༄༅། །ཕྱི་ལོ་ ༢༠༢༠ ཟླ་ ༡ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་བཞུགས་སྒར་ཕོ་བྲང་གི་མཇལ་འཕྲད་ཁང་དུ་ཐའེ་ལན་ཊི་དང་ཝེ་ཏི་ནམ་གྱི་དད་ལྡན་སེར་སྐྱ་མི་མང་ཁག་གཅིག་ལ་མཇལ་ཁ་དང་ཏོག་དབྱིབས་ནད་ཡམས་སམ་ཀཱོ་རོ་ནཱ་གཉན་རིམས་(2019-nCoV)ལ་སྒྲོལ་མའི་གཟུངས་སྔགས་བགྲང་ན་ཕན་ཐོགས་ཡོད་པ་བཀའ་སྩལ།
དེ་ཡང་སྔ་དྲོ་ཆུ་ཚོད་ ༩།༠༠ ཙམ་ལ་བཞུགས་སྒར་འཇལ་འཕྲད་ཁང་དུ་ཆིབས་བསྒྱུར་གྱིས་བཀའ་སློབ་སྩལ་དོན། དེ་རིང་ཁ་སང་རྒྱ་ནག་ལ་ནད་ཡམས་ཤིག་སླེབས་འདུག རྒྱ་ནག་ལ་ཆ་བཞག་ན་ལོ་རྒྱུས་ཐོག་ནས་ནང་པའི་ལུང་པ་རེད། དེ་རིང་འདིར་ལེགས་སྦྱར་གྱི་ཆོས་བརྒྱུད་འཛིན་པ་གནང་མཁན་དང་། པཱ་ལིའི་ཆོས་བརྒྱུད་འཛིན་པ་གནང་མཁན་མཉམ་དུ་ཡོད་པ་རེད། དེར་བརྟེན། ང་ཚོ་ཚང་མ་ཐུན་མོང་གི་ཐོག་ནས་ནད་ཡམས་འདི་རིམ་པས་ཞི་འགྲོ་བ་ལ་སྨོན་ལམ་རྒྱག
ནང་ཆོས་ཀྱི་དད་པ་ཡོད་མཁན་དང་། གཟུངས་སྔགས་བགྲངས་པར་གོམས་གཤིས་ཡོད་མཁན་ལ་ངོས་ཀྱིས་སྒྲོལ་མའི་གཟུངས་སྔགས་བགྲང་དགོས་པ་རེད་ཅེས་བཤད་བཞིན་ཡོད། དེས་ནད་ན་ཚ་མ་ཡོང་བ་ལ་ཏན་ཏན་ཁྱད་པར་ཡོད་པ་རེད། དེ་རིང་འདིར་ཁྱོད་རང་ཚོའི་ནང་ན་གཟུངས་སྔགས་བགྲངས་པ་ལ་དོ་སྣང་ཡོད་ན། ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཟེར་བའི་སྒྲོལ་མའི་གཟུངས་སྔགས་འདི་བགྲང་པ་ཡིན་ན་ཕན་གྱི་རེད། དེ་རིང་འདིར་དངོས་སུ་ང་ཚོ་མི་ཉུང་ཤོས་ཤིག་ཡོད་པ་རེད། ས་སྟེང་འདིའི་སྒང་ལ་ནད་ཡམས་འདི་ལ་ཏོག་ཙམ་དངངས་སྐྲག་བྱེད་མཁན་མང་པོ་ཞིག་འདུག ཚང་མར་ངོས་ཀྱིས་སྨོན་ལམ་རྒྱག་གི་ཡོད། ད་ལྟ་བཤད་མ་ཐག་པ་ནང་བཞིན་གཟུངས་སྔགས་དེ་འདྲ་ལ་དོ་སྣང་ཡོད་པ་ཡིན་ན་སྒྲོལ་མའི་གཟུངས་སྔགས་བགྲང་ན་ཡག་པོ་ཡོང་གི་རེད། ཅེས་བཀའ་སྩལ་ཡོད་པ་རེད།
