༄༅། །ཕྱི་ལོ་ ༢༠༢༣ ཟླ་ ༩ ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལྷོ་ཤར་ཨེ་ཤེ་ཡའི་དད་ལྡན་ཆོས་ཞུ་བ་ཚོས་ཇི་ལྟར་གསོལ་བ་བཏབ་པ་ལྟར་ཐེག་ཆེན་ཆོས་གླིང་གཙུག་ལག་ཁང་དུ་དབུ་མ་འཇུག་པ་དང་དེའི་རང་འགྲེལ་གྱི་བཀའ་ཆོས་འཕྲོ་སྐྱོང་དབུ་འཛུགས་མཛད་ཡོད་པ་རེད།
དེ་ཡང་ཞོགས་པ་ཆུ་ཚོད་༧།༤༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་གནང་བ་དང་། སྐབས་དེར་གསུང་ཆོས་གསོལ་འདེབས་ཞུ་མཁན་ཚོགས་ཆུང་གི་འཐུས་མི་ཚོས་གདན་ཞུ་དང་མགོན་པོ་གང་ཉིད་མཆོག་གིས་མི་མང་ལ་ཕྱག་བརྡས་འཚམ་འདྲི་དང་འབྲེལ་ཐུབ་དབང་ལྷ་ཁང་གི་བཞུགས་ཁྲིར་༸ཞབས་སོར་འཁོད་མཚམས་པཱ་ལིའི་ཆོས་བརྒྱུད་ཀྱི་རྗེས་འབྲང་དགེ་འདུན་པ་ཚོས་བཀྲ་ཤིས་པའི་མདོ་གསུང་འདོན་གནང་། དེ་རྗེས་རྒྱ་སྐད་ཐོག་ཤེས་རབ་སྙིང་པོ་གསུང་འདོན་མཚམས་གསུང་ཆོས་གོ་སྒྲིག་ཚོགས་ཆུང་གི་ཚོགས་མིས་མཎྜལ་རྟེན་གསུམ་འདེགས་འབུལ་དང་མཇལ་ཁ་ཞུས་མཚམས་བཀའ་སློབ་སྩལ་དོན།
དེ་རིང་འདིར་རིས་སུ་མ་ཆད་པའི་བཅོམ་ལྡན་འདས་ཀྱི་རྗེས་འབྲང་གི་ཆོས་པ་རྣམས་རུབ་རུབ་བྱས་ཏེ་སྨོན་ལམ་རྒྱག་བཞིན་པ་རེད། ལམ་རིམ་ཉམས་མགུར་ལས། ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ།། མཐའ་ཡས་འགྲོ་བའི་རེ་བ་སྐོང་བའི་གསུང༌།། མ་ལུས་ཤེས་བྱ་ཇི་བཞིན་གཟིགས་པའི་ཐུགས།། ཤཱཀྱའི་གཙོ་བོ་དེ་ལ་མགོས་ཕྱག་འཚལ།། ཞེས་གསུངས་པ་ལྟར། སྟོན་པ་བཅོམ་ལྡན་འདས་རང་རྟག་པ་རང་བྱུང་གི་སྐྱེས་བུ་མ་ཡིན་པར་དུས་ཚོད་མང་པོར་བསླབ་ཅིང་། མཐར་གྲངས་མེད་གསུམ་གྱི་ཚོགས་བསགས་ནས་མངོན་པར་རྫོགས་པར་སངས་རྒྱས་པ་རེད། ཕུན་ཚོགས་དགེ་ལེགས་བྱེ་བས་བསྐྲུན་པའི་སྐུ་ཞེས་རྒྱུ་ཚོགས་གྲངས་མེད་པ་ཞིག་གི་ཐོག་ནས་འབྲས་བུ་མངོན་དུ་བྱས་པའི་བཅོམ་ལྡན་འདས་རང་ཉིད་ཀྱིས་རྒྱུ་ཚོགས་མང་པོར་དགོངས་པ་བཞེས་ནས་སེམས་གཏིང་གི་དྲི་མ་བག་ཆགས་དང་བཅས་པ་སྦྱངས་པའི་ཉམས་མྱོང་གི་ཐོག་ནས་ང་ཚོར་ལམ་བསྟན་ཞིང་། མཐའ་ཡས་འགྲོ་བའི་རེ་བ་སྐོང་བའི་གསུང་།། ཞེས་གདུལ་བྱ་བློ་རབ་འབྲིང་ཐ་མ་གསུམ་ལ་གང་འདུལ་གྱི་གསུང་གི་འཕྲིན་ལས་བསྐྱེད་ནས་ཐ་ན་ཆོས་དད་མེད་མཁན་ཞིག་ཡིན་ནའང་བསླབ་བྱ་བཟང་པོ་ཞིག་གིས་སེམས་རྒྱུད་བཟང་པོ་བྱེད་པ་དང་། གཞན་ཕན་བྱེད་པ་གསུང་གི་ཡོད། ཆོས་དད་ལའང་སྣ་ཚོགས་ཡོད་པས་གང་ལྟར་སོ་སོའི་ཁམས་དང་མོས་པ་དང་འཚམ་པ་ཞིག་དང་། གང་ལྟར་གཞན་ཕན་གྱི་བློ་བཟང་པོ་སྟོན་པ་ཞིག་རེད།
ཕྱོགས་གཅིག་ནས་བཅོམ་ལྡན་འདས་རྒྱུ་ཚོགས་ཇི་འདྲ་ཞིག་ལ་རྟེན་ནས་མངོན་པར་རྫོགས་པར་སངས་རྒྱས་པ་ང་ཚོས་རྩད་གཅོད་བྱས་དགོས། བཅོམ་ལྡན་འདས་ལམ་ཇི་ལྟ་བུ་ཞིག་གི་ཐོག་ནས་མངོན་པར་རྫོགས་པར་སངས་རྒྱས་པ་བཞིན། ང་ཚོ་ཚང་མའི་རྒྱུད་དུ་ཁམས་བདེ་གཤེགས་སྙིང་པོ་ཡོད་པ་རེད། ང་ཚོ་ཚང་མའི་རྒྱུད་དུ་ཉོན་མོངས་པའི་དྲི་མ་དང་ཤེས་བྱའི་དྲི་མ་མང་པོ་ཡོད་ཀྱང་། དེ་དག་གི་གཞི་རྩ་ནི་བདག་ཏུ་འཛིན་པའི་བདེན་འཛིན། གང་ཟག་གི་བདེན་འཛིན་དང་། ཆོས་ཀྱི་བདེན་འཛིན་གྱི་ཐོག་ནས་ཡོང་གི་ཡོད་པས་བདག་མེད་པའི་ལྟ་བུའི་ཐོག་ཏུ་བསམ་བློ་བཏང་བ་ཡིན་ན་བདག་ཏུ་འཛིན་པའི་བདག་འཛིན་གཉིས་པོ་དེ་རིམ་བཞིན་ཞི་ཐུབ་པ་ཞིག་རེད།
ངོས་རང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་རེད། ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་གི་ཡོད། གང་ལྟར་སེམས་ལ་འགྱུར་བ་མང་པོ་སླེབས་ཀྱི་འདུག ཕྱི་ནང་གི་ཆོས་གང་ཡིན་ཡང་དོན་སྟེང་ནས་ཡོད་པ་ཞིག་ང་རང་ཚོར་སྣང་གི་ཡོད་ཀྱང་། སྣང་བ་ལྟར་དུ་གྲུབ་མེད་བསམ་པའི་མིང་རྐྱང་བཏགས་ཡོད་ཙམ་ཟེར་བའི་བསམ་བློ་ཧ་ཅང་ཤུགས་ཆེན་པོ་འཁོར་ཐུབ་ཀྱི་འདུག སེམས་རྒྱུད་ཀྱི་མ་རུང་བར་བྱེད་མཁན་བདག་ཏུ་འཛིན་པའི་བདེན་འཛིན་ལ་གཉེན་པོ་བསྟེན་ནས་ཡོང་གི་ཡོད་པས་བདེན་འཛིན་གྱི་ཨ་འཐས་ཀྱི་འཛིན་པ་ཤུགས་ཆུ་རུ་ཕྱིན་ནས། དེ་དང་ཆབས་ཅིག རང་ཉིད་གཅེས་འཛིན་རྒུད་པ་ཀུན་གྱི་སྒོ།། མ་རྣམས་གཅེས་འཛིན་ཡོན་ཏན་ཀུན་གྱི་གཞི།། དེ་ཕྱིར་བདག་གཞན་བརྗེ་བའི་རྣལ་འབྱོར་ལ།། ཉམས་ལེན་སྙིང་བོར་བྱེད་པར་བྱིན་གྱིས་རློབས།། ཞེས་གསུངས་པ་ལྟར། རང་གཅེས་པར་འཛིན་པའི་གཅེས་འཛིན་དེ་ཞི་མཐའ་ལ་ལྷུང་བ་ནས་གང་ལྟར་འཕྲལ་སེལ་གྱི་མངོན་འདོད་ལུས་རྟེན་གྱི་ནང་དུའང་སྡུག་བསྔལ་མང་པོ་ཡོང་བ་རྣམས་བདག་ཏུ་འཛིན་པའི་བདེན་འཛིིན་དང་། རང་གཅེས་འཛིན་གྱིས་བྱེད་ཀྱི་ཡོད་པ་དང་། ག་ཚོད་ཐུབ་ཐུབ་ཀྱིས་ནམ་མཁའི་མཐས་གཏུགས་པའི་སེམས་ཅན་ཐམས་ཅད་རང་དང་རང་འདྲ་བར་སྡུག་བསྔལ་ཕྲ་མོ་ཙམ་ཡང་མི་འདོད་པར་བདེ་བའི་ཆོག་མི་ཤེས་པ་ཡིན་པ་གཅིག་མཚུངས་ཡིན་པས་ནམ་མཁའི་མཐས་གཏུགས་པའི་སེམས་ཅན་ཐམས་ཅད་ལ་མཐའ་གཅིག་ཏུ་བརྩེ་བ་བྱེད་དགོས་པ་ཞིག་རེད།
སྡུག་བསྔལ་གྱི་རྒྱུ་བདེན་འཛིན་ཡིན་པས་དེ་སྤང་ཐུབ་པ་ལ་ངེས་པ་རྙེད་ཚེ་བདེན་འཛིན་གྱི་གཞན་དབང་དུ་སོང་ནས། བདེ་བ་འདོད་ཀྱང་བདེ་བས་ཕོང་། སྡུག་བསྔལ་མི་འདོད་ཀྱང་སྡུག་བསྔལ་གྱིས་མནར་བའི་ཉམ་ཐག་པའི་སེམས་ཅན་རྣམས་ལ་མཐའ་གཅིག་ཏུ་བརྩེ་བའི་བློ་སླེབས་སྡོད་པ་ཞིག་རེད། དེ་ལྟར་ཡིན་པས་རང་གཅེས་པར་འཛིན་པའི་གཅེས་འཛིན་གྱིས་གང་ལྟར་གཞན་ཕོང་པ། རང་ཕོང་བ་ཞིག་གི་རེད། དེར་བརྟེན། ག་ཚོད་ཐུབ་ཐུབ་ཀྱིས་གཞན་གཅེས་པར་འཛིན་པའི་གཅེས་འཛིན་བྱོས། དེ་ནས་སྣང་ཞིང་སྲིད་པའི་ཆོས་ཐམས་ཅད་སྣང་བ་ལྟར་དུ་དོན་སྟེང་ནས་གྲུབ་པ་མེད་པར། མཐའ་ལ་གཏུགས་ཡོང་དུས་མིང་རྐྱང་བཏགས་ཡོད་ཙམ་མ་གཏོགས་མེད་པ་བློ་ལ་ཤར་ཐུབ་ཀྱི་འདུག དེ་དག་ངོས་ཀྱིས་དཔེ་ཆའི་ནང་དུ་ཡོད་པ་མར་སྐྱོར་བ་མ་རེད། ངོས་རང་གིས་ཉིན་རེ་བཞིན་དུ་བསམ་བློ་གཏོང་གི་ཡོད། སྟོང་ཉིད་ཀྱི་ལྟ་བར་བསམ་བློ་བཏང་ཡོང་དུས་སྣང་ཡང་མི་བདེན་པའི་སྒྱུ་མ་ལྟ་བུ་དེ་བློ་ལ་སླེབས་ཀྱི་འདུག རང་གཅེས་པར་འཛིན་པའི་གཅེས་འཛིན་གྱི་སྐྱོན་ལ་སྒོ་དུ་མ་ནས་བསམ་བློ་བཏང་ཡོང་དུས་མཐའ་གཅིག་ཏུ་གཞན་བདེ་འབའ་ཞིག་སྒྲུབ་བསམ་པའི་བློ་ཞིག་སླེབས་ཀྱི་འདུག དེར་བརྟེན། བློ་གོམས་ན་ག་ལེར་རང་གཅེས་པར་འཛིན་པའི་གཅེས་འཛིན་དང་གཅིག བདག་ཏུ་འཛིན་པའི་བདེན་འཛིན་དང་གཉིས་པོ་ད་ལྟའི་བར་དུ་ང་ཚོའི་བློ་འཁྲུལ་བའི་དབང་གིས་བདེན་འཛིན་དང་བདག་འཛིན་གྱི་གཞན་དབང་དུ་སོང་བ་དེ་ལྟར་རེད་མ་གཏོགས། ད་རེས་ང་ཚོ་སངས་རྒྱས་པའི་ཆོས་དང་མཇལ། དཔལ་ནཱ་ལེནྡྲའི་མཁས་པའི་དབང་པོ་ཚོས་གཏན་ལ་ཕབ་པའི་གཞུང་རྣམས་ལ་མཇལ། དེ་ནས་རིགས་པས་དཔྱད་པ་བྱས་ཡོང་སྐབས། རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱི།། ཞེས་གསུངས་པ་ལྟར། རང་དོན་སྒྲུབ་པ་ལ་བྱང་ཆུབ་ཀྱི་སེམས། གཞན་དོན་སྒྲུབ་ནའང་བྱང་ཆུབ་ཀྱི་སེམས་རེད། བྱང་ཆུབ་ཀྱི་སེམས་ནི་དངོས་གནས་རང་གཞན་ཀུན་ལ་བདེ་སྐྱིད་ཡོང་བ་དང་། འཕྲལ་དུ་བདེ་བ། ཕུགས་ལ་ཕན་པ། མཐའ་ལུས་བདེ་བ་དང་སེམས་བག་ཕེབས་པོ་ཡོང་བ་ཞིག་བྱང་ཆུབ་ཀྱི་སེམས་ཀྱིས་ཡོང་གི་འདུག
རྐྱེན་ངན་མང་པོ་ཡོང་སྐབས་རྐྱེན་ངན་ཡོང་བའི་གཞི་རྣམས་ལ་སྙིང་རྗེ་སྐྱེས་པ་མ་གཏོགས་དེ་ལ་སེམས་ཀྱིས་མ་བཟོད་པའི་ཐོག་ནས་མ་དགའ་བ་ཡོང་རྒྱུ་མི་འདུག ནམ་མཁའི་མཐས་གཏུགས་པའི་སེམས་ཅན་སྤྱི་དང་། ལྷག་པར་དུ་གདོན། བགེགས། ལོག་འདྲེན་སོགས་ཚང་མ་དངོས་གནས་རང་གཅེས་འཛིན་གྱི་གཞན་དབང་དུ་སོང་ནས་དེ་ལྟ་བུའི་ཐོག་ནས་གཞན་ལ་གནོད་པ་བྱེད་པ་ཞིག་ཡོང་གི་ཡོད་པ་རེད། མི་ཤེས་པའི་དབང་གིས་ཡོང་གི་ཡོད་པ་རེད། སྙིང་རྗེ་བའི་ཡུལ་རེད། དེར་བརྟེན། གདོན་བགེགས་ལོག་འདྲེན་ཟེར་བ་སོགས་ལ་སྙིང་རྗེ་སྐྱེས་པ་མ་གཏོགས་སེམས་ནས་ཞེད་སྣང་བྱེད་པ་དང་། དེ་དག་ལ་རྒྱབ་ཀྱིས་ཕྱོགས་དགོས་པ་མི་འདུག ཚང་མས་རང་གཅེས་འཛིན་གྱི་སྐྱོན་དང་། བདག་ཏུ་འཛིན་པའི་བདེན་འཛིན་གྱི་སྐྱོན་ལ་བསམ་བློ་ཡག་པོ་ཞིག་འཁོར་ཡོང་དུས་རང་གཅེས་འཛིན་དང་བདེན་འཛིན་གྱི་གཞན་དབང་དུ་སོང་བའི་ནམ་མཁའི་མཐས་གཏུགས་པའི་སེམས་ཅན་ཐམས་ཅད་སྡུག་བསྔལ་རྒྱུ་དང་བཅས་པ་ལས་བྲལ་བ་ཞིག་དང་། བདག་མེད་པའི་དེ་ཁོ་ན་ཉིད་ཀྱི་དོན་བདེ་བླག་ཏུ་ཁོང་དུ་ཆུད་པ་ཞིག་བྱུང་ན་ཅི་མ་རུང་བསམ་པའི་སེམས་ཤུགས་ཤིག་སྐྱེས་ཡོང་གི་འདུག དེ་ལྟར་བསམ་བློ་བཏང་ཡོང་དུས་བསམ་བློ་གཏོང་སྟངས་ཀྱི་ཐོག་ནས་ནམ་རྒྱུན་མི་བདེ་བ་ཡོང་བའི་གྲས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་འཁོར་ཡོང་སྐབས་རྐྱེན་ངན་རུ་འཛིང་པ་རྣམས་སེམས་ཤུགས་འཕར་བ་ཞིག་དང་། གང་སྣང་བདེན་གྲུབ་ཏུ་སྣང་བ་རྣམས་སྣང་བ་ལྟར་དུ་གྲུབ་པ་གཏན་ནས་མེད་བསམ་པ་ཞིག་གི་སྟོང་ཉིད་ཀྱི་ལྟ་བ་ལ་བསམ་བློ་འཁོར་ཐུབ་པ་ཞིག་གི་ཧ་ཅང་ཡག་པོ་རེད།
ང་ཚོའི་སངས་རྒྱས་པའི་ཆོས་སྤྱི་དང་། དཔལ་ནཱ་ལེནྡྲའི་ཀླུ་སྒྲུབ་ཡབ་སྲས། ལྷག་པར་དུ་དཔལ་ལྡན་ཟླ་བ་གྲགས་པ་སོགས་ཀྱིས་རིགས་པའི་ལམ་ལ་བརྟེན་ནས་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བ་གསུང་སྐབས་སེམས་ཀྱི་གཏིང་ནས་དེ་དེ་བཞིན་རེད་བསམ་པ་ཞིག་སེམས་གཏིང་ནས་ཡིད་ཆེས་རྙེད་པ་ཞིག་ཡོང་རྒྱུ་འདུག རྗེ་རིན་པོ་ཆེས། བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག། ཅེས་ཐུགས་སྨོན་གནང་བ་ལྟར། ངོས་རང་ལ་མཚོན་ནའང་བཅོམ་ལྡན་འདས་ཀྱི་རྗེས་འབྲང་དགེ་སློང་ཞིག་རེད། དབུ་ཚད་ཀྱི་གཞུང་ལ་དགའ་རབ་བལྟས་ཡོད། དེར་བརྟེན། སངས་རྒྱས་བཅོམ་ལྡན་འདས་ཀྱི་ཆོས་ཚུལ་རིགས་པའི་ལམ་ནས་བསམ་བློ་བཏང་སྡོད་པ་དེ་ཧ་ལས་པ་ཞིག་རེད།
དེ་རིང་འདིར་ཆོས་གྲོགས་ཚོར་ཐུག་པ་རེད། གང་ལྟར་དུས་སྙིགས་མ་ཆགས་ཀྱི་ཡོད་ཀྱང་། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་དུས་སྙིགས་མ་ཆགས་ནས་ཕན་ཐོགས་མེད་པ་རྩ་བ་ཉིད་ནས་མ་རེད། དུས་སྙིགས་མ་ཆགས་སྐབས་འདི་དག་གི་ནུས་པ་ཆེ་རུ་འགྲོ་བ་ནི་ཏན་ཏན་རེད། དེར་བརྟེན། ཚང་མས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཉིན་རེ་བཞིན་དུ་བསམ་བློ་ཐོངས། བསྟན་པའི་དགྲ་བོ་ཟེར་བ་ལྟ་བུ་དང་། གདོན། བགེགས། ལོག་འདྲེན་སོགས་སྙིང་རྗེའི་སྐྱེ་ཡུལ་རེད་མ་གཏོགས་འཇིགས་སྣང་ཡོང་བ་དང་། དེ་ལ་བགེགས་གཏོར་བཏང་ནས་བསྐྲད་རྒྱུ་ལྟ་བུ་གང་ཡང་དགོས་དོན་མི་འདུག སྙིང་རྗེ། བདག་ཏུ་འཛིན་པའི་བདེན་འཛིན་དང་། རང་གཅེས་འཛིན་གྱི་གཞན་དབང་དུ་སོང་ཡོད་པ་རྣམས་ལ་མཐའ་གཅིག་ཏུ་བརྩེ་བ་འབའ་ཞིག་མ་གཏོགས་གདོན་བགེགས། འབྱུང་བོ་ཞེས་བསྐྲད་རྒྱུའི་སྐད་ཆ་རེད་མི་འདུག ཐམས་ཅད་ལ་བརྩེ་བའི་བློ་སྐྱེས་དགོས་པ་ནི་སངས་རྒྱས་པའི་ཆོས་ཀྱི་འགྲོ་སྟངས་རེད།
ངོས་རང་ལ་མཚོན་ན་ག་ཚོད་ཐུབ་ཐུབ་ཀྱིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་སྒོམ་གྱི་ཡོད། སེམས་ལ་ཧ་ཅང་ཕན་ཐོགས་ཡོང་གི་འདུག སེམས་ལ་ཕན་ཐོགས་ཡོང་བའི་ཚོད་ཀྱིས་ལུས་ཀྱི་བདེ་ཐང་ལའང་ཧ་ཅང་ཕན་ཐོགས་འདུག དེར་བརྟེན། ཚེ་སྒྲུབ་ཅེས་ཟུར་དུ་སྔགས་བགྲངས་ན་ཕྲན་བུ་ཕན་གྱི་ཡོད་ནའང་། ངོ་ཐོག་ཁ་ཡོད་ལག་ཡོད་ཀྱི་ཚེ་སྒྲུབ་ནི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་ན་སེམས་ལྷོད་ལྷོད་ཆགས་ནས་ཚེ་སྒྲུབ་ཀྱི་མཆོག་རེད། གཞན་ལ་ཕན་བདེ་སྒྲུབ་པ་ལའང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་ན་གཞན་ལ་དངོས་དང་རྒྱུད་པའི་ཐོག་ནས་ཕན་ཐོགས་ཡོང་ཐུབ་པ་ཞིག་རེད། ང་ཚོའི་ཆོས་ཀྱི་སྙིང་པོ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ང་ཚོ་ཚང་མས་ག་ཚོད་ཐུབ་ཐུབ་ཀྱིས་བསམ་བློ་ཡག་པོ་གཏོང་དགོས། ད་རེས་དུས་ཚོད་འདིར་ང་ཚོ་རྣམ་འདྲེན་བཞི་པ་རྒྱལ་བ་ཤཱཀྱ་ཐུབ་པའི་བསྟན་པའི་རྗེས་སུ་ཞུགས་མཁན་རེད། དེར་བརྟེན། ང་ཚོས་སྟོན་པ་བཅོམ་ལྡན་འདས་ནང་བཞིན་བྱེད་ཀྱི་ཡིན་བསམ་པའི་དམིགས་ཡུལ་བཟུང་ནས་སེམས་ཤུགས་བསྐྱེད་དེ། སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ལ་ཉིན་རེ་བཞིན་དུ་ཉམས་ལེན་ལ་འབད་བརྩོན་བྱེད་དགོས་ཧ་ཅང་གལ་ཆེན་པོ་རེད། ཅེས་དང་།
ངོས་རང་ལ་མཚོན་ན་ཟླ་བ་གྲགས་པ་ནང་བཞིན་མེད་ཀྱང་། ཟླ་བ་གྲགས་པའི་གཞུང་ལ་སྦྱང་ཡོད། གང་ལྟར་དབུ་མ་ལ་ལམ་དབུ་མ་དང་གཞི་དབུ་མ་ཟེར་བ་སོགས་ཀྱང་ཡོད། འདི་གཞུང་དབུ་མ་ཆགས་ཀྱི་ཡོད། དབུ་མ་འཇུག་པ་ནི་དབུ་མ་རྩ་བ་ཤེས་རབ་ལ་ཟབ་རྒྱས་གཉིས་ཀྱི་ཐོག་ནས་ཚིག་འགྲེལ་ཙམ་མིན་པར་དོན་འགྲེལ་ཟབ་ཅིང་བརླིང་བའི་དོན་འགྲེལ་ཡོད་པ་ཆགས་ཡོད། ང་ཚོས་འདི་ལྟ་བུའི་ཀླུ་སྒྲུབ་ཡབ་སྲས་ཀྱི་གཞུང་ལ་མཇལ་གྱི་ཡོད་པ་རེད། དེ་བཞིན་ཉིན་རེ་བཞིན་དུ་ག་ཚོད་ཐུབ་ཐུབ་ཀྱིས་བསམ་བློ་བཏང་བ་ཡིན་ན་སྔོན་གྱི་སློབ་དཔོན་ཚོས་གཞུང་བརྩམས་པའི་དགོས་དོན་ནི་གདུལ་བྱའི་སེམས་རྒྱུད་ལ་འགྱུར་བ་སླེབས་པ་ཞིག་དགོས་ཀྱི་ཡོད་པ་རེད། དབུ་མ་པ་བླ་མ་གོང་མ་རྣམས་ལ་སྒྲུབ་པའི་མཆོད་པ་ཡིན་བསམ་པའི་ཐོག་ནས་ཉིན་རེ་བཞིན་དུ་དབུ་མའི་ལྟ་བ་དང་བྱང་ཆུབ་ཀྱི་སེམས་ལ་་ག་ཚོད་ཐུབ་ཐུབ་ཀྱིས་བསམ་བློ་གཏོང་ཐུབ་ན་མཁས་པའི་དབང་པོ་དེ་ཚོར་སྒྲུབ་པའི་མཆོད་པ་ཕུལ་གྱི་ཡོད་པ་རེད། ཧ་ཅང་གལ་ཆེན་པོ་རེད། ཅེས་སོགས་བཀའ་སློབ་སྩལ་རྗེས་དབུ་མ་འཇུག་པ་དང་དེའི་རང་འགྲེལ་གྱི་གསུང་ཆོས་འཕྲོ་སྐྱོང་མཛད་པ་དང་། མཐར་སྔ་དྲོའི་ཆུད་༩།༣༠ ཙམ་ལ་ཉིན་དང་པོའི་ཆོས་འབྲེལ་གནང་སྒོ་ལེགས་པར་གྲུབ་ནས་བཀའ་སློབ་སྩལ་དོན།
དེ་རིང་ཆོས་འབྲེལ་འདིར་འཇོག གོང་དུ་ཞུས་ཟིན་པ་ལྟར། བསྟན་པ་འཇིག་པའི་གནས་སྟངས་ལྟ་བུ་ཆགས་ཀྱི་ཡོད་ཀྱང་། ང་ཚོར་དངོས་གནས་སངས་རྒྱས་བཅོམ་ལྡན་འདས་ཀྱི་ཆོས་རྒྱ་ཆེ་ཞིང་གཏིང་ཟབ་པ་འདི་ལྟ་བུ་ཞིག་ལ་ཀླུ་སྒྲུབ་ཡབ་སྲས་ལ་སོགས་པ་དང་། ཐོགས་མེད་སྐུ་མཆེད་ལ་སོགས་པས་ཟབ་པ་རྒྱ་ཆེ་བའི་ལམ་བསྟན་པའི་དཔེ་ཆ་མཐོང་རྒྱུ་འདུག དཔེ་ཆ་དེ་དག་ཉམས་མྱོང་ཅན་གྱི་བླ་མ་ཚོས་ཁྲིད་རྒྱུའང་འདུག ང་ཚོར་དེ་ལྟ་བུའི་གོ་སྐབས་ཧ་ཅང་ཡག་པོ་ཞིག་ཡོད་པ་རེད། དེར་བརྟེན། ཚང་མས་དེ་ལྟ་བུའི་གོ་སྐབས་བཟང་པོ་ཆུད་ཟོས་སུ་མི་གཏོང་བར་ཉམས་ལེན་ཡག་པོ་གནང་རོགས། ཐུགས་རྗེ་ཆེ། ཞེས་སོགས་བཀའ་སློབ་སྩལ་རྗེས་ཉིན་དང་པོའི་གསུང་ཆོས་གནང་སྒོ་ལེགས་པར་གྲུབ་སྟེ་ཕོ་བྲང་དུ་ཆིབས་བསྒྱུར་བསྐྱངས་ཡོད།
