༄༅། །ཕྱི་ལོ་ ༢༠༢༡ ཟླ་ ༤ ཚེས་ ༡༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་སྔར་ལས་བཟང་བ་ཞིག་དང་བྱམས་བརྩེའི་བདག་ཉིད་བགྱིས་ཞེས་པའི་ཚོགས་པས་གསོལ་འདེབས་གོ་སྒྲིག་ཞུས་དོན་ལྟར་དྲ་ལམ་བརྒྱུད་རྒྱ་གར་གྱི་སྔ་དྲོའི་ཆུ་ཚོད་༩ ནས་ ༡༠ བར་བཅོས་བསྒྱུར་མཁན་དང་ཤུགས་རྐྱེན་ཆེ་བའི་ན་གཞོན་བཅུ་གཉིས་ལ་བཀའ་ལན་སྩལ་ཡོད་པ་རེད།
དེ་ཡང་ཞོགས་པའི་ཆུ་ཚོད་དགུ་བ་མ་ཟིན་ཙམ་ལ་གཟིམ་ཆུང་ནས་བཀའ་སློབ་གནང་ཡུལ་དུ་ཆིབས་བསྒྱུར་གྱིས་བཞུགས་ཁྲིར་༸ཞབས་སོར་འཁོད་འཚམས་གོ་སྒྲིག་ཚོགས་པའི་འཐུས་མི་ལྕམ་སོ་ཧྥེ་ཡ་ལགས་ཀྱིས་འཚམ་འདྲི་དང་འབྲེལ་འཛམ་གླིང་སྔར་ལས་བཟང་བ་ཞིག་དང་བྱམས་བརྩེའི་བདག་ཉིད་བགྱིས་ཞེས་པའི་ཚོགས་པ་ངོ་སྤྲོད་དང་། ཚོགས་པའི་ངོས་ནས་འཛམ་གླིང་གཅིག་གྱུར་གྱི་འགན་ཁུར་ཐོག་ལ་སེམས་ཁུར་བླངས་ནས་མཉམ་འབྲེལ་རྒྱལ་ཚོགས་ཀྱི་ལམ་སྟོན་ཐོག་གང་ཐུབ་ཤར་བསྐྱོད་བྱེད་བཞིན་པ་དང་། ལས་འགན་གཞན་གཅིག་ནི་འཛམ་གླིང་གི་ཁོར་ཡུག་བསྐྱར་གསོ་བྱེད་རྒྱུ་དེ་ཡིན། དེ་ལྟ་བུའི་ཀུན་སློང་ཡོད་ནའང་ང་ཚོར་སེམས་ཤུགས་གོང་འཕེལ་དུ་འགྲོ་བའི་སྙིང་སྟོབས་ཞན་པ་ལྟ་བུ་མཐོང་གི་འདུག མ་འོངས་པར་གོ་ལ་འདི་ཚད་ལྡན་ཡོང་བའི་ཆེད་དུ་མཉམ་མཐུན་དང་བྱམས་སྙིང་རྗེ་དགོས་ཀྱི་ཡོད་པ་རེད། ཡིན་ནའང་འགྲན་བསྡུར་ཤུགས་ཆེན་པོ་སླེབས་དུས་ང་ཚོར་དཀའ་ངལ་ཡོང་གི་འདུག སྤྱིར་བཏང་མིའི་ཀླད་པ་ནི་བྱམས་བརྩེའི་རང་བཞིན་ཅན་དང་སྤྱི་ཚོགས་ལ་བརྟེན་པའི་གཤིས་ཀ་ཅན་ཆགས་ཡོད་པ། དེ་གཞན་ཕན་ཅན་དང་གཅིག་ཕན་གཅིག་གྲོགས་བྱེད་མཁན་ཡིན་པ་ཚན་རིག་པས་གསུང་བཞིན་ཡོད་པ་རེད། དེ་ནི་ནད་ཡམས་ཀྱི་དཀའ་ངལ་འདིའི་ནང་གདོང་ལེན་བྱེད་མཁན་སྨན་པ་དང་ཆེད་ལས་པ་གཞན་པས་སོ་སོ་བློས་བཏང་ནས་དཀའ་ངལ་མང་པོར་གདོང་ལེན་བྱས་པ་ཡིས་ར་སྤྲོད་བྱེད་ཐུབ་པ་རེད། དེར་བརྟེན། རྒྱ་གར་གྱི་སེམས་དཔའ་ཆེན་པོ་གྷན་དྷི་ཡིས་འཛམ་གླིང་འདིར་འགྱུར་བ་ཞིག་མཐོང་འདོད་ཡོད་ཚེ་འགྱུར་བ་དེ་དང་པོ་རང་ཉིད་ནས་མགོ་རྩོམ་དགོས་གསུངས་པ་རེད། ༸གོང་ས་མཆོག་ལ་ཞུ་རྒྱུར་དུས་རབས་ཉི་ཤུ་རྩ་གཅིག་འདིའི་ནང་དུ་ང་ཚོར་དཀའ་ངལ་དང་ཕན་ཚུན་མི་མཐུན་པ་ཡོད་པ། འཛམ་གླིང་ནང་འདྲ་མཉམ་མིན་པ། འཛམ་གླིང་ཞི་བདེ་མེད་པ། ང་ཚོ་ཚང་མས་ཞི་བདེ་འདོད་པ་སོགས་ཀྱི་ཐབས་ལམ་ནི་གཞན་ཕན་དང་སྙིང་རྗེ་ཡིན་པའི་སྐོར་ལ་བཀའ་སློབ་ཅིག་གནང་རོགས་གནང་། ཞེས་གསུང་བཤད་གྲུབ་མཚམས་༸གོང་ས་མཆོག་གིས་བཀའ་སློབ་སྩལ་དོན།
ངོས་རང་ལོ་ ༨༦ ཆགས་ཡོད། ངོས་ཀྱི་མི་ཚེ་གང་བོའི་ཉམས་མྱོང་ཞུས་པ་ཡིན་ན། འཛམ་གླིང་དམག་ཆེན་དང་པོ་དང་གཉིས་པ། དེ་བཞིན་ས་ཆ་མང་པོར་ཕན་པོར་གསོད་རེས་དང་དྲག་རྩུབ་མང་པོ་བྱུང་བ་རེད། དེ་ཡི་མཐའ་མའི་གྲུབ་འབྲས་ནི་ཅི་ཞིག་བྱུང་བ་རེད་དམ་ཞེ་ན་མི་ལ་སྡུག་བསྔལ་མང་བ་དང་། ཁོང་ཁྲོ་ཤུགས་ཆེ་རུ་བཏང་བ་མ་གཏོགས་གང་ཡང་མེད། ཡུ་རོབ་སྤྱི་མཐུན་རྒྱལ་ཁབ་ནང་ཡོད་པའི་རྒྱལ་ཁབ་ཁ་ཤས་ཀྱིས་དམག་ཆེན་གཉིས་པའི་སྐབས་སུ་དགྲ་བྱས་ཏེ་འཛིང་རེ་བྱས་ཡོད་པ་རེད། འདས་པའི་སྐབས་སུ་སོ་སོའི་ཁྱིམ་མཚེས་རྒྱལ་ཁབ་དགྲར་བཟུང་བ་ཞིག་ཕྱིས་སུ་ཕན་ཐོགས་མེད་པ་ཤེས་ནས་ཡུ་རོབ་སྤྱི་མཐུན་རྒྱལ་ཁབ་བཙུགས་པ་རེད། དཔེར་ན། ཧྥ་རིན་སི་དང་འཇར་མན་གཉིས་དམག་ཆེན་གཉིས་པའི་སྐབས་སུ་ཕན་ཚུན་དགྲ་བྱས་པ་དང་། ཕྱིས་སུ་ཧྥ་རན་སིའི་Charles de Gaulle (1890-1970)དང་། འཇར་མན་གྱི་ Konrad Adenauer (1876-1967)གཉིས་ཀྱིས་འགན་ཁུར་ཏེ་ཡུ་རོབ་ནང་དུ་སྤྱི་མཐུན་ཚོགས་པ་ཞིག་གསར་གཏོད་བྱེད་རྒྱུའི་བསམ་བློ་བཏང་བ་རེད། འདས་པའི་ལོ་རྒྱུས་ནང་དུ་རྒྱལ་ཁབ་ཕན་ཚུན་གྱིས་གསོད་རེས་ཅི་ཙམ་བྱས་ཡོད་པ་རེད་དམ། ཁོང་ཚོས་སྐབས་བབ་ཀྱི་གནས་སྟབས་ལ་བསམ་བློ་བཏང་ནས་ཡུ་རོབ་སྤྱི་མཐུན་རྒྱལ་ཁབ་བྱུང་བ་རེད། ངོས་རང་ལ་ཆ་བཞག་ན་ཕན་ཚུན་མཐུན་འབྲེལ་མཉམ་གནས་ལ་ཡི་རངས་བྱེད་མཁན་ཞིག་ཡིན་པས་ཡུ་རོབ་ཙམ་མིན་པར་འཛམ་གླིང་ཤར་ནུབ་གང་དུ་ཡིན་ནའང་གོ་ལ་གཅིག་མཚུངས་འདིའི་ཁུངས་སུ་གཏོགས་པ་རེད། དེར་བརྟེན། འཛམ་གླིང་སྤྱི་ཡོངས་ཀྱི་མི་མང་གི་བདེ་སྡུག་དང་འཛམ་གླིང་སྤྱི་ལ་ཁྱབ་པའི་སེམས་ཁུར་ཞིག་དགོས་པ་ཧ་ཅང་གལ་ཆེན་པོ་རེད། དེང་སང་སོ་སོའི་རྒྱལ་ཁབ་དང་སོ་སོའི་གླིང་ཕྲན་ཙམ་གྱི་བསམ་བློ་བཏང་ན་དེས་ལྡེང་གི་མེད་པ་དང་། དེ་ནི་དངོས་ཡོད་གནས་ཚུལ་དང་མཐུན་པ་ཞིག་ཆགས་ཀྱི་མེད། དངོས་ཡོད་གནས་ཚུལ་ལ་ཕན་ཚུན་ལྟོས་ནས་གྲུབ་ཡོད་པ་ཞིག་བྱུང་ཡོད། དཔེར་ན། འཛམ་གླིང་གི་དཔལ་འབྱོར་གྱི་གནས་སྟངས་ལ་ཆ་བཞག་ན་ཧ་ཅང་ལྟོས་གྲུབ་ཆགས་ཡོད།
གནས་ཚུལ་གསར་པ་ཞིག་ལ་འཛམ་གླིང་གི་ཚ་དྲོད་ཧ་ཅང་ཆེ་རུ་འགྲོ་བཞིན་པའང་སྤྱི་ལ་ཁྱབ་པའི་དཀའ་ངལ་ཞིག་ཏུ་གྱུར་ཡོད། དེ་ལྟ་བུའི་དཀའ་ངལ་ལ་གཞིགས་ནས་སོ་སོའི་རྒྱལ་ཁབ་དང་སོ་སོའི་གླིང་ཕྲན། སོ་སོའི་མི་རིགས་རྐྱང་བ་མིན་པར་མི་སྤྱིའི་བདེ་སྡུག་དང་། འཛམ་གླིང་སྤྱི་ཡོངས་ཀྱི་བདེ་འཇགས་ལ་བསམ་བློ་གཏོང་དགོས་པ་ཧ་ཅང་གལ་ཆེན་པོ་རེད། གཞི་རྩའི་ང་ཚོ་ཚང་མ་མི་ཡིན་པ་གཅིག་མཚུངས་ཆགས་ཡོད། གདོང་པའི་པགས་པ་དང་གཟུགས་པོའི་དབྱིབས་མི་འདྲ་བའི་ཁྱད་པར་ཅུང་ཟད་ཡོད་ཀྱང་། མིའི་སེམས་ཚོར་དང་ཀླད་པ། རྣམ་པར་ཤེས་པ་ཡོད་པ་གཅིག་མཚུངས་ཆགས་ཡོད། འདོད་ཀྱང་མ་འདོད་ཀྱང་གོ་ལ་འདིར་ང་ཚོ་མཉམ་དུ་འདུག་དགོས་པ་དངོས་ཡོད་གནས་ཚུལ་ཆགས་ཡོད། དེར་བརྟེན། སྤྱི་ལ་ཁྱབ་པའི་སེམས་ཁུར་དགོས་ཀྱི་ཡོད། ངོས་ཀྱི་དམ་བཅའ་གཅིག་ནི་འཛམ་གླིང་མི་གྲངས་དུང་ཕྱུར་བདུན་ཅུ་ཚང་མར་གཅིག་མཚུངས་ཀྱི་འདུ་ཤེས་འཛིན་རྒྱུ་གོང་འཕེལ་གཏོང་རྒྱུ་དེ་ཆགས་ཡོད། ངོས་རང་བོད་ལ་ཡོད་དུས་བོད་པ་ཡིན་བསམ་པ་དང་བོད་པ་ཞེས་པའི་བསམ་ཚུལ་ཤུགས་ཆེན་པོ་ཡོད་པ་དང་། བཙན་བྱོལ་དུ་སླེབས་ནས་མི་མང་པོར་ཐུག་པ་དང་། ཆོས་ལུགས་མི་འདྲ་བ་དང་མི་རིགས་མི་འདྲ་བ་མང་པོར་ཐུག་ཡོང་སྐབས་རང་གི་ཉམས་མྱོང་གི་ཐོག་ནས་ང་ཚོར་ཁྱད་པར་མེད་པ་ར་འཕྲོད་པ་བྱུང་སོང་། གལ་སྲིད་མིའི་ནང་དུ་ལྷ་མོ་ཡིན་པ་མིག་གསུམ་ཡོད་པ་ལྟ་བུ་ཞིག་ཡོད་ན་དམིགས་བསལ་རེད་མ་གཏོགས་ང་ཚོ་ཚང་མ་གཅིག་མཚུངས་རེད། གལ་ཆེ་ཤོས་ནི་འཛམ་གླིང་སྤྱི་ཡོངས་ཀྱི་བསམ་བློ་དང་འགྲོ་བ་མི་སྤྱི་ལ་སེམས་ཁུར་བྱེད་དགོས་པ་གལ་ཆེན་པོ་རེད་མ་གཏོགས་སོ་སོའི་རྒྱལ་ཁབ་དང་སོ་སོའི་མི་རིགས་ལ་བསམ་བློ་རྐྱང་བ་བཏང་ན་དངོས་ཡོད་གནས་ཚུལ་དང་མི་མཐུན་པ་ཆགས་ཡོད། འདས་པའི་མི་རབས་ནང་དུ་ཆབ་སྲིད་ཀྱི་དབང་བསྒྱུར་བྱེད་པའི་རིགས་ལམ་འདྲ་མིན་དར་ཡོད་པ་རེད། ཡིན་ནའང་། གོ་ལ་གཅིག་གྱུར་གྱི་འདུ་ཤེས་བཅིངས་དགོས་པ་ཧ་ཅང་གལ་ཆེན་པོ་དང་། དེའི་ཐོག་ལ་ང་ཚོས་ལས་འགན་བླངས་ནས་ལས་ཀ་སྣ་ཚོགས་བྱེད་དགོས་པ་དང་། མཉམ་རུབ་ཀྱི་ཐོག་ནས་ལས་ཀ་བྱེད་དགོས། ཆོས་ལུགས་མི་འདྲ་བ་དང་རྒྱལ་ཁབ་མི་འདྲ་བ་ནི་རིམ་པ་གཉིས་པའི་ཁྱད་པར་ལས་གཞི་རྩའི་ཆ་ནས་ང་ཚོ་མི་ཡིན་པ་གཅིག་མཚུངས་རེད། དེ་ངོས་ཀྱི་ཡིད་ཆེས་དང་། ཡིད་ཆེས་ཙམ་མ་ཡིན་པར་དམ་བཅའ་ཡིན། ཁྱོད་རང་རྣམ་པ་འགྲོ་བ་མིར་གཅིག་མཚུངས་ཀྱི་འདུ་ཤེས་འཛིན་རྒྱུར་ངོས་ལ་དཔུང་རོགས་གནང་རོགས་ཞེས་འབོད་སྐུལ་ཞུ་རྒྱུ་ཡིན།
ཆོས་ལུགས་འདྲ་མིན་གྱི་ནང་དུ་ངའི་ཆོས་དང་ཁྱོད་ཀྱི་ཆོས་ཞེས་དབྱེ་བ་བྱེད་བཞིན་པ་ནི་ད་ལྟ་དུས་ཚོད་ཡོལ་ཟིན་པ་རེད། འཛམ་གླིིང་སྤྱི་ཡོངས་ལ་ཆོས་ལུགས་མང་པོ་ཞིག་ཡོད་པ་དེ་ཕན་ཐོགས་ཡོང་གི་ཡོད་པ་རེད། སྒེར་སོ་སོའི་དད་པ་བྱེད་ས་སྒེར་སོ་སོའི་དོན་དག་ཆགས་ཡོད། གཞི་རྩའི་ཆོས་ལུགས་ཁག་གི་བསླབ་བྱ་ནི་བྱམས་སྙིང་རྗེའི་ཉམས་ལེན་གསུང་བཞིིན་ཡོད་པ་རེད། ལྟ་གྲུབ་མི་འདྲ་བ་མང་པོ་ཡོད་པ་ཡིན་ནའང་གཞི་རྩའི་ཉམས་ལེན་གཅིག་མཚུངས་ཡིན་པའི་ཆ་ནས་ཆོས་ལུགས་མི་འདྲ་ཡང་མཉམ་འདུས་ཀྱིས་སྡོད་ཐུབ་ཀྱི་ཡོད། དཔེར་ན། རྒྱ་གར་ལ་ཆ་བཞག་ན་འཛམ་གླིང་ནང་གི་གྲགས་ཆེ་བའི་ཆོས་ལུགས་ཆ་ཚང་ཡོད་ཀྱང་མི་མང་རྣམས་འཆམ་མཐུན་གྱི་ཐོག་ནས་སྡོད་ཐུབ་ཀྱི་ཡོད། ཅེས་སོགས་བཀའ་སློབ་སྩལ་རྗེས་དྲི་བ་ཁག་ལ་བཀའ་ལན་སྩལ་ཡོད་པ་བཅས།།
