༄༅། །ཕྱི་ལོ་ ༢༠༢༥ ཟླ་ ༢ ཚེས་ ༡༣ ཉིན་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བྱེས་ཀྱི་བཀྲ་ཤིས་ལྷུན་པོ་དགོན་པར་སྒྲོལ་དཀར་ཚེ་དབང་གི་ཆོས་འབྲེལ་བཀའ་དྲིན་སྩལ་ཡོད་པ་རེད།
སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། དེ་རིང་འདིར་དུས་ཚོད་དཀའ་ལས་ཁག་པོ་ཞིག་ལ་མཇུག་ཏུ་དགེ་བ་ལྟ་བུ་རེད། འདི་གནས་སྐབས་ཤིག་རེད་མ་གཏོགས། ངོས་ཀྱི་མི་ཚེའི་ཆ་ནས་མཇུག་ཏུ་སླེབས་ཀྱི་མ་རེད། ངོས་ཀྱིས་ནམ་རྒྱུན་བཤད་བཞིན་པ་ལྟར་ལོ་བརྒྱ་དང་བཅུ་གྲངས་ཤིག་འཚོ་ངེས་རེད། རྨི་ལམ་དེ་ལྟ་བུའང་གཏོང་གི་འདུག དེར་བརྟེན། ད་ལྟ་གནས་སྐབས་ཤིག་གི་རིང་ས་གནས་འདིར་དེ་རིང་མཇུག་སྡུད་ལྟ་བུ་རེད། མཇུག་གི་བྱ་བར་སྒྲོལ་དཀར་གྱི་ཚེ་དབང་བྱ་རྒྱུ་བྱས་པ་ཡིན། ལྷག་པའི་ལྷ་མཆོག་འཕགས་པ་སྒྲོལ་དཀར་ཡིད་བཞིན་འཁོར་ལོ་ང་ཚོའི་ཚེ་བསྲིང་བར་དམིགས་བསལ་གྱིས་ལས་འབྲེལ་ཡོད་པ་ཞིག་ཆགས་ཡོད། དེ་རིང་འདིར་རྒྱ་ཆེའི་མང་ཚོགས་འདུས་ནས་ཚང་མས་ཆོས་དོན་གཉེར་རེད་མ་གཏོགས་གཏམ་དོན་གཉེར་ཕལ་ཆེར་མ་རེད། དེར་བརྟེན། དེ་རིང་འདིར་མཇུག་ཏུ་དགེ་བ་སྒྲོལ་དཀར་ཡིད་བཞིན་འཁོར་ལོའི་བྱིན་རླབས་བྱེད་རྒྱུ་ཡིན། ཞེས་དང་།
མ་གཞི་ངས་ཁ་སང་ཡང་ཞུས་ཟིན་པ་བཞིན། ངོས་ཀྱི་རྨི་ལམ་ལ་གཙུག་ལག་ཁང་ཆེན་པོ་ཞིག་གི་ཏུ་དབུས་སུ་བཅོམ་ལྡན་འདས་བཞུགས་འདུག་པ་དང་། ངོས་རང་གཤམ་དུ་བསྡད་འདུག་པར་བཅོམ་ལྡན་འདས་ཀྱི་ཡར་ཤོག་གསུངས་པ་ལྟར་བཅོམ་ལྡན་འདས་ཀྱི་དྲུང་ལ་ཕྱིན་པར། བཅོམ་ལྡན་འདས་ཀྱིས་ཧ་ཅང་འཆམ་པོ་གནང་སོང་། དེར་བརྟེན། སེམས་ཀྱི་ནང་ལ་བཅོམ་ལྡན་འདས་ཀྱི་ཐུགས་རྗེ་གཟིགས་པ་བླ་ན་མེད་པ་ཞིག་འདུག་བསམ་ནས་དམིགས་བསལ་གྱི་དགའ་སྤྲོ་ཞིག་བྱུང་། གང་ལྟར་བསྟན་པ་རྒུད་པའི་སྐབས་ཐོག་འདིར་ངོས་ནས་བསྟན་པའི་བྱ་བ་བྱེད་བཞིན་ཡོད། འཛམ་བུ་གླིང་གི་ཤར་ནུབ་གང་ས་གང་ལ་ནང་པའི་ཆོས་འགྲེལ་བཤད་བརྒྱབས་ནས། སངས་རྒྱས་པའི་ཆོས་ལ་དད་པ་གསར་པ་སྐྱེ་བ་དང་། དད་པ་སྔར་ཡོད་བརྟན་པོ་ཡོང་བར་ངོས་ཀྱིས་ཞབས་འདེགས་དགའ་རབ་བསྒྲུབས་ཡོད།
མདོ་སྨད་ནས་ཡོང་བའི་ཨ་མདོའི་ཕྲུ་གུ་ངོས་རང་ལ་ཕ་མ་ཚོ་ཧ་ཅང་དྲིན་ཆེན་པོ་དང་། ཨ་མ་ལགས་ཧ་ཅང་དྲིན་ཆེན་པོ་ཡིན། རྨོ་ལགས་ཀྱང་ཧ་ཅང་དྲིན་ཆེན་པོ་ཡིན། ཁོ་ཚོས་ངོས་ལ་ནང་པའི་ཆོས་ཀྱི་སྐོར་བག་ཆགས་སྤྲད་ནས་དོ་སྣང་ཞིག་བསླེབས་ཏེ། རྒྱུན་དུ་ཨ་ར་པ་ཙ་བགྲང་སྡོད་ཀྱི་ཡོད། སྐུ་འབུམ་ལ་ཇོ་བོའི་ལྷ་ཁང་ཞིག་ཡོད་པ་དེར། ཕྲུ་གུ་གཞན་པ་ཚོས་ཕྱག་འཚལ་ནས་ཨ་ར་པ་ཙ་བགྲང་ནས་སྡོད་ཀྱི་འདུག་པར། ངོས་ཀྱང་དེ་ཚོའི་མཉམ་དུ་ཕྱག་འཚལ་བཞིན་ཨ་ར་པ་ཙ་བགྲང་ནས་སྡོད་ཀྱི་ཡོད། དེ་དུས་ཕལ་ཆེར་ང་ལོ་གསུམ་བཞི་ཞིག་མིན་ནམ། གང་ལྟར་ཆུང་ཆུང་སྐབས་ནས་བཅོམ་ལྡན་འདས་ཀྱི་ཆོས་ལ་བག་ཆགས་བཞག་ཡོད། དེ་ནས་ལྷ་མོའི་བླ་མཚོ་ནས་ཨ་ཀ་མ་སོགས་ཤར་བའི་ཐོག་ནས། མཐའ་མར་ངོས་ཀྱི་མིང་དེ་རྒྱལ་དབང་གི་ཁྲི་ལ་འཁོད་པ་རེད། ངོས་རང་འཇོན་པོ་རྒོད་པོ་ཅང་མེད་ཀྱང་། སོ་སོའི་ལས་དང་སྨོན་ལམ་གྱི་མཐུ་བཙན་པོས་ཡར་རྒྱལ་དབང་གི་ཁྲི་ལ་བསླེབས་པ་དང་། རྒྱལ་དབང་གི་ཁྲི་ལ་བསླེབས་ནས་དབུས་གཙང་གི་མི་ཨ་ཅང་ཅང་སྟེ། མདོ་སྟོད་སྨད་ཀྱི་ས་ཆ་གང་ས་གང་ནས་ཧ་ཅང་དགའ་བོ་བྱེད་ཀྱི་འདུག
ངོས་ཀྱི་མི་ཚེ་བསྐྱལ་བའི་ནང་ཡག་ཤོས་ཡོངས་འཛིན་རྣམ་པ་གཉིས་མཇལ་ནས་དཔེ་ཆར་བལྟས་པ་དེ་ཡིན། ཐོག་མར་བསྡུས་གྲྭ་ནས་བཟུང་སྟེ་རྟགས་གསལ་གྱི་འགྲོ་སྟངས་རྣམས་བསླབས། དེ་ནས་མངོན་རྟོགས་རྒྱན་དང་དབུ་མ་འཇུག་པ་སྟེ་རྒྱན་འཇུག་གཉིས་བློ་ལ་བཟུང་། ཡོངས་འཛིན་རྣམ་པ་གཉིས་ཀྱིས་གཞུང་དེ་དག་གི་འགྲེལ་བཤད་སྙིང་བསྡུས་རེ་གསུངས་པར། ད་ལྟ་བསམ་བློ་གཏོང་དུས་ངོས་རང་མི་གོ་ཆོད་པ་ཞིག་བྱས་འདུག་བསམས་ནས་སོ་སོས་སོ་སོར་ཡི་རང་དང་། དགའ་སྤྲོ་སྐྱེ་བཞིན་འདུག
ལྷ་སར་ཟིང་འཁྲུགས་ལངས་པའི་སྐབས་སུ་ནོར་བུ་གླིང་གར་རྟེན་མགོན་པོ་ཕྱག་དྲུག་པ་ཞིག་ཡོད་པའི་སྐུ་མདུན་དུ་ཕྱིན་ནས་སྨོན་ལམ་བརྒྱབ་པ་དང་། དེ་དང་ཆབས་ཅིག་ངོས་དང་འབྲེལ་མེད་ཀྱིས་འཁྱེར་བཞིན་པའི་ལྷ་མོའི་སྐུ་ཐང་མདུན་དུ་ཟན་རྟགས་སྒྲིལ་ནས་ཐ་མ་ནོར་བུ་གླིང་ག་ནས་ཐོན་པ་རེད། ནོར་བུ་གླིང་ག་ནས་ཐོན་པ་དེ་ཡག་པོ་བྱུང་འདུག རང་དབང་ལུང་པར་སླེབས་པ་དང་། མི་མང་པོར་ནང་ཆོས་ལ་དོ་སྣང་ཡོད་པའི་ཐོག་ངོས་ལ་ཏཱ་ལའི་བླ་མའི་མིང་ཡོད་པས་ཚང་མས་དགའ་བོ་བྱེད་པ་ཞིག་དང་། དེ་སྔ་ཆོས་མེད་སའི་ལུང་པའི་ནང་དུའང་ཏཱ་ལའི་བླ་མ་ཟེར་དུས་དགའ་བོ་བྱེད་ཀྱི་འདུག དེ་ལྟར་བསམ་བློ་གཏོང་དུས་ངོས་ཀྱི་མི་ཚེ་འདི་དོན་དང་ལྡན་པ་ཞིག་བྱུང་འདུག ད་དུང་ཡིན་ནའང་སྟོན་པ་བཅོམ་ལྡན་འདས་ཀྱི་རྗེས་འབྲངས་དགེ་སློང་ཞིག་གིས་དངོས་གནས་འདུལ་བའི་ལག་ལེན་བཅོས་མིན་གནང་བའི་ཐོག་གསང་སྔགས་ཀྱི་གཞུང་བསྐྱེད་རྫོགས་སྐོར་ལ་སློབ་སྦྱོང་བྱེད་པ་དང་། དེ་བཞིན་གཙོ་ཆེ་ཤོས་སྒོམ་རྒྱག་པ་བཅས་ཞོགས་པ་རེ་བཞིན་གཉིད་སད་པ་དང་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བ་སྒོམ་བཞིན་ཡོད། དེ་ལྟར་ངོས་ཀྱི་མི་ཚེ་དོན་དང་ལྡན་པ་ཞིག་བསྐྱལ་བཞིན་ཡོད། ངོས་ཀྱིས་ཆོས་ཀྱི་ཉམས་ལེན་འདི་ལྟར་བྱས་ཏེ་མི་ཚེ་བསྐྱལ་བཞིན་པ་གྲོགས་པོ་ཚོར་ཡང་འདི་ལྟ་བུའི་མིག་ལྟོས་སླེབས་ཡོད། མདོར་ན་ངོས་ཀྱི་གྲོགས་པོ་ནང་པ་མིན་མཁན་དེ་འདྲ་ལའང་དོ་སྣང་སླེབས་ནས་ནང་པའི་ཆོས་ལ་དགའ་མོས་བྱེད་མཁན་ཇེ་མང་ལ་འགྲོ་མཁན་བྱུང་། ངོས་ཀྱིས་མི་ཚེ་འདི་ལྟར་བསྐྱལ་བཞིན་ཡོད།
ངོས་ཀྱི་རྨི་ལམ་ལ་བལྟས་པ་ཡིན་ན། ད་དུང་ཡང་ཕལ་ཆེར་ལོ་བརྒྱ་དང་བཅུ་གྲངས་ཤིག་སྡོད་ཀྱི་འདུག ངོས་ཀྱིས་ད་ལྟའི་བར་དུ་ཧུར་ཐག་བྱས་པ་ཡིན་ལ། ད་དུང་ཡིན་ན་ཡང་ཧུར་ཐག་བྱ་རྒྱུ་ཡིན། ཨ་མདོ་ཟི་ལིང་པ་ཏོག་ཙམ་གྲུང་སེ་ཞིག་ཡོད་པ་དང་། ངོས་རང་གྲུང་པོ་བྱ་ས་དེ་ནོར་མེད། སངས་རྒྱས་པའི་ཆོས་ལ་གྲུང་པོ་བྱས་ནས་བསྡད་པས་ངོས་ལ་ཁེ་བཟང་རག་པར་མ་ཟད། སངས་རྒྱས་ཀྱི་བསྟན་པ་ལ་ཞབས་འདེགས་ཀྱང་སྒྲུབ་ཀྱི་ཡོད། མ་གཞི་དེ་རིང་སྐབས་སུ་བབ་པའི་ཆོས་འཁོར་དེ་དག་ཚར་ནས་སྒྲོལ་དཀར་གྱི་ཚེ་དབང་ཞིག་བྱ་རྒྱུ་ཡིན། ངོས་ཀྱིས་སྒྲོལ་དཀར་གྱི་ཚེ་དབང་བསྐུར་བར་སྒྲུབ་ཞག་སྒྲུབ་པའི་རིང་ཁྱོད་ཚོས་སྒྲོལ་མའི་སྔགས་ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ་ཞེས་པ་འདི་གསོགས་ཤིག ཅེས་སོགས་བཀའ་སློབ་སྩལ་རྗེས་མགོན་པོ་གང་ཉིད་མཆོག་གིས་སྒྲུབ་ཞག་མཛད།
སྒྲུབ་ཞག་མཛད་གྲུབ་མཚམས་མགོན་པོ་གང་ཉིད་མཆོག་སྒྲོལ་སྒྲོལ་དཀར་ཚེ་སྦྱིན་ཡིད་བཞིན་འཁོར་ལོར་ཞལ་གཅིག་ཕྱག་གཉིས་པ་ཞིག་ལ་གསལ་ཡོད་པ་དང་། དེ་ལྟར་བསམ་པའི་སྒོ་ནས་བླ་མ་ལ་མནྜལ་མདོར་བསྡུས་ཤིག་འབུལ་བར་ཞུ། ཞེས་སོགས་ཚེ་དབང་དབུ་འཛུགས་ཀྱིས་མཛད་ཅིང་། སྒྲོལ་མ་ནི་སངས་རྒྱས་ཀྱི་འཕྲིན་ལས་ཀྱི་རང་གཟུགས་ཐུན་མོང་མ་ཡིན་པ་ཞིག་ཆགས་ཡོད་པ་དང་། བོད་གངས་ཅན་གྱི་ལྗོངས་ཀྱི་སྔོན་གྱི་སྐྱེས་བུ་དམ་པ་མང་པོ་ཞིག་འཕགས་པ་སྒྲོལ་མ་ལ་བརྟེན་ནས་སྐུ་ཚེ་བསྲིངས་ཏེ། བསྟན་པ་དང་འགྲོ་བའི་དོན་རྒྱ་ཆེན་མཛད་ཡོད། ལྷག་པར་འབྲོམ་སྟོན་ཆོས་ཀྱི་རྒྱལ་པོ་ལ། ཁྱོད་ཀྱི་རྗེས་འབྲང་ཁོ་མོས་སྐྱོང་། ཞེས་གསུངས་འདུག
མཁའ་ཁྱབ་ཀྱི་སེམས་ཅན་ཐམས་ཅད་རང་གི་དྲིན་ཆེན་གྱི་མ་ཤ་སྟག་ཡིན་ཡང་། མ་དེ་རྣམས་སྡུག་བསྔལ་དུ་མས་ཉམ་ཐག་ནས་བསྡད་ཡོད་པ་དང་། འཛམ་བུའི་གླིང་གི་མི་མང་ཆེ་བའི་མི་ཚེ་དེ་སེམས་མི་སྐྱིད་པ་ཞིག་གི་ངང་ནས་འགྲོ་ཡི་འདུག་པ་དེ་ཧ་ཅང་ཡ་ང་བ་ཞིག་དང་སེམས་སྐྱོ་བ་ཞིག་རེད། བསམ་བློ་གཏོང་མི་ཤེས་པ་ཞིག་གི་མི་ཚེ་སྐྱེལ་སྟངས་དེ། སེམས་ཁྲལ་ཁོ་ནའི་ངང་ནས་མི་ཚེ་སྐྱེལ་བཞིན་ཡོད་པས། ལུས་འདི་དགེ་བའི་གྲོགས་སུ་བསྒྱུར་བའི་ཐོག་ནས་ཆོས་ཀྱི་བསམ་བློ་དང་མ་བྲལ་བ་ཞིག་བྱ་ཐུབ་ན། མི་ཚེ་དོན་དང་ལྡན་པ་ཞིག་ཡོང་ཐུབ་ཀྱི་ཡོད་པ་དང་། མི་ཚེ་དོན་དང་ལྡན་ཞིང་ཚེ་རིང་པོ་ཡོང་བ་ལ་སྒྲོལ་དཀར་གྱི་བྱིན་རླབས་ཞུགས་པའི་ཐོག་ནས་ཚེ་རིང་པོར་སྡོད་ཐུབ་ན། མི་
