༄༅། །ཕྱི་ལོ་ ༢༠༢༢ ཟླ་ ༧ ཚེས་ ༢༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁྲིག་རྩེ་ཤེས་རབ་སྐྱེད་ཚལ་གླིང་དཔེ་མཛོད་ཁང་དུ་ཆིབས་སྒྱུར་གྱིས་རབ་གནས་དང་། ཁྲིག་རྩེ་དགོན་པའི་གསུང་ཆོས་ར་བར་ལ་དྭགས་ཀྱི་སློབ་གྲྭ་ཆེ་འབྲིང་གི་སློབ་ཕྲུག་གཙོས་དགེ་སློབ་ཉིས་སྟོང་བརྒལ་བར་ཆོས་ལུགས་དང་མ་འབྲེལ་བའི་སྤྱོད་བཟང་སྐོར་ལ་བླང་དོར་བཀའ་སློབ་བཀའ་དྲིན་སྩལ་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༩།༡༥ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་དྭགས་ལྕོག་ལམ་ས་ཞི་བའི་ཚལ་ཕོ་བྲང་ནས་ཆིབས་འཁོར་བརྒྱུད་ཁྲིག་རྩེ་དགོན་པར་ཆིབས་བསྒྱུར་སྐབས་ཕེབས་ལམ་གཡས་གཡོན་དུ་ལ་དྭགས་ཡུལ་མི་རྣམས་ཀྱིས་མེ་ཏོག་སྣ་ཚོགས་ཀྱི་མཆོད་ཕྲེང་བསྒྲིགས་ཏེ་ཕེབས་བསུ་དང་བཅས་ཤེས་རབ་སྐྱེད་ཚལ་གླིང་དཔེ་མཛོད་ཁང་དུ་༸ཞབས་སོར་བདེ་བར་འཁོད་དེ་ཐོག་མར་དཔེ་མཛོད་ཁང་ལ་རབ་གནས་དང་། དཔེ་མཛོད་ཀྱི་བོད་ཡིག་སྡེ་ཚན་དང་ཨིན་ཡིག་སྡེ་ཚན་གཉིས་ལ་རིམ་བཞིན་གཟིགས་སྐོར་མཛད་རྗེས་དཔེ་མཛོད་ཚོམས་ཆེན་དུ་ཁྲིག་རྩེ་རིན་པོ་ཆེ་མཆོག་གིས་མནྜལ་རྟེན་གསུམ་འདེགས་འབུལ་དང་། ཁྲིག་རྩེ་དགེ་རྩའི་ཚོགས་མི་དང་། ཁྲིག་རྩེ་དཔེ་མཛོད་དགེ་རྩའི་ཚོགས་མི། ཁྲིག་རྩེའི་དུད་འགྲོ་སྲུང་སྐྱོབ་ཚོགས་པའི་ཚོགས་མི་བཅས་ལ་མཇལ་ཁ་དང་སྐུ་པར་ལྷན་སྒྲོན་མཛད།
ཁྲིག་རྩེ་དཔེ་མཛོད་ཁང་དང་ཤེས་ཡོན་བསྟི་གནས་ཁང་འདི་ནི་ཕྱི་ལོ་ ༢༠༡༨ ཟླ་ ༧ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་སྨོན་མཚམས་སྦྱོར་དང་འབྲེལ་བའི་སྒོ་ནས་སྐྱེ་དགུའི་འདོད་དོན་ལྷུན་གྱིས་གྲུབ་ཅིང་མི་འཇིགས་རྡོ་རྗེའི་ཁམས་སུ་བརྟན་པའི་རྨང་འཇོག་རྟེན་འབྲེལ་དང་། ས་གཞི་བྱིན་རླབས་ཀྱི་མཛད་སྒོ་བཀའ་དྲིན་བསྐྱངས་ཡོད་པ་རེད།
ཁྲིག་རྩེ་ཤེས་རབ་སྐྱེད་ཚལ་གླིང་དཔེ་མཛོད་ལ་རབ་གནས་དང་གཟིགས་སྐོར་ལེགས་པར་གྲུབ་རྗེས་ཁྲིག་རྩེ་དགོན་པའི་ཤེས་རབ་སྐྱེད་ཚལ་གླིང་གི་གསུང་ཆོས་ར་བར་ཆིབས་བསྒྱུར་གྱིས་བཞུགས་ཁྲིར་༸ཞབས་སོར་འཁོད་མཚམས་ཁྲིག་རྩེ་རིན་པོ་ཆེ་མཆོག་གིས། ལ་དྭགས་དགོན་ཚོགས་དང་ནང་ཚོགས། གུས་བཅས་ནས་༸གོང་ས་མཆོག་ལ་དྭགས་སུ་༸ཞབས་སོར་འཁོད་རྒྱུར་གསོལ་འདེབས་ཞུས་དོན་ལྟར་མགོན་པོ་གང་ཉིད་མཆོག་ལ་དྭགས་སུ་༸ཞབས་སོར་འཁོད་པ་མ་ཟད་གསུང་ཆོས་དང་བཀའ་སློབ་བཀའ་དྲིན་བསྐྱངས་པར་ལ་དྭགས་མི་མང་ཡོངས་ཀྱི་ཚབ་ཞུས་ནས་བཀའ་དྲིན་ཆེ་ཞུ་རྒྱུ་དང་། གསོལ་འདེབས་རེ་འདུན་ཞུས་པ་ལྟར་ཁྲིག་རྩེ་ཤེས་རབ་སྐྱེད་ཚལ་གླིང་ནང་དཔེ་མཛོད་ཁང་དང་། ཤེས་ཡོན་བསྟི་གནས་ཁང་ལ་སྤྱན་གཟིགས་དང་འབྲེལ་ཕྱག་གནས་དང་། སློབ་ཕྲུག་དང་ཕ་མ་མི་མང་རྣམས་ལ་ཆོས་ལུགས་དང་མ་འབྲེལ་བའི་ཡ་རབས་སྤྱོད་བཟང་སྐོར་ལ་བཀའ་སློབ་སྩལ་རྒྱུར་ཞལ་བཞེས་བཟང་པོ་ཐོབ་པར་བཀའ་དྲིན་ཆེ་ཞུ། ཞེས་དང་།
ལ་དྭགས་མི་མང་རྣམས་ཀྱིས་ནང་ཆོས་ཀྱི་གནད་འགག་ཤེས་ནས་ཆོས་དང་རིགས་ལམ་སོགས་ལ་དོ་སྣང་ཆེ་རུ་འགྲོ་བཞིན་ཡོད་པ་ནི་༸གོང་ས་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་བྱུང་བ་ཡིན་པ་དང་། གུས་འབངས་རྣམས་ཐུགས་བརྩེའི་སྐྱབས་འོག་ནས་ནམ་ཡང་མི་འདོར་བར་བརྩེ་གཟིགས་ཡོང་བ་ཞེས་གསོལ་འདེབས་དང་འབྲེལ། ཤེས་རབ་སྐྱེད་ཚལ་གླིང་ལོ་གསུམ་ནང་འགྲུབ་དགོས་པའི་ལམ་སྟོན་བཀའ་དགོངས་ཕེབས་དོན་བཞིན་ཕྱི་ལོ་ ༢༠༡༨ ལོར་མགོ་འཛུགས་དང་ཕྱི་ལོ་ ༢༠༢༠ ལོར་འཛུགས་སྐྲུན་ལེགས་པར་གྲུབ་སྟེ། སློབ་གྲྭ་ཁག་ནས་སློབ་ཕྲུག་ ༣༥༠ ལ་ཉིན་གྲངས་ ༤༥ རིང་ཆོས་ལུགས་དང་མ་འབྲེལ་བའི་སྤྱོད་བཟང་གི་སྐོར་ལ་སློབ་སྦྱོང་སྤྲད་ཡོད་པ་དང་། དེ་བཞིན་ཕྱི་ལོ་ ༢༠༡༩ ལོར་ནད་ཡམས་ཀྱི་རྐྱེན་གྱིས་སློབ་ཕྲུག་ ༡༥༠ དང་། ཕྱི་ལོ་ ༢༠༢༢ ལོར་སློབ་ཕྲུག་ ༣༥༠ ལ་ཟབ་སྦྱོང་ལེགས་པར་ཕུལ་ཐུབ་པ་རྣམས་མགོན་པོ་གང་ཉིད་མཆོག་གི་བཀའ་དྲིན་ཡིན་པ་དང་། མཐར་༸གོང་ས་མཆོག་ཁྲིག་རྩེ་དགོན་པར་༸ཞབས་སོར་འཁོད་པ་ལ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་དང་། ༸གོང་ས་མཆོག་གི་བཀའ་སློབ་དགོངས་དོན་བཞིན་ད་བར་བསྒྲུབས་དང་སྒྲུབ་མུས་དང་། ཕྱིས་སུ་ཡང་བཀའ་དགོངས་སྒྲུབ་རྒྱུ་དམ་བཅའ་འབུལ་རྒྱུ་ཡིན་ཞེས་ཕེབས་བསུའི་གསུང་བཤད་གནང་བ་དང་།
དེ་རྗེས་སློབ་ཕྲུག་གཉིས་ཀྱིས་སྔ་ཕྱིར་བོད་ཨིན་སྐད་ཐོག་ཕེབས་བསུའི་གསུང་བཤད་གནང་དོན། ཁྲིག་རྩེ་དཔེ་མཛོད་དང་ཤེས་ཡོན་བསྟི་གནས་ཁང་གཉིས་ཀྱི་བཀའ་དྲིན་ལས་༸གོང་ས་མཆོག་གི་བཀའ་སློབ་ལ་ཉན་རྒྱུའི་སྐལ་བཟང་ཐོབ་པ་ལ་སྒོ་གསུམ་གུས་པ་དང་ལག་གཉིས་ཐལ་མོ་སྦྱར་ནས་བཀྲ་ཤིས་བདེ་ལེགས་དང་འཇུ་ལེ། ཞེས་དང་། བླ་མ་བཀའ་དྲིན་ཅན་གྱི་ཐུགས་དགོངས་ལྟར་ཆོས་ལུགས་ལ་མ་བརྟེན་པའི་བཟང་སྤྱོད་སློབ་སྦྱོང་བྱེད་ས་ཞིག་ཁྲིག་རྩེ་ཤེས་ཡོན་བསྟི་གནས་ཁང་དང་དཔེ་མཛོད་ཁང་གཉིས་ནས་གོ་སྒྲིག་གིས་ལ་དྭགས་ཀྱི་ཡུལ་གཤམ་སྟོད་ནུབ་ར། བྱང་ཐང་། ཟངས་དཀར། གླེ། དཀར་འཁྱིལ་སོགས་ཀྱི་སློབ་ཕྲུག་ཕོ་མོ་མང་པོར་ལོ་གསུམ་བཞིའི་རིང་དགུན་དུས་གུང་སེང་སྐབས་རིན་མེད་ཟུར་ཁྲིད་གནང་ཡོད་པ་ལ་མགོན་པོ་གང་ཉིད་མཆོག་དང་ཁྲིག་རྩེ་རིན་པོ་ཆེར་བཀའ་དྲིན་ཆེ་ཞུས་པ་དང་། མ་འོངས་པར་ལ་དྭགས་གཤམ་སྟོད་བར་གསུམ་གྱི་སློབ་ཕྲུག་ཡོངས་ཀྱིས་༸རྒྱལ་བ་རིན་པོ་ཆེའི་ཐུགས་འགན་བཞི་དང་དམིགས་བསལ་དུ་ཆོས་ལུགས་དང་མ་འབྲེལ་བའི་སྤྱོད་བཟང་གི་སྐོར་ལ་སློབ་སྦྱོང་བྱས་ཏེ་གྲུབ་འབྲས་བཟང་པོ་ཞིག་མགྱོགས་པོར་ཡོང་བའི་དམ་བཅའ་འབུལ་རྒྱུ་ཡིན། བླ་མ་མཁྱེན། ཞེས་དང་། མགོན་པོ་གང་ཉིད་མཆོག་དགུང་གྲངས་བརྒྱ་དང་བཅུ་གསུམ་ལས་མང་བ་བཞུགས་ཏེ་ང་ཚོ་ཚང་མར་བཀའ་སློབ་ལམ་སྟོན་དང་བྱིན་རླབས་ཡང་ཡང་གནང་བའི་གསོལ་འདེབས་ཞུ་རྒྱུ་ཡིན། ཐུགས་རྗེ་ཆེ། འཇུ་ལེ། ཕྱག་འཚལ་ལོ།། ཞེས་གསུང་བཤད་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ལུགས་དང་མ་འབྲེལ་བའི་སྤྱོད་བཟང་གི་སྐོར་ལ་བཀའ་སློབ་སྩལ་དོན།
དེ་རིང་འདིར་ལ་དྭགས་སུ་ཡང་བསྐྱར་ཚར་གཅིག་སླེབས་ནས་ཁྱོད་རང་ཚོ་རྒན་བྱིས་མང་པོར་ཐུག་ནས་དངོས་གནས་དྲང་གནས་མཛའ་བརྩེའི་རྣམ་འགྱུར་ཧ་ཅང་གསལ་བོ་འདུག ཐུགས་རྗེ་ཆེ་ཞུ་རྒྱུ་ཡིན། ལ་དྭགས་པའི་སྤྱི་ཚོགས་ནང་ཧ་ཅང་འཆམ་མཐུན་ཡོད། ཆོས་ལུགས་དང་རིགས་རུས་ཀྱི་ཁྱད་པར་ཡོད་མེད་ལ་མ་ལྟོས་པར་རྣམ་པ་ཚོ་འགྲོ་བ་མི་ཡིན་པའི་ཆ་ནས་མཉམ་གནས་བྱེད་དགོས། ང་ཁ་ཆེ་ཡིན། ང་ནང་པ་ཡིན། ང་གཅེར་བུ་བ་ཡིན། ང་ཡེ་ཤུ་པ་ཡིན་ཞེས་ཧ་ཅང་གིས་དང་དོད་བྱས་ན་ཕན་པ་ལས་གནོད་ཀྱི་ཡོད། ང་རང་ཚོ་ཚང་མ་མའི་མངལ་ལས་སྐྱེས་པའི་འགྲོ་བ་མི་རེད། ཕྲུ་གུ་ཆུང་ངུ་རྣམས་ལ་ཆ་བཞག་ན་ཁོང་ཚོས་ནམ་ཡང་ཁ་ཆེའི་ཆོས་ལུགས་དང་། ཡི་ཤུའི་ཆོས་ལུགས། ནང་པའི་ཆོས་ལུགས་གང་ཡིན་སྐོར་བསམ་བློ་གཏོང་གི་མ་རེད། ངོས་རང་ལ་ཆ་བཞག་ནའང་གཞི་རྩའི་ཆ་ནས་འགྲོ་བ་མི་ཞིག་རེད། ངོས་རང་གང་དུ་ཕྱིན་ཡང་ང་ཚོ་ཚང་མ་འགྲོ་བ་མི་གཅིག་གྱུར་ཡིན་བསམ་གྱི་ཡོད། འཛམ་གླིང་སྟེང་འགྲོ་བ་མི་ཐེར་འབུམ་བདུན་ཡོད་པ་ཚང་མ་འགྲོ་བ་མི་ཡིན་པ་གཅིག་པ་རེད། ང་ཚོ་ཚང་མ་སྐྱེ་སྟངས་དང་འཆི་སྟངས་གཅིག་པ་རེད། ང་ཚོ་ཡར་འཚར་ལོངས་བྱུང་རྗེས་ང་ཚོ་འགྲོ་བ་མི་གཅིག་གྱུར་ཡིན་པ་དང་དོད་བྱེད་རྒྱུའི་ཚབ་ཏུ་ང་ཚོའི་ཆོས་ལུགས་དང་ཁོང་ཚོའི་ཆོས་ལུགས། ང་ཚོའི་རིགས་རུས་དང་ཁོང་ཚོའི་རིགས་རུས། ང་ཚོའི་རྒྱལ་ཁབ་དང་ཁོང་ཚོའི་རྒྱལ་ཁབ་ཅེས་ཧ་ཅང་དང་དོད་བྱེད་ཀྱི་ཡོད། ང་ཚོའི་ཆོས་ལུགས་དང་ཁོང་ཚོའི་ཆོས་ལུགས་ཞེས་དང་དོད་ཏག་ཏག་བྱེད་ཐུབ་ན་འགྲིག་གི་ཡོད། འོན་ཀྱང་། ང་ཚོའི་ཆོས་ལུགས་དང་ཁོང་ཚོའི་ཆོས་ལུགས་ཞེས་དང་དོད་ཤུགས་ཆེ་དྲགས་ན་དཀའ་ངལ་འབྱུང་གི་ཡོད།
ངོས་ཀྱི་ལས་འགན་གཅིག་ནི་འཛམ་གླིང་སྟེང་འགྲོ་བ་མི་ཐེར་འབུམ་བདུན་ཡོད་པ་ཚང་མ་གཅིག་གྱུར་ཡིན་པའི་འདུ་ཤེས་གོང་མཐོར་གཏོང་གི་ཡོད། ང་ཚོ་གོ་ལ་འདིའི་སྟེང་གི་འགྲོ་བ་མི་གཅིག་གྱུར་ཡིན་པའི་སྐོར་བསམ་བློ་གཏོང་དགོས། ཆོས་ལུགས་དང་རིགས་རུས་ལ་བརྟེན་ནས་ཕན་ཚུན་དབྱེ་འབྱེད་བྱེད་ཀྱི་ཡོད་པ་དེ་ནི་ང་ཚོའི་བསམ་བློ་རང་གིས་བཟོས་པ་རེད། གཞི་རྩའི་ཆ་ནས་ང་ཚོ་འགྲོ་བ་མི་ཡིན་པ་གཅིག་པ་རེད། ང་ཚོ་སྐྱེས་པའི་སྐབས་མའི་བྱམས་བརྩེ་དང་འོ་མར་བརྟེན་ནས་འཚར་ལོངས་འབྱུང་གི་ཡོད། འཆི་བའི་སྐབས་གཡས་གཡོན་དུ་ཡོད་པའི་མི་རྣམས་ཀྱིས་བྱམས་སྐྱོང་གནང་ན་ང་ཚོ་དགའ་ཚོར་སྐྱེའི་རེད། ཆོས་དད་ཡོད་མེད་ལ་མ་ལྟོས་པར་གཙོ་བོ་སེམས་པ་བཟང་པོ་བྱེད་རྒྱུ་དེ་གལ་ཆེན་པོ་ཆགས་ཡོད། སེམས་པ་བཟང་པོ་ཡོད་ན་རང་ཉིད་ཞི་བདེ་དང་སྐྱིད་པ་ཡོང་གི་ཡོད།གཞོན་སྐྱེས་རྣམས་ཀྱིས་ངེས་པར་སེམས་པ་བཟང་པོ་བྱེད་རྒྱུའི་སྐོར་བསམ་བློ་གཏོང་དགོས། ཇི་ཙམ་གྱི་གོ་མཚོན་མང་བ་བཟོས་ན་དེ་ཚོད་ཀྱི་འགྲོ་བ་མི་བདེ་སྐྱིད་ལྡན་པ་ཡོང་གི་མ་རེད། རྒྱ་གར་གྱི་ལོ་ངོ་སྟོང་ཕྲག་མང་པོའི་རིང་གི་གནའ་བོའི་རིག་གཞུང་སྙིང་རྗེ་དང་འཚེ་བ་མེད་པ་ཟེར་བ་ཧ་ཅང་གལ་ཆེན་པོ་ཆགས་ཡོད། ཅེས་དང་།
གཞན་ཡང་། དུས་རབས་བདུན་པའི་ནང་བཙན་པོ་སྲོང་བཙན་སྒམ་པོས་རྒྱ་ནག་གི་སྲས་མོ་བཙུན་མོར་བཞེས་ཏེ་ཞལ་ཟས་སྣ་མང་གི་བྲོ་བར་རོལ་ཡང་། རྒྱ་ཡིག་རྙོག་དྲ་ཚ་བོར་གཟིགས་ཏེ་རྒྱ་གར་གྱི་ཡི་གེར་དཔེར་བལྟས་ནས་གསལ་བྱེད་སུམ་ཅུ་ཅན་གྱི་བོད་ཡིག་སྐབས་དེར་གསར་གཏོད་བྱས་པ་དང་། བཙན་པོ་ཁྲི་སྲོང་ལྡེ་བཙན་གྱིས་ནཱ་ལེནྡྲའི་མཁས་པའི་དབང་པོ་མཁན་ཆེན་ཞི་བ་འཚོ་བོད་ལ་གདན་ཞུས་ཀྱིས་ཁོང་གི་ལམ་སྟོན་ལྟར་བཀའ་བསྟན་བོད་བསྒྱུར་གནང་ཡོད་པས་དེང་གི་དུས་སུ་ན་ལེནྡྲའི་ཆོས་བརྒྱུད་འགྲེལ་བརྗོད་བྱེད་པ་ལ་བོད་ཡིག་ལེགས་ཤོས་ཡིན་པའི་སྐོར་ལ་བཀའ་སློབ་སྩལ་བ་མ་ཟད། དེང་གི་དུས་སུ་རྒྱ་ནག་གི་དགེ་རྒན་ཆེན་མོ་ཁ་ཤས་ཀྱིས་བོད་ཀྱི་ནང་བསྟན་ནི་ཚན་རིག་དང་མཐུན་པའི་ངོས་འཛིན་དང་ཆེ་བསྟོད་བྱེད་བཞིན་པ་སོགས་ངོ་སྤྲོད་དང། ཆོས་ལུགས་དང་མ་འབྲེལ་བའི་སྤྱོད་བཟང་སྐོར་ལ་བཀའ་སློབ་བཀའ་དྲིན་སྩལ་རྗེས་སློབ་ཕྲུག་ཁག་གཅིག་གི་དྲི་བར་བཀའ་ལན་སྩལ་ཏེ། ཆུ་ཚོད་བཅུ་གཅིག་ཡོལ་ནས་ཁྲིག་རྩེ་ཤེས་རབ་སྐྱེད་ཚལ་གླིང་དུ་ཉིན་གུང་ལྗགས་སྨིན་གནང་རྗེས་ལྕོག་ལམ་ས་ཞི་བའི་ཚལ་ཕོ་བྲང་དུ་ཆིབས་བསྒྱུར་བསྐྱངས་ཡོད་པ་བཅས།། །།
