༄༅། །ཕྱི་ལོ་ ༢༠༢༥ ཟླ་ ༢ ཚེས་ ༥ ཉིན་སེ་ར་ཐེག་ཆེན་གླིང་གི་ཚོགས་ཆེན་འདུ་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་སེ་ར་བླ་སྤྱི་དང་། སེར་སྨད་གྲྭ་ཚང་། སེར་བྱེས་གྲྭ་ཚང་གསུམ་ཐུན་མོང་གིས་བླ་མ་མཆོད་པའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་པ་རེད།
དེ་ཡང་ཞོགས་པ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཀྱི་གདན་ས་ཆེན་པོ་བཀྲ་ཤིས་ལྷུན་པོ་ནས་ཆིབས་འཁོར་ལ་བཞུགས་སྟེ་སེ་ར་ཐེག་ཆེན་གླིང་དུ་ཆིབས་བསྒྱུར་བསྐྱངས་པ་དང་། སེ་རར་༸ཞབས་སོར་འཁོད་མཚམས་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་ཆོས་རྗེ་རྣམ་ཀྱིས་གཙོས་བླ་སྤྲུལ་དགེ་བཤེས་སོགས་དགེ་འདུན་འདུས་མང་ནས་ཕེབས་བསུའི་སེར་སྦྲེང་དང་སེ་ར་བླ་སྤྱིའི་ཚོགས་ཆེན་འདུ་ཁང་དུ་ཆིབས་བསྒྱུར་གྱིས་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་ཆོས་རྗེ། རྒྱུད་གྲྭ་སྟོད་སྨད་དང་བཀྲ་ཤིས་ལྷུན་པོ་བཅས་ཀྱི་མཁན་རིན་པོ་ཆེ་སོགས་ལ་མཇལ་ཁ་སྩལ་བ་དང་། བརྟན་བཞུགས་ཚོགས་མགོན་དུ་ཆིབས་བསྒྱུར་གྱིས་བཞུགས་ཁྲིར་འཁོད་མཚམས་བླ་མ་མཆོད་པའི་ཆོ་གའི་སྒོ་ནས་བརྟན་བཞུགས་ཀྱི་ཐོག་མའི་ཞལ་འདོན་ཁག་ཅིག་གསུང་འདོན་དང་། ཚོགས་མང་ཡོངས་ལ་གསོལ་ཇ་འབྲས་སིལ་འདེགས་འབུལ་ཀྱིས་བརྟན་བཞུགས་ཀྱི་ཆོ་ག་རིམ་པར་བསྐྱངས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
དེ་རིང་འདིར་བརྟན་བཞུགས་གནང་བ་རེད། སེ་འབྲས་དགེ་གསུམ་གཙོ་བོར་གྱུར་པའི་དགོན་པ་ཁག་དད་པ་དང་དམ་ཚིག་གཡོ་བ་མེད་པ་རེད། ལོ་འདིའི་རིང་མཉམ་དུ་གཤིབ་བསྡད་པ་རེད། ངོས་རང་གི་ངོས་ནས་གདན་ས་གསུམ་ཟེར་དུས་སེམས་ཐག་ཧ་ཅང་ཉེ་བོ་ཡོད་པ་ཞིག་ཡིན། ཁྱོད་ཚོ་སེ་འབྲས་དགེ་གསུམ་གྱི་དགེ་འདུན་པ་ཚོ་ཡིན་ནའང་༸རྒྱལ་བ་ཐམས་ཅད་མཁྱེན་པ་ཟེར་དུས་དམིགས་བསལ་གྱིས་སེམས་ཐག་ཉེ་བོ་ཞིག་ཡོད་པ་རེད། དེ་ནས་ཆོས་ཀྱི་རྩ་བ་དད་པ་དང་དམ་ཚིག་ཡིན་པ་དང་། ང་ཚོ་འདི་དག་ལ་དད་པ་དང་དམ་ཚིག་གཡོ་བ་མེད་པར་ཡོད་པས་ངོས་ཀྱིས་སྨོན་ལམ་རྒྱག་པ་དང་། ཁྱོད་ཚོ་གདན་ས་གསུམ་གྱི་དགེ་འདུན་པ་གཙོ་བོར་གྱུར་པའི་བོད་གངས་ཅན་ལྗོངས་ཀྱི་ལྷ་མི་འདུས་སྡེ་ཡོངས་རྫོགས་ཀྱིས་སྨོན་ལམ་བརྒྱབ་བཞིན་ཡོད།
ངོས་རང་འདིར་ལས་དང་སྨོན་ལམ་གྱི་འབྲེལ་བའི་ཐོག་ནས་བོད་གངས་ཅན་གྱི་བསྟན་འགྲོར་དམིགས་བསལ་གྱིས་འབྲེལ་བ་ཡོད་པ་ཞིག་ཆགས་ཡོད། ངོས་རང་ངོས་ནས་ཆ་བཞག་ན་བོད་གངས་ཅན་གྱི་སྐྱེ་འགྲོ་སེམས་ཅན་གྱི་དོན་དེ་ལ་བསམ་བློ་ཤུགས་ཆེན་ཡོད་པས་མིག་ལ་མཆུ་ཞག་འཁོར་བའི་སེམས་ཐག་ཉེ་བོ་ཞིག་ཆགས་ཡོད། ད་ལྟའི་བར་དུ་ངོས་ནས་གང་ཡོང་ཅི་ཡོང་གིས་བོད་བསྟན་སྲིད་དོན་དུ་སྙིང་ཁུངས་རུས་པའི་གཏིང་ནས་སེམས་ཤུགས་སྒྲིམ་ནས་བསྡད་ཡོད། ད་དུང་ཡང་སྤྱིར་བཏང་ཚོད་དཔག་བྱས་ན་ལོ་བརྒྱ་དང་བཅུ་གྲངས་ཤིག་གི་རིང་ངོས་རང་སྡོད་པའི་བཟོ་སྟ་ཡོད། དེའི་རིང་སེ་འབྲས་དགེ་གསུམ་གཙོ་བོར་གྱུར་པའི་འཛམ་གླིང་འདིའི་སྟེང་གི་ནང་པའི་ཆོས་ལ་དོ་སྣང་ཡོད་མཁན་ཚང་མར་ངོས་རང་སེམས་ཐག་ཉེ་བོ་ཡོང་གི་ཡོད། དེ་བཞིན་རྒྱ་ནག་གི་ནང་པ་མང་པོ་ཞིག་གིས་ངོས་ལ་དགའ་མོས་ཤུགས་ཆེན་པོ་བྱེད་བཞིན་འདུག ཕྱི་རྒྱལ་ཡུལ་གྲུ་ཁག་ཏུའང་ནང་པའི་ཆོས་ལ་དོ་སྣང་བྱེད་མཁན་དང་། ལྷག་པར་ནང་པའི་གཞུང་ནས་སེམས་ཁམས་རིག་པ་གསུང་ཡོང་སྐབས་ཡིད་འཕྲོག་ནས་དམིགས་བསལ་དགའ་བོ་བྱེད་བཞིན་འདུག ངོས་ཀྱིས་འདི་དག་ཚང་མར་དམིགས་ནས་མི་ཚེ་རིང་པོར་བསྡད་པའི་ཐོག་ནས། བོད་གཞིས་བྱེས་མི་མང་གཙོ་བོར་གྱུར་པའི་གང་ལྟར་ངོས་ལ་དགའ་བོ་བྱེད་པའི་མི་ཚང་མར་དངོས་གནས་དྲང་གནས་མི་ཚེ་རིང་པོར་སྡོད་པ་དང་། ངོས་དང་སེམས་ཐག་ཉེ་བའི་འབྲེལ་བ་རྒྱུན་མ་ཆད་པར་ཡོང་བའི་སྨོན་ལམ་རྒྱག་གི་ཡིན། ཁྱོད་ཚོ་ཚང་མས་སྨོན་ལམ་སྐྱོན་ཞོག
དེ་རིང་འདིར་བརྟན་བཞུགས་གནང་བ་རེད། ཁྱོད་ཚོ་ཚང་མའི་ལས་དང་སྨོན་ལམ་གྱི་འབྲེལ་བ་ཞིག་རེད་ལ། སེམས་ཤུགས་གཅིག་སྒྲིལ་གྱི་ཐོག་ནས་བརྟན་བཞུགས་གནང་བ་རེད། ངོས་རང་སེམས་འགུལ་ཐེབས་པ་ལྟ་བུའང་ཧ་ཅང་དགའ་བོ་བྱུང་། ངོས་རང་ལོ་བརྒྱ་དང་བཅུ་གྲངས་རིང་སྡོད་པར་ཕལ་ཆེར་ཚོད་དཔག་བྱེད་ཐུབ་ཀྱི་འདུག དེར་བརྟེན། ངོས་ནས་བོད་བསྟན་སྲིད་ཀྱི་དོན་དུ་གང་ཡོང་ཅི་ཡོང་གིས་ད་ལྟའི་བར་དུ་ཧུར་ཐག་བྱས་པ་ཡིན་ལ། ད་དུང་ཡང་སྙིང་སྟོབས་ཞུམ་པ་མེད་པར་ཧུར་ཐག་བྱེད་ཀྱི་ཡིན། དེ་རིང་འདིར་བརྟན་བཞུགས་གཟབ་རྒྱས་གནང་བ་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་བཀའ་སློབ་སྩལ་ཡོད་པ་དང་། མཐར་བརྟན་བཞུགས་ཀྱི་གནང་སྒོ་མཇུག་སྐྱོང་གིས་ལེགས་པར་གྲུབ་མཚམས་བཀྲ་ཤིས་ལྷུན་པོར་ཆིབས་བསྒྱུར་བསྐྱངས་ཡོད་པ་དང་། ཉིན་རྒྱབ་བྱེས་ཀྱི་ཆོས་སྡེ་ཆེན་པོ་བཀྲ་ཤིས་ལྷུན་པོའི་ཆོས་གྲྭའི་ནང་༸རྒྱལ་མཆོག་སྐུ་ཕྲེང་དང་པོ་རྗེ་དགེ་འདུན་གྲུབ་དཔལ་བཟང་པོའི་དགོངས་རྫོགས་མཆོད་འབུལ་གྱི་ཚོགས་མགོན་དུ་ཆིབས་སྒྱུར་བསྐྱངས་ཡོད་པ་རེད།
