༄༅། །ཕྱི་ལོ་ ༢༠༢༠ ཟླ་བ་ ༡༢ ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྱང་ཨ་རིའི་ས་གནས་བོད་རིགས་རྣམས་ཀྱིས་ཇི་ལྟར་གསོལ་འདེབས་ཞུས་དོན་ལྟར་དྲ་ལམ་བརྒྱུད་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མ་དང་། རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་བཀའ་དྲིན་སྩལ་ཡོད་པ་རེད།
དེ་ཡང་རྒྱ་གར་གྱི་སྔ་དྲོ་ཆུ་ཚོད་ ༩ ཙམ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸རྒྱལ་བའི་གཟིམ་ཆུང་ཕོ་བྲང་ནས་བཀའ་ཆོས་གནང་ཡུལ་དུ་ཆིབས་སྒྱུར་གྱིས་བཞུགས་ཁྲིར་འཁོད་མཚམས་ཨ་རིའི་དོན་གཅོད་དངོས་གྲུབ་ཚེ་རིང་ལགས་ཀྱིས་གསོལ་འདེབས་དང་བཀའ་དྲིན་རྗེས་དྲན་དང་འབྲེལ་བྱང་ཨ་རིའི་བོད་མི་ཁྲི་གསུམ་ལྷག་ཡོད་པ་ནས་ཇི་ལྟར་གསོལ་བ་བཏབ་པ་ལྟར་ཆོས་འབྲེལ་དང་གཞོན་སྐྱེས་ཚོར་དྲི་བ་དྲིས་ལན་གྱི་བཀའ་བཞེས་བཟང་པོ་བྱུང་བར་བཀའ་དྲིན་ཆེ་ཞུས་པ་དང་། ཚེས་ ༢༡ ཉིན་ཨ་རིའི་གྲོས་ཚོགས་གོང་འོག་གཉིས་ནས་བོད་དོན་སྲིད་བྱུས་ལ་རྒྱབ་སྐྱོར་གྱི་ཁྲིམས་འཆར་ ༢༠༢༠ ཞེས་པ་གཏན་འབེབ་གནང་བའི་སྐོར་སོགས་༸སྙན་སེང་ཞུས་རྗེས་མགོན་པོ་གང་ཉིད་མཆོག་གིས་གསུང་ཆོས་སྔོན་འགྲོའི་བཀའ་སློབ་སྩལ་དོན།
དེ་རིང་འདིར་བྱང་ཨ་མེ་རི་ཁར་ཡོད་པའི་བོད་རིགས་ཚོར་དྲ་རྒྱའི་ཐོག་ཐུག་ནས་སྐད་ཆ་བཤད་རྒྱུར་ཁྱོད་རང་ཚོས་རེ་འདུན་བྱས་པ་རེད་ལ། ངོས་རང་ཡང་བློ་ལ་འབབ་པོ་བྱུང་། གཉིས་ནས་དེ་གི་ནད་ཡམས་དང་ལོ་ཡར་རྒས་པའི་དབང་གིས་ཐག་རིང་པོར་འགྲོ་བར་དཀའ་ངལ་འདུག སྡོད་ས་རྡ་རམས་ས་ལར་བསྡད་ནས་དྲ་རྒྱའི་སྟེང་ནས་འབྲེལ་བ་བྱེད་རྒྱུ་དེ་ལས་སླ་བོ་འདུག དེར་བརྟེན། དེ་རིང་དྲ་རྒྱའི་ཐོག་ནས་ཐུག་རྒྱུ་བྱས་པ་རེད།
ང་ཚོ་བོད་གངས་ཅན་ཞེས་པ་དེར་ཆོས་རྒྱལ་སྲོང་བཙན་མ་བྱོན་པའི་གོང་དུ་སོག་པོ་དང་འབྲེལ་བ་ཡོད་པའི་འབྲོག་པའི་ཟོལ་ལྟ་བུ་ལས་དེ་ཙམ་གྱི་རིག་གཞུང་ཡོད་པ་མ་རེད། སྲོང་བཙན་སྒམ་པོ་བྱོན་རྗེས། སྲོང་བཙན་སྒམ་པོ་ཧ་ཅང་གྲུང་པོ་རེད། ཆོས་རྒྱལ་སྲོང་བཙན་སྒམ་པོ་རྒྱ་ནག་གི་སྲས་མོ་རྒྱ་བཟའ་དང་འཁྲུངས་ས་བསྐྱོན་པ་དང་། རྒྱ་ནག་ནས་ལྷ་སའི་ཇོ་བོ་གདན་དྲངས་པ་རེད། རྒྱ་ནག་གོང་མ་དང་གཉེན་འབྲེལ་གྱི་ཐོག་ནས་འབྲེལ་བ་ཡོད་པ་ཞིག་ཡིན་ཡང་། ངོས་ཀྱིས་རྣམ་ཀུན་རྩེད་མོ་དང་སྦྲགས་ནས་བཤད་བཞིན་ཡོད། ཆོས་རྒྱལ་སྲོང་བཙན་སྒམ་པོ་རྒྱ་བཟའ་དང་འཁྲུངས་ས་བསྐྱོན་ནས། རྒྱ་ཟས་ལ་ཏན་ཏན་མཉེས་པོ་གནང་གི་ཡོད་རྒྱུ་རེད། ཡིན་ནའང་། རྒྱ་ཡིག་ནི་ཧ་ཅང་གི་རྙོག་དྲ་ཆེན་པོ་ཞིག་ཏུ་ཕལ་ཆེར་གཟིགས་པ་འདྲ་འདུག གང་ལྟར་ལྷ་སའི་ཇོ་བོ་དེ་རྒྱ་ནག་ནས་ཡར་ཕེབས་པ་དང་བོད་ནང་དུ་ནང་ཆོས་ཐོག་མར་རྒྱ་ནག་ནས་དར་ཡོད། ཆོས་རྒྱལ་སྲོང་བཙན་སྒམ་པོས་རྒྱ་ཡིག་དེ་ཧ་ཅང་རྙོག་གྲ་ཚ་པོ་ཞིག་ཡིན་པར་ཕལ་ཆེར་གཟིགས་ཏེ་བོད་ཡིག་གསར་བཟོ་དང་། རྒྱ་གར་གྱི་ཡི་གེ་ Devanagari ལ་དཔེ་བལྟས་ནས་དབྱངས་དང་གསལ་བྱེད་ལྡན་པའི་བོད་ཀྱི་ཡི་གེ་གསར་གཏོད་གནང་བ་རེད།
དུས་རབས་བརྒྱད་པའི་ནང་ཆོས་རྒྱལ་ཁྲི་སྲོང་ལྡེ་བཙན་རྒྱ་ནག་དང་འབྲེལ་བ་ཡག་པོ་ཡོད་ནའང་། སངས་རྒྱས་ཀྱི་བསྟན་པ་རྒྱ་ནག་ནས་མིན་པར་རྒྱ་གར་ནས་གདན་འདྲེན་ཞུ་དགོས་པར་ཐུགས་ཐག་བཅད་ཡོད། དེ་དུས་ནང་བའི་རྟེན་གཞི་གཙོ་བོ་ནཱ་ལེནྡྲ་རེད། ནཱ་ལེནྡྲའི་མཁས་པ་ཆེན་པོ་མཁན་ཆེན་ཞི་བ་འཚོ་བོད་ལ་གདན་དྲངས་པ་རེད། སྐབས་དེའི་ནཱ་ལེནྡྲའི་མཁས་པ་ཆེན་པོ་ཁོང་དགུང་ལོ་བགྲེས་པོ་ཡིན་ནའང་བོད་དུ་ཕེབས་ཤིང་། བཙན་པོ་ལ་ཁྱོད་རང་ཚོར་རང་གི་སྐད་དང་ཡི་གེ་ཡོད་པས་ལེགས་སྦྱར་དང་པ་ལིའི་སྐད་ཡིག་སོགས་བསླབ་མི་དགོས་པར། གཞུང་ཆེན་ཁག་བོད་ཡིག་ལ་བསྒྱུར་དགོས་པ་རེད་ཅེས་ལམ་སྟོན་གནང་ཡོད། ངོས་ཀྱི་ངོ་ཤེས་པ་འགའ་རེས་མཁན་ཆེན་ཞི་བ་འཚོས་བོད་ཡིག་ལ་ཐུགས་སྣང་གནང་བ་རེད་ཅེས་བཤད་པ་གོ་མྱོང་། དེར་བརྟེན། བཀའ་འགྱུར་པོ་ཏི་བརྒྱ་དང་བསྟན་འགྱུར་པོ་ཏི་ཉིས་བརྒྱ་ལྷག་བསྒྱུར་བ་ལས་འདུལ་བའི་གཞུང་ཕ་ཆེར་པ་ལིའི་གཞུང་དང་། ལྟ་གྲུབ་དང་ཚད་མའི་གཞུང་ལེགས་སྦྱར་ལས་བསྒྱུར་བ་རེད། བོད་ཀྱི་སངས་རྒྱས་ཆོས་དེ་དཔལ་ནཱ་ལེནྡྲའི་ཆོས་བརྒྱུད་ཆགས་ཡོད། མཁན་ཆེན་ཞི་བ་འཚོ་ནི་ཚད་མ་བ་དང་ལྟ་གྲུབ་སྨྲ་བ་ཆེན་པོ་རེད། ཚད་མའི་གཞུང་ལ་ཐུགས་སྣང་གནང་ནས་ཚད་མའི་མཁས་པ་རེད། ཁོང་གིས་མཛད་པའི་ཚད་ཆེན་ལ་ང་ཚོས་ལྟ་བཞིན་ཡོད། དབུ་མའི་ལྟ་བའི་སྐོར་ལ་དབུ་མ་རྒྱན་ཡོད།
སློབ་དཔོན་ཕྱོགས་གླང་ཆོས་གྲགས་ཀྱི་གཞུང་རྒྱ་ཡིག་ནང་བསྒྱུར་ཡོད་པ་མ་རེད། བོད་སྐད་དུ་བསྒྱུར་བ་མ་ཟད་སློབ་སྦྱོང་བྱས་པ་རེད། ཆོས་རྗེ་ས་པཎ་སོགས་ཀྱིས་ཐུགས་སྣང་ཆེན་པོ་གནང་། ཕྱིས་སུ་འཇམ་མགོན་བླ་མ་ཙོང་ཁ་བ་ཆེན་པོས་སློབ་གཉེར་བྱེད་རྒྱུ་གལ་ཆེན་པོར་གཟིགས་ནས། གདན་ས་གསུམ་གཙོས་དགོན་སྡེ་དག་གིས་ཚད་མ། ཕར་ཕྱིན། དབུ་མ། མཛོད། འདུལ་བ་བཅས་གཞུང་བཀའ་པོད་ལྔ་དེ་སློབ་གཉེར་བྱེད་ས་གཙོ་བོ་རེད། དེར་བརྟེན། འཛམ་གླིང་འདིར་ནཱ་ལེནམྡྲའི་ཆོས་བརྒྱུད་དབུ་ཚད་ཟུང་འབྲེལ་གྱིས་འཆད་རྒྱུ་ཡོད་པ་ཕལ་ཆེར་བོད་གཅིག་པུ་རེད། བོད་ལ་དར་བ་དང་རིམ་གྱིས་སོག་པོར་དར་བ་རེད། རྒྱལ་བ་བསོད་ནམས་རྒྱ་མཚོ་སོག་ཡུལ་ལ་ཕེབས་ཤིང་ཏཱ་ལའི་བླ་མ་ཞེས་པའི་མིང་དེའང་དེ་དུས་སུ་ཐོགས་པ་རེད། དེ་ལྟར་སོག་པ་དང་འབྲེལ་བ་ཐུན་མོང་མ་ཡིན་པ་ཆགས་ནས་སོག་པོའི་དགོན་པ་ཁག་མང་པོ་ཞིག་གིས་དབུས་གཙང་གི་གདན་ས་ཁག་ལྟར་སློབ་གཉེར་བྱེད་པ་བྱུང་ཡོད། དེ་ལྟར་བྱུང་རིམ་ལ་ལྟོས་ན་རྒྱ་གར་དུ་ཉམས་ནས་ཡོད་པ་མ་རེད། ངོས་རང་གནས་སྐོར་ལ་འགྲོ་དུས་ཤིག་ལ་ནཱ་ལེནྡྲར་ཕྱིན་ནས་དབུ་མ་འཇུག་པ་སྐྱོར་བ་ཡིན། སྔོན་མ་སློབ་གཉེར་ཁང་ཆེན་པོ་ཡིན་ནའང་། ད་ལྟ་ནཱ་ལེནྡྲར་གྱང་རོ་ཞིག་ལས་ཅི་ཡང་མི་འདུག སེམས་སྐྱོ་བ་ཞིག་རེད། དེ་ལྟར་བསམ་བློ་བཏང་ན། ང་ཚོ་བོད་པས་ནཱ་ལེནྡྲའི་ཆོས་བརྒྱུད་དེ་བསམ་པ་རྣམ་དག་གིས་འཛིན་སྐྱོང་སྤེལ་གསུམ་བྱས་འདུག་སྙམ་ནས་སེམས་ལ་སྤོབས་པ་སྐྱེ་བ་ཞིག་རེད།
ང་ཚོར་བཀའ་འགྱུར་བསྟན་འགྱུར་པོ་ཏི་སུམ་བརྒྱ་ལྷག་ཡོད་པ་དེ། ཆོས་ཀློག་པ་བཀའ་བསྟན་དག་སྒྲོག་སོགས་ཞབས་བརྟན་བྱེད་པ་ཙམ་མ་རེད། སློབ་དེབ་རེད། སློབ་སྦྱོང་བྱེད་རྒྱུ་གལ་ཆེན་པོ་རེད། བོད་ཀྱི་མཁས་པ་ཚོས་ཀྱང་རྒྱ་གར་མཁས་པའི་གཞུང་དག་རྩ་བར་བཞག་ནས་ལེགས་བཤད་བརྩམས་ཡོད་རེད། དེར་བརྟེན། ང་ཚོ་བོད་པ་དེ་སྔ་སོག་པོ་མཉམ་དུ་རི་དྭགས་བརྒྱབ་ནས་འགྲོ་མཁན་དེས། རིམ་གྱིས་ནང་བ་སངས་རྒྱས་པའི་ཆོས་ལ་ཐོས་པ་བྱས། ཐོས་རྐྱང་ལ་མ་བཞག་པར་བསམ། སྒོམ། ཐོས་བསམ་དང་སྒོམ་པ་ཟུང་འབྲེལ་་བྱས་ཡོད་རེད། དངོས་ཡོད་གནས་ཚུལ་ལ། བོད་གངས་ཅན་པས་སངས་རྒྱས་ཀྱི་བསྟན་པར་ཞབས་འདེགས་ཧ་ལས་པ་སྒྲུབ་ཡོད།
དེང་གི་དུས་སུ་ཤྲི་ལངྒ་དང་འབར་མ་དང་། ཐའེ་ལན་སོགས་ལ་པ་ལིའི་གཞུང་གི་ཐོག་ནས་སྡེ་སྣོད་གསུམ་ཞེས་ཧ་ཅང་ཡག་པོ་ཡོད་པ་རེད། འོན་ཀྱང་ཚད་མའི་སྐོར་མེད། ངོས་ཀྱིས་མཚམས་རེ་རྩེད་མོ་དང་འབྲེལ་པཱ་ལིའི་གཞུང་ཁོ་ནར་གཟིགས་མཁན་ཚོས་བཅོམ་ལྡན་འདས་ཀྱི་བཀའ་ཡོད་པ་རེད་ཅེས་ལུང་བགྲང་པ་མ་གཏོགས་དེར་རིགས་པའི་ལམ་ནས་དཔྱད་པ་བྱས་ནས་རིགས་པས་སྒྲུབ་རྒྱུ་མེད། ཁྱེད་རང་ཚོར་སོ་ཡོད་མ་རེད། མཁྲེགས་པོ་ཞིག་དང་ཐུག་ན་མུར་མུར་བྱེད་ནས་འདུག་པ་ལས་ཟ་ཐུབ་ཀྱི་མ་རེད། ཅེས་བརྗོད་ཀྱི་ཡོད། ང་ཚོ་བོད་ལ་ཚད་མའི་གཞུང་ཡོད་པས། དོན་དག་གང་ལ་ཐུག་ནའང་སངས་རྒྱས་བཅོམ་ལྡན་འདས་རང་ཉིད་ཀྱིས། བསྲེག་བཅད་བརྡར་བའི་གསེར་བཞིན་དུ།། ལེགས་པར་བརྟག་ལ་ང་ཡི་བཀའ།། བླང་བར་བྱ་ཡི་གུས་ཕྱིར་མིན།། ཞེས་བརྟག་དཔྱད་བྱེད་དགོས་གསུངས་པ་ལྟར་ང་ཚོ་དེ་ལྟར་འཇུག་གི་ཡོད། ཀླུ་སྒྲུབ་ཡབ་སྲས་དང་དཔལ་ལྡན་ཟླ་བ་གྲགས་པའི་གཞུང་སོགས་དབུ་ཕར་ཚད་གསུམ་གྱི་གཞུང་དེ་གལ་ཆེན་པོ་བྱས་ནས། བོད་ལ་དགེ་བཤེས་ཤིག་འཇོག་པར་ཕལ་ཆེར་ལོ་ཉི་ཤུ་ནས་སུམ་ཅུ་བར་དཔེ་ཆར་ལྟ་དགོས་པ་རེད། དེ་དག་གི་རྩ་བ་བློར་བཟུང་། འགྲེལ་བའི་ཚིག་སྣེ་དག་བློར་འཛིན་གྱིན་ཡོད། དཔེར་ན། ངོས་རང་ཆུང་བའི་དུས་ནས་རྒྱན་འཇུག་གཉིས་བློར་བཟུང་བ་ཡིན། དེ་བཞིན་རྣམ་འགྲེལ་ལས་ཀྱང་ཐོར་བུ་སྒྲུག་ནས་བློར་བཟུང་བ་ཡིན། མཛོད་རྩ་བ་བློར་བཟུང་ཡང་ཧ་ཅང་ཕན་པོ་ཞིག་མི་འདུག ཅེས་སོགས་བཀའ་སློབ་དང་།
གཞན་ཡང་། བོད་གངས་ཅན་པ་ལ་སློབ་གཉེར་བྱེད་པའི་ཕྱག་སྲོལ་ཞིག་ཡོད་པས། ༸རྒྱལ་བ་རིན་པོ་ཆེ་ཡིན་ནའང་དམིགས་བསལ་གང་ཡང་ཡོད་པ་མ་རེད། ཆུང་ཆུང་ཡིན་དུས་ནས་དཔེ་ཆར་ལྟ་དགོས་པ་རེད། ང་དེ་དུས་དཔེ་ཆ་ལྟ་བར་སེམས་ཤུགས་ཆེན་པོ་མེད། ལེ་ལོར་གཡེང་བ་ཞིག་ཡོད། དེར་བརྟེན། ཡོངས་འཛིན་གླང་རིན་པོ་ཆེས་རྟ་ལྕགས་སེར་པོ་ཞིག་ངའི་དཔེ་ཆར་ལྟ་སར་བཀལ་ཡོད། དབྱར་ཁར་ནོར་བུ་གླིང་གར་ཡོང་དུས་རྟ་ལྕགས་དེ་མར་ཁུར་ཡོང་། དགུན་ཁར་རྩེ་ལ་སྡོད་དུས་ཡར་རྩེ་ལ་ཁུར་འགྲོ་གི་ཡོད། ངོས་་དང་མཉམ་དུ་བློ་བཟང་བསམ་གཏན་ལ་རྟ་ལྕག་དཀྱུས་མ་ཞིག་དང་༸རྒྱལ་བ་ཐམས་ཅད་མཁྱེན་པར་རྟ་ལྕགས་སེར་པོ་ཞིག་ཡོད། རྟ་ལྕག་དཀྱུས་མ་དང་སེར་པོ་ལ་ཁྱད་པར་མེད་པར་གཞུས་ན་ན་ཚ་གཏོང་ལུགས་གཅིག་པ་རེེད། སྐྱབས་སུ་མཆི། ཡོངས་འཛིན་རྣམ་པ་ཧ་ཅང་ཐབས་ལ་མཁས་པ་རེད། དཔེ་ཆ་དེ་ལྟར་བལྟས་པ་རེད།
དེ་སྔ་ཡིན་ན་ང་ཚོ་བོད་ཀྱི་ཆོས་ལ་བླ་མའི་ཆོས་ལུགས་ཞེས་བཤད་ཀྱིན་ཡོད་རེད། ནང་བའི་ཆོས་དངོས་ཤིག་ཡིན་མིན་ཐེ་ཚོམ་བྱས་ནས་ཡོད་པ་ལྟ་བུ་ཞིག་རེད། ང་ཚོ་རྒྱ་གར་ལ་ཡོང་ནས་མཁས་པ་མང་པོར་ཐུག སེ་འབྲས་སོགས་ནས་དཔེ་ཆ་བ་མང་པོ་སླེབས་དུས། ང་ཚོ་བླ་མའི་ཆོས་ལུགས་མིན་པར་ནཱ་ལེནྡྲའི་ཆོས་བརྒྱུད་དྲི་མ་མེད་པ་དང་། དེ་ཡང་བཤད་སྒྲུབ་ཟུང་འབྲེལ་གྱི་སྒོ་ནས་ཉར་ཚགས་བྱེད་ཀྱིན་ཡོད་པ་འཛམ་གླིང་ཡོངས་གྲགས་རེད། ང་ཚོས་རིགས་པས་དཔྱད་པ་བྱས་ནས་ཡོང་བའི་ཆ་ནས་ཚན་རིག་པ་ཚོས་ཀྱང་ང་ཚོར་ལག་སྦྲེལ་བྱེད་ཀྱི་ཡོད། ང་ལ་སྤོབས་པ་ག་རེ་ཡོད་ཅེ་ན། ང་ཚོས་ལུང་ཙམ་ལ་སྐྱབས་སུ་བཟུང་ནས་བསྡད་ཡོད་པ་མ་རེད། རིགས་པས་དཔྱད་པ་བྱས་ནས་འགྲོ་གི་ཡོད། ཚན་རིག་པ་ཚོས་ཀྱང་སྔར་གྱི་མཁས་པ་ཚོའི་བཤད་པ་ལ་ཆ་བཞག་གི་ཡོད་པ་མ་རེད། བརྟག་དཔྱད་དང་རྩད་གཅོད་བྱས་ནས་འགྲོ་གི་ཡོད། འདས་པའི་ལོ་བཅུ་ཕྲག་བཞི་ཙམ་རིང་ངས་ཚན་རིག་པར་འབྲེལ་བ་བྱས་པ་རེད། ཚན་རིག་པར་དངོས་ཁམས་རིག་པ་གཙོ་བོ་མ་གཏོགས་སེམས་ཁམས་རིག་པར་བཤད་རྒྱུ་མི་འདུག སེམས་སྐྱིད་དང་མི་སྐྱིད་ཅེས་པ་དེ་དངོས་ཡོད་གནས་ཚུལ་གལ་ཆེན་པོ་ཞིག་ཡིན་དུས། སེམས་མི་སྐྱིད་པ་ཡོང་བ་དེ་དད་པ་དང་སྨོན་ལམ་གཅིག་བུས་སེལ་མི་ཐུབ་པར་བརྟེན། སེམས་ཉིད་ལ་བརྟག་དཔྱད་བྱས་ནས་སེམས་དཀྲུག་མཁན་གྱི་བློ་དེ་ཤུགས་ཆུང་བར་བཏང་། སེམས་ཞི་བདེ་ཡོང་བའི་གསལ་རིག་དེ་ཤུགས་ཆེ་བར་གཏོང་དགོས་པ་རེད། སེམས་མི་སྐྱིད་པ་དེ་རིལ་བུ་འདྲ་བོ་ཟས་ནས་ཕན་གྱི་མ་རེད། ཨ་འཐས་ཀྱི་འཛིན་པས་སེམས་མི་སྐྱིད་པ་ཡོང་གི་ཡོད། ཁོ་ལ་གཉེན་པོ་བསྟེན་དགོས་པ་རེད།
ང་ཚོའི་སེམས་ཁམས་རིག་པའི་སྐོར་དང་། ངོས་ནས་ལུས་པོའི་འཕྲོད་བསྟེན་དང་སེམས་ཀྱི་འཕྲོད་བསྟེན་ཞེས་གཉིས་སུ་དབྱེ་ནས་བཤད་པ་དེར་ཚན་རིག་པ་ཚོས་ཧ་ཅང་དགའ་བོ་བྱེད་ཀྱི་འདུག ལུས་ཀྱི་འཕྲོད་བསྟེན་འཛམ་གླིང་འདིར་ཡག་ཐག་ཆོད་ཡོད་རེད། ཡིན་ནའང་། སེམས་ཀྱི་འཕྲོད་བསྟེན་ཡོང་བ་ལ་ནང་པའི་སེམས་ཁམས་རིག་པའི་ནང་གི་སྤྱོད་འཇུག་གི་གཞུང་དག་ཧ་ལས་པ་རེད། དེར་བརྟེན། ཚན་རིག་པ་ཚོས་ཀྱང་དོ་སྣང་བྱེད་ཀྱི་འདུག
ངས་འདིར་ཀྲོག་ཀྲོག་བྱས་ནས་བཤད་ན། དེ་སྔ་ང་ཚོས་བླ་མའི་ཆོས་ལུགས་ཀྱི་ཞ་མོ་གོན་བསྡད་ཡོད། ང་ཚོ་རྒྱ་གར་ལ་སླེབས་ནས་ཚན་རིག་པ་མཉམ་དུ་གོ་བསྡུར་བྱས། མཁས་པ་མང་པོ་མཉམ་དུ་གོ་བསྡུར་བྱས་ནས་ཡོང་དུས་བླ་མའི་ཆོས་ལུགས་ཀྱི་ཞྭ་མོ་དེ་ཕུད་ནས་ཚན་རིག་པའི་ཞྭ་མོ་གོན་བསྡད་ཡོད། ང་ཚོས་རྒྱུ་མཚན་ལ་བསམ་བློ་བཏང་ནས་རིགས་པས་དཔྱད་པ་བྱས་ནས་འགྲོ་གི་ཡོད་རེད། དེ་ཚན་རིག་པའི་འགྲོ་སྟངས་རེད། དེར་བརྟེན། དེང་སྐབས་མི་མང་པོས་ངོས་ལ་ཚན་རིག་པ་ཞེས་བཤད་ཀྱི་ཡོད། ང་ཚོ་བོད་གངས་ཅན་གྱི་སངས་རྒྱས་ཀྱི་བསྟན་པ་དེ་འཛམ་བུ་གླིང་གི་སྤྱི་ནོར་རེད་ཅེས་བརྗོད་ཐུབ་ཀྱི་རེད། འཛམ་བུ་གླིང་འདིར་སེམས་མ་སྐྱིད་པར་ཡོད་པ་དེ་སེམས་ཁམས་རིག་པ་གལ་ཆེན་པོ་དང་། སེམས་ཁམས་རིག་པ་དེའང་སྨོན་ལམ་ཙམ་བརྒྱབ་ནས་མི་འཇོག་པར་སེམས་ལ་བརྟག་དཔྱད་བྱས་ནས་འགྲོ་དགོས་པ་ཞིག་ལ་གྱུར་དུས། བོད་ཀྱི་སངས་རྒྱས་ཀྱི་ཆོས་བཀའ་བསྟན་པོ་ཏི་སུམ་བརྒྱ་ལྷག་ཡོད་པ་དེ་ཚད་མའི་གཞུང་ནས་དཔྱད་པ་བྱེད་པ་དང་། ལྟ་གྲུབ་ཀྱི་ཐོག་ནས་བཤད་པ་དེ་འཛམ་བུ་གླིང་གི་སྤྱི་ནོར་རེད། ཅེས་སོགས་བཀའ་སློབ་སྩལ་རྗེས་ཆོས་འབྲེལ་དབུ་འཛུགས་དང་། མཐར་དྲི་བ་ཁག་གཅིག་ལ་བཀའ་ལན་སྩལ་རྗེས་ཆོས་འབྲེལ་གནང་སྒོ་རེ་ཞིག་ལེགས་པར་གྲུབ་ཡོད་པ་བཅས།།
