དེ་རིང་ཝ་ཤིན་ཌོན་དུ་བོད་དོན་རྒྱབ་སྐྱོར་ཚོགས་པ་ཁག་མང་པོ་ཞིག་གི་མི་སྣ་འཛོམས་ནས་གོ་བསྡུར་གནང་གི་ཡོད་པ་རེད། ཁྱོད་ཚོ་ཚང་མར་བཀའ་དྲིན་ཆེ་ཞེས་ཞུ་བཞིན་ཡོད། ང་ཚོ་བོད་ཀྱི་དོན་དག་ནི་ཕྱོགས་གཅིག་ནས་བདེན་དོན་དང་། གཉིས་ནས་བོད་ཀྱི་དོན་དག་དེ་སེམས་ཁམས་རིག་པའི་སེམས་ཀྱི་ཞི་བདེ་དང་བྱམས་བརྩེ་བཅས་ཀྱི་ཤེས་ཡོན་གཙོ་བོ་ཆགས་ཡོད་པས་གང་ལྟར་བོད་དོན་ནི་ཆབ་སྲིད་ཀྱི་སྐད་ཆ་གཅིག་པུ་མ་ཡིན་པ་དང་། བོད་ཀྱི་རིག་གཞུང་ནི་སེམས་ཀྱི་ཞི་བདེ་སྒྲུབ་ཐབས་དང་། དེ་ཡང་ཡིད་ཆེས་གཅིག་པུ་མ་ཡིན་པར་རྒྱུ་མཚན་ལ་བརྟེན་ནས་སེམས་ཁམས་རིག་པ་དང་འབྲེལ་ནས་སེམས་ཀྱི་ཞི་བདེ་སྒྲུབ་པ་ཞིག་རེད། དེ་ཡང་རྒྱ་གར་མཁས་པའི་རིག་གཞུང་སྤུས་དག་ཤོས་དེ་དུས་རབས་བརྒྱད་པའི་ནང་མཁན་ཆེན་ཞི་བ་འཚོ་བོད་ལ་ཕེབས་ནས་བོད་ལ་གཞི་ཚུགས་པ་རེད། དེ་ནས་ང་ཚོ་བོད་པ་ཕྲུ་གུ་ཆུང་ཆུང་ཞིག་ཡིན་ནའང་འབུ་མ་གསོད་ཟེར་བ་ལྟ་བུའི་སྙིང་རྗེའི་རྣམ་འགྱུར་ཆུང་ཆུང་སྐབས་ནས་ཡོད་པའི་གོམས་གཤིས་ཅན་གྱི་མི་རིགས་ཤིག་ཆགས་ཡོད། དེ་ལྟ་བུའི་མི་རིགས་འདིའི་བཟང་པོའི་གོམས་གཤིས་དེ་བོད་མི་ཙམ་མ་ཡིན་པར་རིམ་པས་འཛམ་གླིང་འདིའི་སྟེང་ལ་ཁྱབ་སྟེ་བྱམས་བརྩེ་ལ་དོ་སྣང་གསར་པ་སླེབས་པ་ཞིག་དང་། དེའི་ཐོག་ལ་ང་ཚོ་བོད་མི་རིགས་ཀྱི་ཤེས་ཡོན་ཡོད་མཁན་ཚོས་ག་ཚོད་ཐུབ་ཐུབ་ཀྱིས་ཞབས་འདེགས་བསྒྲུབ་རྒྱུར་འབད་བརྩོད་བྱེད་བཞིན་ཡོད། དེ་ལྟར་འབད་བརྩོན་བྱས་ན་གོ་སྐབས་ཡག་པོ་ཡོད་པ་ལྟ་བུ་འདུག འདི་ང་ཚོ་བོད་པ་གཅིག་པུའི་དོན་དག་མ་རེད། འཛམ་བུ་གླིང་སྤྱི་ཡོངས་ཚང་མ་ཞི་བདེ་ལ་དགའ་མོས་བྱེད་མཁན་ཞིག་རེད། ཞི་བདེའི་རྩ་བ་ནི་སེམས་པ་བཟང་པོ་བྱ་རྒྱུ་དེ་ཡིན།
སེམས་པ་བཟང་པོ་ནི་མངལ་སྐྱེས་ཀྱི་སེམས་ཅན་དུད་འགྲོ་ཚུན་ཆད་སྐྱེས་མ་ཐག་ནས་མའི་བྱམས་བརྩེས་འཚོ་བ་ཞིག་ཆགས་ཡོད། ང་ཚོ་མི་ཡིན་པའི་ཆ་ནས་དེ་བས་ཀྱང་མའི་བྱམས་བརྩེའི་འོག་ནས་འཚར་ལོངས་བྱུང་བ་རེད། སྐྱོན་ཆ་ནི་ཤེས་ཡོན་གྱི་སྡེ་ཚན་ནང་ལ་ཞུགས་ཡོང་བའི་སྐབས་སུ་ཤེས་ཡོན་སྡེ་ཚན་ནང་ནུབ་ཕྱོགས་ནས་ཡོང་བའི་དངོས་ཁམས་རིག་པ་ལྟ་བུ་གཙོ་བོར་བཞག་པ་མ་གཏོགས། སེམས་ཀྱི་ཞི་བདེ་སྒྲུབ་ཐབས་སྐོར་མི་འདུག དེང་སང་ནུབ་ཕྱོགས་ཀྱི་མཁས་དབང་དང་སེམས་ཁམས་རིག་པ་སྨྲ་མཁན་གྱིས་གཞི་ནས་ང་ཚོའི་སེམས་ཀྱི་ཞི་བདེ་སྒྲུབ་ཐབས་དང་བྱམས་བརྩེ་ལ་དོ་སྣང་གསར་པ་ཞིག་ཡོང་གི་འདུག སེམས་ཀྱི་ཞི་བདེ་བྱམས་བརྩེ་གོང་འཕེལ་གཏོང་བའི་སེམས་ཁམས་རིག་པའི་ཤེས་ཡོན་དང་། དེང་དུས་འཛམ་བུ་གླིང་གི་དངོས་པོ་ཡར་རྒྱས་ཀྱི་ཤེས་ཡོན་གཉིས་ཟུང་དུ་སྦྲེལ་བ་ཞིག་ང་ཚོས་ཕལ་ཆེར་བྱེད་ཐུབ་ཀྱི་རེད། སུ་དང་སུ་ཡིན་ནའང་བདེ་སྐྱིད་འདོད་མཁན་ཤ་སྟག་རེད། བདེ་སྐྱིད་ཀྱི་རྩ་བ་ནི་སེམས་པ་བཟང་པོ་བྱ་རྒྱུ་དེ་ཡིན། མི་ཞིག་ཡིན་ཕྱིན་ཆད་ལ་ཚོར་བ་ཡོད་པ་རེད། དེ་ལ་ལྟོ་གྲོད་ཁོག་གང་དང་། འཕྲལ་སེལ་གྱི་རྩེད་མོ་རྩེ་རྒྱུ་ལྟ་བུ་ཁ་ཤས་ཤིག་ཡོད་པས་ཕན་གྱི་མེད། སེམས་ལ་བྱམས་བརྩེའི་ཚོར་བ་ཡོད་པ་ཞིག་བྱུང་ན་སོ་སོང་གང་དུ་ཡོད་ས་དེར་སེམས་སྐྱིད་པ་ཞིག་ཡོང་གི་འདུག དེར་བརྟེན། བོད་ཀྱི་རིག་གཞུང་འདི་ཆོས་ཀྱི་སྐད་ཆ་གཅིག་པུ་མ་རེད། ལྷ་གསོལ་ཀླུ་གསོལ་གྱི་སྐད་ཆ་མ་རེད། གང་ལྟར་ཆོས་མེད་མཁན་ཞིག་ཡིན་ནའང་སེམས་པ་བཟང་པོ་བྱས་ན་སྐྱིད་པོ་ཡོད། ང་ཚོའི་བོད་ཀྱི་རིག་གཞུང་གཙོ་བོ་ནི་བྱམས་བརྩེ་འདི་ཡིན། དེ་ང་ཚོས་ད་ལྟ་བར་དུ་ང་ཚོ་བཙན་བྱོལ་ལ་ཡོད་ཀྱང་ག་ཚོད་ཐུབ་ཐུབ་ཀྱིས་བདག་པོ་བརྒྱབ་པ་དེ་ལྟར་རེད། དེས་ནུས་པའང་ཐོན་གྱི་འདུག དཔེར་ན་ངོས་རང་ལ་མཚོན་ནའང་དེ་ལྟ་བུའི་ཐོག་ནས་འཚར་ལོངས་བྱུང་བ་ཡིན་པས་གང་དུ་ཕྱིན་པ་ཡིན་ནའང་བྱམས་བརྩེ་ལ་འགྲེལ་བཤད་རྒྱག་བཞིན་ཡོད།
དེ་རིང་རྒྱལ་སྤྱིའི་ཚོགས་འདུ་འདི་འདྲ་འཚོགས་པའི་སྐབས་སུ་གཙོ་བོ་ཆབ་སྲིད་ཀྱི་དཀའ་ངལ་རེད་ལ། གཙོ་བོ་གཅིག་བོད་ཀྱི་རིག་གཞུང་འདི་ཉམས་པ་སོར་ཆུད་དང་མི་ཉམས་གོང་འཕེལ་ཡོང་བ་ལ་ཁྱེད་རང་ཚོས་ཐུགས་ཁུར་ཤུགས་ཆེ་ཙམ་བཞེས་ཐུབ་ན། ང་ཚོས་ཆབ་སྲིད་ཀྱི་ཐོག་ནས་རང་བཙན་བྱེད་ཀྱི་ཡིན་ཟེར་གྱི་མེད། ལོ་ཁ་ཤས་སྔོན་ལ་ངོས་ཀྱིས་གསལ་བོ་བཤད་པ་ཡིན། ང་ཚོས་རང་བཙན་རྩོད་ཀྱི་མེད། བོད་ཀྱི་རིག་གཞུང་དང་སྐད་ཡིག་འདི་སྲུང་སྐྱོབ་བྱ་རྒྱུ་ཧ་ཅང་གལ་ཆེན་པོ་འདུག་ཅེས་རྗོད་བཞིན་ཡོད། ཆབ་སྲིད་ཀྱི་ཐོག་ནས་རྒྱ་ནག་དང་འགལ་ཟླ་འགྲོ་རྒྱུ་གང་ཡང་མེད། དངོས་ཡོད་གནས་ཚུལ་དེང་སང་རྒྱ་ནག་ཏུ་ནང་པའི་ཆོས་ལ་དོ་སྣང་བྱེད་མཁན་ཇེ་མང་ཇེ་མང་ལ་འགྲོ་བཞིན་འདུག་པས་དེ་ལྟ་བུའི་གནས་སྟངས་འོག་ནས་ང་ཚོའི་བོད་ཀྱི་ཆོས་དང་རིག་གཞུང་འདི་ཉམས་པ་སོར་ཆུད་དང་མི་ཉམས་གོང་འཕེལ་ཡག་པོ་ཞིག་བྱུང་ཐུབ་ན། བོད་མི་རིགས་གཅིག་པུ་མ་ཡིན་པར་ཧོར་གྱི་མི་རིགས་ཁག་དང་། སོག་རིགས་ཁག ཆེ་ས་རྒྱ་ནག་རང་གི་ནང་ལ་ཆ་བཞག་ན་བོད་ཀྱི་སེམས་པ་བཟང་པོ་བྱེད་པ་དང་ཡ་རབས་བྱེད་པའི་རིག་གཞུང་འདི་འཛམ་བུ་གླིང་གི་མི་འབོར་ཆེ་ཤོས་ཡོད་པའི་རྒྱལ་ཁབ་དེའི་ནང་ལ་ཕན་ཐོགས་ཡོང་ཐུབ་པ་ཞིག་ཆགས་ཡོད། དེ་ཆོས་དང་འབྲེལ་ནས་ཆོས་པ་བྱེད་དགོས་པ་རེད་ཟེར་གྱི་ཡོད་པ་མ་རེད། ནང་པ་བྱེད་དགོས་པ་རེད་ཟེར་གྱི་ཡོད་པ་མ་རེད། ཆོས་དད་ཡོད་ནའང་རེད། མེད་ནའང་རེད་མི་བཟང་པོ་ཞིག་བྱེད་པ་ལ་ང་རང་ཚོ་སྐྱེས་ཙམ་ཉིད་ནས་ཨ་མས་བྱམས་པོ་བྱས་པའི་བྱམས་བརྩེའི་རྣམ་འགྱུར་ཞིག་ཡོད་པ་དེ་ཆོས་དང་འབྲེལ་མེད་པར་རང་བཞིན་ལྷན་སྐྱེས་ཀྱིས་ཡོང་གི་ཡོད། དེར་བརྟེན། ང་ཚོས་དེ་ལྟ་བུའི་སེམས་པ་བཟང་པོ་བྱེད་པའི་མིག་ལྟོས་དེ་ང་ཚོ་བོད་ལ་ཧ་ཅང་ཡག་པོ་ཡོད་པས་དེ་རྒྱ་བསྐྱེད་ཐུབ་ན་མང་པོ་ལ་ཕན་ཐོགས་ཡོང་གི་རེད་དྲན་བཞིན་ཡོད། ངོས་རང་ལ་ཆ་བཞག་ན་ངོས་ཀྱིས་མཐའ་གཅིག་ཏུ་ནང་ཆོས་སྤེལ་རྒྱུ་བཤད་ཀྱི་མེད། གང་ལྟར་སེམས་པ་བཟང་པོ་བྱེད་རྒྱུ་ཤོད་བཞིན་ཡོད། དེ་རིང་ཁྱེད་རང་ཚོའི་ཚོགས་འདུ་འདིའི་ཐོག་ལ་སེམས་པ་བཟང་པོ་བྱེད་པའི་བོད་ཀྱི་རིག་གཞུང་གི་སྙིང་པོ་འདི་ཉམས་པ་སོར་ཆུད་དང་མི་ཉམས་གོང་འཕེལ་ཡོང་ཆེད་ཁྱོད་ཚོས་དགོངས་པ་བཞེས་ནས་དེང་དུས་ཀྱི་ཤེས་ཡོན་སྡེ་ཚན་ནང་དུ་ཆོས་དང་མ་འབྲེལ་བའི་ཡ་རབས་ཀྱི་སྤྱོད་པ་བསླབ་རྒྱུར་ཤུགས་བསྐྱོན་ཐུབ་ན་དེས་ཕན་ཐོགས་ཡོང་གི་རེད་བསམ་གྱི་འདུག ཐུགས་རྗེ་ཆེ།
