༄༅། །ཕྱི་ལོ་ ༢༠༢༣ ཟླ་ ༧ ཚེས་ ༤ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་བཞུགས་སྒར་ཕོ་བྲང་དུ་ཕྱི་རྒྱལ་ཡུལ་གྲུ་ཁག་འདྲ་མིན་ནས་དབྱར་དུས་སློབ་སྒར་ (Summer Camp) ལ་ཕེབས་པའི་བོད་པའི་སློབ་ཕྲུག་རྣམས་ལ་མཇལ་ཁ་དང་བཀའ་སློབ་བཀའ་དྲིན་སྩལ་ཡོད་པ་རེད།
དེ་ཡང་༸གོང་ས་མཆོག་གིས་བཀའ་སློབ་སྩལ་དོན། ངོས་ཀྱི་ཉམས་མྱོང་ཐོག་ནས་བཤད་ན་བྱང་ཆུབ་ཀྱི་སེམས་གཞན་ཕན་གྱི་བློ་ལ་བསམ་གཏོང་ཡོང་དུས།རང་བཞིན་གྱིས་སེམས་ལ་ཞི་བདེ་ཡོང་བར་ཧ་ཅང་ཕན་ཐོགས་འདུག ང་ཚོ་ཚང་མ་འཕགས་པ་སྤྱན་རས་གཟིགས་ཀྱི་འདུལ་ཞིང་ལ་སྐྱེས་པའི་མི་རེད། བསམ་པ་བཟང་པོ་བྱེད་དགོས་པ་རེད། བོད་མི་རིགས་ལ་འདས་པའི་ལོ་ངོ་སྟོང་ཕྲག་རིང་བསམ་པ་བཟང་པོ་བྱེད་རྒྱུའི་མིག་ལྟོས་ཤིག་ཡོད་པ་རེད། མ་འོངས་པར་ཡང་བོད་པའི་གོམས་གཤིས་བསམ་པ་བཟང་པོ་བྱེད་རྒྱུ་དེ་མུ་མཐུད་ནས་གནས་ཐུབ་པ་ཁྱེད་རང་ཚོས་འབད་བརྩོན་དང་སེམས་ལ་ཞོག
འཛམ་གླིང་ཞི་བདེ་ཟེར་བ་དེ་མེ་མདའ་འཁྱེར་ནས་ཡོང་ཐུབ་ཐབས་མེད། བསམ་པ་བཟང་པོས་ཞི་བདེ་ཡོང་གི་རེད། དེ་བོད་པར་ཐུན་མོང་མ་ཡིན་པ་ཡོད་པ་རེད། བསམ་པ་བཟང་པོ་བྱེད་པར་སོ་སོའི་ཉམས་ལེན་དང་། སོ་སོའི་སྤུན་དང་བུ་ཕྲུག་ཚོའང་བསམ་པ་བཟང་པོ་བྱེད་དགོས་པའི་འགྲེལ་བཤད་ཡག་པོ་རྒྱོབ། ཅེས་དང་།
ངོས་ཀྱིས་སློབ་གྲྭ་ཁག་གི་དགེ་རྒན་ལ་ཆོས་དགེ་ཞེས་པའི་ཚབ་ལ་ལྟ་གྲུབ་དགེ་རྒན་ཞེས་མིང་བཏགས་ན་ཡག་པོ་འདུག་ཅེས་བརྗོད་རྒྱུ་བྱུང་། དཔེར་ན། བོད་ཀྱི་སངས་རྒྱས་པའི་ཆོས་འདི་ལ་ལྟ་གྲུབ་ཀྱི་ཐོས་ནས་འགྲེལ་བཤད་མང་པོ་རྒྱག་རྒྱུ་ཡོད་པ་ཞིག་རེད། ང་ཚོའི་ཆོས་ནི་དཔལ་ནཱ་ལེནྡྲ་ནས་བརྒྱུད་པ་ཞིག་རེད། ནཱ་ལེནྡྲའི་མཁས་པའི་དབང་པོ་ཚོས་ཐོས་བསམ་སྒོམ་གསུམ་ཟུང་སྦྲེལ་གྱི་ཐོག་ནས་རིག་པ་བེད་སྤྱོད་བྱས་ནས་ཕྱི་དངོས་པོའི་གནས་ཚུལ་དང་། ནང་སེམས་ཀྱི་རྣམ་གཞག་ལ་དཔྱད་བྱེད་པ་མ་གཏོགས། བླ་མས་གསུང་ཆོས་གནང་ནས་བསྡད་པ་ཙམ་ཆགས་ཀྱི་མེད། ངོས་ཀྱིས་ཆོས་དགེ་ཞེས་མིང་མ་བཏགས་པར་ལྟ་གྲུབ་དགེ་རྒན་ཞེས་མིང་བཏགས་པ་ཡིན། ལྟ་གྲུབ་སློབ་པར་ངེས་པར་དུ་ཆོས་པ་དང་ནང་པ་ཡིན་དགོས་དོན་མེད།
གང་ལྟར་མིའི་བསམ་བློ་ལ་ཧ་ཅང་ཕན་ཐོགས་ཡོད་པ་ཞིག་དང་བསམ་བློ་རྒྱ་ཆེན་པོ་འཁོར་ཐུབ་མཁན་ཞིག་རེད། སྔོན་མ་ཆོས་དགེ་ཞེས་པའི་མིང་དེར་འགྱུར་བ་བཏང་ནས་ལྟ་གྲུབ་དགེ་རྒན་ཞེས་བརྗོད་དགོས་དོན་དེ་ལྟར་ཡིན། ནང་པའི་ཆོས་ཀྱི་འགྲོ་སྟངས་དེ་ལྟ་གྲུབ་ཀྱི་ཐོག་ནས་བསམ་བློ་རྒྱ་ཆེན་པོ་གཏོང་དགོས། དེང་སྐབས་ཚན་རིག་པའི་ནང་ནས་དོ་སྣང་བྱེད་ཡོང་གི་འདུག ང་ཚོས་ཆོས་ཀྱི་འགྲོ་སྟངས་བྱས་ནས་འདོན་པ་བཏོན་པ་དང་། གཟུངས་སྔགས་བགྲང་པ་ཡིན་ན་ཚན་རིག་པས་དོ་སྣང་བྱེད་ཀྱི་མ་རེད། ང་ཚོས་ལྟ་གྲུབ་སྐོར་སྐད་ཆ་བཤད་ཡོང་དུས་ཚན་རིག་པའི་ནང་ནས་དགའ་པོ་བྱེད་མཁན་ཧ་ཅང་མང་པོ་འདུག ཁྱེད་རང་ཚོས་སྨོན་ལམ་བརྒྱབ་པ་ཙམ་མིན་པར་གཞི་དང་ལམ། འབྲས་བུའི་རྣམ་གཞག སངས་རྒྱས་པའི་ཆོས་ཀྱི་ནང་ནས་དཔལ་ནཱ་ལེནྡྲའི་མཁས་པའི་དབང་པོ་ཚོས་མཛད་པའི་ལྟ་གྲུབ་དེ་དག་ཡག་པོ་ཤེས་པར་བྱེད་དགོས། ཡིད་ཆེས་བྱེད་མིན་སོ་སོའི་རང་དབང་རེད། གང་ལྟར་ལྟ་གྲུབ་གཏིང་ཟབ་པོ་ཞིག་ཡོད་པ་དེར་དོ་སྣང་བྱས་ནས་ཤེས་པ་བྱས་པ་ཡིན་ན། བློ་གྲོས་རྒྱ་བསྐྱེད་པར་ཧ་ཅང་ཕན་ཐོགས་ཡོད། གཞི་དངོས་པོའི་གནས་ཚུལ་དང་། ལམ་བགྲོད་པའི་རིམ་པ། འབྲས་བུ་མངོན་ཏུ་བྱེད་ཚུལ་ཟེར་བ་དེ་དག་བསམ་བློ་རྒྱ་ཆེན་པོ་བཏང་ནས་ཕྱིན་པ་ཡིན་ན་ཕན་ཐོགས་ཧ་ཅང་ཡོད་པ་རེད།
ང་ཚོ་བོད་པའི་ཁྱད་ཆོས་གཅིག་ནི། ངོས་ཀྱིས་ཆོས་རྒྱལ་སྲོང་བཙན་སྒམ་པོ་གྲུང་པོར་མཐོང་གི་འདུག ཆོས་རྒྱལ་སྲོང་བཙན་སྒམ་པོས་རྒྱ་བཟའ་དང་ཆང་ས་བསྐྱོན་པ་རེད། འོན་ཀྱང་། ང་ཚོ་བོད་པ་རང་གི་ཐོག་ནས་བསམ་བློ་གཏོང་ཡོང་དུས་རྒྱ་སྐད་དང་རྒྱ་ཡིག་བསླབ་རྒྱུར་དོ་སྣང་མ་གནང་བར་བོད་རང་ཉིད་ཀྱི་ཡི་གེ་དགོས་ཀྱི་འདུག་ཅེས་སྐབས་དེར་བོད་ཡིག་བཟོས་པ་རེད། དེ་བ་ན་ག་རི་ཞེས་པའི་ཡི་གེ་ལ་དཔེ་བལྟས་ནས་བོད་ཡིག་བཟོས་པ་རེད། དེ་ནས་ཆོས་རྒྱལ་ཁྲི་སྲོང་ལྡེའུ་བཙན་ཕེབས་ཡོང་དུས་བོད་ཀྱི་ནང་ཆོས་འདི་སྨོན་ལམ་བརྒྱབ་པ་དང་འདོན་པ་བཏོན་པ་ཙམ་མ་ཡིན་པར། གཞུང་ཆེན་མོའི་ནང་ནས་ལྟ་སྒོམ་སྤྱོད་གསུམ་གྱི་རྣམ་གཞག་ཐོག་བསམ་བློ་གཏིང་རིང་པོ་གཏོང་རྒྱུ་ཡོད་པ་ནཱ་ལེནྡྲའི་འགྲོ་སྟངས་འདི་ཡག་པོ་ཡོད་པ་འདིའི་ཆེད་མཁན་ཆེན་ཞི་བ་འཚོ་བོད་དུ་གདན་ཞུ་གནང་ཞིང་། མཁན་ཆེན་ཞི་བ་འཚོས་ཆོས་རྒྱལ་གྱི་རེ་འདུན་ལྟར། དཔེ་ཆར་བལྟ་རྒྱུ་དང་། ལྟ་སྒོམ་སྤྱོད་གསུམ་ལ་རིགས་པའི་ལམ་ནས་དཔྱད་པ་བྱས་ནས་བསམ་བློ་གཏོང་རྒྱུ་གལ་ཆེན་པོ་རེད། ཅེས་ལམ་སྟོན་གནང་བ་རེད། སྔོན་གྱི་ཆོས་རྒྱལ་ཚོས་ཐུགས་རེ་གནང་བ་བཞིན་ཕལ་ཆེར་ལྟ་གྲུབ་སྐོར་སློབ་སྦྱོང་བྱས་ནས་བསམ་བློ་གཏོང་རྒྱུ་དེ་བོད་པ་ཡག་ཤོས་རེད་འདུག
ངོས་རང་ཐའེ་ལན་ཌི་དང་ཝེ་ཏི་ནམ་གྱི་ནང་པ་མང་པོ་ཐུག་གི་ཡོད་ཀྱང་ལྟ་གྲུབ་སྐོར་བཤད་རྒྱུ་མི་འདུག བོད་པ་ཚོར་ལྟ་གྲུབ་སྐོར་བསླབ་པ་ཡིན་སྟབས་བསམ་བློ་གྲུང་པོ་དང་རྒྱ་ཆེ་བ། བཟང་བ་འདུག བོད་ཀྱི་ནང་ཆོས་གཙོ་བོ་ལྟ་གྲུབ་ཀྱི་ཐོག་ནས་འགྲོ་སྟངས་ཡག་པོ་ཤེས་པར་བྱོས། ཚན་རིག་པ་དང་མཉམ་དུ་གོ་བསྡུར་བྱེད་ཐུབ་ཀྱི་ཡོད་པ་རེད། ང་ཚོ་ཆོས་པ་ཡིན་ཟེར་ནས་བསམ་བློ་གུ་དོག་པོ་མིན་པར་ཤེས་བྱའི་རྣམ་གཞག་ལ་བརྟག་དཔྱད་བྱས་ནས་བཤད་ཐུབ་རྒྱུ་ཧ་ཅང་གལ་ཆེན་པོ་རེད། ཅེས་བཀའ་སློབ་སྩལ་ཡོད།
