་ཆེན་རྣམ་པས་སྣང་གསལ་མཆོད་མེ་ཞལ་འབྱེད་གནང་ཞིང་། རྒྱ་གར་དང་ཤྲི་ལངྒ། ཐའེ་ལན་ཌི། མན་མེར། བྷང་ལ་དྷེ་ཤི། ཁམ་བྷོ་ཌི་ཡ། ཐའེ་ཝན། ཀོ་རི་ཡ། ཉི་ཧོང་། ཝའེ་དུ་ནམ། བོད་བཅས་ཀྱི་དགེ་འདུན་པ་རྣམ་པས་རིམ་པར་འཛམ་གླིང་ཞི་བདེའི་ཆེད་སྨོན་ལམ་གསུང་འདོན་ལེགས་པར་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
དེ་རིང་ཆོས་གྲོགས་རྣམ་པ་ལྷན་རྒྱས་ལ་ཞུ་རྒྱུར། ང་ཚོ་ཚང་མ་སངས་རྒྱས་བཅོམ་ལྡན་འདས་མངོན་པར་རྫོགས་པར་སངས་རྒྱས་སའི་གནས་ཁྱད་པར་ཅན་འདིར་རུབ་རུབ་བྱས་པ་རེད། སྟོན་པའི་བཀའ་རྟེན་འབྱུང་གི་དེ་ཁོ་ན་ཉིད་ཅེས་པ་ནི་ཐུན་མོང་མ་ཡིན་པ་ཞིག་ཆགས་ཡོད། དེ་ལྟ་བུའི་རྟེན་འབྱུང་གི་ལྟ་བ་དེ་རང་དོན་ཡིད་བྱེད་ཀྱི་བློ་དང་འབྲེལ་བ་ཡིན་ན་ཉན་རང་དགྲ་བཅོམ་པའི་གོ་འཕང་ཐོབ་པ་དང་། རྟེན་འབྱུང་གི་ལྟ་བ་དེ་བྱང་ཆུབ་ཀྱི་སེམས་ཀྱིས་ཟིན་ཚེ་བཅོམ་ལྡན་འདས་ཀྱིས་མངོན་དུ་མཛད་པའི་སྒྲིབ་གཉིས་སྤངས་པའི་བྲལ་བའི་ཡོན་ཏན་མངོན་དུ་བྱེད་ཐུབ་པ་ཞིག་ཆགས་ཀྱི་ཡོད། བཤད་མ་ཐག་པ་ལྟར་སེམས་ཀྱི་གནས་ལུགས་ཇི་འདྲ་ཡིན་པ་བརྟག་དཔྱད་བྱ་རྒྱུ་ཧ་ཅང་གལ་ཆེན་པོ་འདུག སངས་རྒྱས་པའི་ཆོས་དང་། དེའི་ནང་ཚན་ནས་དཔལ་ནཱ་ལེནྡྲ་ནས་བརྒྱུད་པའི་ཀླུ་སྒྲུབ་ཡབ་སྲས་སོགས་ཀྱིས་སངས་རྒྱས་པའི་ཆོས་ནི། དད་པ་གཅིག་པུ་མ་ཡིན་པར་སྡུག་བསྔལ་སྤྲོད་པའི་སེམས། མི་ཤེས་པའི་བློ་དེ་དཔྱད་པ་བྱས་ཏེ་ག་ལེར་སེལ་དགོས་པ་གསུངས་ཡོད། དེ་དཔེ་ཆའི་ནང་དུ་བཤད་པ་གཅིག་པུ་མ་ཡིན་པར་ངོས་རང་ལ་ཆ་གཞག་ན་ཡར་ལྷ་སར་སླེབས་ནས་རྒྱན་འཇུག་བློ་ལ་བཟུང་བ་དང་། ཡོངས་འཛིན་རྡོ་རྗེ་འཆང་རྣམ་པའི་བཀའ་དྲིན་ལ་བརྟེན་ནས་སློབ་ཁྲིད་གནང་ཞིང་། དེའི་ཁར་རང་གི་ཉམས་མྱོང་གི་ཐོག་ནས་མིག་མཐོང་ལག་ཟིན་གྱིས་སྟོང་ཉིད་ཀྱི་ལྟ་བས་སེམས་ལ་འགུལ་སྐྱོད་ཐེབས་པ་ཞིག་རེད། དེ་ལྟ་བུའི་སྟོང་ཉིད་ཀྱི་ལྟ་བ་དེ་ཐབས་བྱང་ཆུབ་ཀྱི་སེམས་ཀྱིས་ཟིན་པ་ཞིག་ཡིན་པས་རྣམ་མཁྱེན་རྒྱལ་བའི་གོ་འཕང་ཐོབ་པའི་རྒྱུ་ལ་འགྲོ་གི་ཡོད།
ངོས་ནས་ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་གཙོ་བོར་བྱེད་ཀྱི་ཡོད། ལྷ་ཡི་རྣལ་འབྱོར་སྒོམ་རྒྱུ་ཡོད་ཀྱང་། གཙོ་བོ་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ཡིན། ཁ་ཡོད་ལག་ཡོད་ཀྱིས་སེམས་ལ་འགུལ་སྐྱོད་ཐེབས་པ་ཞིག་ཡོང་གི་འདུག དེར་བརྟེན། དེ་ལྟ་བུའི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་བཏང་བས། ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭཱ་ཧཱ། ཞེས་གསུངས་པ་ལྟར། ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་ལམ། རྣམ་མཁྱེན་གྱི་གོ་འཕང་བཅས་ཐོབ་པར་ནམ་རྒྱུན་ཤེས་རབ་སྙིང་པོ་བཏོན་པ་ལྟར་དོན་ངོ་མའི་ཐོག་ནས་སོ་སོའི་སེམས་རྒྱུད་རིམ་པར་འགྱུར་བ་འགྲོ་དགོས། དཔེར་ན། ཕྱིན་ཅི་ལོག་པའི་རྟོག་པ་མིན་པར་ངོས་ལ་སྟོང་ཉིད་ལ་དགའ་རབ་ཉམས་ལེན་དང་མྱོང་བ་ཡོད། བྱང་ཆུབ་ཀྱི་སེམས་ལའང་དེ་བཞིན་ཉམས་མྱོང་ཡོད། ཉིན་རེ་བཞིན་དུ་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་གཙོ་བོར་སྒོམ་གྱི་ཡོད། དེས་སེམས་ལ་ཧ་ཅང་འགུལ་སྐྱོད་ཐེབས་ཀྱི་འདུག དེར་བརྟེན། སངས་རྒྱས་པའི་ཆོས་ནི་བསམ་བློ་བཏང་ནས་ཡོང་དུས་ཁ་ཡོད་ལག་ཡོད་ཀྱིས་སེམས་ལ་འགྱུར་བ་ཐེབས་པ་ཞིག་རེད། བུདྡྷཾ་ཤ་ར་ཎཾ་གཙྪཱ་མི། ཞེས་བཅོམ་ལྡན་འདས་ལ་དད་པ་གཅིག་པུ་མ་ཡིན་པར། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང༌།། འགྲོ་བའི་སྡུག་བསྔལ་ཕྱག་གིས་མི་སེལ་ལ།། ཉིད་ཀྱི་རྟོགས་པ་གཞན་ལ་སྤོ་མིན་ཏེ།། ཆོས་ཉིད་བདེན་པ་བསྟན་པས་གྲོལ་བར་འགྱུར།། ཞེས་གསུངས་འདུག བཅོམ་ལྡན་འདས་ཀྱིས་ང་ཚོར་ཟབ་པ་དང་རྒྱ་ཆེ་བའི་ལམ་གྱི་འགྲོ་སྟངས་གསུངས་པ་དང་། ཀླུ་སྒྲུབ་ཡབ་སྲས་སོགས་ཀྱིས་ཞིབ་ཚགས་པོའི་ཐོག་གཏན་ལ་ཕབ་ཡོད་པ་འདི་ལ་བསམ་བློ་དགའ་རབ་བཏང་ན་སེམས་ལ་འགུལ་སྐྱོད་ཐེབས་ཀྱི་རེད།
ངོས་ལ་མཚོན་ན་མངོན་པའི་ང་རྒྱལ་ཡིན་སྲིད་ཀྱང་། ཚེ་འདི་ལ་ཚོགས་ལམ་ཐོབ་ཡོད། སྦྱོར་ལམ་དང་ས་དང་པོ། ས་གཉིས་པ་སོགས་ས་དགའ་རབ་བགྲོད་ཐུབ་པ་ཞིག་ལ་རེ་བ་རྒྱག་གི་ཡོད། ཁ་ཡོད་ལག་ཡོད་རེད། སངས་རྒྱས་པའི་ཆོས་ནི་སེམས་ལ་བཟོ་བཅོས་བརྒྱབ་ནས་འགྲོ་དགོས་པ་མ་གཏོགས་སངས་རྒྱས་ལ་སྐྱབས་སུ་མཆི་ཟེར་བ་གཅིག་པུས་འགྲིག་གི་མི་འདུག གཞི་རྐང་ངོས་ཀྱིས་ཆོས་ལུགས་ཚང་མར་གུས་ཞབས་བྱེད་ཀྱི་ཡོད། ཧ་ཅང་ཡག་པོ་རེད། ཡིན་ནའང་། རྒྱུ་མཚན་ཡང་དག་པ་ང་ཚོའི་བློ་རང་ག་བ་དང་སྦྲེལ་ཡོང་སྐབས་འདི་མ་རེད་ཟེར་རྒྱུ་མི་འདུག་ཅེས་བློ་ལ་འཆར་ཡོང་། མདོ་དོན་སྙིང་པོ་དུག་གསུམ་གྱི་ཉོན་མོངས་ཇེ་ཉུང་དུ་གཏོང་ཐུབ་པ་ཞིག་དང་། མཐར་ཉོན་མོངས་པའི་བག་ཆགས་ཤེས་སྒྲིབ་རིམ་པས་མེད་པ་བཟོ་ཐུབ་པ་ཞིག་སྟོོན་པ་བཀའ་དྲིན་ཅན་མངོན་པར་རྫོགས་པར་སངས་རྒྱས་པའི་གནས་མཆོག་འདིར་མཛད་པ་མཛད་ནས་ང་ཚོ་གདུལ་བྱ་ལ་ཟབ་པ་དང་རྒྱ་ཆེ་བའི་ལམ་གསུངས་པ་ཧ་ཅང་སྤུས་དག་པོ་རེད།
དེ་ནས་ངོས་རང་ལ་མཚོན་ན་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་རེད། ཟབ་པ་དང་རྒྱ་ཆེ་བའི་ལམ་གྱི་སྐོར་ལ་ལོ་མང་རིང་སློབ་སྦྱོང་དང་སྒོམ་པའི་མི་ཞིག་ཆགས་ཀྱི་ཡོད། དེ་ལྟ་བུའི་མི་དེ་རིང་བཅོམ་ལྡན་འདས་མངོན་པར་རྫོགས་པར་སངས་རྒྱས་སའི་གནས་ཁྱད་པར་ཅན་འདིར་ཟབ་པ་དང་རྒྱ་ཆེ་བའི་བཅོམ་ལྡན་འདས་ཀྱི་གསུང་གི་སྐོར་ལ་རྗེས་ཟློས་བྱེད་རྒྱུ་བྱུང་བ་ཧ་ཅང་སྐལ་བ་བཟང་པོ་ཡིན། འཛམ་གླིང་འདིར་སྤྱིར་སེམས་ཅན་ཐམས་ཅད། ཡང་སྒོས་མི་ཚང་མ་སྡུག་བསྔལ་མི་འདོད་པ་དང་། བདེ་བ་འདོད་པ་ཤ་སྟག་རེད། ཡིན་ནའང་། སྡུག་བསྔལ་དང་བདེ་བའི་རྒྱུ་རྩད་བཅད་ནས་བསམ་བློ་གཏོང་རྒྱུ་ཉུང་ཉུང་ཆགས་འདུག དཔེར་ན། ང་ཚོ་ནང་པ་ཞིག་གིས་སངས་རྒྱས་ལ་སྐྱབས་སུ་མཆིའོ་ཞེས་སྨོན་ལམ་བཏབ་ཚེ་ང་ཚོའི་སྡུག་བསྔལ་སེལ་བ་དང་། བདེ་བ་སྒྲུབ་པ་བཅོམ་ལྡན་འདས་ལ་གནང་རྒྱུ་ཡོད་པ་ལྟ་བུ་མ་རེད། བཅོམ་ལྡན་འདས་ཀྱིས་གསུངས་པ་རྣམས་ང་ཚོས་ལག་ལེན་བཀལ་ནས་སེམས་མ་དུལ་བ་བཏུལ་བར་བྱས། མ་ཞི་བ་ཞི་བར་བྱས་ཏེ། བདག་ཉིད་བདག་གི་མགོན་གསུངས་པ་ལྟར་བསམ་བློ་བཏང་ཡོང་སྐབས། ངོས་རང་གི་ཉམས་མྱོང་ཐོག་ནས་སེམས་ལ་ཆགས་སྡང་སྐྱེས་རྒྱུ་ཕལ་ཆེར་མེད་པ་ངོས་ལ་ཉམས་མྱོང་ཡོང་གི་ཡོད། བོད་ལ་ཆ་མཚོན་ན་དཀའ་ངལ་མང་པོ་འཕྲད་ཀྱི་ཡོད་པ་རེད། དཀའ་ངལ་སྤྲོད་མཁན་ལ་སྙིང་རྗེ་སྐྱེས་པ་མ་གཏོགས་ཁོང་ཁྲོ་ཁྱོན་ནས་ལང་གི་མི་འདུག དེ་ནི་བཅོམ་ལྡན་འདས་ཀྱི་ཆོས་ཀྱི་བསླབ་བྱས་སེམས་ལ་འགུལ་སྐྱོད་ཐེབས་པ་རེད། དེར་བརྟེན། ཆོས་གྲོགས་ཚང་མས་སངས་རྒྱས་བཅོམ་ལྡན་འདས་ཀྱི་ཆོས་ཀྱི་སློབ་སྦྱོང་བྱས་ཏེ་རྒྱུད་ཐོག་ལ་བཀལ་བ་ཡིན་ན་དངོས་གནས་སེམས་ཀྱི་ཞི་བདེ་ཡོང་ཐུབ་པ་ཞིག་དང་། དེ་ལ་བརྟེན་ནས་ཚེ་རབས་ནས་ཚེ་རབས་སུ་སེམས་རྒྱུད་དུལ་བོ་ཞིག་འགྲོ་ཐུབ་པ་དང་། མཐར། ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭཱ་ཧཱ། གསུངས་པ་ལྟར་ཚོགས་ལམ། སྦྱོར་ལམ། མཐོང་ལམ། སྒོམ་ལམ། མི་སློབ་ལམ། བཅོམ་ལྡན་འདས་ཁོང་གིས་མངོན་དུ་མཛད་པའི་གོ་འཕང་དམ་པ་དེ་ལྟ་བུ་ཞིག་ང་ཚོར་ཐོབ་ཐུབ་པ་ལ་ཚོད་དཔག་བྱེད་ཐུབ་ཀྱི་འདུག དེ་ཚང་མས་དགོངས་པར་བཅངས་རོགས། བཀྲ་ཤིས་བདེ་ལེགས། ཞེས་བཀའ་སློབ་སྩལ་རྗེས་གོལ་ཧྥུ་རླངས་འཁོར་(Golf cart)ལ་བཞུགས་ཏེ་དགའ་ལྡན་འཕེལ་རྒྱས་གླིང་དུ་ཆིབས་བསྒྱུར་བསྐྱངས་ཡོད།
