༄༅། །ཉེ་ཆར་ཕྱི་ཚེས་ ༡༤ ཉིན་ནིའུ་ཛི་ལནྜ་རྒྱལ་ཡོངས་འོས་བསྡུའི་སྐབས་ཕྱོགས་འགལ་ཚོགས་པར་རྒྱལ་ཁ་ཐོབ་པར་བརྟེན་ཚོགས་པའི་དབུ་ཁྲིད་ Chris Luxon ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་ཞིག་སྩལ་ཡོད།
གསུང་འཕྲིན་དེའི་ནང་། དེང་སང་འཛམ་གླིང་གང་སར་དཀའ་ངལ་ཧ་ཅང་ཆེན་པོ་འཕྲད་བཞིན་པའི་སྐབས་ཡིན་ཀྱང་། འཛམ་གླིང་གང་སར་འགྲོ་བ་མི་གཅིག་གྱུར་དང་། གཅིག་ལ་གཅིག་བརྟེན་གྱི་འདུ་ཤེས་ཆེ་རུ་འགྲོ་བཞིན་ཡོད་པས། ཚང་མས་ནུས་པ་མཉམ་སྤུངས་བྱས་ན་རིང་མིན་གྲུབ་འབྲས་བཟང་པོ་ཞིག་ཐོན་ཐུབ་པའི་ཡི་ཆེས་ཡོད། ཅེས་དང་།
ནིའུ་ཛི་ལནྜ་ཀྱི་རྡུལ་ཕྲན་མཚོན་ཆ་མེད་པའི་སྲིད་བྱུས་དེ་དག་མུ་མཐུད་ཤར་བསྐྱོད་བྱེད་རྒྱུ་ཡིན་པ་དེ་ནི་རྒྱལ་ཁབ་གཞན་ལ་མིག་དཔེ་བཟང་པོ་ཞིག་ཡིན། རང་གཞན་ཚང་མའི་དོན་དུ་འཛམ་གླིང་ཞི་འཇགས་ལྷིང་པོ་ཞིག་ཡོང་བའི་ཐབས་ལམ་ཉག་གཅིག་དེ་ནི། རིམ་པས་རྡུལ་ཕྲན་མཚོན་ཆ་སོགས་མེད་པར་བཟོ་རྒྱུ་དེ་ཡིན། ཞེས་དང་།
མཛེས་སྡུག་ལྡན་པའི་ནིའུ་ཛི་ལནྜ་ནང་ཐེངས་མ་ཁ་ཤས་སླེབས་མྱོང་ཞིང་། དེ་དག་གི་སྐབས་འགྲོ་བ་མིའི་བཟང་སྤྱོད་དང་། བྱམས་སྙིང་རྗེ། བཟོད་སྒོམ། འདོད་ཆུང་ཆོག་ཤེས། སྒྲིག་ཁྲིམས་རང་སྲུང་། ཆོས་ལུགས་མཐུན་འབྲེལ་གོང་སྤེལ་སོགས་ངོས་ཀྱིས་དོ་ཁུར་བྱེད་ས་རྣམས་ལ་མང་ཚོགས་ཀྱིས་དོ་ཁུར་དང་རྒྱབ་སྐྱོར་གནང་བྱུང་ལ། ཡུལ་མི་རྣམས་ཀྱི་སེམས་ཤུགས་དང་། མཛའ་བརྩེ་ལ་བརྟེན་ནས་བློ་སྟོབས་འཕེལ་བ་བྱུང་། ཞེས་དང་།
མཇུག་ཏུ། འདེམས་ཐོན་སྲིད་བློན་མཆོག་གིས་ལས་ཁུར་འགོ་བཙུགས་པ་ནས་བཟུང་ནིའུ་ཛི་ལནྜ་མི་མང་གི་མངོན་འདོད་འགྲུབ་ཐུབ་པའི་སྨོན་འདུན་ཡོད། ཅེས་བཀའ་སྩལ་ཡོད།
