༄༅། །ཕྱི་ལོ་ ༢༠༢༢ ཟླ་ ༡༢ ཚེས་ ༢༣ ཉིན་གྱི་ཞོགས་པ་ཆུ་ཚོད་ ༨།༠༠ ཙམ་ལྷ་དང་བཅས་པའི་འགྲོ་བ་ཡོངས་ཀྱི་མགོན་སྐྱབས་སྤྱི་ནོར་༸གོང་ས་༸རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་གིས་རྒྱ་གར་བྷི་ཧར་མངའ་སྡེའི་གྷ་ཡ་རྫོང་དུ་ཡོད་པའི་སྟོན་པ་བཅོམ་ལྡན་འདས་རྒྱལ་བ་ཤཱཀྱ་ཐུབ་པ་མངོན་པར་རྫོགས་པར་སངས་རྒྱས་པའི་གནས་མཆོག་རྡོ་རྗེ་གདན་གྱི་མཆོད་རྟེན་ཆེན་མོར་བཞུགས་པའི་སྟོན་པའི་སྐུ་བརྙན་ལ་མཆོད་མཇལ་དང་ཐུགས་སྨོན་གནང་ཡོད་པ་རེད།
དེ་ཡང་ཞོགས་པ་ཆུ་ཚོད་༨།༠༠ ཙམ་ལ་བྷི་ཧར་མངའ་སྡེའི་བདེ་སྲུང་མི་སྣས་ཕེབས་ལམ་སྲུང་སྐྱོབ་ཚགས་ཚུད་དང་བཅས་མགོན་པོ་གང་ཉིད་མཆོག་དགའ་ལྡན་འཕེལ་རྒྱས་གླིང་ནས་ཀོར་ཧྥུ་རླངས་འཁོར་(Golf cart)ལ་བཞུགས་སྟེ་མཆོད་རྟེན་ཆེན་མོའི་དམིགས་བསལ་སྒོ་ཆེན་དུ་ཆིབས་བསྒྱུར་བསྐྱངས་པ་དང་། སྐབས་དེར་ཕེབས་ལམ་གཡས་གཡོན་དུ་རྒྱལ་ཁབ་དང་མི་རིགས་འདྲ་མིན་གྱི་དད་ལྡན་དང་། ཡུལ་སྐོར་བ་སོགས་མི་མང་སྟོང་ཕྲག་བརྒལ་བས་མཇལ་དར་དང་མེ་ཏོག་ཐོགས་ནས་ཕེབས་བསུ་ཞུས་པ་དང་། མཆོད་རྟེན་ཆེན་མོའི་དམིགས་བསལ་སྒོ་ཆེན་དུ་མཆོད་རྟེན་འབྲེལ་ཡོད་འགན་འཛིན་ཁག་གིས་ཕེབས་བསུའི་མཇལ་དར་སྒྲོན་འབུལ་དང་བཅས་རྟེན་གཙོ་སྟོན་པའི་སྐུ་བརྙན་རིན་པོ་ཆེའི་མདུན་དུ་༸ཞབས་སོར་འཁོད་དེ། ཐོག་མར་སྣང་གསལ་མཆོད་མེ་ཞལ་འབྱེད་གནང་རྗེས་རྒྱུན་ཆགས་གསུམ་པ་དང་རྟེན་འབྲེལ་བསྟོད་པ། པཎ་གྲུབ་བཅུ་བདུན་གྱི་གསོལ་འདེབས། ཤེས་རབ་སྙིང་པོ། གསོལ་འདེབས་སྨོན་ཚིག་བདེན་པའི་རྔ་སྒྲ། གུ་རུའི་ཐུགས་དམ་གནད་སྐུལ། ཚེ་རབས་རྗེས་འཛིན། ཐུབ་བསྟན་རིས་མེད་རྒྱས་པའི་སྨོན་ལམ་བཅས་གསུང་འདོན་དང་། མུ་མཐུད་རབ་གནས་དང་བཟང་སྤྱོད་སྨོན་ལམ། བདེན་ཚིག་སྨོན་ལམ་སོགས་གསུང་འདོན་གྱིས་ཐུགས་སྨོན་སྐྱབས་འཇུག་གནང་ཡོད།
མཆོད་མཇལ་ལེགས་པར་གྲུབ་རྗེས་མཆོད་རྟེན་ཆེན་མོའི་མདུན་དུ་གསར་འགོད་པ་ཚོར་བཀའ་སྩལ་དོན། བཅོམ་ལྡན་འདས་སྐུ་ངོ་མས་བྱིན་རླབས་གནང་བའི་གནས་མཆོག་རྡོ་རྗེ་གདན་དུ་བསྟན་རྒྱས་སྨོན་ལམ་བཏོན་པ་ཡིན། བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག ། ཅེས་གསུངས་པ་ལྟར། འཛམ་བུ་གླིང་དེང་སང་ཧ་ཅང་འཁྲུག་པོ་ཞིག་དང་། དངོས་པོ་ཧ་ཅང་ཡར་རྒྱས་ལ་ཕྱིན་ཡོད་ཀྱང་སེམས་ཧ་ཅང་འཁྲུག་པོ་དང་ཆགས་སྡང་ཆེན་པོ་ཡོད་པ་ཞིག་རེད། དེ་ལྟ་བུའི་དུས་ཚོད་འདིར་སྟོན་པ་བཅོམ་ལྡན་འདས་ཀྱི་བྱམས་བརྩེ་དང་རྟེན་འབྱུང་གི་དེ་ཁོ་ན་ཉིད་ཅེས་པའི་བསླབ་བྱ་འདི་ཧ་ཅང་རྩ་ཆེན་པོ་རེད། དེ་རིང་འདིར་རྟེན་མཆོག་དྲུང་དུ་ངོས་ཀྱིས་སྨོན་ལམ་བརྒྱབ་པ་ཡིན། ཞེས་བཀའ་སློབ་སྩལ་བ་དང་། གསར་འགོད་པ་ཞིག་གིས་བོད་ནང་གི་གཞིས་བཞུགས་རྒྱ་ཆེའི་མི་མང་ཕེབས་ཐུབ་ཀྱི་མེད་པས་ཁོང་ཚོར་དམིགས་བསལ་གྱིས་བཀའ་སློབ་ཅིག་སྩོལ་རོགས་ཞུས་པར་མགོན་པོ་གང་ཉིད་མཆོག་གིས་བཀའ་ལན་སྩལ་དོན།
བོད་ནང་གི་མི་རྣམས་ལུས་པོའི་ཆ་ནས་ང་ཚོ་དང་ཁ་ཁ་རེད། ཡིན་ནའང་། ནང་བསམ་བློའི་ཆ་ནས་དད་པ་དང་ཞེན་ཁོག་གཅིག་གྱུར་ཆགས་ཡོད་པ་རེད། དེ་བཞིན་ཧི་མ་ལ་ཡའི་མི་མང་ཆ་ཚང་ཧ་ལས་པའི་དད་པ་དང་ཞེན་ཁོག་ཡོད་པ་ཞིག་རེད། ངོས་ཀྱིས་སྨོན་ལམ་རྒྱག་གི་ཡོད། ཁོ་རྣམ་པས། གངས་རི་ར་བས་བསྐོར་བའི་ཞིང་ཁམས་སུ།། ཞེས་སོགས་ཀྱི་ཚིག་འདི་སོས་པ་བྱས་ཏེ་སེམས་ལ་ཉར་སྡོད་ཀྱི་ཡོད་པ་རེད། ངོས་ཀྱིས་རྟག་པར་སྨོན་ལམ་རྒྱག་གི་ཡོད། རིམ་བཞིན་བདེན་པའི་མཐའ་གསལ་བ་ཞིག་ཏན་ཏན་ཡོང་གི་རེད། ཅེས་བཀའ་སློབ་སྩལ་རྗེས་མཆོད་རྟེན་སྐོར་ལམ་དུ་དད་ལྡན་མི་མང་གིས་མཇལ་ཁ་ཞུས་པ་དང་འབྲེལ་རྡོར་གདན་དགའ་ལྡན་འཕེལ་རྒྱས་གླིང་དུ་ཆིབས་བསྒྱུར་བསྐྱངས་ཡོད།
