༄༅། །ཕྱི་ལོ་ ༢༠༢༦ ཟླ་ ༢ ཚེས་ ༢༧ ནས་དབུ་འཛུགས་ཀྱིས་ཚེས་ ༢༨ དང་། ཟླ་ ༣ ཚེས་ ༢ དང་ ༣ བཅས་ཉིན་གྲངས་བཞིའི་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་རྡ་རམ་ས་ལའི་ཕོ་བྲང་དུ་རྒྱུད་གྲྭ་སྨད་སྟོད་སོགས་ཀྱི་བསྒྲུབ་བྱ་ ༢༢༣ ལ་དགེ་ཚུལ་དང་དགེ་སློང་གི་སྡོམ་པ་གནང་ཡོད་པ་རེད།
དེ་ཡང་ཟླ་ ༢ ཚེས་ ༢༧ དང་ ༢༨ ཉིན་གཉིས་རིང་གདན་ས་སེ་འབྲས་དགའ་གསུམ་དང་། རྒྱུད་གྲྭ་སྨད་སྟོད། གམ་བཅར་རྣམ་རྒྱལ་གྲྭ་ཚང་སོགས་ནས་ཕེབས་པའི་བསྒྲུབ་བྱ་དགེ་ཚུལ་ཕ་ ༨༡ དང་། བཙུན་དགོན་སྒྲོལ་མ་གླིང་དང་། བྱང་ཆུབ་ཆོས་གླིང་། དགེ་ལྡན་ཆོས་གླིང་། འཇམ་དབྱངས་ཆོས་གླིང་སོགས་ཀྱི་དགེ་ཚུལ་མ་ ༤༧ ལ་དགེ་ཚུལ་གྱི་སྡོམ་པ་བཀའ་དྲིན་སྩལ་བ་དང་། ཟླ་ ༣ ཚེས་ ༢ ནས་ ༣ ཉིན་གཉིས་རིང་བསྒྲུབ་བྱ་ ༩༥ ལ་བསླབ་གཞི་ཡོངས་སུ་རྫོགས་པའི་བསྙེན་རྫོགས་ཀྱི་སྡོམ་པ་བཀའ་དྲིན་སྩལ་ཡོད།
ད་ལན་དགེ་ཚུལ་སློང་གི་སྡོམ་པ་བཞེས་མཁན་རྣམས་ནི་བོད་དང་། རྒྱ་བལ་འབྲུག་གསུམ། ཝེད་ནམ(Vietnam) སོག་པོ(Mongolia)། རཱ་ཤཱི་ཡ(Russia)། རྒྱ་ནག( China) ཁེ་ན་ཌ(Canada)། ཨོ་སི་ཌི་ལི་ཡ(Australia)། ཐའེ་ཝན་(Taiwan) ཧྥ་རན་སི་བཅས་(France)བཅས་རྒྱལ་ཁབ་བཅུ་གཉིས་ནས་ཕེབས་ཡོད།
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ས་ཕག་ཟླ་ ༡༡ ཚེས་ ༢༡ ཕྱི་ལོ་ ༡༩༦༠ ཟླ་ ༡ ཚེས་ ༡༩ ཉིན་གནས་མཆོག་ཝཱ་རཱ་ཎ་སཱིའི་སི་ལོན་གཙུག་ལག་ཁང་དུ་བསྙེན་རྫོགས་ཐོག་མར་སྩལ་བ་ནས་ད་བར་དགེ་སློང་ ༡༩༢༠༠ དང་། དགེ་ཚུལ་ ༦༠༠༠ ལ་དགེ་ཚུལ་སློང་གི་བསླབ་སྡོམ་སྩལ་ཏེ་གཏན་བདེའི་ས་བོན་བསྐྲུན་པར་མཛད་ཡོད།
