༄༅། །ཕྱི་ལོ་ ༢༠༢༢ ཟླ་ ༧ ཚེས་ ༣༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནང་པའི་ཚོགས་འདུ་དང་། ལ་དྭགས་དགོན་པ་ཚོགས་པ་ཐུན་མོང་ནས་ཇི་ལྟར་གསོལ་བ་བཏབ་པ་ལྟར་ལ་དྭགས་གླེ་ལྕོག་ལམ་ས་ཞི་བའི་ཚལ་གསུང་ཆོས་ར་བར་ཐུགས་རྗེ་ཆེན་པོའི་དབང་ཆེན་དང་། ལ་དྭགས་དགོན་ཚོགས་དང་ནང་ཚོགས་ཐུན་མོང་ནས་མགོན་པོ་གང་ཉིད་མཆོག་ལ་བརྟན་བཞུགས་བསྟར་འབུལ་ཞུས་ཡོད་པ་རེད།
དེ་ཡང་སྔ་དྲོ་ཆུ་ཚོད་བདུན་པ་མ་ཟིན་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཞི་བའི་ཚལ་ཕོ་བྲང་ནས་གསུང་ཆོས་ར་བར་ཆིབས་བསྒྱུར་གྱིས་བཞུགས་ཁྲིར་༸ཞབས་སོར་འཁོད་མཚམས་འབྲུག་པ་ཐུགས་སྲས་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས་རྗེས་བཀའ་སློབ་སྩལ་དོན། དེ་རིང་འདིར་ཐུགས་རྗེ་ཆེན་པོའི་དབང་ཆེན་བྱེད་རྒྱུ་ཡིན། འཕགས་པ་ཐུགས་རྗེ་ཆེན་པོ་ནི་ཇི་སྐད་དུ། སངས་རྒྱས་ཀུན་གྱིས་རབ་ཏུ་བསྔགས།། ཡོན་ཏན་དམ་པ་ཀུན་བསགས་པ།། སྤྱན་རས་གཟིགས་ཞེས་མཚན་གསོལ་བ།། རྟག་པར་བརྩེ་ལ་ཕྱག་འཚལ་ལོ།། ཞེས་གསུངས་པ་ལྟར་སྙིང་རྗེའི་ལྷ་མཆོག རྒྱལ་བ་ཀུན་གྱི་བརྩེ་བ་ཆེན་པོའི་ཡེ་ཤེས་དེ་ཉིད་གཟུགས་སྐུའི་རྣམ་པར་ཤར་བ་ཞིག་ལ་འཕགས་པ་སྤྱན་རས་གཟིགས་ཞུ་བཞིན་ཡོད་པ་རེད། སྤྱིར་སེམས་ཅན་མཐའ་དག་ལ་མཐའ་གཅིག་ཏུ་མ་བུ་གཅིག་པ་ལ་བརྩེ་བ་ལྟར་བརྩེ་བ་ཡོད་པ་རེད། བྱེ་བྲག་ཏུ་ང་ཚོ་བོད་གངས་ཅན་གྱི་ལྗོངས་འདི་འཕགས་པ་སྤྱན་རས་གཟིགས་ཀྱི་གདུལ་ཞིང་ཐུན་མོང་མ་ཡིན་པ་རེད། དེར་བརྟེན། ང་ཚོ་ཚེ་རབས་མང་པོའི་ལས་ཀྱི་འབྲེལ་བའི་ཐོག་ནས་འཕགས་པ་སྤྱན་རས་གཟིགས་ལ་གསོལ་བ་འདེབས་པ་དང་། མ་ཎི་བགྲང་བ་ཡིན་ན་བྱིན་རླབས་གཞན་ལས་མྱུར་བ་དང་བྱིན་རླབས་ཆེ་བ་ཡོང་གི་ཡོད་པ་རེད།
ངོས་རང་ལ་ཆ་བཞག་ན་ཞོགས་པ་ཡར་ལངས་པ་དང་རྟེན་འབྲེལ་བསྟོད་པ་བཏོན། སྟོན་པ་བཀའ་དྲིན་ཅན་གྱིས་རྟེན་འབྱུང་གི་དེ་ཁོ་ན་ཉིད་གསལ་བར་མཛད་པ་ལ་བསམ་བློ་བཏང་ནས་མ་ཎི་གསོག་གིན་ཡོད། ངོས་ཀྱིས་འདི་ལྟར་བརྗོད་ཆོག་ན་འཕགས་པ་སྤྱན་རས་གཟིགས་ཀྱི་སྐུ་ཡི་སྐུ་ཚབ། གསུང་གི་གསུང་ཚབ། ཐུགས་ཀྱི་ཐུགས་ཚབ་བྱས་ཏེ་འདིར་མོས་གུས་བྱེད་བཞིན་ཡོད། དེར་བརྟེན། ཞོགས་པ་འཆར་ཅན་མ་ཎི་ཕྲེང་སྐོར་གཅིག་གཉིས་གསོག་གིན་ཡོད། དེ་རིང་འདིར་ཐུགས་རྗེ་ཆེན་པོའི་དབང་ཆེན་བྱ་རྒྱུ་དང་། ངོས་ཀྱིས་སྒྲུབ་ཞག་རིང་ཁྱོད་ཚོ་ཚང་མས་མ་ཎི་གསོགས། ཁ་སང་བཤད་པ་བཞིན་ཆོས་ལུགས་ཚང་མའི་བསླབ་བྱ་གཙོ་བོ་སྙིང་རྗེ་རེད། འཛམ་གླིང་འདིར་ཞི་བདེ་དགོས་ན་གཙོ་བོ་སེམས་ཀྱི་ཞི་བདེ་དགོས་པ་རེད། དེའི་རྩ་བ་ནི་ཕན་པའི་སེམས་བསམ་པ་བཟང་པོ་བྱེད་རྒྱུ་དེ་རེད། དེར་བརྟེན། དེ་རིང་འདིར་ཡོད་པའི་ཆོས་གྲོགས་ནང་པ་ཙམ་མ་ཡིན་པར་ཡེ་ཤུའི་ཆོས་པ་དང་ཁ་ཆེའི་ཆོས་པ། ཇེན་གྱི་ཆོས་པ་སོགས་སུ་ཡིན་ཡང་། ཚང་མར་སྙིང་རྗེ་ཉམས་ལེན་གཙོ་བོ་རེད། ཁྱོད་ཚོ་རིས་སུ་མ་ཆད་པའི་ཆོས་པ་ཕལ་ཆེར་འདིར་ཡོད་པ་རེད། ཁྱེད་རྣམས་ཀྱིས་སྙིང་རྗེའི་བསམ་པ་ལ་བསམ་བློ་ཐོངས། འཕགས་པ་སྤྱན་རས་གཟིགས་སྙིང་རྗེའི་ལྷ་མཆོག་རེད། བོད་གངས་ཅན་ལ་ཆ་བཞག་ན་ཕྲུ་གུ་ཆུང་ཆུང་སྐབས་ནས་མ་ཎི་བགྲང་བའི་གོམས་གཤིས་ཡོད་པ་རེད། ངོས་ཀྱིས་སྒྲུབ་ཞག་བྱེད་པའི་རིང་ལ་ཚང་མས་འཕགས་པ་སྤྱན་རས་གཟིགས་མཁྱེན་བསམ་པའི་ཐོག་ནས་སྙིང་རྗེ་ལ་ག་ཚོད་ཐུབ་ཐུབ་ཀྱིས་བསམ་བློ་གཏོང་བཞིན་མ་ཎི་གསོགས། ཅེས་བཀའ་སློབ་སྩལ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྒྲུབ་ཞག་མཛད།
དེ་རྗེས་བཀའ་དབང་དབུ་འཛུགས་ཀྱི་ཐོག་མར་ཁྲིག་རྩེ་རིན་པོ་ཆེ་མཆོག་གིས་མཎྜལ་རྟེན་གསུམ་འདེགས་འབུལ་ཞུས་རྗེས་མགོན་པོ་གང་ཉིད་མཆོག་གིས་སློབ་མ་སྟ་གོན་གྱི་རིམ་པ་དབུ་འཛུགས་དང་འབྲེལ་བཀའ་སློབ་སྩལ་དོན། སངས་རྒྱས་བཅོམ་ལྡན་འདས་རྣམ་འདྲེན་བཞི་པ་འདིས་གསང་སྔགས་ཀྱི་ཆོས་སྐོར་གསུངས་ཡོད་པ་རེད། བསྐལ་བཟང་སངས་རྒྱས་སྟོང་ལས་གཞན་དག་གིས་གསང་སྔགས་རྡོ་རྗེ་ཐེག་པའི་ཆོས་འཁོར་བསྐོར་དང་མ་བསྐོར་གསལ་པོ་ཡོད་པ་མ་རེད། སངས་རྒྱས་སྟོང་གི་མཐའ་མ་སངས་རྒྱས་མོས་པའི་སྐབས་སུ་གསང་སྔགས་ཀྱི་ཆོས་སྐོར་ཕལ་ཆེར་མེད་དམ་བསམ་པ་ཞིག་རེད། གང་ལྟར་ང་ཚོའི་སྟོན་པ་ཤཱཀྱ་སེངྒེའི་བསྟན་པ་ལ་གསང་སྔགས་ཀྱི་ཆོས་སྐོར་ཡོད་པ་རེད། གསང་སྔགས་ཀྱི་ཆོས་སྐོར་ལ་བྱ་རྒྱུད་དང་སྤྱོད་རྒྱུད། རྣལ་འབྱོར་རྒྱུད། རྣལ་འབྱོར་བླ་མེད་ཀྱི་རྒྱུད་བཅས་ཡོད་པ་ལས་སྐབས་འདིའི་ཐུགས་རྗེ་ཆེན་པོ་བྱ་རྒྱུད་ལྟར་དུ་བསྒྲུབ་རྒྱུ་གསུངས་པ་དེ་ལྟར་རེད། བྱ་རྒྱུད་ནི་ཕྱི་ཡི་བྱ་བ་གཙོ་བོར་བྱེད་པ། སྤྱོད་རྒྱུད་ནི་ཕྱི་ཡི་བྱ་བ་དང་ནང་གི་རྣལ་འབྱོར་ཆ་མཉམ་པོར་སྤྱོད་པ། དེ་ནས་རྣལ་འབྱོར་རྒྱུད་དང་རྣལ་འབྱོར་བླ་མེད་ཀྱི་རྒྱུད་གཉིས་ནི་ནང་གི་རྣལ་འབྱོར་གཙོ་བོར་བརྩི་བ་ཞིག་རེད། འདིར་ཐུགས་རྗེ་ཆེན་པོ་བྱ་རྒྱུད་ལྟར་དུ་བསྒྲུབ་པ་ལ་ཐོག་མར་ཀུན་སློང་བཅོས་དགོས། ཞེས་དང་།
སྤྱིར་སངས་རྒྱས་ཀྱི་ཆོས་དང་ཡང་སྒོས་གསང་སྔགས་ཀྱི་ཆོས་ཉམས་ལེན་བྱེད་མཁན་དང་། གསང་སྔགས་ཀྱི་ཆོས་དོན་གཉེར་བྱེད་མཁན་རིགས་གཅིག་གིས་ཚེ་འདིའི་དོན་དུ་དབང་ཐང་ཡོང་བ་དང་། རྒྱུ་ནོར་ལོངས་སྤྱོད་ཡོང་བ་ལྟ་བུ། སྡུག་ས་ནས་བཤད་ན་ངན་སྔགས་བརྒྱབ་པའི་ཐོག་ནས་སོ་སོ་མ་དགའ་སའི་དགྲ་འདུལ་བ་ལྟ་བུ་རེད། བོད་དུ་འཕྲུལ་འཁོར་སྒྲུབ་ནས་དགྲ་བོ་ཚད་བཅད་པ་ཡོང་གི་ཡོད་པ་རེད། དེ་ཚོའི་གྲས་ནི་དངོས་གནས་བྱས་ན་ཚད་ལྡན་ཞིག་ཡོང་གི་མེད། གསང་སྔགས་རྡོ་རྗེ་ཐེག་པའི་ཆོས་སྐོར་འདི་ནི་རྣམ་མཁྱེན་སྒྲུབ་པ་དང་། མཐའ་ཡས་པའི་སེམས་ཅན་ཐམས་ཅད་ཀྱི་དོན་སྒྲུབ་པ་ལས་དགྲ་འདུལ་གཉེན་སྐྱོང་བྱེད་པ་ཞིག་རྩ་བ་ཉིད་ནས་མ་རེད། ཅེས་དང་། གསང་སྔགས་ཀྱི་ཆོས་ཉམས་ལེན་བྱེད་པ་ལ་ཚེ་འདི་དོན་གཉེར་གྱི་བསམ་བློ་མེད་པ་དང་། རང་གཅིག་པུའི་ཞི་བདེ་སྒྲུབ་པའི་བསམ་པའང་མེད་པར་ནམ་མཁའི་མཐས་གཏུགས་པའི་སེམས་ཅན་ཐམས་ཅད་རང་དང་རང་འདྲ་བར་སྡུག་བསྔལ་མི་འདོད་པ་དང་བདེ་བ་འདོད་པ་སྒོ་ཀུན་ནས་མཚུངས་པ་ཡོད།
རྫོགས་སངས་སྐུ་ནི་འཕྲོ་ཕྱིར་དང་།། དེ་བཞིན་ཉིད་དབྱེར་མེད་ཕྱིར་དང་།། རིགས་ཡོད་ཕྱིར་ན་ལུས་ཅན་ཀུན།། རྟག་ཏུ་སངས་རྒྱས་སྙིང་པོ་ཅན།། ཞེས་གསུངས་པ་ལྟར། སེམས་ཅན་ཐམས་ཅད་ཀྱི་རྒྱུད་ལ་ཁམས་བདེ་གཤེགས་སྙིང་པོ་ཡོད་པ་རེད། དེ་ལྟ་བུའི་ཁམས་བདེ་གཤེགས་སྙིང་པོ་དེ་སད་པར་བྱེད་པ་ལ་གསང་སྔགས་ཀྱི་ཆོས་སྐོར་ཐོག་ནས་ཟབ་པ་དང་རྒྱ་ཆེ་བའི་ལམ་ལ་བསམ་བློ་བཏང་ན་ཁམས་བདེ་གཤེགས་སྙིང་པོ་སད་ཐུབ་པ་རེད། རབ་ལ་ཚེ་འདིར་སྐུ་བཞིའི་གོ་འཕང་མངོན་དུ་བྱེད་ཐུབ་པ་དང་། དེ་མེད་ན་ཚེ་རབས་ནས་ཚེ་རབས་དང་། སྐབས་སུ་བབ་པ་འཕགས་པ་སྤྱན་རས་གཟིགས་ཀྱིས་རྗེས་སུ་བཟུང་ནས་ས་ལམ་རིམ་གྱིས་བགྲོད་དེ་མཐའ་ཡས་པའི་མ་རྒན་སེམས་ཅན་ཐམས་ཅད་ཀྱི་ཆེད་དུ་རྣམ་མཁྱེན་རྒྱལ་བའི་གོ་འཕང་ཐོབ་པ་ཞིག་དམིགས་ཡུལ་དང་དགོས་པ་རེད། ཅེས་སོགས་གསང་སྔགས་ཀྱི་ཆོས་སྐོར་ངོ་སྤྲོད་དང་ཆོས་ཞུ་བ་རྣམས་ནས་ཉིན་རེ་བཞིན་སྤྱན་རས་གཟིགས་ཀྱི་གཟུངས་སྔགས་རབ་ལ་ཁྲི་གཅིག་(10,000)དང་། དེ་མིན་སྟོང་ཕྲག་ཁ་ཤས་གྲངས་གསོག་གནང་ན་ཕན་ཡོན་ཆེན་པོོ་ཡིན་པའི་སྐོར་བཀའ་ཕེབས་པ་དང་།
ཐུགས་རྗེ་ཆེན་པོའི་བཀའ་དབང་གི་སྔོན་འགྲོ་སྟ་གོན་ནས་མཇུག་གི་རིམ་པའི་བར་བཀའ་དྲིན་བསྐྱངས་གྲུབ་རྗེས་ལ་དྭགས་དགོན་པའི་ཚོགས་པའི་ཚོགས་གཙོ་ཨཅརྱ་བསྟན་འཛིན་དབང་གྲགས་ལགས་ཀྱིས་བཀའ་དྲིན་གཏིང་རག་གི་ཡོན་ཏུ་མཎྜལ་འདེགས་འབུལ་ཞུས་པ་དང་། དེ་རྗེས་ལ་དྭགས་དགོན་པའི་ཚོགས་འདུ་དང་ནང་པའི་ཚོགས་འདུ་གཉིས་ཀྱིས་དབུས་དགའ་ལྡན་ཁྲི་རིན་པོ་ཆེ་མཆོག་དང་། ཁྲིག་རྩེ་རིན་པོ་ཆེ། ཀུན་བདེ་གླིང་རིན་པོ་ཆེ། རྟོགས་ལྡན་རིན་པོ་ཆེ་སོགས་མཁན་བླ་འདུས་མང་དང་། སེར་སྐྱ་མི་མང་སྟོང་ཕྲག་བདུན་ཅུ་(70,000)ལྷག་གིས་མགོན་པོ་གང་ཉིད་མཆོག་འགྲོ་བ་ལྷ་དང་བཅས་པའི་མགོན་དཔུང་དམ་པར་སྐུ་ཚེ་བརྟན་ཅིང་། ཐུགས་ཀྱི་བཞེད་དོན་འགྲུབ་ཆེད་བརྟན་བཞུགས་བསྟར་ཞུས་ཤིང་། མཐར་ཉིན་གསུམ་རིང་གི་ཆོས་འབྲེལ་གནང་སྒོ་ལེགས་པར་གྲུབ་སྟེ་ཞི་བའི་ཚལ་ཕོ་བྲང་དུ་ཆིབས་བསྒྱུར་བསྐྱངས་ཡོད།
