༄༅། །ཕྱི་ལོ་ ༢༠༢༡ ཟླ་ ༦ ཚེས་ ༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་བོད་རིགས་གཞོན་སྐྱེས་རྣམས་ལ་དྲ་ལམ་བརྒྱུད། རྟོགས་བརྗོད་འདུན་ལེགས་མའི་བཤད་ལུང་བཀའ་དྲིན་སྩལ་འཕྲོས་ཤིག་ཏུ་དོལ་རྒྱལ་སྐོར་གསུང་སྐབས། ངས་ཤུགས་ལྡན་སྐོར་དམ་བསྒྲགས་འདྲ་ཏོག་ཙམ་བྱས་པ་རེད། ད་ལྟའི་ཚིགས་བཅད་འདིར་ (སྤྱོད་འཇུག་གི་ཚིགས་བཅད། བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱི། །ལྷ་དང་ལྷ་མིན་ལ་སོགས་དགའ་བར་གྱིས། །) བསམ་བློ་གཏོང་ཡོང་དུས། བརྩེ་བ་བྱ་ས་དང་། མཐའ་གཅིག་ཏུ་བྱམས་བརྩེ་སྒོམ་ས་ཞིག་རེད་མ་གཏོགས། དེ་བསྟན་པ་ལ་གནོད་མཁན་རེད་ཟེར་བ་ལྟ་བུའི་རྒྱུ་མཚན་ཕྲ་མོ་ཞིག་ལ་བརྟེན་ནས་ཏོག་ཙམ་སེམས་ཐག་རིང་དུ་བསྡད་པ་ཡིན་ན་ཕལ་ཆེར་དེ་ནོར་བ་རེད་ཤག། ཅེས་གསུངས་པ་ལ། རང་རེའི་སྤྱི་ཚོགས་སུ་རེ་འགས་དོན་ཇི་བཞིན་མ་རྟོགས་པའམ་ཡིད་གཉིས་སུ་གྱུར་པ། ལྷག་པར་དོལ་རྒྱལ་བས་ཆེད་དུ་མངགས་ནས། ༸རྒྱལ་བ་རིན་པོ་ཆེས་དོལ་རྒྱལ་སྐོར་སྔ་ཕྱི་ལམ་སྟོན་ཡང་ཡང་ཕེབས་པ་རྣམས་ནོར་འཁྲུལ་དུ་ངོས་ལེན་གནང་བ་རེད་ཅེས་ལོག་འགྲེལ་བྱེད་བཞིན་ཡོད་སྟབས། བཀའ་ཆོས་དེ་གྲུབ་ནས་རིང་པོར་མ་སོང་བའི་སྐབས་ཤིག་ཏུ། ༸རྒྱལ་བའི་དབང་པོ་ཉིད་ལ་དོལ་རྒྱལ་བས་ཇི་སྨྲས་སོགས་༸སྙན་སྒྲོན་ཞུས་པའི་ཕྱིར་ཕེབས་སུ། ངོས་ནས་སྔ་ཕྱིར་དོལ་རྒྱལ་སྐོར་བཤད་པར་འགྱུར་བ་མེད། དེ་ཡང་༸རྒྱལ་མཆོག་ལྔ་པ་ཆེན་པོས། དམ་མིན་དམ་རྫུ་གྲགས་པ་རྒྱལ་མཚན་ཞེས། །སྨོན་ལམ་ལོག་པའི་དམ་སྲི་འབྱུང་པོ་འདིས། །བསྟན་དང་འགྲོ་བ་ཀུན་ལ་འཚེ་བྱེད་ན། །མགོན་སྐྱབས་དཔུང་གཉེན་མ་མཛད་ཐལ་བར་རློག །ཅེས་སོགས་གསུངས་པའི་རྩ་བའི་ལངས་ཕྱོགས་དེ་ག་རང་རེད་ཅེས་ཕེབས།
ཡང་། ཕྱི་ལོ་ ༢༠༢༣ ལོའི་ཟླ་ ༤ ཚེས་ ༡༢ ཉིན་དགའ་ཤར་དགེ་བཤེས་ཤིག་ནས་མཇལ་མང་སྐབས་ཞུ་ཡིག་ཏུ། ཁྲི་བྱང་རིན་པོ་ཆེའི་ཡང་སྤྲུལ་མཇལ་བཅར་ཆོག་པ་ཞུས་པའི་བཀའ་ལན་དུ། ཡང་སྲིད་རིན་པོ་ཆེ་ངོས་དང་མ་འགྲིག་པ་གཞན་གང་ཡང་མེད། རྙོག་དྲ་དེ་དོལ་རྒྱལ་བསྟེན་གསོལ་གྱི་ཐོག་ནས་བྱུང་པ་རེད། ངོས་ནས་དོལ་རྒྱལ་སྐོར་དམ་བསྒྲགས་བྱས་པ་དེ་དགོས་པ་རྒྱུ་མཚན་དུ་མ་ལ་བརྟེན་ནས་བྱས་པ་ཡིན། ཞེས་བཀའ་ཕེབས།
ཉེ་ལམ་ཕྱི་ལོ་ ༢༠༢༥ ཟླ་ ༢ ཚེས་ ༥ ཉིན་རྒྱ་གར་ལྷོ་ཕྱོགས་སེ་ར་ཐེག་ཆེན་གླིང་དུ་བརྟན་བཞུགས་གྲུབ་ནས་ཆིབས་སྒྱུར་གནང་སྐབས་སེ་རའི་ཚོགས་ཆེན་གྱི་གཞུང་སྒོའི་གཡས་ཕྱོགས་སུ་ཤར་པ་ཆོས་རྗེ་ངག་དབང་འབྱོར་ལྡན་མཆོག་སོགས་གདན་སའི་མཁན་ལས་ཟུར་རྣམས་ནས་སེར་སྦྲེང་གིས་ཕེབས་སྐྱེལ་ཞུ་སྐབས། ཤར་པ་ཆོས་རྗེ་ལ་ཞལ་ཕྱོགས་ནས། ད་ལྟ་འདིར་དོལ་རྒྱལ་གྱི་སྐོར་སྐད་ཅོར་འདྲ་མི་འདུག་གམ་ཞེས་བཀའ་རྩད་ཕེབས་པར། ཤར་པ་ཆོས་རྗེ་ནས། དེ་འདྲ་གང་ཡང་མི་འདུག། ཞི་བདེ་རེད་འདུག་ཅེས་ཞུས། ༸གོང་ས་མཆོག་ནས་ཞལ་འཛུམ་དམུལ་བཞིན། ༸རྒྱལ་བ་རིན་པོ་ཆེ་དང་དོལ་རྒྱལ་གཉིས་སྡུར་ན་༸རྒྱལ་བ་རིན་པོ་ཆེ་བསོད་ནམས་ཆེ་གི་རེད། ཅེས་བཞད་མོ་བཞད་བཞིན་བཀའ་གནང།
ཡང་ཉེ་ལམ་ཕྱི་ལོ་ ༢༠༢༥ ཟླ་ ༤ ཚེས་ ༧ ཉིན། མཇལ་མང་དུ་ལ་དྭགས་པའི་རྨོ་བོ་ཞིག་མཇལ་བཅར་སྐབས། ནང་གི་བུ་མོ་ཞིག་ལ་མི་མ་ཡིན་ཞིག་ཞུགས་ནས་དཀའ་ངལ་འཕྲད་བཞིན་འདུག། མི་ཁག་ཅིག་ནས་ཤུགས་ལྡན་རེད་ཅེས་བརྗོད་ཀྱིན་འདུག་པས་ཐུགས་སྨོན་སྐྱབས་འཇུག་ཡོང་བ་ཞེས་༸སྙན་སེང་ཞུས་པའི་བཀའ་ལན་དུ། དོལ་རྒྱལ་མ་རེད། ངས་ཐག་བཅད་ནས་ཤོད་ཐུབ་ཀྱི་རེད། གང་ཡིན་ཞེ་ན། ངས་དོལ་རྒྱལ་བསྟེན་གསོལ་ཐོག་དམ་བསྒྲགས་བྱེད་ཀྱིན་ཡོད་པས་གནོད་ཐུབ་ཀྱི་མ་རེད། ཅེས་པས་མཚོན་ལོ་འདི་དག་གི་རིང་འདི་འདྲ་ཡང་ཡང་གསུངས་པ་ལ་གཞིགས་ན་༸གོང་ས་མཆོག་གི་དགོངས་གཞི་གང་ཡིན་ཤིན་ཏུ་གསལ་བས་འགྲེལ་བརྗོད་གཞན་དགོས་པ་མ་མཐོང་།
འོན་ཀྱང་གོང་གསལ་ཕྱི་ལོ་ ༢༠༢༡ ཟླ་ ༦ ཚེས་ ༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རིགས་གཞོན་སྐྱེས་རྣམས་ལ་དྲ་ལམ་བརྒྱུད་བཀའ་ཆོས་སྩོལ་སྐབས་དོལ་རྒྱལ་ལ་བལྟ་སྟངས་གང་འདྲ་དགོས་མིན་སྐོར་ཆེས་ཐུང་ངུ་ཞིག་གསུངས་པ་དེས་རྐྱེན་བྱས་ནས་གོ་ནོར་ལོག་འགྲེལ་བྱེད་མཁན་བྱུང་རྐྱེན་དང་། དེས་བོད་མི་ཁག་གཅིག་ལ་ཤུགས་རྐྱེན་ཐེབས་སྲིད་སྟབས་གསལ་བཤད་ཐུང་ཙམ་ཞིག་ཞུ་རྒྱུར།
གསུང་ག་འདྲ་ཞིག་གི་སྐབས་བབ་ཀྱི་ནང་དོན་ཚང་ཞིང་མ་ནོར་བར་ངེས་པ་ལ་གསུང་དེའི་ཚིག་གཅིག་གཉིས་ཀྱི་ངོ་གདོང་ཙམ་མིན་པར་གསུང་དེ་དང་འབྲེལ་བ་ཆགས་པའི་ཚིག་སྔ་ཕྱི་ཀུན་ལ་ཞིབ་ཏུ་བལྟ་དགོས་པ་སྤྱི་སྲོལ་དུ་གྱུར་ཡོད། དོན་བསྡུས་ན། སྐབས་དེར་དོལ་རྒྱལ་སྐོར་སྐར་ཆ་ཕྱེད་ཙམ་ཞིག་གསུངས་པ་དེར། སེམས་ཅན་ལ་བརྩེ་བ་བསྒོམ་ཡུལ་ལས་ཞེ་སྡང་བྱ་ཡུལ་ཞིག་མེད་ཅེས་གསལ་བས་དོལ་རྒྱལ་ཡང་བརྩེ་བ་བྱ་ཡུལ་ལས་སྡང་པོ་བྱ་ཡུལ་མ་རེད་ཅེས་གསུངས་པ་དེ་ཙམ་ཞིག་རེད།
དེ་ཡང་བཀའ་སློབ་དེར། བརྩེ་བ་བྱ་ཡུལ་ལས་སྡང་པོ་བྱ་ཡུལ་མེད་ཅེས་པས་བརྩེ་བ་བྱས་ཏེ་སེམས་ཐག་ཉེ་པོ་བྱ་རྒྱུ་ལས་བརྩེ་བ་མ་བྱས་པར་སེམས་ཐག་རིང་པོ་བྱས་ནས་བསྡད་པ་དེ་ནོར་བར་གསུངས་པ་ཞིབ་མོར་ཉན་ན་གསལ་པོར་ཆགས་ཡོད། དེས་ན་བསྟན་པ་ལ་གནོད་མཁན་རེད་ཟེར་བ་དང་། འདྲ་མི་འདྲ་ཞིག་རེད་ཟེར་བའི་རྒྱུ་མཚན་ཕྲ་མོ་ཞིག་ལ་བརྟེན་ནས་བརྩེ་བ་མ་སྒོམ་པར་སེམས་ཐག་རིང་པོ་བྱས་ན་ནོར་བའི་དོན་དུ་གསལ། བྱང་ཆུབ་སེམས་དཔས་ཞིང་བཅུ་ཚང་བ་ལྟ་བུ་ཆེས་ཤིན་ཏུ་མ་རུངས་པའི་སེམས་ཅན་གྱིས་མཚོན་སེམས་ཅན་གཅིག་ཀྱང་བློས་གཏོང་མི་རུང་བར་བརྩེ་བས་བསྐྱང་དགོས་ཏེ། སེམས་ཅན་གཅིག་བློས་བཏང་ནའང་བྱང་ཆུབ་སེམས་དཔའ་ལ་རྩ་ལྟུང་འབྱུང་བ་ཡོངས་སུ་གྲགས་ཤིང་གྲུབ་པས་སོ།།
སྤྱིར་བྱང་ཆུབ་སེམས་དཔའི་སྡེ་སྣོད་དུ། དངོས་སུ་འགྲོ་བ་མང་པོའི་སྲོག་ལ་འཚེ་བ་དང་། བརྒྱུད་ནས་ལས་ངན་ཇེ་རྒྱས་སུ་སོང་ནས་ཚེ་རབས་མཐའ་མེད་དུ་ངན་སོང་གི་སྡུག་བསྔལ་མྱོང་ངེས་ལས་སྐྱོབ་པའི་ཕྱིར་དེད་དཔོན་སྙིང་རྗེ་ཅན་གྱིས་མི་ནག་མདུང་ཐུང་ཅན་བསྒྲལ་བའི་བྱུང་བ་དང་། དེ་བཞིན་གསང་སྔགས་ཀྱི་གཞུང་དུ་ཞིང་བཅུ་ཚང་བའི་ཡུལ་ལ་མངོན་སྤྱོད་དྲག་པོའི་ལས་ཀྱིས་བསྒྲལ་སྦྱོར་མཛད་པར་གསུངས་པའི་སྐབས་ཤིག་དང་། ཡང་བྱེད་པ་པོ་ལ་སྙིང་རྗེ་དང་བྱ་བ་ལ་དགག་སྒྲུབ་དགོས་པ་ནི། སློབ་དཔོན་འཕགས་པ་ལྷའི་བཞི་བརྒྱ་པར། ཐུབ་པས་ཉོན་མོངས་དགྲར་གཟིགས་ཀྱི། །ཉོན་མོངས་དང་འབྲེལ་གང་ཟག་མིན། །ཞེས་སོགས་ནང་པའི་གཞུང་ལུགས་སྤྱིའི་དགོངས་དོན་ཡིན་པ་ལྟར། ༸མགོན་པོ་མཆོག་ཉིད་ནས་ཀྱང་རྒྱུན་དུ་བོད་ལ་དྲག་གནོན་བྱེད་མཁན་གྱི་རྒྱ་ནག་གི་འགོ་ཁྲིད་ཚོར་སྙིང་རྗེ་དང་ཁོ་ཚོའི་ཚུལ་མིན་ཡིད་བྱེད་དང་བྱ་སྤྱོད་ལ་ཁ་གཏད་གདོང་ལེན་དགོས་ཞེས་བཀའ་གནང་བཞིན་པ་ལྟར། དོལ་རྒྱལ་གྱི་བསྟན་འགྲོ་ལ་གནོད་པའི་བྱ་སྤྱོད་ལ་གདོང་ལེན་དང་། ངོ་བོ་དམ་སྲི་འབྱུང་པོ་ལ་སྙིང་རྗེ་བསྒོམས་ནས་ཁོ་པའི་གནས་ངན་ལེན་གྱི་རྒྱུན་གཅོད་ཐབས་བྱེད་དགོས་ཞེས་པའི་དོན་དུའང་སྣང་།
དེ་ལྟར་ན་རང་རེ་བོད་སྤྱིའི་རྩ་དོན་ལ་ལར་ཞེན་དང་ལྡན་པ་ཀུན་ནས། སྔར་ནས་༸གོང་ས་མཆོག་གིས། ང་ཤི་ནས་དོལ་རྒྱལ་བ་རོ་ལངས་རྒྱག་དགོས་བསམ་མཁན་ཡོད་འགྲོ་སྟེ། འགོ་ངས་བཙུགས་ནས་མཇུག་ངས་བསྐྱལ་གྱིན་རེད། ཅེས་སོགས་དོལ་རྒྱལ་སྐོར་སྔ་ཕྱི་བར་གསུམ་དུ་ལམ་སྟོན་ཡང་ནས་ཡང་དུ་ཤིན་ཏུ་ནན་ཏན་དུ་སྩལ་བ་དག་ཡིད་ལ་བཅངས་ཏེ། རྒྱ་གཞུང་གིས་ཆེད་དུ་མངགས་ནས་བོད་མིའི་ནང་ཁུལ་དཀྲུག་པ་དང། དོལ་རྒྱལ་བ་སོགས་ཀྱིས་སྐབས་གང་ཡོད་ལ་སིམ་འཛུལ་གྱིས། གདན་ས་ཁག་ཏུ་དགོས་དབང་གིས་དམ་ཆོས་འདུལ་བའི་དགོངས་དོན་ལྟར་ཚུལ་ཤིང་འགྲིམས་ནས་དོལ་རྒྱལ་བ་དང་ཆོས་དང་ཟང་ཟིང་གིས་འབྲེལ་བ་བཅད་པ་དེ་མི་རུང་ཚུལ་འུད་སྒྲོག་དང། སློབ་གྲྭ་ཁག་ཏུ་དོལ་རྒྱལ་བའི་ཕྲུ་གུའི་ཐོབ་ཐང་བཀག་ཚུལ་སོགས་འཁྱོག་བཤད་ཀྱི་འཆལ་གཏམ་བཀྲམས་དང་འགྲེམས་བཞིན་པ་དེ་དག་ལ་དབུ་མ་འཁོར་བར་བོད་སྤྱིའི་ལངས་ཕྱོགས་སྔར་རྒྱུན་བཞིན་བརྟན་པོར་འཛིན་དགོས་པ་དང། ༸གོང་ས་༸སྐྱབས་མགོན་ཆེན་པོ་མཆོག་ནས་དོལ་རྒྱལ་སྐོར་དམ་བསྒྲགས་ཀྱི་བཀའ་སློབ་སྔ་རྗེས་གནང་བར་འགྱུར་བ་མེད་པ་ཕྱི་གསལ་ནང་གསལ་ཡིན་པ་གསལ་པོ་གོ་རྟོགས་ཐུབ་པ་དགོས། དགའ་ལྡན་ཕོ་བྲང་ཡིག་ཚང་ནས་ཕྱི་ལོ་ ༢༠༢༥ ཟླ་ ༥ ཚེས་ ༢ ལ།།
