༄༅། །ཕྱི་ལོ་ ༢༠༢༢ ཟླ་ ༨ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་དགོན་པ་ཚོགས་པའི་འདུ་ཁང་ཆོས་ཀྱི་བསྟི་གནས་ལ་རབ་གནས་དབུ་འབྱེད་དང་། དགའ་ལྡན་ཁྲི་ཟུར་རི་རྫོང་རིན་པོ་ཆེའི་བཞུགས་གནས་སུ་ཆིབས་བསྒྱུར། དེ་བཞིན་ལ་དྭགས་ནང་པའི་ཚོགས་འདུ་དང་། ལ་དྭགས་དགོན་པ་ཚོགས་པ་ཐུན་མོང་ནས་ཕེབས་སྐྱེལ་གསོལ་སྟོན་ལ་གདན་ཞུས་ལྟར་ཆིབས་བསྒྱུར་བཀའ་དྲིན་བསྐྱངས་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༨།༠༠ ཡོལ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ཞི་བའི་ཚལ་ཕོ་བྲང་ནས་ལྕོག་ལམ་ཚལ་དུ་རྟེན་གཞི་བྱས་པའི་དགོན་པ་ཚོགས་པའི་འདུ་ཁང་ཆོས་ཀྱི་བསྟི་གནས་ཞེས་པར་ཆིབས་བསྒྱུར་བསྐྱངས་པ་དང་། སྐབས་དེར་ལ་དྭགས་དགོན་པ་ཚོགས་པའི་ཚོགས་གཙོ་བསྟན་འཛིན་དབང་གྲགས་ལགས་དང་། ནང་པ་ཚོགས་པའི་ཚོགས་གཙོ་ཐུབ་བསྟན་ཚེ་དབང་ལགས་སོགས་ཀྱིས་ཕེབས་བསུ་དང་བཅས་ཆོས་ཀྱི་བསྟི་གནས་འདུ་ཁང་དུ་༸ཞབས་སོར་འཁོད་དེ་མནྜལ་རྟེན་གསུམ་འདེགས་འབུལ་རྗེས་མགོན་པོ་གང་ཉིད་མཆོག་གིས་བཞུགས་སྒར་རྡ་རམ་ས་ལ་སོགས་སུ་ཆར་ཤུགས་ཧ་ཅང་ཆེན་པོ་འབབ་བཞིན་པ་དང་བསྟུན་ནས་ལ་དྭགས་སུ་ཕེབས་པ་དང་། ལ་དྭགས་ཤམ་སྟོད་བར་གསུམ་གྱི་མི་མང་རྣམས་དད་པ་དམ་ཚིག་ཧ་ཅང་བརྟན་པོ་ཡིན་པ་ལ་བསྔགས་བརྗོད་དང་འབྲེལ་བཀའ་སློབ་སྩལ་དོན།
ཟངས་དཀར་མི་མང་དང་ལ་དྭགས་མི་མང་ཡོངས་དད་པ་གཡོ་བ་མེད་པ་ནི་གཟི་བརྗིད་ཅིག་རེད། མི་མང་ཚོས་རྩེ་གཅིག་ཏུ་དགའ་པོ་དང་དད་པ་བྱེད་དུས་ངོས་རང་མི་ཚེ་རིང་པོར་སྡོད་དགོས་ཀྱི་འདུག་བསམ་པ་དྲན་ཡོང་གི་འདུག དེ་ནི་བརྟན་བཞུགས་ལའང་ཕན་པ་རེད། ཁྱོད་ཚོ་དངོས་གནས་སངས་རྒྱས་པའི་ཆོས་ལ་དད་མོས་ཡོད་པའི་ཐོག་འདིར་ངོས་ལ་ཐུག་པ་དང་། ངོས་ཀྱིས་ནང་ཆོས་འགྲེལ་བཤད་ཏོག་ཙམ་རྒྱག་གི་ཡོད་པ་རེད། དེས་ཁྱོད་རང་ཚོར་དད་པ་ཙམ་མ་ཡིན་པར་རྒྱུ་མཚན་མཐོང་བའི་སྒོ་ནས་དད་པ་སྐྱེས་པ་ཞིག་དང་། སངས་རྒྱས་པའི་བསྟན་པ་ལ་ཤེས་ནས་དད་པ་ཐོབ་པ་ཞིག་ཡོང་བ་ལ་ངོས་ཀྱིས་ཕན་ཐོགས་གང་འཚམ་བྱེད་ཐུབ་ཀྱི་ཡོད། ངོས་རང་སྤྲོ་བ་ཡོད་ལ་བསྟན་པའི་ཞབས་འདེགས་རེད། དེ་བཞིན་ས་གནས་ལ་ཁ་ཆེའི་ཆོས་པའང་མང་པོ་ཡོད་པ་རེད། ཚང་མས་ཧ་ཅང་དགའ་བོ་བྱེད་ཀྱི་འདུག
ངོས་ཀྱི་ལས་འགན་གཅིག་ནི་ཆོས་ལུགས་ཚང་མ་མཐུན་འབྲེལ་བྱ་རྒྱུ་དེ་ཡིན། ཆོས་ལུགས་ཚང་མས་སེམས་པ་བཟང་པོ་བྱེད་དགོས་པའི་བསླབ་བྱ་གཅིག་གྱུར་ཡིན་པས་ང་ཚོ་ཚང་མ་མཐུན་པོ་བྱེད་དགོས། ངོས་ཀྱིས་གང་ལ་གང་འཚམ་ཁ་ཆེའི་ཆོས་གྲོགས་ཚོར་ཕན་ཐོགས་ཡོང་ཆེད་མང་པོར་ཐུག་སོང་། ཧ་ཅང་དགའ་བོ་བྱུང་། ལ་དྭགས་ནས་ཟངས་དཀར་དང་། དེ་ནས་མོན་བར་དུ་བོད་དང་ས་འབྲེལ་རེད། བོད་ཀྱི་ཆོས་དང་རིག་གཞུང་ས་ཁུལ་འདིར་དར་ཁྱབ་ཡོད་པ་ཞིག་རེད། ལོ་བརྒྱ་ཕྲག་མང་པོའི་རིང་ལ་བོད་ཀྱི་སངས་རྒྱས་པའི་ཆོས་ལ་ཁྱོད་རང་ཚོས་དོ་སྣང་དང་དད་མོས་བྱེད་བཞིན་ཡོད། དེར་བརྟེན། ས་ཁུལ་འདི་དག་ལ་ངོས་ཀྱིས་བོད་ཀྱི་སངས་རྒྱས་པའི་ཆོས་ངོ་སྤྲོད་ཏོག་ཙམ་བྱེད་སྐབས་བོད་ཀྱི་སངས་རྒྱས་པའི་ཆོས་ལ་ཤེས་ནས་དད་པ་ཐོབ་པ་ཞིག་བྱུང་ན་བོད་ཀྱི་ཆོས་དང་རིག་གཞུང་ཉམས་པ་སོར་ཆུད་དང་། མི་ཉམས་གོང་འཕེལ་ཡོང་བ་ལ་ཕན་ཐོགས་ཡོང་བ་ཆགས་ཡོད། འདི་བོད་ཀྱི་ས་མཚམས་ཡིན་པས་༸རྒྱལ་བ་རིན་པོ་ཆེ་ཟངས་དཀར་དང་ལ་དྭགས་ལ་སླེབས་ཡོད་པ་དང་། ཡུལ་བ་ཚོས་དད་པ་རྩེ་གཅིག་དང་། ༸རྒྱལ་བ་རིན་པོ་ཆེ་འཛུམ་ཤིག་ཤིག་བསྡད་ཡོད་པ་བོད་ནང་ནས་གོ་ཡོང་དུས་བོད་ནང་གི་རྒྱ་ཆེའི་མི་མང་གིས་ངོས་རང་ལ་བློ་གཏད་བཅོལ་ནས་བསྡད་ཡོད། དེར་བརྟེན། ཁོང་ཚོ་ཕ་གིར་ཡིད་ཆེས་བརྟན་དུ་འགྲོ་བ་དང་། སེམས་ཀྱི་གཏིང་ནས་སོ་སོས་གདེང་འཁེལ་བ་ཞིག་རེད། བོད་ཀྱི་ཆོས་དང་རིག་གཞུང་རྒྱ་གུང་ཁྲན་གྱིས་ཐབས་ཤེས་ཡོད་རྒུ་རྩལ་སྤྲུགས་ཀྱི་ཐོག་ནས་མེད་པ་བཟོ་རྒྱུའི་ཐབས་ཤེས་བྱས་ཀྱང་རྩ་བ་ནས་ཕམ་ཉེས་ཕྱིན་ནས་བོད་རྒྱ་ཆེའི་མི་མང་གི་དད་པ་དང་དམ་ཚིག་གཡོ་བ་མེད་པར་ཡོད་ལ་འདི་བོད་ནང་གི་མི་ཚོས་མཐོང་དུས་སེམས་ཤུགས་བསྐྱེད་པར་ཕན་ཐོགས་ཡོད་པ་ཏན་ཏན་རེད།
བོད་ཀྱི་སངས་རྒྱས་པའི་ཆོས་དང་རིག་གཞུང་འདི་དངོས་གནས་དྲང་གནས་དཔལ་ནཱ་ལེནྡྲའི་མཁས་པའི་དབང་བོ་ཚོས་བསྲེགས་བཅད་བརྡར་གསུམ་བྱས་ཏེ་ཧ་ཅང་སྤུས་དག་པོ་ཞིག་ཆགས་ཡོད། དཔལ་ནཱ་ལེནྡྲའི་མཁས་པའི་དབང་པོ་ཚོས་བསྲེགས་བཅད་བརྡར་གསུམ་གྱི་ཐོག་ནས་སངས་རྒྱས་པའི་ཆོས་གཏན་ལ་ཕབ་པ་འདི་རིགས་པ་དང་ལྡན་པ། བསམ་བློ་ཅི་ཙམ་བཏང་བ་ན་ངེས་པ་ཇེ་ཆེ་ནས་ཇེ་ཆེར་འགྲོ་རྒྱུ་མ་གཏོགས་རིགས་པས་དཔྱད་སྐབས་ཐེ་ཚོམ་གྱི་གཞི་ཁྱོན་ནས་མེད་པ་ཞིག་རེད། སྤྱིར་ཆོས་ལུགས་ཚང་མས་བྱམས་བརྩེ་གསུང་གི་ཡོད་པ་རེད། ཧ་ཅང་ཡག་པོ་རེད། ཡིན་ནའང་། ནཱ་ལེནྡྲ་ནས་བརྒྱུད་པའི་བོད་ཀྱི་ཆོས་འདི་རིགས་པའི་ལམ་ནས་དཔྱད་པ་བྱས་ཏེ་བསྲེགས་བཅད་བརྡར་གསུམ་གྱིས་གཏན་ལ་ཕབ་པ་ཞིག་ཡིན་པས་ཅི་ཙམ་རིགས་པའི་དཔྱད་པ་བྱས་པ་དེའི་ཚོད་ཀྱིས་སེམས་ལ་ངེས་པ་ཐོབ་ཐུབ་པ་ཞིག་ཆགས་ཀྱི་ཡོད། ངོས་རང་མ་ཎིའི་རྡང་རིང་པོ་དེའི་འཁྲིས་ནས་ཡོང་སྐབས། བྱང་ཆུབ་སེམས་མཆོག་རིན་པོ་ཆེ།། མ་སྐྱེས་པ་རྣམས་སྐྱེས་གྱུར་ཅིག། ཅེས་འཆར་ཅན་བསགས་ནས་ཡོང་གི་ཡོད། གང་ལྟར་བདེ་སྐྱིད་ཀྱི་རྩ་བ་ནི་སེམས་ལ་ཞི་བདེ་ཡོད་པའི་ཐོག་རང་གི་རོགས་པ་ཚོའི་མཉམ་དུ་མཛའ་མཐུན་ཡག་པོ་ཡོད་ན་བདེ་སྐྱིད་ཡོང་གི་རེད། དེར་བརྟེན། ངོས་ཀྱིས་རྟག་པར་རླངས་འཁོར་ནང་སྐར་མ་ཤས་ཀྱི་རིང་། བྱང་ཆུབ་སེམས་མཆོག་རིན་པོ་ཆེ།། མ་སྐྱེས་པ་རྣམས་སྐྱེས་གྱུར་ཅིག། ཅེས་སྨོན་ལམ་བརྒྱབ་ནས་འགྲོ་གི་ཡོད། ཅེས་དང་།
ཆབ་སྲིད་ཀྱི་དོན་དག་ཟེར་ན་མི་འདུག མི་ལུས་ཀྱི་དོན་དག་ཐོག་ནས་བཤད་ཡོང་སྐབས་འདི་བོད་དང་ས་འབྲེལ་ཡིན་པ་དང་། བོད་ནང་གི་མི་ཚོས་དངོས་དང་བརྒྱུད་པའི་ཐོག་ནས་གནས་ཚུལ་ཏོག་ཙམ་གོ་ཐུབ་པ་ཞིག་ཡིན་པས་ཕྱོགས་གཅིག་ནས་རྒྱ་མི་གུང་ཁྲན་གྱིས་ཏཱ་ལའི་ལོག་སྤྱོད་པ་ཞེས་བཤད་བཞིན་ཡོད་པ་རེད། ཏཱ་ལའི་ལོག་སྤྱོད་པ་ཧྲ་ཐག་ཐག་བསྡད་འདུག་བསམ་དུས་བོད་ནང་གི་མི་ཚོ་སེམས་ཤུགས་བསྐྱེད་པ་ལ་ཕན་གྱི་རེད། གང་ལྟར་རྒྱ་མི་གུང་ཁྲན་བསམ་བློ་སྦུབ་སུག་དོག་པོའི་གྲས་ཀྱིས་ཧི་མ་ལ་ཡའི་རི་རྒྱུད་དུ་ཏཱ་ལའི་བླ་མར་ཁ་ཞེ་གཉིས་མེད་ཀྱི་ཐོག་ནས་དད་མོས་བྱེད་མཁན་ཧ་ཅང་ཤུགས་ཆེན་པོ་ཡོད་པ་མཐོང་སྐབས་དེ་ལའང་གནད་འགག་ཅིག་ཡོད་པ་རེད། རྒྱ་མི་གུང་ཁྲན་དངོས་ཡོད་གནས་ཚུལ་མི་ཤེས་མཁན་ཆོས་ཟེར་དུས་ཧ་ཅང་སྡིག་ཅག་ཅིག་ལ་བརྩིས་སྡོད་མཁན་ཚོས་ངོས་རང་ཚུར་སླེབས་པའི་སྐབས་སུ་ཧི་མ་ལ་ཡའི་རི་རྒྱུད་ཀྱི་མི་རྨོངས་དད་ཅན་ཚོར་ཏཱ་ལའི་བླ་མས་མགོ་སྐོར་གཏོང་གི་འདུག་དྲན་གྱི་ཡོད་པ་རེད། ཅེས་སོགས་བདེ་སྐྱིད་ཀྱི་རྩ་བ་སེམས་ལ་ཞི་བདེ་ཡོང་རྒྱུ་ཡིན་པ་སོགས་བཀའ་སློབ་སྩལ་བ་དང་།
དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྟོན་འཁོར་དང་བཅས་པ་གླེ་ཅང་པ་རུ་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་གི་བཞུགས་གནས་སུ་ཆིབས་བསྒྱུར་གྱིས་རིན་པོ་ཆེ་མཆོག་ལ་མཇལ་འཕྲད་གནང་རྗེས་ལ་དྭགས་ནང་པའི་ཚོགས་པ་དང་། ལ་དྭགས་དགོན་པ་ཚོགས་པ་ཐུན་མོང་གིས་ཇི་ལྟར་གསོལ་བ་བཏབ་པ་ལྟར་ལྕོག་ལམ་ཚལ་དུ་རྟེན་གཞི་བྱས་པའི་དཔེ་ཐུབ་དགོན་པའི་སྤང་ཐང་དུ་མགོན་པོ་གང་ཉིད་མཆོག་ལ་ཕེབས་སྐྱེལ་གསོལ་སྟོན་གོ་སྒྲིག་ཞུས་ཡོད་པར་ཆིབས་བསྒྱུར་གྱིས་བཀའ་སློབ་དྲིན་སྩལ་བ་དང་། ཉིན་གུང་ལྗགས་སྨིན་བསྐྱངས་ཡོད། དེ་ཡང་ཐོག་མར་ལ་དྭགས་ནང་ཚོགས་ཀྱི་ཚོགས་གཙོ་ཐུབ་བསྟན་ཚེ་དབང་ལགས་ཀྱིས་ཕེབས་བསུའི་གསུང་བཤད་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
དེ་རིང་ལ་དྭགས་གླེ་ས་ཁུལ་གྱི་སེར་སྐྱ་མི་མང་མང་པོ་ཞིག་འདིར་འདུས་ནས་ངོས་ལ་དགའ་བསུ་གནང་བཞིན་པ་རེད། ཚང་མར་ཐུགས་རྗེ་ཆེ་ཞུ་རྒྱུ་ཡིན། བོད་གངས་ཅན་གྱི་ལྗོངས་དང་ཉེ་འདབས་བྱས་ཏེ་ཡོད་པའི་ཟངས་དཀར་ནས་བཟུང་མོན་བར་གྱི་ཁྱོད་ཚོ་ཚང་མ་བོད་ཀྱི་ཆོས་དང་རིག་གཞུང་ལ་དམིགས་བསལ་དོ་སྣང་ཡོད་པ་དང་། ངོས་རང་ཏཱ་ལའི་བླ་མའི་མིང་འཁྱེར་ཏེ་བོད་ཀྱི་ཆོས་སྲིད་གཉིས་ཀྱི་འགན་འཁྱེར་མཁན་ཞིག་དང་། སློབ་སྦྱོང་བྱས་པའི་མི་ཞིག་ཡིན་པས་ཁྱོད་ཚོས་དམིགས་བསལ་གྱིས་དོ་སྣང་བྱས་ཏེ་སེམས་གཏིང་ནས་དད་པ་དང་སྤྲོ་བ་ཟུང་དུ་འབྲེལ་བའི་ཐོག་ནས་ངོས་ལ་དགའ་བསུ་བྱེད་བཞིན་ཡོད་པ་རེད། ཐུགས་རྗེ་ཆེ་ཞུ་རྒྱུ་ཡིན།
བོད་ཀྱི་ཆོས་དང་རིག་གཞུང་ནི་མི་རིགས་གཅིག་གི་སོ་སོའི་ལུང་པའི་ཆོས་དང་རིག་གཞུང་ཙམ་མ་རེད། སྔོན་གྱི་ཆོས་རྒྱལ་ཚོའི་ཐུགས་རྗེ་བཀའ་དྲིན་ལ་རྟེན་ནས་དཔལ་ནཱ་ལེནྡྲའི་མཁས་པའི་དབང་པོ་ཚོས་རིགས་པའི་ལམ་ནས་གཏན་ལ་ཕབ་པའི་རྨད་དུ་བྱུང་བའི་ལེགས་བཤད་དེ་བོད་རྒྱ་ཆེའི་མི་མང་གིས་ལོ་བརྒྱ་ཕྲག་རིང་བདག་པོ་བརྒྱབ་ནས་བསྡད་པ་རེད། དེ་ལྟ་བུའི་ཆོས་དང་རིག་གཞུང་ནི་བོད་མི་རིགས་དང་དེའི་ས་ཁུལ་གྱི་མི་མང་ཙམ་མ་ཡིན་པར་སེམས་ཅན་ཐམས་ཅད་ཀྱི་སྡུག་བསྔལ་སེལ་བ་དང་། བདེ་བ་སྒྲུབ་པའི་སེམས་ཤུགས་སྦྱོང་མཁན་ཆགས་ཡོད། དངོས་གནས་དྲང་གནས་ཆེ་ས་ནས་བཤད་ན་ནམ་མཁའི་མཐའི་གཏུགས་པའི་སེམས་ཅན་ཐམས་ཅད་ཀྱི་ཆེད་དུ་གཞན་དོན་སྒྲུབ་པའི་བློ་སྦྱང་བའི་གོམས་གཤིས་དང་རིག་གཞུང་ཡིན། ཕྲུ་གུ་ཆུང་ཆུང་སྐབས་ནས་སྲོག་གཅོད་མི་རུང་ཞེས་བཤད་པའི་གོམས་གཤིས་ཤིག་ཡོད། གང་ལྟར་སྔོན་གྱི་ཆོས་རྒྱལ་ཚོའི་ཐུགས་རྗེ་བཀའ་དྲིན་ལ་བརྟེན་ནས་བོད་ལ་སྲོག་ཆགས་ཚང་མར་འཚེ་བ་མི་བྱེད་པར་ཕན་པ་སྒྲུབ་དགོས། སེམས་པ་བཟང་པོ་བྱེད་དགོས་པའི་བག་ཆགས་ཤིག་ཡོད། ཅེས་བཀའ་བསྟན་པོ་ཏི་སུམ་བརྒྱ་ལྷག་ཡོད་པ་རྣམས་མཆོད་བཤམས་སུ་སྒྲིག་རྒྱུ་མ་ཡིན་པར་སློབ་སྦྱོང་བྱེད་དགོས་པ་དང་། གཞན་ཕན་སྒྲུབ་རྒྱུ་གལ་ཆེན་ཡིན་པ་སོགས་བཀའ་སློབ་སྩལ་བ་དང་།
མཐར། ཟངས་དཀར་ནས་བཟུང་ངོས་ལ་དོ་སྣང་བྱུང་། བོད་ཀྱི་ཁྱིམ་མཚེས་ཆགས་ཡོད་པ་རེད་ལ་བོད་ཀྱི་ཆོས་དང་རིག་གཞུང་ལ་ཁྱོད་རང་ཚོས་བདག་པོ་ཧ་ཅང་ཡག་པོ་བརྒྱབ་འདུག ཐུགས་རྗེ་ཆེ་ཞུ་རྒྱུ་ཡིན། བོད་ཀྱི་འཚེ་བ་མེད་པའི་གོམས་གཤིས་དང་རིག་གཞུང་དུས་ད་ལྟ་ཡིན་ནའང་ང་ཚོ་ཧི་མ་ལ་ཡའི་རི་རྒྱུད་ཀྱི་མི་མང་ཙམ་དུ་མ་ཟད་པའི་འཛམ་གླིང་སྤྱི་ལ་དགོས་མཁོ་ཡོད་པ་ཆགས་ཡོད། བོད་ནང་དུ་རྒྱ་གུང་ཁྲན་གྱི་བཙན་གནོན་འོག་ཏུ་སོ་སོའི་རིག་གཞུང་དེ་མངོན་གསལ་དོད་པོའི་ཐོག་འཛིན་སྐྱོང་བྱ་རྒྱུ་ཁག་པོ་ཆགས་ཀྱི་ཡོད། དེ་ལྟ་བུའི་དུས་ཚོད་འདིར་ཁྱོད་ཚོས་བོད་ཀྱི་ཆོས་དང་རིག་གཞུང་གི་མིག་ལྟོས་བཟང་པོར་བདག་པོ་རྒྱབ་པ་ལ་ངོས་ཀྱིས་ཐུགས་རྗེ་ཆེ་ཞུ་རྒྱུ་ཡིན། ཞེས་དང་། སང་ཉིན་ལྡི་ལིར་འགྲོ་རྒྱུ་ཡིན། དེ་རིང་ཐེངས་འདིའི་ཟངས་དཀར་དང་ལ་དྭགས་ཀྱི་ལྟ་སྐོར་གྲུབ་འགྲོ་གི་ཡོད། འདི་ནི་མཐའ་མ་མ་རེད། ལོ་རྗེས་མ་ཡང་བསྐྱར་ངོས་རང་ལ་དྭགས་ཁུལ་དུ་ཡོང་གི་རེད། ཁྱོད་ཚོ་ཚང་མ་སེམས་སྐྱིད་པོ་དང་སེམས་བཟང་པོ་བྱས་ཏེ་ཏཱ་ལའི་བླ་མས་སེམས་བཟང་པོ་བྱེད་དགོས་པ་རེད་ཟེར་བ་སྙིང་ལ་བཅིངས་ནས་སུ་ལའང་འཚེ་བ་མི་བྱེད་རྒྱུ་སེམས་ལ་ཞོག སངས་རྒྱས་པའི་ཆོས་ཀྱི་སྙིང་པོ་བྱང་ཆུབ་ཀྱི་སེམས་རེད། སེམས་པ་བཟང་པོ་བྱ་རྒྱུ་དེ་རེད། དེའི་ཐོག་ཆོས་རིག་པའི་རྣམ་འབྱེད་ཀྱི་ཤེས་རབ་ཀྱིས་བསམ་བློ་ཏོག་ཙམ་གཏོང་ཐུབ་ན་ང་ཚོས་རྒྱུན་དུ་འདོན་པའི་ཤེས་རབ་སྙིང་པོ་རུ། གཟུགས་སྟོང་པའོ།། སྟོང་པ་ཉིད་གཟུགས་སོ།། གཟུགས་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་གཟུགས་གཞན་མ་ནོ།། ཞེས་སྟོང་ཉིད་བཞི་སྐོར་གསུངས་པ་ལ་དོ་སྣང་བྱོས། རྒྱ་ཆེ་བ་བྱང་ཆུབ་ཀྱི་སེམས་དང་། ཟབ་པ་སྟོང་ཉིད་ཀྱི་ལྟ་བ་གཉིས་མཉམ་དུ་སྦྲེལ་ནས་འགྲོ་བ་ཞིག་ང་ཚོས་ནམ་རྒྱུན་ཉམས་ལེན་བྱེད་པ་དེ་རེད། ཉིན་རེ་བཞིན་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་གི་ཡོད། དེའི་འབྲས་བུ་ཆོས་གཟུགས་སྐུ་སྒྲུབ་པ་དང་། ཆོས་གཟུགས་སྐུ་ནི་རང་དོན་ཆོས་སྐུ་དང་། གཞན་དོན་གཟུགས་སྐུ་ཞེས་པའི་དོན་གཉིས་མཐར་ཕྱིན་པའི་གོ་འཕང་སྒྲུབ་རྒྱུ་དེ་ལྟར་རེད། ཐུགས་རྗེ་ཆེ། ཞེས་བཀའ་སློབ་སྩལ་རྗེས་ཉིན་གུང་ལྗགས་སྨིན་གནང་། ལ་དྭགས་དགོན་པ་ཚོགས་པའི་ཚོགས་གཙོ་བསྟན་འཛིན་དབང་གྲགས་ལགས་ཀྱིས་ཐུགས་རྗེ་ཆེ་ཞུ་བའི་མཇུག་སྡོམ་གསུང་བཤད་གནང་རྗེས་ཞི་བའི་ཚལ་ཕོ་བྲང་དུ་ཆིབས་བསྒྱུར་བསྐྱངས་ཡོད་པ་དང་། ཚེས་ ༢༦ ཉིན་གྱི་ཞོགས་པར་གླེ་ནས་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱང་རྒྱུ་ཡིན་པ་བཅས།།
