༄༅། །སྤྱི་ལོ་ ༢༠༡༧ ཟླ་ ༤ ཚེས་ ༧ ཉིན་ཕྱེད་ཡོལ་ཆུ་ཚོད་ ༤ ཙམ་ལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་རྟ་དབང་དགའ་ལྡན་རྣམ་རྒྱལ་ལྷ་རྩེ་དགོན་དུ་༸ཞབས་སོར་བདེ་བར་འཁོད་ཡོད་པ་དང་། སྐབས་དེར་རྟ་དབང་དགོན་པའི་མཁན་ལས་ཟུར་རྣམས་དང་ལས་སྣེ། དེ་བཞིན་འབྲས་སྤུངས་བློ་གསལ་གླིང་གི་མཁན་རིན་པོ་ཆེ་མཆོག དགེ་འདུན་པ་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས། དེ་རྗེས་དགོན་པའི་ནང་ཆིབས་སྒྱུར་བཀའ་དྲིན་བསྐྱངས་ནས་རྟེན་འབྲེལ་གསོལ་ཇ་འབྲས་བསིལ་འདེགས་འབུལ་ཞུས་གྲུབ་བསྟུན་བླང་དོར་བཀའ་སློབ་སྩལ་དོན།
ཚང་མར་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་འདིར་ཡོང་སྐབས་ལམ་དུ་དེ་སྔ་ནས་ནང་པ་ཡིན་པའི་ས་ཆ་ཁག་མང་པོར་སླེབས་བྱུང་། ལམ་དུ་མི་མང་པོ་དགའ་བསུ་ཞུ་བཞིན་པ་ཡང་ཐུགས་བྱུང་། སང་ཉིན་ནས་བཟུང་ཆོས་འབྲེལ་བྱེད་རྒྱུ་ཡིན་པས་དེ་རིང་ཞེ་དྲག་ཞུ་ཡ་མེད། ཅེས་དང་།
ལྷ་ཁང་ཞེས་པ་གཙོ་བ་ནང་གི་ལྷ་ཁང་དེ་ལ་གོ་དགོས་ལ། དེ་ཡང་ཤེས་རབ་ཀྱི་ལྷ་རྗེ་བཙུན་འཇམ་དཔལ་དབྱངས་དང་། སྙིང་རྗེའི་ལྷ་འཕགས་པ་སྤྱན་རས་གཟིགས་ཀྱི་ལྷ་ཁང་གཉིས་རང་གི་སེམས་ནང་དུ་བཞེངས་དགོས་ཀྱི་ཡོད། དེ་ལྟར་བྱུང་ན་བྱིན་རླབས་ངོ་མ་དེའི་ཐོག་ནས་ཡོང་གི་རེད། ཅེས་དང་། ཡང་། དེ་སྔ་ལྔ་བཅུ་ང་དགུའི་སྐབས་ངོས་འདིར་འབྱོར་སྐབས་དང་བསྡུར་ན་འདི་ཕྱོགས་སུ་ཆོས་ཕྱོགས་ལ་དོ་སྣང་ཆེ་རུ་སོང་བའི་རྣམ་པ་འདུག ཅེས་དང་།
སངས་རྒྱས་ཀྱི་བསྟན་པའི་ཁྱད་ཆོས་གཙོ་བོ་ཞིག་ནི་ལྟ་གྲུབ་རྣམས་རྒྱུ་མཚན་གྱི་ཐོག་ནས་འགྲེལ་བརྗོད་བྱེད་ཐུབ་པ་དེ་ཡིན། གལ་སྲིད་ཆོས་ཀྱི་སློབ་གཉེར་ཡག་པོ་བྱས་ཏེ་རིགས་པ་རྣམ་པར་དག་པའི་སྒོ་ནས་བསྟན་པའི་གནད་རྣམས་གཏན་ལ་ཕབ་ཐུབ་པ་བྱུང་ན། སངས་རྒྱས་ཀྱི་བསྟན་པ་མི་ལོ་བརྒྱ་ཕྲག་ཁ་ཤས་རིང་གནས་ཐུབ་ཀྱི་རེད། ལ་དྭགས་ནས་བཟུང་ཨ་རུ་ན་ཅལ་བར་སྔར་ལས་ལྷག་སངས་རྒྱས་ཀྱི་བསྟན་པར་དོ་སྣང་ཆེ་རུ་སོང་འདུག་ལ། དེ་སྔ་བོད་དང་ཧི་མ་ལ་ཡའི་ཁོངས་སུ་དགོན་པ་མང་པོ་བྱུང་ཡོད་ཀྱང་ཆོས་ཕྱོགས་ཀྱི་སློབ་གཉེར་ནི་བཤད་གྲྭ་ཆེ་ཁག་འགའ་ཞིག་ནང་མ་གཏོགས་མེད། ངོས་ནས་རྒྱུན་དུ་སློབ་གཉེར་ལ་ཤུགས་བརྒྱབ་དགོས་ཀྱི་འདུག་ཅེས་ཡང་ཡང་ནན་ཏན་བརྗོད་ཀྱི་ཡོད་པ་ལྟར་འདིར་སླར་ཡང་ཞུ་རྒྱུ་ཡིན། ཞེས་དང་།
ད་ལྟ་དུས་ཚོད་དེ་ཙམ་མིན་འདུག འོན་ཀྱང་རྒྱུན་ལྡན་དུ་སྨོན་ལམ་བྱེད་པ་ལྟར་འདིར་ཡང་འདོན་འདོད་འབྱུང་། ཞེས་གསུངས་ཏེ།
ས་སོགས་འབྱུང་བ་ཆེན་པོ་དག
ནམ་མཁའ་བཞིན་དུ་རྟག་པར་ཡང་།
སེམས་ཅན་དཔག་ཏུ་མེད་པ་ཡི།
རྣམ་མང་ཉེར་འཚོའི་གཞིར་ཡང་ཤོག
ཅེས་གསུངས་ཏེ། ཕྱི་ཉིན་གྱི་བཀའ་ཆོས་སར་ཞིབ་པར་གསུངས་རྒྱུའི་ཞལ་བཞེས་ཀྱིས་བཀའ་སློབ་སྩལ་རྗེས་གཟིམ་ཆུང་དུ་༸ཞབས་སོར་འཁོད་གནང་མཛད་ཡོད་པ་བཅས།།
