༄༅། །ཕྱི་ལོ་ ༢༠༢༢ ཟླ་ ༡༡ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཀོ་རི་ཡའི་ནང་པའི་རྗེས་འཇུག་པ་ཚོས་ཇི་ལྟར་གསོལ་བ་བཏབ་པ་ལྟར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་ཉིན་གཉིས་རིང་གི་དབུ་མ་རྩ་བ་ཤེས་རབ་ཀྱི་བཀའ་ཆོས་དབུ་འཛུགས་མཛད་ཡོད་པ་རེད།
དེ་ཡང་ཞོགས་པ་ཆུ་ཚོད་བརྒྱད་པ་མ་ཟིན་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་ནས་ཀོ་རི་ཡའི་མཁན་པོ་ Jinwook KIM སོགས་ཀྱིས་ཕེབས་བསུ་དང་བཅས་ཐེག་ཆེན་ཆོས་གླིང་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་མཚམས་ཀོ་རི་ཡའི་ཆོས་ཞུ་བ་སེར་སྐྱ་མི་མང་གིས་རང་སྐད་ཐོག་ཤེས་རབ་སྙིང་པོ་གསུང་འདོན་གནང་བ་དང་། དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
དེ་རིང་ཀོ་རི་ཡའི་ཆོས་གྲོགས་ཚོར་ཆོས་འབྲེལ་བྱེད་རྒྱུ་དང་། ཀོ་རི་ཡ་ནི་ཕ་མེས་ནས་ནང་ཆོས་བྱས་ཏེ་དོ་སྣང་ཆེན་པོ་ཡོད་པ་ཞིག་རེད། བར་སྐབས་ངོས་རང་ལྷོ་ཀོ་རི་ཡ་ལ་འབྲེལ་བ་དགའ་རབ་ཆགས་ཀྱི་ཡོད། ལྷོ་ཀོ་རི་ཡ་ལ་ངོས་རང་འཁྱུག་ཙམ་སླེབས་ཀྱང་སླེབས་པ་རེད། གང་ལྟར་མི་མང་ཚོ་སངས་རྒྱས་པའི་ཆོས་ལ་དད་པ་རྩེ་གཅིག་ཏུ་ཡོད་པ་ཞིག་རེད། དེ་རིང་འདིར་ཀོ་རི་ཡའི་ཆོས་གྲོགས་ཚོར་ངོས་ཀྱིས་ཆོས་འབྲེལ་བྱེད་པའི་གོ་སྐབས་བྱུང་བར་ཧ་ཅང་དགའ་བོ་བྱུང་། ཁྱོད་རང་ཚོ་སངས་རྒྱས་པའི་ཆོས་ལ་དམིགས་བསལ་གྱིས་དོ་སྣང་སླེབས་པ་ཧ་ཅང་ཡག་པོ་རེད། རྩ་བ་ཆོས་དད་རང་མོས་དང་། སྤྱི་ཡོངས་ནས་ཆོས་ལ་དད་དང་མི་དད། ཆོས་གང་འདྲ་ཞིག་ལ་དད་མོས་བྱེད་མིན་སོ་སོའི་རང་དབང་རེད། ཆོས་ལུགས་འདྲ་མིན་ཡོད་པའི་ནང་ནས་སོ་སོའི་མོས་པ་གང་ལ་ཡོད་པའི་ཆོས་དེ་བྱེད་རྒྱུ་རེད། འཇིག་རྟེན་བཀོད་པ་པོ་འདོད་མཁན་གྱི་ཆོས་པ་ཚོས་འཇིག་རྟེན་བཀོད་པ་པོ་འདོད་པའི་ལྟ་གྲུབ་ཐོག་ནས་རྩེ་གཅིག་ཏུ་དད་པ་བྱེད་དུས་ཡག་པོ་རེད། གང་ལྟར་ཆོས་ལུགས་ཚང་མར་ལྟ་གྲུབ་སྣ་ཚོགས་ཡོད་ཀྱང་། ཚང་མས་སེམས་པ་བཟང་པོ་བྱེད་དགོས་པ་དང་། མི་ལ་ཕན་སེམས་བྱེད་དགོས་པ་ལས་གནག་སེམས་གནོད་སེམས་བྱས་ཏེ་བསམ་ངན་བཅངས་མི་རུང་བ་གསུང་གི་ཡོད། ཧ་ཅང་ཡག་པོ་རེད། ཅེས་དང་།
ཆོས་ལུགས་འཐེན་འཁྱེར་མི་བྱེད་པར་མཐུན་འབྲེལ་བྱེད་དགོས་པའི་སྐོར་ལ་ལམ་སྟོན་བཀའ་སློབ་སྩལ་དོན། ངོས་རང་ནང་པའི་དགེ་སློང་ཞིག་རེད། ཆོས་ལུགས་ཚང་མར་བརྩི་བཀུར་བྱེད་ཀྱི་ཡོད། ཆོས་ལུགས་འདྲ་མིན་དང་ཆོས་པ་འདྲ་མིན་ངོས་ཀྱིས་ངོ་ཤེས་ཀྱི་ཡོད། དངོས་གནས་སེམས་པ་བཟང་པོ་དང་། སོ་སོ་སྒེར་གྱིས་ཆོག་ཤེས་དང་། སྤྱི་ལ་ཕན་ཐོགས་བྱེད་པའི་བསམ་བློ་ཡོད་པ་ཧ་ཅང་ཡག་པོ་རེད། ཚང་མར་གུས་ཞབས་བྱེད་ཀྱི་ཡོད། དེང་སང་ཆབ་སྲིད་ཀྱི་ཐོག་ནས་འཐེན་འཁྱེར་ཡོད་པ་ཙམ་དུ་མ་ཟད། ཆོས་ལུགས་ཀྱི་ཐོག་ནས་འཐེན་འཁྱེར་བྱེད་པ་ཡོང་གི་ཡོད། དཔེར་ན། ཨ་ཧྥུ་རྒ་ནི་སི་ཐན་གྱི་ནང་དུ་ཆོས་ལུགས་ཀྱི་འཐེན་འཁྱེར་བྱེད་པ་ལྟ་བུ་རེད། དེ་ནི་ཧ་ཅང་བློ་ཕམ་པོ་ཞིག་རེད། ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་མི་ལ་ཕན་སེམས་བྱེད་པ་དང་། སྤྱི་ལ་ཞབས་འདེགས་སྒྲུབ་རྒྱུ་ནི་ཆོས་ལུགས་ཚང་མས་གསུང་གི་འདུག དེར་བརྟེན། ཆོས་ལུགས་ཚང་མ་མཐུན་པོ་བྱེད་རྒྱུ་ནི་ཧ་ཅང་གལ་ཆེན་པོ་རེད། ངོས་རང་ལ་མཚོན་ན་ནང་པ་ཡིན་ཀྱང་། ཡེ་ཤུ་ཆོས་ཁང་། ཁ་ཆེའི་ཆོས་ཁང་། ཧིན་དྷུའི་ཆོས་ཁང་སོགས་ལ་འགྲོ་བཞིན་ཡོད་ལ། དེའི་མཚོན་པའི་ཆོས་ལུགས་ཚང་མར་གུས་ཞབས་བྱེད་བཞིན་ཡོད། ཅེས་དང།
དེ་ནས་སྟོང་པ་ཉིད་ཀྱི་ལྟ་བ་དང་། བྱམས་སྙིང་རྗེའི་སྐོར་ལ་བཀའ་སློབ་སྩལ་དོན། དེ་རིང་འདིར་ཀོ་རི་ཡའི་ཆོས་གྲོགས་ཚོ་གཙོ་བོར་གྱུར་པའི་མི་མང་ལ་ནང་ཆོས་ངོ་སྤྲོད་ཀྱི་གོ་སྐབས་བྱུང་བ་ངོས་རང་ཧ་ཅང་དགའ་བོ་བྱུང་། ཀོ་རི་ཡའི་མཁན་པོས་མཚོན་པའི་དམིགས་བསལ་གྱིས་ཐུགས་སྣང་གནང་བ་དེ་ལ་ཐུགས་རྗེ་ཆེ་ཞུ་རྒྱུ་ཡིན། ཀོ་རི་ཡའི་ཆོས་གྲོགས་མཁན་པོ་ཁོང་ལོ་མང་པོའི་རིང་ངོ་ཤེས་རེད། དེ་རིང་ཡང་བསྐྱར་འདིར་ཐུག་ནས་ཆོས་འབྲེལ་བྱེད་པའི་གོ་སྐབས་བྱུང་བ་ལ་ཧ་ཅང་གི་དགའ་བོ་བྱུང་། ཐུགས་རྗེ་ཆེ་ཞུ་རྒྱུ་ཡིན།
རྒྱུད་ལས།
སྲིད་པ་ངོ་བོ་ཉིད་ཀྱིས་དག།
ངོ་བོ་ཉིད་ཀྱིས་སྲིད་བྲལ་བྱས།།
རང་བཞིན་དག་པའི་སེམས་ལྡན་པའི།།
སྲིད་པ་དམ་པ་བྱེད་པར་འགྱུར།།
ཞེས་པའི་ཚིག་འདི་ཧ་ཅང་གནད་འགག་ཆེན་པོ་རེད། དེ་རིང་འདི་ཞུ་འདོད་བྱུང་། སྲིད་པ་ངོ་བོ་ཉིད་ཀྱིས་དག། ཅེས་པས་སྲིད་པ་ངོ་བོ་ཉིད་ཀྱིས་གྲུབ་མེད་པ་དང་། སྲིད་པ་ངོ་བོ་ཉིད་ཀྱིས་མ་གྲུབ་པ་ཞིག་ཡིན་ཡང་། ང་ཚོའི་བློར་ཆོས་གང་དང་གང་སྣང་ཡང་ངོ་བོ་ཉིད་ཀྱིས་གྲུབ་པར་སྣང་ཞིང་། སྣང་བ་ལྟར་དུ་ངོ་བོ་ཉིད་ཀྱིས་གྲུབ་པར་ཞེན་པའི་བློ་དེས་ཆགས་སྡང་བསྐྱེད་ཅིང་། བློ་དེས་ཕོང་གི་ཡོད། དེར་བརྟེན། ཆོས་རྣམས་ངོ་བོ་ཉིད་ཀྱིས་གྲུབ་པའི་སྟོང་པ་ལ་བསམ་བློ་འཁོར་རྒྱུ་ཧ་ཅང་གལ་ཆེན་པོ་རེད།
ངོ་བོ་ཉིད་ཀྱིས་སྲིད་བྲལ་བྱས།། ཞེས་རང་བཞིན་གྱིས་གྲུབ་པའི་སྟོང་པ་ཤེས་ཏེ་བསམ་བློ་བཏང་བ་ཡིན་ན། ཨ་འཐས་ཀྱི་འཛིན་པ་ཤུགས་ཆུང་དུ་འགྲོ་བ་དང་། དེའི་རྐྱེན་གྱིས་ཆགས་སྡང་གི་བློ་ཤུགས་ཆུང་དུ་འགྲོ་གི་ཡོད། ངོས་ཀྱིས་ངོ་ཤེས་པའི་ཚད་རྡུལ་དངོས་ཁམས་རིག་པ་བ་ཁ་ཤས་ཀྱིས་ཕྱི་ནང་གི་ཆོས་གང་དང་གང་ཡིན་ཡང་། ང་ཚོར་དོན་གྱི་ངོས་ནས་ཡོད་པར་སྣང་བ་དེ་སྣང་བ་ལྟར་དུ་གྲུབ་ཡོད་པ་མ་རེད། ཚང་མ་བློ་ཡིས་བཅོས་པ་ཙམ་རེད། ཅེས་བརྗོད་ཀྱི་འདུག ང་ཚོའི་དབུ་མའི་གཞུང་དུ། ཆོས་གང་དང་གང་ཡིན་ཡང་དོན་གྱི་ངོས་ནས་ཡོད་པར་སྣང་གི་ཡོད་ཀྱང་། སྣང་བ་ལྟར་དུ་གྲུབ་པ་མེད། ཅེས་གསུངས་ཡོད། དེའི་གནད་འགག་ནི་དོན་གྱི་ངོ་ནས་ཡོད་པ་ཞིག་སྣང་སྐབས་དེ་ལ་དམིགས་ནས་ཡིད་དུ་འོང་བ་ཞིག་སྣང་ན་ཆགས་པ་སྐྱེས། ཡིད་དུ་མི་འོང་བ་ཞིག་སྣང་ན་སྡང་སེམས་སྐྱེས་པའི་ཆགས་སྡང་གི་བློ་ཡོང་གི་ཡོད་པས་ཆགས་སྡང་གི་བློའི་གཞི་མ་ནི་ཨ་འཐས་ཀྱི་འཛིན་པས་བྱེད་ཀྱི་ཡོད།
མདོར་ན། སྲིད་པ་ངོ་བོ་ཉིད་ཀྱིས་དག། ངོ་བོ་ཉིད་ཀྱིས་སྲིད་བྲལ་བྱས།། ཞེས་པའི་དོན་ནི། ཆོས་རྣམས་རང་བཞིན་གྱིས་གྲུབ་པའི་སྟོང་པའི་ངོ་བོ་ཡག་པོ་ཤེས་པ་ཡིན་ན། ཆོས་རྣམས་སྣང་བ་ལྟར་དུ་ངོ་བོ་ཉིད་ཀྱིས་གྲུབ་པར་འཛིན་པའི་འཛིན་པ་དེ་ལ་གནོད་པའི་སྒོ་ནས་བདེན་འཛིན་ལ་གནོད་ཀྱི་ཡོད། དེ་ལྟ་བུའི་ཆོས་རྣམས་སྣང་བ་ལྟར་དུ་གྲུབ་མེད་པ་ལ་བཏགས་དོན་བཙལ་བ་ཡིན་ན་མིང་བརྡས་གཞག་ཙམ་མ་གཏོགས་དོན་གྱི་ངོས་ནས་གྲུབ་པ་རྡུལ་ཙམ་མེད་པ་བློ་ལ་ཤར་ཡོང་སྐབས་ཆགས་སྡང་གི་བློ་མི་སྐྱེ་པ་ཆགས་ཀྱི་ཡོད།
རང་བཞིན་དག་པའི་སེམས་ལྡན་པའི།། སྲིད་པ་དམ་པ་་་་། ཞེས་ཆོས་རྣམས་རང་བཞིན་གྱིས་གྲུབ་པའི་སྟོང་པར་ངེས་པའི་བློ་དེས་བདེན་འཛིན་ལ་ཐད་ཀར་གནོད་པའི་སྒོ་ནས་ཆགས་སྡང་གི་བློ་ཤུགས་ཆུང་དུ་འགྲོ་བ་དང་། དེ་དང་ཆབས་ཅིག་རང་གཞན་སུ་ཡིན་ཡང་ཨ་འཐས་ཀྱི་འཛིན་པས་ཕོང་ཡོང་བ་ཡིན་པས་ནམ་མཁའི་མཐའི་གཏུགས་པའི་སེམས་ཅན་ཐམས་ཅད་འཁྲུལ་བའི་གཞན་དབང་དུ་མ་འགྲོ་བ་ཞིག་བྱུང་ནས་བསམ་པའི་བརྩེ་བའི་བློ་དང་། དེ་ལྟ་བུའི་ཟབ་པ་སྟོང་ཉིད་ལ་བསམ་བློ་འཁོར་ཞིང་། དེས་དྲངས་ནས་གཞན་རྨོངས་པའི་གཞན་དབང་དུ་གྱུར་པ་སེམས་ཅན་རྣམས་ལ་སྙིང་ནས་མི་བཟོད་པའི་བརྩེ་བའི་བློ། སྟོང་ཉིད་ཀྱི་ལྟ་བས་བདེན་འཛིན་ལ་ཨ་འཐས་ཀྱི་འཛིན་པ་ཤུགས་ཆུང་དུ་གཏོང་བ་དང་ཆབས་ཅིག་བདེན་འཛིན་གྱི་གཞན་དབང་དུ་སོང་བའི་སེམས་ཅན་རང་དང་རང་འདྲ་བ་རྣམས་སྡུག་བསྔལ་མི་འདོད་པ་དང་བདེ་བ་འདོད་པ་གཅིག་མཚུངས་ཡིན་པས་དེ་ལ་མི་བཟོད་པའི་སྙིང་རྗེའི་བློ་བཅས་སླེབ། དེའི་ཐབས་ཤེས་ཀྱི་ཉམས་ལེན་ཚང་མ་འདིའི་སྒང་ནས་ཡོང་གི་འདུག དེ་ལྟ་བུའི་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ཀྱི་ཉམས་ལེན་བྱེད་སྐབས་ཐེག་ཆེན་དང་ཐེག་དམན་གང་ལ་ཆ་བཞག་ནའང་། ཚོགས་ལམ། སྦྱོར་ལམ། མཐོང་ལམ། སྒོམ་ལམ། བཅས་རིམ་བཞིན་མངོན་དུ་བྱེད་ཐུབ།
དེར་བརྟེན། རང་བཞིན་དག་པའི་སེམས་ལྡན་པའི།། སྲིད་པ་དམ་པ་བྱེད་པར་འགྱུར།། ཞེས་ཆོས་གཟུགས་ཀྱི་སྐུ་ཟུང་དུ་སྦྲེལ་བའི་རྒྱལ་བའི་གོ་འཕང་ཐོབ་ཐུབ་པ་རེད། ཅེས་གསུངས་པ་རེད། སྲིད་པ་ངོ་བོ་ཉིད་ཀྱིས་མ་གྲུབ་པ་དེ་རྩ་ཆེན་པོ་དང་་བཀའ་དྲིན་ཆེན་པོ་རེད་འདུག གལ་སྲིད། སྲིད་པ་ངོ་བོ་ཉིད་ཀྱིས་གྲུབ་ཡོད་ན་ང་ཚོའི་ཨ་འཐས་ཀྱི་འཛིན་པ་མེད་པ་བཟོ་ཐབས་མི་འདུག སྲིད་པ་ངོ་བོ་ཉིད་ཀྱིས་མ་གྲུབ་པ་ལ་བསམ་བློ་ཡག་པོ་བཏང་བ་ཡིན་ན་ཆགས་སྡང་གི་ཨ་འཐས་ཀྱི་འཛིན་པ་ཤུགས་ཆུང་དུ་འགྲོ་བ་དང་། ཆོས་རྣམས་རང་བཞིན་གྱིས་གྲུབ་པའི་སྟོང་པ་ཟེར་བ་ནི་དངོས་པོའི་གཤིས་ལུགས་བཤད་པ་ཙམ་དུ་མ་ཟད། ང་ཚོའི་སེམས་མ་རུངས་པ་དེ་ལས་རུང་དུ་བྱེད་པའི་གནད་འགག་དེར་ཐུག་འདུག ཅེས་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ཉམས་སུ་ལེན་པའི་རིམ་པའི་སྐོར་ལ་བཀའ་སློབ་ཟབ་མོ་སྩལ་བ་དང་།
གཞན་ཡང་། ལྷོ་ཀོ་རི་ཡར་མི་མང་འཚང་ཁའི་ཁྲོད་འདས་གྲོངས་སོང་པའི་ནང་མི་རྣམས་ལ་དམིགས་ཏེ་བཀའ་སློབ་སྩལ་དོན། གསར་འགྱུར་དུ་ཐོན་གསལ་ལ། ཉེ་ཆར་ལྷོ་ཀོ་རི་ཡར་མི་མང་ཧ་ཅང་འཚང་ཁ་བརྒྱབ་ནས་མི་ཁ་ཤས་འདས་གྲོངས་དང་། གང་ལྟར་ཤི་རྨས་སོང་བའི་གནས་ཚུལ་བཤད་ཀྱི་འདུག དེ་ཐབས་སྐྱོ་པོ་ཞིག་རེད། ང་ཚོ་ཚང་མས་འདས་གྲོངས་ཕྱིན་པ་ཚོའི་ནང་མི་རྣམས་ལ་སེམས་གསོའི་འཚམ་འདྲི་དང་། དེ་ལྟ་བུའི་གནས་ཚུལ་བྱུང་བ་ལ་བློ་ཕམ་པོ་བྱུང་། ང་ཚོའི་ནང་པའི་ཡུལ་གྲུ་ཞིག་ཏུ་དོན་དག་ཆུང་ས་ཞིག་གི་ཐོག་ནས་འཁྲུག་པ་བརྒྱབ་པ་ནི་ནང་པ་སྤྱིའི་ངོས་ནས་བཤད་ན་བློ་ཕམ་གྱི་རང་བཞིན་ཞིག་རེད། འདས་གསོན་ཚང་མར་ང་ཚོས་སྨོན་ལམ་རྒྱག་རྒྱུ་གལ་ཆེན་པོ་རེད། ཅེས་དང་།
མཐར། ཐེངས་འདིའི་བཀའ་ཆོས་ཀྱི་གཞང་དབུ་མ་རྩ་བ་ཤེས་རབ་ཀྱི་གཞུང་དང་མཛད་པོ་པོའི་སྐོར་ནས་བཀའ་སློབ་སྩལ་དོན། དཔལ་ནཱ་ལེནྡྲ་ནས་བརྒྱུད་པའི་ནང་པའི་མཁས་པ་དང་། ལྷག་པར་དུ་མགོན་པོ་ཀླུ་སྒྲུབ་ཀྱིས་དངོས་གནས་ཟབ་པ་དང་རྒྱ་ཆེ་བའི་ལམ་མཐའ་ཡས་པ་རིགས་པའི་ལམ་ལ་བརྟེན་ནས་འགྲེལ་བཤད་སྐྱོན་ཡོང་གི་ཡོད། དེར་བརྟེན། དཔལ་ནཱ་ལེནྡྲའི་མཁས་པའི་དབང་པོ་ཚོ་དཔལ་མགོན་འཕགས་པ་ཀླུ་སྒྲུབ་ཀྱི་རྗེས་སུ་འབྲང་ནས་དབུ་མ་རྩ་བ་ཤེས་རབ་དང་། རིན་ཆེན་ཕྲེང་བའི་ཐོག་ནས་ཟབ་པ་དང་རྒྱ་ཆེ་བའི་ལམ་གྱི་རིམ་པ་ཉམས་ལེན་བྱེད་དུས། ལུང་ལ་བརྟེན་ནས་འགྲོ་བ་མ་ཡིན་པར་རིགས་པ་ལ་བརྟེན་ནས་འགྲོ་བ་ཡིན་པས་ཧ་ཅང་རྩ་ཆེན་པོ་རེད། དཔལ་མགོན་འཕགས་པ་ཀླུ་སྒྲུབ་དངོས་གནས་བསྟན་པ་འདི་ལ་སྟོན་པ་གཉིས་པ་ལྟ་བུ་ཆགས་ཡོད། དེར་བརྟེན། དུས་ནས་དུས་སུ་དབུ་མ་རྩ་བ་ཤེས་རབ་དང་། དབུ་མ་རིན་ཆེན་ཕྲེང་བ་ཏོག་ཙམ་རེ་བཀླགས་པ་ཡིན་ན་ཡག་པོ་ཡོང་གི་རེད། འདིར་དམིགས་གསལ་རྩ་བ་ཤེས་རབ་ཀྱི་འགྲེལ་བཤད་ཞུ་དགོས་པ་མི་འདུག རྒྱུན་དུ་དཔེ་ཆ་སྔས་མགོར་བཞག་ནས་བལྟ་རྒྱུ་ཧ་ཅང་གལ་ཆེན་པོ་རེད། མཁྱེན་སོང་ངམ། གཞུང་ཆེན་རྣམས་ཐག་རིང་པོར་མ་བཞག་པར་མཚམས་དང་མཚམས་སུ་བལྟ་རྒྱུ་ཡོད་པ་ཞིག་དང་། དབུ་མ་འཇུག་པ་དང་འཇུག་པ་རང་འགྲེལ་བཅས་ལ་གོམས་འདྲིས་ཡག་པོ་བྱུང་ན་ཧ་ཅང་ཕན་ཐོགས་ཡོད། ངོས་རང་ལ་མཚོན་རྩ་བ་ཤེས་རབ་དང་། དབུ་མ་འཇུག་པ་དང་འཇུག་པ་རང་འགྲེལ་ཉིན་ལྟར་ཏོག་ཙམ་ཏོག་ཙམ་བཀླགས་ཀྱི་ཡོད། དེ་ཚང་མས་དགོངས་པར་བཅིངས་རོགས། བཀྲ་ཤིས་བདེ་ལེགས། ཞེས་སོགས་བཀའ་སློབ་སྩལ་རྗེས་ཉིན་དང་པོའི་ཆོས་འབྲེལ་ལེགས་པར་གྲུབ་སྟེ་ཕོ་བྲང་དུ་ཆིབས་བསྒྱུར་བསྐྱངས་ཡོད།
