༄༅། །ཕྱི་ལོ་ ༢༠༢༣ ཟླ་ ༦ ཚེས་ ༡༣ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་བཞུགས་སྒར་ཕོ་བྲང་དུ་ཏུ་ཥི་ཏཱ་(Tushita)ཆོས་ཚོགས་དང་། སངྐི་སཱ་ནང་པའི་གཞོན་ནུ་ཚོགས་པ་ཟུང་འབྲེལ་གྱིས་གོ་སྒྲིག་གནང་བའི་ནང་ཆོས་ངོ་སྤྲོད་ཀྱི་ཟབ་སྦྱོང་ལ་ཞུགས་པའི་རྒྱ་གར་གྱི་ནང་པ་རྣམས་ལ་མཇལ་ཁ་དང་བཀའ་སློབ་སྩལ་ཡོད་པ་རེད།
དེ་ཡང་མགོན་པོ་གང་ཉིད་མཆོག་གིས་དད་ལྡན་མི་མང་བརྒྱ་ཕྲག་བརྒལ་བར་མཇལ་ཁ་སྩལ་རྗེས་ཕོ་བྲང་མཇལ་འཕྲད་ཁང་དུ་ཆེད་ཕེབས་ཀྱིས་རྒྱ་གར་གྱི་ནང་པའི་རྗེས་འཇུག་པ་བརྒྱ་ཕྲག་ཙམ་ལ་བཀའ་སློབ་སྩལ་དོན། དེ་རིང་འདིར་རྒྱ་གར་གྱི་ས་ཁུལ་མང་པོ་ཞིག་ནས་ནང་ཆོས་ལ་དོ་སྣང་ཡོད་མཁན་ཁྱོད་ཚོ་རུབ་རུབ་བྱས་ཏེ་ངོས་རང་ཐུག་པའི་གོ་སྐབས་བྱུང་བ་ལ་ཧ་ཅང་དགའ་བོ་བྱུང་། ངོས་རང་ནང་པའི་དགེ་སློང་ཞིག་རེད། ཆོས་ལུགས་ཚང་མར་གུས་ཞབས་བྱེད་ཀྱི་ཡོད། ཆོས་ལུགས་ཚང་མར་ལྟ་གྲུབ་མི་འདྲ་བ་ཡོད་ཀྱང་སེམས་ཀྱི་ཞི་བདེ་དགོས་པ་དང་བྱམས་བརྩེ་དགོས་པ་ཚང་མས་གསུང་གི་ཡོད། ནང་གསེས་ཀྱི་ལྟ་གྲུབ་མི་འདྲ་བའི་ཐོག་དྲི་བ་དྲིས་ལན་བྱེད་པ་ལྟ་བུ་ནང་པ་རང་གི་ནང་དུའང་གྲུབ་མཐའ་སྨྲ་བ་བཞི་ཞེས་མི་འདྲ་བ་ཡོང་གི་ཡོད། དེང་སང་དུས་རབས་ཉེར་གཅིག་པར་འཕྲུལ་ཆས་སོགས་དངོས་པོ་ཧ་ཅང་ཡར་རྒྱས་ལ་ཕྱིན་ཡོད་ཀྱང་། མིའི་སེམས་ཀྱི་ཞི་བདེ་འཕྲུལ་ཆས་ཀྱི་ཐོག་ནས་བཟོ་ཐུབ་རྒྱུ་ཧ་ཅང་ཁག་པོ་རེད། ང་ཚོ་མིའི་ཀླད་པ་ཆ་ཚང་བཀོག་ནས་འཕྲུལ་ཆས་ལ་བསྒར་ནའང་བསམ་བློ་གཏོང་བའི་ནུས་པ་མེད་པས་འཕྲུལ་ཆས་ཀྱིས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་བསྒོམ་མི་ཐུབ།
སངས་རྒྱས་བཅོམ་ལྡན་འདས་ཀྱིས། བདག་ཉིད་བདག་གི་མགོན་རེད། ཅེས་ཐུན་མོང་མ་ཡིན་པར་བསམ་བློ་གཏོང་རྒྱུ་ཡོད་པའི་མིའི་ཀླད་པ་བེད་སྤྱོད་བྱེད་དགོས་པ་གསུངས་ཡོད། མིའི་རྣམ་དཔྱོད་ནི་གཟུགས་པོའི་ཤུགས་ཀྱི་སྐད་ཆ་མིན་པར་བསམ་བློ་གཏོང་རྒྱུ་དེ་ཡིན། སྔོན་གྱི་རྒྱ་གར་གྱི་རྒྱན་དྲུག་མཆོག་གཉིས་ལྟ་བུར་མཚོན་ན་སྐུ་གཟུགས་ཧ་ཅང་ཤུགས་ཆེན་པོ་དེ་འདྲ་ཡོད་པ་མ་རེད། སངས་རྒྱས་པའི་ཆོས་དང་དེའི་ནང་ཚན་ནས་ནཱ་ལེནྡྲ་ནས་བརྒྱུད་པའི་ཆོས་དེ་ཀླུ་སྒྲུབ་ཡབ་སྲས་དང་དཔལ་ལྡན་ཆོས་གྲགས་སོགས་ཀྱིས་རིགས་པས་དཔྱད་པ་བྱེད་རྒྱུ་ཧ་ཅང་གལ་ཆེན་པོར་གསུངས་འདུག ང་ཚོ་བོད་ལ་ཆོས་རྒྱལ་སྲོང་བཙན་སྒམ་པོའི་སྐབས་སུ་གཞི་ནས་རྒྱ་གར་མཁས་པ་དང་འབྲེལ་བ་བྱུང་བ་རེད། ཆོས་རྒྱལ་སྲོང་བཙན་སྒམ་པོ་རྒྱ་བཟའ་དང་ཁྲུང་ས་བསྐྱོན་ཡང་། ང་རང་ཚོ་རང་གི་སྐད་ཡིག་ཅིག་དགོས་ཀྱི་འདུག་ཅེས་བོད་ཡིག་བཟོས།
དུས་རབས་བརྒྱད་པའི་ནང་དུ་མཁན་ཆེན་ཞི་བ་འཚོ་བོད་དུ་གདན་ཞུ་གནང་ཞིང་། མཁན་ཆེན་ཞི་བ་འཚོས་ཁྱེད་ཚོར་བོད་སྐད་དང་བོད་ཡིག་འདུག་པས་ལེགས་སྦྱར་དང་པཱ་ལིའི་སྐད་དུ་ཡོད་པ་ཁྱོད་ཚོའི་ཡི་གེར་བསྒྱུར་ནས་སློབ་སྦྱོང་བྱ་རྒྱུ་བྱུང་ན་ཡག་པོ་ཡོང་གི་རེད་གསུངས་པ་རེད། ཕྱིས་སུ་རྒྱ་གར་མཁས་པའི་གཞུང་ལ་དོ་སྣང་དང་སློབ་སྦྱོང་བྱེད་མཁན་མཁན་ཆེན་ཞི་བ་འཚོའི་རྗེས་འབྲང་སློབ་དཔོན་ཀ་མ་ལ་ཤཱི་ལ་དང་ཁོང་གི་དགེ་ཕྲུག་ཁག་ཅིག་ཕྱོགས་གཅིག་དང་། ཆོས་རྒྱལ་ཁྲི་སྲོང་ལྡེ་བཙན་དཀྱིལ་ལ་བཞུགས། ཕྱོགས་གཅིག་ལ་རྒྱ་ཡི་སྒོམ་ཆེན་པ་ཚོ་བཞུགས་ཏེ་བགྲོ་གླེང་གནང་བ་རེད། རྒྱ་ཡི་མཁན་པོ་ཚོར་སྒོམ་རྒྱག་རྒྱུ་མ་གཏོགས་བཤད་རྒྱུ་མ་བྱུང་བ་རེད། ཆོས་རྒྱལ་ཁྲི་སྲོང་ལྡེ་བཙན་གྱིས་ང་ཚོའི་བོད་པ་ཚོར་སློབ་སྦྱོང་བྱས་ཏེ་གཞུང་ལ་སྒྲོ་འདོགས་གཅོད་རྒྱུ་ཧ་ཅང་གལ་ཆེན་པོ་རེད། སྒོམ་རྒྱག་རྒྱུ་ཡག་པོ་ཡོད་ཀྱང་སྔོན་ལ་སློབ་སྦྱོང་བྱ་རྒྱུ་གལ་ཆེན་པོ་འདུག་ཅེས་སློབ་དཔོན་ཀ་མ་ལ་ཤཱི་ལའི་དགེ་ཕྲུག་ཚོར་མངགས་ཆ་ཆེན་པོ་ཞིག་གནང་བ་དང་། རྒྱ་ཡི་མཁན་པོ་ཚོར་ཁྱོད་ཚོས་སྒོམ་བསྐྱོན་ནས་ཧ་ཅང་ཡག་པོ་རེད་དེ། ཡིན་ནའང་། ང་ཚོར་སློབ་སྦྱོང་དགོས་ཀྱི་འདུག་པས་ཁྱེད་ཚོ་རྒྱ་ཡུལ་དུ་ལོག་ན་འགྲིག་གི་འདུག་གསུངས་པ་རེད། ཅེས་དང་།
བོད་ལ་མཁན་ཆེན་ཞི་བ་འཚོ་ཕེབས་པ་ནས་སློབ་སྦྱོང་གི་ཐོག་ལ་ང་ཚོས་ཧ་ཅང་ཤུགས་བརྒྱབ་ཡོད་པ་རེད། ངོས་ཀྱིས་ནམ་རྒྱུན་རྩེད་མོ་དང་སྦྲགས། སྔ་མོ་ཁྱོད་ཚོ་རྒྱ་གར་བ་ཚོ་དགེ་རྒན་རེད། རིམ་བཞིན་རྒྱ་གར་གྱིས་དེང་དུས་ཀྱི་ཤེས་ཡོན་ཐོག་ལ་ཤུགས་བརྒྱབ་ནས་རྒྱ་གར་གྱི་གནའ་རབས་ཀྱི་སེམས་ཁམས་རིག་པའི་སྐོར་ལ་ཞིབ་ཚགས་མོས་བསམ་བློ་གཏོང་རྒྱུ་ཏོག་ཙམ་ཉམས་པ་ལྟ་བུ་དང་། དེང་སང་ནུབ་ཕྱོགས་རྒྱལ་ཁབ་ནང་དུ་དམིགས་བསལ་ཆོས་ལ་དོ་སྣང་མིན་ཡང་། སེམས་ཁམས་རིག་པའི་ཐོག་ལ་དོ་སྣང་གསར་པ་སླེབས་ཡོང་སྐབས་ནང་པའི་གཞུང་གི་ནང་དུ་སེམས་ཁམས་རིག་པའི་སྐོར་ཞིབ་ཚགས་མོ་དང་སྤུས་དག་པོ་འདུག རྒྱ་གར་ལ་ནང་པ་རང་ལ་ཆ་བཞག་ན་མདོ་སྡེ་བ། སེམས་ཙམ་པ། དབུ་མ་པ་སོགས་ཡོད་པ་དང་། དབུ་མ་པའི་ནང་གསེས་ལའང་ཐལ་འགྱུར་བ། རང་རྒྱུད་པ་ཞེས་ལྟ་གྲུབ་ལ་བསམ་བློ་གཏོང་སྟངས་ཞིབ་ཚགས་ལོས་ཐོག་ནས་མི་འདྲ་བ་ཁ་ཤས་འདུག
སེམས་ཁམས་རིག་པའི་སྐོར་ལ་གོང་དུ་ཞུས་པ་ལྟར་བསམ་བློའི་འགྲོ་སྟངས་སྐོར་ལ་དོ་སྣང་ཡོད་མཁན་གྱི་ཚན་རིག་པ་ཚོས་སངས་རྒྱས་པའི་སེམས་ཁམས་རིག་པའི་སྐོར་ལ་དམིགས་བསལ་དོ་སྣང་བྱེད་ཀྱི་འདུག དེང་གི་དུས་རབས་འདི་འདྲ་ཞིག་ལ་མིའི་བསམ་བློ་གཏོང་སྟངས་ལ་དོ་སྣང་བྱེད་མཁན་མང་པོ་ཞིག་ཡོང་བའི་སྐབས་སུ་ནང་པའི་གཞུང་ནས་སེམས་ཁམས་རིག་པའི་སྐོར་ལ་བཤད་པ་དེ་དམིགས་བསལ་ཕན་ཐོགས་ཆེན་པོ་ཡོད་པ་ཞིག་འདུག ཅེས་བཀའ་སློབ་སྩལ་རྗེས་དྲི་བ་དྲིས་ལན་གནང་བ་དང་། དྲི་བར་བཀའ་ལན་གནང་སྐབས་མགོན་པོ་གང་ཉིད་མཆོག་གིས། མིའི་སྐྱོན་ཆ་མང་པོ་རྟག་འཛིན་གྱི་བློ་ལ་བརྟེན་ནས་ཡོང་གི་ཡོད་པས་མི་རྟག་པ་སྒོམ་རྒྱུ་གལ་ཆེན་པོ་ཡིན་པའི་སྐོར་དང་། ལུང་ཚན་དང་ཆོས་ལུགས་མི་འདྲ་བ་སོགས་ནི་དོན་དག་ཆུང་ཆུང་ཡིན་པས་འགྲོ་བ་མི་རྣམས་ལ་གཅིག་མཚུངས་ཀྱི་འདུ་ཤེས་འཛིན་རྒྱུ་གལ་ཆེན་པོ་ཡིན་པ་དང་། དེ་ལ་བརྟེན་ནས་འཛམ་གླིང་ཞི་བདེ་ཡོང་གི་ཡོད་པའི་སྐོར་སོགས་བཀའ་སློབ་སྩལ་ཡོད།
