༄༅། །ཕྱི་ལོ་ ༢༠༢༢ ཟླ་ ༨ ཚེས་ ༡༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལིང་ཤེད་ནས་ཐད་འཕུར་གནམ་གྲུར་བཞུགས་ཏེ་ཟངས་དཀར་དཔལ་ལྡུམ་དུ་༸ཞབས་སོར་བདེ་བོར་འཁོད་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༡༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལིང་ཤེད་ནས་ཐད་འཕུར་གནམ་གྲུ་ནས་ཟངས་དཀར་དཔའ་གཏུམ་དུ་ཆིབས་སྒྱུར་སྐབས་ས་གནས་མང་ཚོགས་ཀྱིས་ཕེབས་ལམ་གཡས་གཡོན་དུ་ཕེབས་བསུ་གཟབ་རྒྱས་དང་བཅས་དཔའ་གཏུམ་གྲུ་འཛིན་ཕོ་བྲང་དུ་༸ཞབས་སོར་བདེ་བོར་འཁོད་པ་དང་། སྐབས་དེར་ཟངས་དཀར་ནང་ཚོགས་དང་། དགོན་ཚོགས། གཞོན་ནུ་ཚོགས་པ་ཐུན་མོང་ནས་མཎྚལ་རྟེན་གསུམ་འདེགས་འབུལ་ཞུས་རྗེས་མགོན་པོ་གང་ཉིད་མཆོག་གིས་བཀའ་སློབ་བཀའ་དྲིན་སྩལ་དོན།
དེ་བཞིན་མགོན་པོ་གང་ཉིད་མཆོག་གིས་མུ་མཐུད། དེ་རིང་འདིར་འབྱོར་ནས་སང་དང་གནངས་ཉིན་ཆོས་འབྲེལ་བྱ་རྒྱུ་དེ་དབང་སོགས་རྙོག་དྲ་ཚ་པོ་མེད་པར་གཙོ་བོ་ཐམས་ཅད་རྣལ་འབྱོར་གྱི་སེམས་བསྐྱེད་དང་བྱང་ཆུབ་ཀྱི་སེམས་སྐོར་འགྲེལ་བཤད་ཅིག་བརྒྱབ། དེའི་སྙིང་ཁར་ཟླ་བའི་དཀྱིལ་འཁོར་ཀུན་གསལ་ཟླ་བའི་ཉ་གང་བ་ཞིག་བསམ། ཆོས་ཐམས་ཅད་སྣང་བ་ལྟར་དུ་གྲུབ་མེད། གང་ལྟར་ང་ཚོར་སྣང་ཡོང་དུས་དོན་གྱི་ངོས་ནས་ཡོད་པ་ཞིག་སྣང་གི་ཡོད་པ་རེད། དེ་ཡང་། གང་ཕྱིར་དངོས་པོ་འདི་དག་རྣམ་དཔྱད་ན།། དེ་ཉིད་བདག་ཅན་དངོས་ལས་ཚུ་རོལ་དུ།། གནས་རྙེད་མ་ཡིན་དེ་ཕྱིར་འཇིག་རྟེན་གྱི།། ཐ་སྙད་བདེན་ལ་རྣམ་པར་དཔྱད་མི་བྱ།། ཞེས་གསུངས་པ་ལྟར་སྣང་བ་ལྟར་གྲུབ་ན་དོན་སྟེང་ནས་གྲུབ་དགོས། རང་ངོས་ནས་གྲུབ་དགོས། དེ་བཏགས་དོན་བཙལ་ན་རྙེད་རྒྱུ་མེད། བཏགས་དོན་བཙལ་ནས་རྙེད་རྒྱུ་མེད་དུས་ཐ་སྙད་དབང་གི་ཡོད་པ་ཞིག་མ་གཏོགས་འགྲོ་ས་མེད། ང་ཚོར་ཐ་སྙད་དབང་གིས་ཡོད་པ་ཞིག་མ་ཡིན་པར་དོན་སྟེང་ནས་ཚུགས་ཐུབ་པ་ཞིག་བློ་ལ་ཤར་གྱི་ཡོད། དེ་ཡོད་པ་ཡིན་ན་རྣམ་བདུན་གྱི་རིགས་པ་དང་རྣམ་ལྔའི་རིགས་པ་སོགས་ཀྱིས་དཔྱད་དུས་གསལ་དུ་འགྲོ་དགོས་ཀྱང་དེ་ལྟར་ཡོང་གི་མེད། དེ་འདྲ་ཡིན་དུས་དོན་དམ་བྱང་ཆུབ་ཀྱི་སེམས་འདི་རྡོ་རྗེ་དཀར་པོ་རྩེ་ལྔ་པ་ཞིག་ལ་བསམ་བློ་བཏང་དགོས། སང་ཉིན་གནངས་ཉིན་ངོས་ཀྱིས་བཀའ་ཆོས་གཙོ་བོ་དེ་ཐམས་ཅད་རྣལ་འབྱོར་གྱི་སེམས་བསྐྱེད་རྒྱུ་དེ་འགྲེལ་བཤད་ཅིག་བརྒྱབ། ང་ཚོ་ཚང་མས་མཉམ་དུ་སྒོམ་དགོས་བསམ་བྱུང་། ཞེས་སོགས་ལྷ་ལྡིང་རིན་པོ་ཆའི་སྐོར་ལ་བཀའ་སློབ་དང་།
གཞན་ཡང་། བྱུང་ན་གཡས་གཡོན་གྱི་དགོན་ཁག་ཚོར་མཆོད་མཇལ་ཞུ་དགོས་ཀྱང་། གང་ལྟར་ཆོས་དཀོན་མཆོག་ངོ་མ་དེ་སེམས་ནང་ཡོད། འགོག་ལམ་གྱིས་བསྡུས་པའི་ཆོས་དཀོན་མཆོག་གང་ལ་གང་འཚམ་གྱི་ཉམས་མྱོང་ཡོད། ཆོས་དཀོན་མཆོག་ངོ་མ་དེ་རེད། དགོན་པ་ཁག་མཇལ་ཐུབ་ན་ཡག་པོ་རེད། འོན་ཀྱང་གཅིག་ནས་དུས་ཚོད་མེད་ལ་གཉིས་ནས་རྡོ་སྐས་འཛེག་རྒྱུར་པུས་མོར་དཀའ་ངལ་ཕྲན་བུ་འདུག དེར་བརྟེན། དགོན་ཁག་ཏུ་མཆོད་མཇལ་གནས་སྐོར་འགྲོ་རྒྱུ་ཁག་པོ་རེད། ངོས་རང་འདི་གར་བསྡད་ནས་རྒྱ་ཆེ་མི་མང་ལ་ཉིན་གསུམ་རིང་ཆོས་འབྲེལ་བྱས་ནས་ལྷོད་ལྷོད་སྡོད་ཀྱི་ཡིན། རྡ་རམ་ས་ལར་ཆར་ཞོད་ཆེ་བས་ངོས་རང་ཟངས་དཀར་ཐེ་བའི་ལ་དྭགས་ས་ཁུལ་ལ་ས་སྐམ་པོ་དང་ཉི་མ་བསྟན་གྱི་ཡོད་དུས་བདུན་ཕྲག་ཁ་ཤས་བསྡད་རྩིས་བྱས་ཏེ་ཡོང་བ་རེད། གལ་ཆེ་ཤོས་ཤིག་ནི་ལ་དྭགས་མི་མང་རྣམས་ཀྱིས་དཔལ་ནཱ་ལེནྡྲ་ནས་བརྒྱུད་པའི་སངས་རྒྱས་པའི་ཆོས་གཙོ་བོར་གྱུར་པའི་བོད་ཀྱི་རིག་གཞུང་ཉར་ཚགས་བྱེད་ཀྱི་ཡོད། ཁྱེད་རང་ཚོ་ཧི་མ་ལ་ཡ་རི་རྒྱུད་ན་ཡོད་པའི་ལ་དྭགས་མི་མང་ཆོས་ལ་དད་པ་ཧ་ཅང་ཆེན་པོ་རེད། དད་པ་བྱེད་སའི་ཆོས་དེ་ལ་སློབ་སྦྱོང་བྱས་ནས་ཕྲན་བུའི་ཞིབ་ཚགས་པོ་ཤེས་ན་དངོས་གནས་དྲང་གནས་ང་ཚོས་དད་པ་བྱ་ཡུལ་སངས་རྒྱས་པའི་ཆོས་དེ་རིགས་པའི་ལམ་དང་མཐུན་པ་ཧ་ཅང་ཡག་པོ་རེད། ཧི་མ་ལ་ཡ་རི་རྒྱུད་ཀྱི་མི་རིགས་ལ་ཆབ་སྲིད་ཀྱི་ཐོག་ནས་རང་དབང་ཡོད། རྒྱ་གར་ལ་ཆ་མཚོན་ན་མང་གཙོ་དང་ཆོས་དད་རང་མོས་ཡིན་པས་ཁྱེད་རང་ཚོར་མང་གཙོ་དང་རང་དབང་ཡོད་དུས་རང་གི་ཕ་མེས་ནས་བརྒྱུད་པའི་ཆོས་འགལ་རྐྱེན་གང་ཡང་མེད་པའི་ཐོག་བདག་པོ་བརྒྱག་རྒྱུ་དེ་ཧ་ཅང་ཡག་པོ་འདུག ཅེས་སོགས་བཀའ་སློབ་སྩལ་ཡོད།
