༄༅། །ཕྱི་ལོ་ ༢༠༢༦ ཟླ་ ༥ ཚེས་ ༢༠ ཉིན་གྱི་སྔ་དྲོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་དང་། ཧི་མ་ལ་ཡ་ནང་པའི་རིག་གཞུང་མཐུན་ཚོགས་གཉིས་ནས་སྒྲོལ་དཀར་ཚེ་སྦྱིན་ཡིད་བཞིན་འཁོར་ལོའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་པ་རེད།
དེ་ཡང་སྔ་དྲོ་ཆུ་ཚོད་༨།༡༥ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་བསྐྱངས་ཤིང་། ཕོ་བྲང་རྒྱ་སྒོ་རུ་རྣམ་གྲྭའི་སྤྱན་རྒྱ་སྤོས་འཛིན་དང་། ཧི་མ་ལ་ཡའི་ནང་ཚོགས་ཀྱི་འཐུས་ཚབ་སྒོ་མང་མཁན་ཟུར་བློ་བཟང་རྒྱལ་མཚན་དང་རྒྱུད་སྟོད་མཁན་ཟུར་བློ་བཟང་མཁས་གྲུབ། མདོ་ཁམས་ཆུ་སྒང་གི་ཚོགས་གཙོ་དགེ་བཤེས་བློ་བཟང་སྙན་གྲགས། མདོ་ཁམས་ཆུ་སྒང་གི་བརྟན་བཞུགས་གོ་སྒྲིག་ཚོགས་ཆུང་གི་ཚོགས་གཙོ་པདྨ་གྲུབ་དབང་བཅས་ཀྱིས་སྤོས་སྣེས་དང་བཅས་གདན་ཞུ་དང་། ཚོགས་ཁག་གཉིས་ཀྱི་ཁོངས་མི་རྣམས་ནས་རང་རང་གི་ཡུལ་སྲོལ་གཟབ་མཆོར་ལེགས་པར་སྤྲས་ཏེ་ཕེབས་བསུ་དང་བཅས་ཐུབ་དབང་ལྷ་ཁང་དུ་བཞུགས་ཁྲིར་༸ཞབས་སོར་འཁོད།
ཐོག་མར་བརྟན་བཞུགས་ཀྱི་དབུ་བཞུགས་རྡོ་རྗེ་སློབ་དཔོན་ཀུན་བདེ་གླིང་རིན་པོ་ཆེས་མཇལ་དར་རྐྱང་འབུལ་དང་འབྲེལ་ཚོགས་མང་ནས་༸རྒྱལ་བའི་འཁྲུངས་རབས་གསོལ་འདེབས་སོགས་ཞལ་འདོན་དབུ་འཛུགས་གནང་ཞིང་། བརྟན་བཞུགས་དངོས་གཞིར་བླ་མ་ལྷར་བསྐྱེད། མཆོད་བསྟོད་ཚེ་འགུགས་བཟླས་པ་ཡན་སོང་མཚམས་ཙ་རུའི་ཚོགས་འཁོར་འབུལ་བཞེས་དང་། ཀུན་བདེ་གླིང་རྟག་ཚག་རྗེ་དྲུང་སྤྲུལ་པའི་སྐུ་རིན་པོ་ཆེས་གསོལ་འདེབས་མཎྜལ་འདེགས་འབུལ་དང་ཚོགས་ཁག་གཉིས་ཀྱི་འཐུས་ཚབ་ནས་ཚོམ་བུ་ཟུར་འདེགས་ཞུས་ཤིང་། རྡོར་སློབ་མཆོག་གིས་སྐུ་གསུང་ཐུགས་རྟེན་དང་ཚེ་བུམ། རིགས་ལྔའི་མཚན་མ། ཚེ་ཆང་། ཚེ་རིལ། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད་དང་རྫས་བརྒྱད་བཅས་བཤད་པ་དང་སྦྲགས་རིམ་པར་འབུལ་ལམ་ཞུས་པ་དང་། བརྟན་བཞུགས་སྦྱིན་བདག་འཐུས་མི་ ༢༢ ཙམ་ནས་མཇལ་ཁ་ཞུས།
མཐར་གཏང་རག་མཎྜལ་འབུལ་སྐབས་བརྟན་བཞུགས་སྦྱིན་བདག་མདོ་ཁམས་ཆུ་སྒང་གི་ཚོགས་གཙོ་དགེ་བཤེས་བློ་བཟང་སྙན་གྲགས་ལགས་ཀྱིས་མཎྜལ་ཚོམ་བུ་འདེགས་འབུལ་དང་། དགའ་ལྡན་ཤར་བྱང་གི་མཁན་རིན་པོ་ཆེ་རྣམ་གཉིས་དང་སྒོ་མང་མཁན་ཟུར་བློ་བཟང་རྒྱལ་མཚན་བཅས་ནས་སྐུ་གསུང་ཐུགས་གསུམ་གྱི་རྟེན་རིམ་པར་ཕུལ་བ་སོགས་བརྟན་བཞུགས་ཀྱི་གནང་སྒོ་རིམ་པར་ཕེབས་ཤིང་། ཉི་གཞོན་འཆར་ཀ་མ་དང་རིས་མེད་བསྟན་རྒྱས་སྨོན་ལམ་སོགས་གསུང་འདོན་གྲུབ་མཚམས་ཚོགས་ཁག་གཉིས་ཀྱི་ཚོགས་གཙོ་དང་འཐུས་ཚབ་ནས་སྤོས་སྣེ་སྤྱན་རྒྱ་དང་བཅས་མགོན་པོ་མཆོག་ཕོ་བྲང་དུ་ཆིབས་བསྒྱུར་བསྐྱངས་ཡོད་པ་དང་། བརྟན་བཞུགས་འདིར་དབུས་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་གཞན་གཉིས། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ། དབུས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བཅས་ལྷན་བཞུགས་གནང་ཡོད་པར་མ་ཟད། མདོ་ཁམས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་དང་། ཧི་མ་ལ་ཡ་ནང་པའི་རིག་གཞུང་མཐུན་ཚོགས་གཉིས་ནས་མགོན་པོ་གང་ཉིད་མཆོག་ལ་བཀའ་དྲིན་རྗེས་དྲན་གྱི་གཟེངས་རྟགས་རེ་ཡང་འབུལ་ལམ་ཞུས་ཡོད།
