༄༅། །ཕྱི་ལོ་ ༢༠༢༣ ཟླ་ ༧ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནང་ཚོགས་དང་དགོན་ཚོགས་ནས་ཇི་ལྟར་གསོལ་བ་བཏབ་པ་ལྟར་ཞི་བའི་ཚལ་གསུང་ཆོས་ར་བ་རུ་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་གསུང་ཆོས་བཀའ་དྲིན་སྩལ་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༧།༤༥ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཞི་བའི་ཚལ་ཕོ་བྲང་དགེ་འཕེལ་གླིང་ནས་གོལ་ཧྥུ་རླངས་འཁོར་(Golf cart)ལ་བཞུགས་ཏེ་གསུང་ཆོས་ར་བར་ཆིབས་བསྒྱུར་གྱིས་བཞུགས་ཁྲིར་༸ཞབས་སོར་འཁོད་མཚམས་ནང་པ་ཚོགས་པའི་ཚོགས་གཞོན་ཚེ་རིང་རྡོ་རྗེ་དང་། ལ་དྭགས་ནང་པའི་གཞོན་ནུ་ཚོགས་པ། ཨ་མ་ཚོགས་པ་བཅས་ཀྱི་སྐུ་ཚབ་དང་། གཞན་ཡང་སྦྱིན་བདག་ཁག་གཅིག་བཅས་ནས་མཎྜལ་རྟེན་གསུམ་འདེགས་འབུལ་ཞུས་པ་དང་། དེ་རྗེས་༸གོང་ས་མཆོག་གིས་ཆོས་ལུགས་མཐུན་འབྲེལ་སྐོར་ལ་བཀའ་སློབ་སྩལ་དོན།
དེ་རིང་འདིར་གསུང་ཆོས་རེད། ཆོས་ལུགས་ཚང་མས་གཞན་ལ་བརྩེ་བ་བྱེད་དགོས་པ་དང་། ཕན་ཐོགས་བྱེད་དགོས་པར་གསུང་གི་ཡོད་པ་རེད། ངོས་ལ་ཆ་བཞག་ན་ཆོས་ལུགས་ཚང་མར་རྗེས་སུ་ཡི་རངས་བྱས་ཏེ་ཡག་པོར་ངོས་འཛིན་བྱེད་ཀྱི་ཡོད། ངོས་ཀྱིས་ཆོས་ལུགས་ཚང་མར་གུས་ཞབས་དང་། མཐོང་བྱེད་པའི་རྒྱུ་མཚན་ལ་བརྟེན་ནས་ངོས་རང་ལུང་པ་འདྲ་མིན་ལ་ཕྱིན་པའི་སྐབས་སུ་ཆོས་ལུགས་སྣ་ཚོགས་ཀྱི་ལྷ་ཁང་རྣམས་ལ་འགྲོ་གི་ཡོད། ཆོས་ལུགས་ཚང་མར་མོས་གུས་བྱེད་ཀྱི་ཡོད། རྒྱུ་མཚན་གཉིས་པ་ནི། འཛམ་གླིང་འདིར་ང་ཚོ་འཁྲུག་པ་རྒྱག་པར་རྒྱུ་རྐྱེན་མང་པོ་ཞིག་ཡོད་པའི་ཐོག་ལ། ཆོས་ལུགས་ཀྱང་ཕྱོགས་འཐེན་བྱེད་པ་དང་། འཁྲུག་པ་རྒྱག་པའི་རྐྱེན་ལ་འགྲོ་བ་ནི་ཧ་ཅང་སེམས་སྐྱོ་པོ་དང་། བློ་ཕམ་པོ་རེད། ཆོས་ལུགས་ཚང་མས་གཞན་ཕན་བྱེད་པ་དང་། གཞན་ལ་ཕན་ཐོག་བྱེད་དགོས་པར་གསུང་གི་ཡོད་ཀྱང་། ཆོས་ལུགས་མི་འདྲ་བ་རྒྱུ་མཚན་དུ་བྱས་ཏེ་ཕན་ཚུན་ལ་འཁྲུག་པ་རྒྱག་པ་ནི་ཧ་ཅང་བློ་ཕམ་པོ་རེད། དེར་བརྟེན། ངོས་ཀྱིས་ཆོས་ལུགས་ཚང་མར་གུས་ཞབས་དང་། ཆོས་ལུགས་ཚང་མ་ཕན་ཚུན་ལ་ཐུགས་མཐུན་ཁྲིམས་གཙང་ཡག་པོ་ཡོང་བ་ལ་འབད་བརྩོན་བྱེད་བཞིན་ཡོད།
ལ་དྭགས་ལ་ཆ་བཞག་ན་མང་ཤོས་ནང་པའི་ཆོས་པ་རེད། དེ་དང་ཆབས་ཅིག་ཁ་ཆེའི་ཆོས་ལུགས་བྱེད་མཁན་ཡང་གང་འཚམ་ཡོད་པ་རེད། དུས་རབས་གསར་པའི་ནང་དུ་ཡི་ཤུ་ཆོས་བྱེད་མཁན་ཡང་ཏན་ཏན་ཡོང་གི་རེད། གནའ་རབས་རྒྱ་གར་གྱི་མུ་སྟེགས་པའི་ཆོས་བྱེད་མཁན་ཡང་ཡོད་ཀྱི་རེད། ང་ཚོ་ཚང་མ་ཐུགས་མཐུན་ཁྲིམས་གཙང་བྱས་ཏེ། ཆོས་ལུགས་ཚང་མས་མི་ལ་ཕན་བདེ་སྒྲུབ་དགོས་པར་གསུང་གི་ཡོད་པས་རང་རང་སོ་སོའི་ཆོས་དད་བྱེད་སྟངས་དང་འགྲེལ་བཤད་མི་འདྲ་བ་ཡོད་ཀྱང་། ཆོས་ལུགས་ཚང་མར་གཅིག་གྱུར་གྱི་གནས་ཚུལ་གང་ཡོད་པ་རེད་ཅེ་ན། མི་ལ་ཕན་བདེ་སྒྲུབ་པ་དང་། སྤྱི་ཚོགས་ཞབས་འདེགས་ཞུ་རྒྱུ་བཅས་ཀྱི་བསླབ་བྱ་གཅིག་མཚུངས་ཡོད་པ་རེད། འཛམ་གླིང་འདིར་མཐོང་ཆོས་རེད། ཡི་ཤུ་ཆོས་པ་ཁ་ཤས་ཀྱིས་འཛམ་གླིང་འདིར་སྨན་བཅོས་བྱེད་པ་དང་། འཕྲོད་བསྟེན། སློབ་སྦྱོང་སོགས་ཀྱི་སྐོར་ལ་ཞབས་འདེགས་སྒྲུབ་ནས་ངོ་མཚར་སྐྱེས་ཡ་རེད། དེ་བཞིན་ཁ་ཆེའི་ཆོས་པ་ཚོ་ཡིན་ནའང་ཧ་ཅང་ཡག་པོ་ཡོད་པ་རེད། མུ་སྟེགས་པ་ཚོ་ཡིན་ནའང་གཞན་ཕན་སྒྲུབ་པ་ལ་ཡག་ཐག་ཆོད་ཡོད་པ་རེད། ཆོས་ལུགས་ཚང་མ་ཐུགས་མཐུན་པོ་བྱས་ཏེ། རྩ་བའི་སོ་སོའི་ཆོས་དད་དེ་རང་རང་གི་ཆོས་ལུགས་ཀྱི་ཐོག་ནས་འགྲོ་བ་དང་། ལེགས་ཆ་ཆོས་ལུགས་གཞན་དུའང་ཡོད་པ་ཡིན་པས་ཆོས་ལུགས་ཚང་མ་ནང་ཚགས་བྱས་ཏེ། ཕན་ཚུན་ལེགས་ཆ་ལེན་རེས་བྱེད་པ་ལྟ་བུ་དང་། དུས་དུས་སུ་འཚོགས་ནས་བགྲོ་གླེང་དང་གོ་བསྡུར་བྱེད་ཐུབ་ན་ཡག་པོ་འདུག །ངོས་ཀྱིས་དེ་ལྟར་བྱེད་ཀྱི་ཡོད། ཅེས་བཀའ་སློབ་བཀའ་དྲིན་སྩལ་རྗེས་གསོལ་ཇ་འབྲས་སིལ་འདེགས་འབུལ་ཞུས།
དེ་ནས་མགོན་པོ་གང་ཉིད་མཆོག་གིས་མུ་མཐུད་བྱང་ཆུབ་སེམས་ཀྱི་ཕན་ཡོན་སྐོར་ལ་བཀའ་སློབ་སྩལ་དོན། དེ་རིང་གནམ་གཤིས་ཚ་མ་དྲགས། གྲང་མ་དྲགས་ཧ་ཅང་ཡག་པོ་འདུག ང་ཚོས་མིག་གིས་མ་མཐོང་བ་མ་གཏོགས་ཡུལ་ལྷ་གཞི་བདག་རྣམས་ཀྱང་ཕལ་ཆེར་འདིར་ཡོད་པའི་ཚོར་བ་ཞིག་ཡོང་གི་འདུག དེ་རིང་སྔོན་འགྲོའི་ཆོས་བཤད་ནི་དངུལ་ཆུ་རྒྱལ་སྲས་ཐོགས་མེད་བཟང་པོའི་གསུང་ལག་ལེན་སོ་བདུན་མའི་བཤད་ལུང་ཞུ་རྒྱུ་ཡིན། མཛད་པ་པོ་ནི་རྒྱལ་སྲས་ཐོགས་མེད་བཟང་པོ་ཞེས་དངུལ་ཆུ་རི་ཁྲོད་དུ་བཞུགས་ནས་ལམ་ཡོངས་རྫོགས་ཤར་སྒོམ་གནང་ནས་སྒོམ་སྐྱོན་གྱི་ཡོད་པ་རེད་ལ། གཙོ་བོ་བྱང་ཆུབ་ཀྱི་སེམས་ཉམས་ལེན་གྱི་མཐིལ་དུ་མཛད་ཀྱི་ཡོད་པ་རེད། མཚན་ལ་དངུལ་ཆུ་རྒྱལ་སྲས་ཐོགས་མེད་བཟང་པོ་ཞེས་རྒྱལ་སྲས་ཀྱི་མིང་ཐོགས་དོན་ནི་བྱང་ཆུབ་སེམས་ཀྱི་ཉམས་ལེན་གཙོ་འདོན་གནང་གི་ཡོད་པས་རྒྱལ་སྲས་ཐོགས་མེད་བཟང་པོ་ཞེས་ཞུ་གི་ཡོད་པ་རེད། སང་ཉིན་ཐུགས་རྗེ་ཆེན་པོའི་དབང་ཆེན་བྱ་རྒྱུ་ཡིན། འདི་ནི་སྔོན་འགྲོ་ལྟ་བུ་རེད་ལ། གང་ལྟར་ཐུན་མོང་ལམ་སྦྱངས་ནི་ཧ་ཅང་གལ་ཆེན་པོ་རེད། དེར་བརྟེན། དངུལ་ཆུ་རྒྱལ་སྲས་ཐོགས་མེད་བཟང་པོའི་གསུང་ལག་ལེན་སོ་བདུན་མའི་ཁྲིད་ཅིག་བཏོན་ན་བསམ། ངོས་ཀྱིས་འདི་ཁུ་ནུ་བླ་མ་རིན་པོ་ཆེའི་སྐུ་མདུན་ནས་ཞུས་པ་ཡིན། དངོས་གནས་དྲང་གནས་སེམས་རྒྱུད་འདུལ་ཐབས་ཀྱི་སྐོར་དང་། བྱང་ཆུབ་ཀྱི་སེམས་ཉམས་ལེན་ནི་ཧ་ཅང་ཕན་ཐོགས་ཆེན་པོ་རེད། ངོས་རང་ལ་མཚོན་ན་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་ལ་བསམ་བློ་གཏོང་གི་ཡོད། རང་གཞན་དོན་ནི་རབ་བསྒྲུབ་ཕྱིར།། ཞེས་གསུངས་པ་ལྟར། དངོས་གནས་རང་དོན་སྒྲུབ་ནའང་བྱང་ཆུབ་ཀྱི་སེམས་སྒོམ་པ་ལས་ལྷག་པ་མི་འདུག གཞན་དོན་སྒྲུབ་པ་ལའང་བྱང་ཆུབ་ཀྱི་སེམས་སྒོམ་པ་ལས་ལྷག་པ་མི་འདུག རང་དོན་ལ་ཆ་བཞག་ན་བྱང་ཆུབ་ཀྱི་སེམས་སྒོམ་ཡོང་སྐབས་སེམས་ལྷོད་ལྷོད་ཆགས་པ་དང་། ཡང་སེམས་ཞུམ་བསྡད་པ་ལྟ་བུ་མིན་པར། ལྷག་བསམ་དང་སྙིང་སྟོབས་གཞན་དང་མི་འདྲ་བ་ཞིག་གིས་སེམས་ཅན་ཐམས་ཅད་ཀྱི་དོན་བྱེད་ཀྱི་ཡིན་ཟེར་བ་ཞིག་དང་། ཇི་སྲིད་ནམ་མཁའ་མ་ཟད་ཀྱི་བར་དུ་གཞན་དོན་བསྒྲུབ་བསམ་པའི་སྙིང་སྟོབས་བསྐྱེད་ཡོད་པས། སྙིང་སྟོབས་དེ་ཡང་ཧ་ཅང་ཤུགས་ཆེན་པ་རེད། ཡང་ནམ་མཁའི་མཐས་གཏུགས་པའི་སེམས་ཅན་ཚང་མར་ཕན་པ་སྒྲུབ་པ་ཞིག་མ་གཏོགས་གནོད་པ་རྨི་ལམ་ཚུན་ཆད་དུ་ནམ་ཡང་མི་བྱེད་ཅེས་བསམ་བློ་ཞིག་བཏང་ཡོང་དུས་འཕྲལ་དུ་སོ་སོའི་སེམས་ཞི་བདེ་ཡོང་བ་དང་། སེམས་ཞི་བདེ་ཡོང་བའི་རྐྱེན་ལ་བརྟེན་ནས་ལུས་པོའང་བདེ་ཐང་ཡོང་བ་རེད། ཐ་མ་གཉིད་ཉལ་སྐབས་གཉིད་ཀྱང་སྐྱིད་པོ་ཁུག་གི་རེད། ཅེས་དང་།
གཞན་ཡང་། འཛམ་གླིང་ཞི་བདེའི་སྐོར་ལ་བཀའ་སློབ་སྩལ་དོན། འཛམ་གླིང་ཤར་ནུབ་ལྷོ་བྱང་ཚང་མས་འཛམ་གླིང་ཞི་བདེ། འཛམ་གླིང་ཞི་བདེ་ཞེས་པའི་འབོད་སྒྲ་ཞིག་ཡོང་གི་ཡོད་པ་རེད། གང་ཡིན་ཟེར་ན་དམག་ཆེན་དང་པོ་དང་། དམག་ཆེན་གཉིས་པའི་སྐབས་སུ་གོ་མཚོན་བེད་སྤྱོད་བཏང་ནས་མི་མང་པོ་སྲོག་ཐོག་ལ་འགྲོ་བ་དང་། རྨས་སྐྱོན་ཤོར་ནས་འཛམ་གླིང་འདི་དམག་འཁྲུག་ལ་ཡིད་སུན་པ་ཆགས་བསྡད་ཡོད། འདི་ལྟ་བུའི་སྐབས་སུ་དམག་འཁྲུག་མི་ཡོང་བའི་ཐབས་ཤེས་སུ་དམག་འཁྲུག་ཡག་པོ་མ་རེད་ཟེར་བ་ཙམ་གྱིས་མི་ཕན། ང་ཚོའི་སེམས་ནས་རང་རྒྱལ་གཞན་ཕམ་ཟེར་བའི་བློ་ཤུགས་ཆེན་པོར་བསྡད་ན་དམག་འཁྲུག་ཡོང་བ་དང་། དེར་བརྟེན། འཛམ་གླིང་གི་མི་དུང་ཕྱུར་བདུན་ཅུ་བརྒྱད་ཅུ་ཡོད་པ་ཚང་མ་མི་གཅིག་མཚུངས་ཡིན། ང་ཚོ་ཚང་མ་འཛམ་གླིང་འདིའི་སྟེང་གི་མིའི་སྤྱི་ཚོགས་ལ་བརྟེན་ནས་འཚོ་དགོས་ཀྱི་ཡོད། དེར་བརྟེན། ཕྲན་བུའི་བློ་མི་མཐུན་པ་དང་བསམ་ཚུལ་ཁ་ཁ་ཡིན་པ་རྒྱུ་མཚན་དུ་བྱས་ཏེ་འཁྲུག་པ་རྒྱག་རྒྱུ་གཏན་ནས་འོས་བབ་ཡོད་པ་མ་རེད། འཛམ་གླིང་འདིར་མི་ཚང་མས་མི་ཚང་མ་གཅིག་མཚུངས་ཡིན་པའི་འདུ་ཤེས་ཀྱི་ཐོག་ནས་ཕན་ཚུན་ལ་གུས་བརྩི་བྱས་ཏེ་བསྡད་ན་འཛམ་གླིང་ཞི་བདེ་ཡོང་ཐུབ་ཀྱི་རེད། ཅེས་སོགས་བཀའ་སློབ་སྩལ་རྗེས་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་བཤད་ལུང་ཆ་ཚང་སྩལ་བ་དང་།
མཐར་བཀའ་སློབ་སྩལ་དོན། སྐྱབས་སུ་མཆི། ངོས་ཀྱིས་དམིགས་བསལ་ཆོས་འབྲེལ་ཞུས་མེད་ཀྱང་། དད་པ་བྱེད་བཞིན་ཡོད། ལྷ་བཙུན་རིན་པོ་ཆེའི་གཟིགས་སྣང་ལ། ངོས་ཀྱི་པར་ཞིག་དང་སྒྲོལ་མའི་སྐུ་ཞིག་ཡོད་འདུག སྒྲོལ་མའི་སྐུ་དེ་ལ་འོད་ཟེར་དཀར་པོ་ཞིག་བྱུང་ནས་ངོས་ཀྱི་པར་ལ་ཟུག་པའི་སྣང་བ་བྱུང་འདུག་པས། རྗེས་ལ་ལྷ་བཙུན་རིན་པོ་ཆེས་ངོས་ལ། ཁྱེད་རང་ཚེ་རིང་པོར་སྡོད་ས་རེད། ཅེས་གསུང་གི་འདུག ལྷ་བཙུན་རིན་པོ་ཆེ་སྐུ་གོང་མ་དང་ཧ་ཅང་འབྲེལ་བ་ཡོད་པ་རེད། ངོས་ལའང་ལྷ་བཙུན་རིན་པོ་ཆེས་ཧ་ཅང་མཉེས་པོ་གནང་གི་རེད། ཅེས་དང་། སང་ཉིན་ཐུགས་རྗེ་ཆེན་པོ་དབང་ཆེན་བྱ་རྒྱུ་ཡིན། ཐུགས་རྗེ་ཆེན་པོ་བྱ་རྒྱུད་ལུགས་རེད། དེར་བརྟེན། ཁྱོད་ཚོས་སང་ཉིན་ཞོགས་ཇ་ལ་ཐུག་པ་ཤ་ཡོད་མ་འཐུང་བར་དཀར་སྐྱོང་བྱེད་དགོས། ཕྱི་དྲོ་རང་དབང་རེད། ཁྱད་པར་མི་འདུག ཅེས་བཀའ་སློབ་སྩལ་རྗེས་རྒྱལ་སྲས་ལག་ལེན་སོ་བདུན་མའི་བཤད་ལུང་ལེགས་པར་གྲུབ་ཡོད།
