༄༅། །ཕྱི་ལོ་ ༢༠༢༣ ཟླ་ ༦ ཚེས་ ༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེག་ཆེན་ཆོས་གླིང་གཙུག་ལག་ཁང་དུ། ལྡི་ལི་བོད་ཁང་གི་ནཱ་ལེནྡྲའི་རབ་འབྱམས་པའི་བསླབ་པ་མཐར་སོན་པ་དང་། གཙུག་ལག་རབ་འབྱམས་པའི་སློབ་གཉེར་བ་སོགས་ཁྱོན་བསྡོམས་རྒྱལ་ཁབ་ཁག་ ༤༤ ནས་ཕེབས་པའི་སློབ་གཉེར་བ་གྲངས་ ༤༨༤ གཙོས་ཁྱོན་མི་གྲངས་ ༥༠༠ ལྷག་དང་། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། ལྡི་ལི་བོད་ཁང་འགན་འཛིན་དགེ་བཤེས་རྡོ་རྗེ་དགྲ་འདུལ་སོགས་ལ་རྟེན་འབྲེལ་བསྟོད་པའི་བཀའ་ཁྲིད་བཀའ་དྲིན་སྩལ་ཡོད་པ་རེད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་གྱིས་བཞུགས་ཁྲིར་༸ཞབས་སོར་འཁོད་མཚམས་བཀའ་སློབ་སྩལ་དོན། ཆོས་གྲོགས་རྣམ་པ་ལྷན་རྒྱས་ལ་ཞུ་རྒྱུར། དེ་རིང་འདིར་ང་ཚོ་འཁྱུག་ཙམ་རིང་ཐུག་རྒྱུ་བྱུང་བ་རེད། འདིར་གྲ་སྒྲིག་བྱེད་མཁན་ཚང་མར་ཐུགས་རྗེ་ཆེ་ཞུ་རྒྱུ་ཡིན།
ང་ཚོ་རྒྱ་གར་ལ་སླེབས་ནས་བཙན་བྱོལ་བ་བྱས་ཏེ་ལོ་ཡུན་འདི་ཙམ་ཕྱིན་པ་རེད། རྒྱ་གར་ནང་གི་མི་མང་པོ་ཞིག་ང་ཚོས་ངོ་ཤེས་པ་དང་། བོད་གངས་ཅན་གྱི་ལྗོངས་སུ་ཡོད་པའི་ཆོས་དང་རིག་གཞུང་ཇི་འདྲ་ཞིག་ཡིན་པ་ལ་གཞི་ནས་གོ་རྟོགས་གསར་པ་སླེབས་པ་ཞིག་བྱུང་བ་རེད། རྗེ་རིན་པོ་ཆེས། བསྟན་པ་རིན་ཆེན་མཆོག་གིས་མ་ཁྱབ་པའམ།། ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི།། སྙིང་རྗེ་ཆེན་པོས་ཡིད་རབ་བསྐྱོད་པ་ཡིས།། ཕན་བདེའི་གཏེར་དེ་གསལ་བར་བྱེད་པར་ཤོག། ཅེས་ཁོང་གིས་ཐུགས་སྨོན་གནང་བ་རེད་ལ། ང་ཚོ་རྗེས་འཇུག་གི་གདུལ་བྱ་ཚོ་ལའང་འདི་འདྲ་ཞིག་གི་བསམ་བློ་གཏོང་དགོས་པ་རེད་ཅེས་བསླབ་བྱ་སྐྱོན་པ་རེད། བསྟན་པ་རིན་ཆེན་མཆོག་གིས་མ་ཁྱབ་པ་ཟེར་དུས་ནང་པ་མ་ཡིན་པའི་ཡུ་རོབ་གཙོ་བོར་གྱུར་པའི་ས་ཁུལ་རྣམས་དེ་སྔ་ནང་པའི་ཆོས་ལ་འབྲེལ་བ་ཡོད་པ་མ་རེད། རྒྱ་གར་གྱི་རིག་གཞུང་ལའང་དམིགས་བསལ་གྱིས་འབྲེལ་བ་ཡོད་པ་མ་རེད། ཡེ་ཤུའི་ཆོས་གཙོ་བོར་བྱས་ཏེ་ཕྱིན་ཡོད། ཨ་རབ་ལྟ་བུ་ཁ་ཆེའི་ཆོས་གཙོ་བོར་བྱས་ཏེ་ཕྱིན་པ་མ་གཏོགས་འདི་ལྟ་བུའི་ལྟ་གྲུབ་ཀྱི་ཐོག་ལ་དོ་སྣང་དང་བསམ་བློ་གཏོང་མཁན་ཡོད་པ་མ་རེད།
བར་སྐབས་ཡུལ་གྲུ་འདི་དག་གི་ནང་དུའང་། ཆོས་ལུགས་དད་རང་མོས་རེད། སོ་སོའི་ཆོས་བྱེད་ཀྱི་རེད་དེ་ཆོས་ཀྱི་འགྲོ་སྟངས་ཐོག་ལ་ཆོས་ཚན་འདྲ་མིན་ལ་སློབ་སྦྱོང་དང་། དོ་སྣང་བྱས་ཏེ་སོ་སོའི་ཉམས་ལེན་གྱི་ཐོག་ལ་ཡིན་ནའང་ཕན་ཐོགས་ཡོད་པ་ཞིག་རེད། དེར་བརྟེན། ནུབ་ཕྱོགས་རྒྱལ་ཁབ་དང་། དེང་སང་ཨ་རབ་ནང་དུའང་ཉུང་ཤོས་ཤིག་གིས་རྒྱ་གར་གྱི་ཆོས་ལུགས་ལ་དོ་སྣང་དམིགས་བསལ་བྱེད་ཀྱི་འདུག ཆོས་ལ་དོ་སྣང་སླེབས་པ་དང་། དོ་སྣང་དེ་ཆོས་ལུགས་ཀྱི་རོལ་མོ་དཀྲོལ་བ་དང་། འདོན་པ་འདོན་པ་ལྟ་བུ་དོ་སྣང་ཡོང་གི་ཡོད་ཀྱང་། གཙོ་བོ་ཆོས་ཀྱིས་བསམ་བློའི་ནང་འགྱུར་བ་ཇི་ལྟར་གཏོང་དགོས་པ་དང་། ཕན་ཐོགས་ཇི་ལྟར་ཡོང་དགོས་མིན་ལ་དོ་སྣང་བྱེད་མཁན་ཡང་མང་དུ་མང་དུ་འགྲོ་བཞིན་ཡོད། དེ་སྔ་ཆོས་ལ་དོ་སྣང་མེད་མཁན་ཚོའི་ནང་ནས་བོད་གངས་ཅན་ལྗོངས་ཀྱི་དཔལ་ནཱ་ལེནྡྲའི་ཆོས་བརྒྱུད་ལ་དོ་སྣང་གསར་པ་ཞིག་སླེབས་ཡོང་དུས་ལྡི་ལི་བོད་ཁང་ལྟ་བུ་ཞིག་ཚུགས་ཐུབ་ན་སློབ་སྦྱོང་བྱེད་ས་དང་། བགྲོ་གླེང་བྱེད་ས་ཚད་ཐུབ་ཅིག་ཡོང་ཐུབ་པ་ཡིན་པས་ལྡི་ལི་བོད་ཁང་ཚུགས་པ་དེ་ལྟར་རེད།
གནའ་སྔ་མོ་བོད་ལ་བོན་གྱི་ཆོས་མ་གཏོགས་ནང་ཆོས་སླེབས་ཡོད་པ་མ་རེད། ཆོས་རྒྱལ་སྲོང་བཙན་དང་། ལྷག་པར་དུ་ཁྲི་སྲོང་ལྡེ་བཙན་སྐབས་སུ་རྒྱ་གར་གྱི་ནང་པ་སངས་རྒྱས་པའི་ཆོས་ལུགས་དང་། དེ་ཡང་དཔལ་ནཱ་ལེནྡྲའི་ཆོས་བརྒྱུད་ལ་ཐུགས་སྣང་ཆེན་པོ་བྱུང་ནས། ཆོས་རྒྱལ་སྲོང་བཙན་སྒམ་པོའི་སྐབས་སུ་སོ་སོའི་རང་གི་སྐད་ཀྱི་ནང་དུ་འདི་དག་སླེབས་དགོས་པར་དགོངས་ནས་ལེགས་སྦྱར་སོགས་ལ་བརྟེན་མི་དགོས་པར་བོད་ཡིག་གསར་པ་བཟོས་པ་དང་། མཁན་ཆེན་ཞི་བ་འཚོ་སོགས་ཀྱི་སྐབས་སུ་སོ་སོར་རང་གི་སྐད་ཡིག་ཡོད་པས་རྒྱ་གར་གྱི་ལེགས་སྦྱར་དང་པཱ་ལིའི་གཞུང་དུ་ཡོད་པའི་གཞུང་མང་པོ་ཞིག་བོད་ཡིག་ཏུ་བསྒྱུར་ཏེ། བཅོམ་ལྡན་འདས་ཀྱི་བཀའ་བཀའ་འགྱུར་པོ་ཏི་བརྒྱ་ལྷག་དང་། ཀླུ་སྒྲུབ་ཡབ་སྲས་ལ་སོགས་པ་རྒྱ་གར་གྱི་མཁས་པ་ཚོས་བརྩམས་པའི་གཞུང་བོད་ཡིག་ཏུ་བསྒྱུར་བ་ཕལ་ཆེར་པོ་ཏི་ཉིས་བརྒྱ་ཙམ་ཡོད་པ་རེད། བཀའ་བསྟན་འགྱུར་རྣམས་ང་ཚོ་བོད་པ་རང་གི་མ་རེད། རྒྱ་གར་དུ་རིག་གཞུང་འདྲ་མིན་ཡོད་པ་ལ་དོ་སྣང་བྱས་ཏེ་བསྒྱུར་བ་ཞིག་རེད།
ཆོས་རྒྱལ་ཁྲི་སྲོང་ལྡེ་བཙན་གྱི་སྐབས་སུ་ནཱ་ལེནྡྲའི་མཁས་པའི་གཙུག་རྒྱན་མཁན་ཆེན་ཞི་བ་འཚོ་བོད་ལ་གདན་ཞུ་གནང་བ་དང་། ཞོར་དུ་རྒྱ་གར་གྱི་མཁས་པའི་གཞུང་ལ་དོ་སྣང་དང་སློབ་སྦྱོང་ཡོད་པའི་རིགས་སློབ་དཔོན་ཀ་མ་ལ་ཤཱི་ལ་སོགས་སྡེ་ཚན་གཅིག་དང་། ཆོས་རྒྱལ་སྲོང་བཙན་སྐབས་སུ་རྒྱ་བཟའ་ལ་བརྟེན་ནས་རྒྱ་དང་འབྲེལ་བ་ཆེན་པོ་ཡོད་པས་རྒྱ་ཡི་སྒོམ་ཆེན་པ་སློབ་གཉེར་བྱས་ཏེ་རྩོལ་བ་བྱེད་ཀྱི་མེད་པར་སྒོམ་རྒྱབ་ནས་སྡོད་མཁན་གྱི་སྒོམ་ཆེན་པ་རྣམས་ཕྱོགས་གཅིག་ཏུ་བསྡད། ཆོས་རྒྱལ་ཁྲི་སྲོང་ལྡེ་བཙན་དཀྱིལ་ལ་བཞུགས་ཏེ་བགྲོ་གླེང་གནང་བ་དང་། རྒྱ་གར་མཁས་པའི་རྗེས་འབྲངས་ཚོར་ནང་པ་སངས་རྒྱས་པའི་ཆོས་ཀྱི་འགྲོ་སྟངས་ཞིབ་ཚགས་པོའི་ཐོག་འགྲེལ་བཤད་རྒྱག་རྒྱུ་ཡོད་པ་ཞིག་བྱུང་བ་དང་། རྒྱ་ཡི་མཁན་པོ་ཚོར་སྒོམ་རྒྱབ་ནས་བཞུགས་རྒྱུ་ལས་སློབ་གཉེར་ཤུགས་ཆེན་པོ་བྱེད་པ་ལ་དོ་སྣང་བྱུང་མེད་པས། ཆོས་རྒྱལ་ཁྲི་སྲོང་ལྡེ་བཙན་གྱིས་རྒྱ་ཡི་མཁན་པོ་ཚོར་ཐུགས་རྗེ་ཆེ། ཁྱེད་རང་ཚོ་སྒོམ་སྐྱོན་རྒྱུ་དེ་རྒྱ་ནག་རང་དུ་སྐྱོན་ན་ཡག་པོ་འདུག་ཅེས་གསུངས་པ་རེད།
བར་སྐབས་ནས་བོད་དུ་སློབ་སྦྱོང་བྱེད་པའི་ཐོག་ལ་དམིགས་བསལ་གྱིས་དོ་སྣང་བྱས་ཏེ། འབྲས་སྤུངས་དང་སེ་ར། དགའ་ལྡན། བཀྲ་ཤིས་ལྷུན་པོ། དེ་བཞིན་དུ་དགོན་པ་མང་པོ་ཞིག་བཤད་གྲྭ་བྱས་ཏེ་སློབ་སྦྱོང་བྱེད་པ་དང་། སློབ་སྦྱོང་བྱེད་སྟངས་དེའང་ཆ་པ་ཆོས་སེང་གི་ལུགས་སྲོལ་ལྟར་རྟགས་གསལ་བཏང་ནས་ཐལ་ཕྱིར་ཞེས་རིགས་ལམ་གྱི་ཐོག་ནས་དཔྱད་པ་བྱེད་པ་དར་སྲོལ་ཆེན་པོ་བྱུང་འདུག དེས་གཞུང་དོན་གང་ཡིན་ཡང་སྒྲོ་འདོགས་དཔྱིས་ཕྱིན་པ་གཅོད་ཐུབ་པ་ཧ་ཅང་ཡག་པོ་བྱུང་འདུག དེང་སང་དངོས་ཡོད་གནས་ཚུལ་དུ་ནང་པའི་ལུང་པ་མང་པོ་ཡོད་པ་དང་། དེའི་ནང་ཚན་དུ་ནཱ་ལེནྡྲའི་ཆོས་བརྒྱུད་འཛིན་མཁན་ཡང་མང་པོ་ཡོད་ཀྱང་། རིགས་ལམ་གྱི་ཐོག་ནས་སྒྲོ་འདོགས་གཅོད་མཁན་ང་ཚོ་བོད་པ་དྲག་ཤོས་རེད།
དེང་སང་ནུབ་ཕྱོགས་པའི་ཚན་རིག་པའི་ནང་དུ་སེམས་ཁམས་རིག་པ་ལ་དོ་སྣང་དམིགས་བསལ་བྱས་ཡོང་དུས། དེའི་འགྲེལ་བཤད་རྒྱག་མཁན་དང་། རྒྱུས་ཡོད་ནི་བོད་པ་སློབ་སྦྱོང་ཡོད་མཁན་ཚོ་དྲག་ཤོས་རེད། བོད་ལ་ཆབ་སྲིད་ཀྱི་ཐོག་ནས་འགྱུར་བ་ཆེན་པོ་བྱུང་བ་རེད། བོད་རང་གི་ཆོས་དང་རིག་གཞུང་ལ་དམིགས་བསལ་གྱིས་དམ་དྲག་བྱུང་བ་རེད། ཡིན་ནའང་། བོད་རྒྱ་ཆེའི་མི་མང་གི་སྙིང་སྟོབས་དང་ཆོས་རབ་ཏུ་རྣམ་འབྱེད་ཀྱི་ཤེས་རབ་ཀྱི་ནུས་པ་བརྟེན་ནས་ད་ལྟའི་བར་དུ་སངས་རྒྱས་པའི་ཆོས་དཔལ་ནཱ་ལེནྡྲའི་ཆོས་བརྒྱུད་དྲི་མ་མེད་པ་འདི་བོད་དུ་སྲུང་སྐྱོབ་ཡིད་ཚིམས་པ་བྱུང་ཡོད་པ་རེད། ང་ཚོ་བོད་པར་དཀའ་ངལ་མང་པོ་ཞིག་འཕྲད་ཀྱང་། སོ་སོའི་རིག་གཞུང་གལ་ཆེན་པོར་བརྩིས་ཏེ་ཐོས་བསམ་སྒོམ་གསུམ་ཡ་མ་བྲལ་བའི་ཐོག་ནས། ཐོག་མར་ཐོས་པ་དང་ཐོས་པའི་དོན་ལ་ཡང་ནས་ཡང་དུ་བསམ། བསམ་པའི་དོན་ལ་ངེས་ཤེས་སྐྱེས་ཏེ་སེམས་ལ་ཚོར་བ་ཡོད་པ་དང་། སེམས་ལ་ཉམས་མྱོང་སྐྱེས། དེ་མུ་མཐུད་དུ་དཔྱད་འཇོག་ཟུང་འབྲེལ་གྱི་ཐོག་ནས་སྒོམ་ཡོང་སྐབས་སེམས་ལ་འགྱུར་བ་འགྲོ་བ་ཤུགས་ཆེན་པོ་ཡོང་གི་འདུག
ནང་པ་སངས་རྒྱས་པའི་ཆོས་ཀྱི་ནང་ནས་རིགས་ལམ་གྱི་འགྲོ་སྟངས་དང་། ཚད་མ་རིག་པའི་འགྲོ་སྟངས་ལ་འཛམ་གླིང་འདིར་དམིགས་བསལ་ཆོས་ལ་དོ་སྣང་མེད་ནའང་ཆོས་དང་མ་འབྲེལ་བའི་ཐོག་དོ་སྣང་གསར་པ་ཞིག་བྱེད་བཞིན་འདུག བོད་ཀྱི་གཞུང་འདི་རྣམས་རྒྱ་གར་ནས་ཡོང་བ་རེད། དེར་བརྟེན། བོད་ཀྱི་རིག་གཞུང་གང་ནས་འབྱུང་སའི་ཡུལ་དུ་དོ་སྣང་བྱེད་མཁན་ཇེ་མང་ཇེ་མང་ལ་འགྲོ་བཞིན་འདུག་པས་དེ་དག་ཁུངས་བཙན་པོ་ཡག་པོ་བྱུང་ན་བསམ་ནས་སྔོན་ལ་ལྡི་ལིར་བོད་ཁང་བཙུགས་པ་དང་། དོ་སྣང་བྱེད་མཁན་ཚོར་ཚིག་གི་འགྲེལ་བཤད་ཙམ་མ་ཡིན་པར་བགྲོ་གླེང་བྱས་ཏེ་བསམ་བློ་གཏོང་བའི་ཐོག་ཕན་ཐོགས་བྱུང་ན་བསམ་ནས་ལྡི་ལི་བོད་ཁང་ལྟ་བུ་རྒྱ་གར་ས་ཆ་ཁག་ཁ་ཤས་ཡོད། ནཱ་ལེནྡྲའི་ཆོས་བརྒྱུད་ཀྱི་རིགས་ལམ་ཐོག་ནས་བསམ་བློ་གཏོང་བ་དེ། ཆོས་སྤེལ་བའི་སྐད་ཆ་མིན་པར་རྣམ་དཔྱོད་རིག་པ་རྩལ་དུ་བཏོན་ནས་ཞིབ་འཇུག་བྱེད་པ་ལ་དོ་སྣང་ཡོད་མཁན་ཚོས་སློབ་སྦྱོང་བྱེད་པར་ཞབས་འདེགས་ཞུ་ཐུབ་ཀྱི་རེད་བསམ་པ་ངོས་ལ་སྤོབས་པ་ཡོད།
ངོས་ནས་འཛམ་གླིང་གི་ཆོས་ལུགས་མཐུན་འབྲེལ་ཧ་ཅང་གལ་ཆེན་པོ་རེད་ཅེས་བཤད་བཞིན་ཡོད་ལ་བསམ་བློའི་ནང་དུའང་ཡོད། ངོས་རང་ཕྱོགས་བསྐྱོད་སྐབས་སུ་ཧིན་དྷིའི་ལྷ་ཁང་། ཁ་ཆེའི་ཕྱག་ཁང་། ཇོའུ་ལྷ་ཁང་སོགས་ལྷ་ཁང་འདྲ་མིན་དུ་ཕྱིན་ནས་རང་རང་གིས་དད་པ་བྱེད་པ་ལ་རྗེས་སུ་ཡི་རང་བྱས་ཏེ་འགྲོ་བཞིན་ཡོད། ཆོས་ལུགས་མཐུན་འབྲེལ་བྱེད་རྒྱུ་ཧ་ཅང་གལ་ཆེན་པོ་རེད། རྒྱ་གར་གྱི་ཁྱིམ་མཚེས་ཨབ་གྷ་ནི་སི་ཐན་ནང་དུ་སྤྱིའི་ཆ་ནས་ཁ་ཆེའི་ཆོས་བརྒྱུད་གཅིག་མཚུངས་ཡིན་ཡང་། ནང་གསེས་ཀྱིས་ཤའེ་ཡ་(Shia) དང་། སའུ་ནི་ (Sunni) ཞེས་ཏོག་ཙམ་རྙོག་དྲ་ཡོང་གི་འདུག ཆོས་ལུགས་ཚང་མ་སེམས་བཟང་པོ་བྱེད་པའི་བསླབ་བྱ་གཅིག་མཚུངས་རེད། སེམས་བཟང་པོ་བྱེད་པའི་རྒྱུ་མཚན་ལ་རང་གི་ལྟ་གྲུབ་ཐོག་ནས་འགྲེལ་བཤད་རྒྱག་རྒྱུ་ཡོད་པ་རེད། སྙིང་པོ་ནི་ཆོས་བྱེད་མཁན་གྱིས་སེམས་པ་བཟང་པོ་དགོས་པ་རེད་ཟེར་བ་གཅིག་གྱུར་རེད། རྒྱ་གར་དུ་འཛམ་གླིང་གི་ཆོས་ལུགས་ཚང་མ་ཡོད་པ་དང་། ཆོས་ལུགས་མཐུན་འབྲེལ་ཧ་ཅང་ཡག་པོ་རེད། དེ་ང་ཚོས་མིག་ལྟོས་བཟང་པོ་ཞིག་ལ་བལྟས་ནས་མུ་མཐུད་ཆོས་ལུགས་མཐུན་འབྲེལ་བྱེད་པ་ནི་ཧ་ཅང་གལ་ཆེན་པོ་རེད། ཅེས་སོགས་བཀའ་སློབ་སྩལ་རྗེས་རྟེན་འབྲེལ་བསྟོད་པའི་བཀའ་ཁྲིད་སྩལ་བ་དང་། མཐར་དྲི་བ་ཁག་གཅིག་ལ་བཀའ་ལན་སྩལ་ཡོད།
