༄༅། །ཕྱི་ལོ་ ༢༠༢༢ ཟླ་ ༤ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཆོས་རར་ཞོ་སྟོན་ཐེངས་ཉེར་ལྔ་པར་བཅར་བའི་ལྷ་མོའི་ཚོགས་པ་བརྒྱད་ཀྱི་ཟློས་གར་བ་རྣམས་དང་། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་སྐབས་ལྔ་པའི་ཚོགས་ཆེན་ལ་བཅར་བའི་ཚོགས་མི་བཅས་ལ་མཇལ་ཁ་དང་བླང་དོར་བཀའ་སློབ་སྩལ་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༨།༠༠ པ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་ར་བར་ཆིབས་བསྒྱུར་བསྐྱངས་སྐབས་ལྷ་མོའི་ཚོགས་པ་བརྒྱད་ཀྱི་ཟློས་གར་བ་ཚོས་ཕེབས་བསུ་དང་བཅས་བཞུགས་ཁྲིར་འཁོད་མཚམས་བཀའ་སློབ་སྩལ་དོན། ལྷ་སར་ཞོ་སྟོན་ཉིན་བཞི་དང་། གཞས་ཕུད་ཉིན་གཅིག་བཅས་ཉིན་ལྔའི་རིང་ཡོད། དེའི་རིང་ངོས་རང་ཧ་ཅང་སྐྱིད་པོ་ཡོད། ཡོངས་འཛིན་རིན་པོ་ཆེ་ཕེབས་ནས་དཔེ་ཆ་སྐྱོར་དགོས་པ་གང་ཡང་མེད། ཨ་མ་ལགས་ཞོ་སྟོན་གྱི་ལྟད་མོར་གཟིགས་པར་ཕེབས་ནས་ནོར་གླིང་ལ་ཡབ་གཞིས་ཤིག་ཡོད་པ་དེར་བཞུགས་ཀྱི་ཡོད། དེར་བརྟེན། ཨ་མ་ལགས་ལ་དུས་དང་དུས་ལ་ཐུག་ཐུབ་པ་དང་། ཞོ་སྟོན་ཕལ་ཆེར་དབྱར་ཁའི་གུང་སེང་ཆེ་ཤོས་ཤིག་རེད།
དེ་རིང་འདིར་བོད་ཀྱི་གོམས་གཤིས་སམ་སྲོལ་རྒྱུན་ཞོ་སྟོན་ཚུགས་པ་རེད། ཞོ་སྟོན་ཟེར་དུས་ཕལ་ཆེར་ཞོ་འཐུང་རྒྱུ་ཡོད་པ་དང་། ཞོ་འབྲས་ཟ་རྒྱུ་ལྟ་བུ་ཞིག་མིན་ནམ། གང་ལྟར་ངོས་རང་ཞོ་སྟོན་གྱི་རིང་ཧ་ཅང་དགའ་སྣང་ཡོང་གི་ཡོད། འདི་བོད་ཀྱི་རིག་གཞུང་གི་ཆ་ཤས་ལྟ་བུ་ཞིག་རེད། ཞོ་སྟོན་ལ་རྒྱང་དཀར། ཅུང་པ། ཤངས་པ། སྐྱོར་མོ་ལུང་པ་བཅས་ཁག་བཞི་ཡིས་གཞུང་མི་འདྲ་བ་འཁྲབ་ཀྱི་འདུག རྒྱང་དཀར་པས་རྒྱ་བཟའ་དང་བལ་བཟའ། ནོར་བཟང་འཁྲབ་རྒྱུ་ཡོད། ཅུང་པ་བས་གཅུང་དོན་ཡོད་དོན་གྲུབ་ཟེར་བ་དེ་འཁྲབ་ཀྱི་ཡོད། དེ་ཡང་གཅུང་དོན་ཡོད་དོན་གྲུབ་ཟེར་བ་སེམས་སྐྱོ་བོ་ཞིག་ཡོད། དེ་ནས་ཤངས་པ་བས་བྲམ་ཟེ་ཐོན་ཡོང་བ་ཞིག་འདུག སྐྱོར་མོ་ལུང་བ་བས་གཞུང་འདྲ་མིན་འཁྲབ་ནས་གང་ལྟར་ཞོ་སྟོན་ཉིན་ལྔ་ཙམ་རིང་ཕལ་ཆེར་ངོས་རང་གི་དུས་ཚོད་སྐྱིད་ཤོས་ཤིག་ལ་རྩི་བཞིན་ཡོད། ཡིན་ནའང་། རྣམ་ཐར་བཏང་ཆོག་གི་མ་རེད། ཡིན་ནའང་། ཁྱོད་རང་ཚོས་རྔོན་པའི་འདོན་འཁྲབ་པ་སོགས་ངོས་ཀྱིས་གང་འཚམ་ཤེས་ཀྱི་ཡོད། ལྷ་སར་ལོ་མང་རིང་ཞོ་སྟོན་ལ་ཧ་ཅང་སྐྱིད་སྣང་ཡོད་པ་ཞིག་ཡིན། དེར་བརྟེན། དེ་རིང་འདིར་ཁྱོད་རང་ཚོ་མི་ཁ་ཤས་ཤིག་གིས་རྣམ་ཐར་བཏང་ན་ཞེས་བསམ་འཆར་བཤད་པ་རེད། གང་ལྟར་ང་ཚོས་དྲན་གསོ་བྱེད་ཀྱི་ཡོད་པ་རེད།
ང་ཚོ་བཙན་བྱོལ་བ་ཆགས་ནས་རང་མགོ་གང་ཐོན་གྱིས་ཕྱིན་ཡོད་པ་མ་རེད། ང་ཚོ་བཙན་བྱོལ་བ་ཡིན་ཀྱང་བོད་མི་རིགས་ཀྱི་ཆོས་དང་རིག་གཞུང་རྣམས་དམ་འཛིན་བྱས་ནས་བཟུང་ཡོད། ཟློས་གར་ལ་མཚོན་ན་བོད་ཀྱི་རིག་གཞུང་གི་ཆ་ཤས་ཆགས་ཡོད། རྒྱ་ནག་གི་སྲིད་བྱུས་སྤྱི་ཡོངས་ལ་འགྱུར་བ་འགྲོ་བཞིན་འདུག རིམ་བཞིན་འགྱུར་བ་ཏན་ཏན་ཡོང་གི་རེད། ང་ཚོས་རྒྱ་མིར་འཁྲུག་པ་བརྒྱབ་ནས་རྒྱ་མི་སྤོས་ཟེར་བ་དེ་ཡོང་ཐབས་མེད། དེར་བརྟེན། ངོས་ཀྱིས་དབུ་མའི་ལམ་ཟེར་བ་དེར་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཟེར་བ་དེའི་ཁོངས་སུ་སྡོད་ཀྱི་ཡིན་ཟེར་གྱི་ཡོད། དེ་ལ་ཁེ་ཕན་ཡོད་པ་རེད། ང་ཚོ་བོད་པ་ཆོལ་ཁ་གསུམ་གཅིག་ཏུ་བསྒྲིལ་ནས་རང་བཙན་ཞེས་ལབ་པ་ཡིན་ན་ཆུང་ཆུང་རེད། ནུས་པ་ཆེན་པོ་མེད། དེ་ལས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཟེར་བ་དེའི་ཁོངས་སུ་བསྡད་ནས་ང་ཚོར་རང་སྐྱོང་མིང་དོན་མཚུངས་པ་ཞིག་དང་། བོད་ཀྱི་སྐད་ཡིག་གཙོ་བོར་གྱུར་བའི་རིག་གཞུང་ལ་བོད་པ་རང་གིས་བདག་པོ་ཆ་ཚང་རྒྱག་ཐུབ་པ་ཞིག་དགོས།
དེང་སང་རྒྱ་ནག་འགྱུར་བ་འགྲོ་བཞིན་འདུག དངོས་ཡོད་གནས་ཚུལ་ལ་རྒྱ་ནག་ཏུ་ནང་ཆོས་ལ་དོ་སྣང་བྱེད་མཁན་མང་དུ་འགྲོ་བཞིན་འདུག ནང་ཆོས་ལ་དོ་སྣང་སླེབས་དུས་བོད་གངས་ཅན་ལྗོངས་སུ་དར་བའི་དཔལ་ནཱ་ལེནྡྲའི་ཆོས་བརྒྱུད་བཤད་སྒྲུབ་ཟུང་འབྲེལ་གྱི་ཐོག་ནས་ཡོད་པ་བོད་ནང་བཞིན་སུ་གང་གིས་ཀྱང་བདག་པོ་རྒྱག་ཐུབ་མེད། དེར་བརྟེན། དེང་རྒྱ་རིགས་ནང་པ་ཚོས་བོད་ཀྱི་སངས་རྒྱས་པའི་ཆོས་དེ་ནཱ་ལེནྡྲའི་ཆོས་བརྒྱུད་དྲི་མ་མེད་པ་ཞིག་དང་། དེ་ལ་དམིགས་བསལ་གྱིས་དོ་སྣང་བྱེད་བཞིན་ཡོད། ནཱ་ལེནྡྲའི་ཆོས་བརྒྱུད་དེ་ཚན་རིག་དང་མཐུན་པ་རེད་ཅེས་དད་པ་གཅིག་པུ་མིན་པར་ཡིན་པ་དང་མིན་པ་རིགས་པས་དཔྱད་པ་བྱས་ཏེ་ཤེས་པར་བྱེད་དགོས། གང་ལྟར་ང་ཚོ་ཚང་མ་ཆགས་སྡང་གཉིས་ཀྱིས་ཕུང་བཞིན་ཡོད། ཆགས་སྡང་གི་རྩ་བ་བདེན་འཛིན་ལ་ཐུག་ཡོད། བདེན་འཛིན་ནི་ཇི་ལྟར་སྣང་བ་ནང་བཞིན་དོན་གྱི་ངོས་ནས་ཡོད་པ་ལ་ཡིད་ཆེས་བྱས་ཏེ་ཆགས་སྡང་སྐྱེ་བཞིན་ཡོད། དེང་སང་ཚད་རྡུལ་དངོས་ཁམས་རིག་པས་ཀྱང་དོན་གྱི་ངོས་ནས་ཡོད་པ་མ་རེད་ཅེས་དབུ་མ་པའི་ལྟ་ཚུལ་འདྲ་བོ་ཞིག་བརྗོད་ཀྱི་འདུག
ང་ཚོ་བོད་ཀྱི་སངས་རྒྱས་པའི་ཆོས་འདི་དེ་སྔ་ང་ཚོ་བོད་གཅིག་པུ་རེད། དེང་སང་འཛམ་གླིང་སྤྱི་ལ་བོད་ཀྱི་ནང་ཆོས་ལ་དོ་སྣང་གསར་པ་སླེབས་པ་ཞིག་དང་། ལྟ་གྲུབ་བཤད་ཡོང་དུས་ཚན་རིག་པ་མང་པོ་ཞིག་དང་། སེམས་ཁམས་རིག་པ་བ་མང་པོ་ཞིག་གིས་དོ་སྣང་བྱེད་ཀྱི་འདུག ཕྱོགས་གཅིག་ནས་བསམ་བློ་བཏང་ན་དེ་སྔ་ང་ཚོ་བོད་དུ་སོ་སོ་ཁེ་གཙང་གིས་བསྡད་ནས་ཕྱི་ལ་ཁྱབ་ཐུབ་ཀྱི་ཡོད་པ་མ་རེད། བཙན་བྱོལ་བ་ཆགས་ནས་མི་མང་པོར་འབྲེལ་བ་བྱེད་རྒྱུ་བྱུང་བས་བཙན་བྱོལ་གྱི་གནས་སྟངས་འདི་རྐྱེན་ངན་གྲོགས་སུ་གྱུར་ཏེ་བོད་ཀྱི་ཆོས་དང་རིག་གཞུང་འཛམ་གླིང་སྤྱི་ལ་ཁྱབ་ཐུབ་པ་ཆགས་ཡོད། ང་ཚོ་བཙན་བྱོལ་བོད་པ་ཉུང་ཤས་ཤིག་ཡོད་པ་འདི་དག་གིས་བོད་ཀྱི་རིག་གཞུང་མུ་མཐུད་དུ་བཟུང་བ་དང་། འཛམ་གླིང་གིས་དོ་སྣང་ཤུགས་ཆེ་རུ་སོང་ཡོད། བོད་ཀྱི་རིག་གཞུང་ལ་བདག་པོ་རྒྱག་པའི་ཆ་རྐྱེན་ཆེད་དེང་སང་རོགས་པ་བྱེད་མཁན་དང་། དོ་སྣང་བྱེད་མཁན་མང་དུ་འགྲོ་བཞིན་ཡོད། དེ་རིང་འདིར་ཞོ་སྟོན་བྱས་ཏེ་རྣམ་ཐར་ཁ་ཤས་ཡོད་ན་ཡག་པོ་མེད་དམ་བསམ་སོང་། རྣམ་ཐར་ཟེར་བ་འདི་ལས་སླ་པོ་ཡོད་པ་མ་རེད། རང་བཞིན་གྱིས་སྐད་དང་འབྲེལ་བ་ཡོད་པ་ཞིག་དང་། བཅོས་མ་རྐྱང་རྐྱང་ཡོང་ཐབས་མེད་པ་ཞིག་རེད། ཅེས་བཀའ་སློབ་སྩལ་བ་དང་།
གཞན་ཡང་། ཆོས་རྒྱལ་སྲོང་བཙན་སྒམ་པོས་བོད་ཡིག་གསར་གཏོད་མཛད་པའི་རླབས་ཆེན་གྱི་མཛད་རྗེས་ལ་བསྔགས་བརྗོད་དང་། དུས་རབས་བརྒྱད་པའི་ནང་བཙན་པོ་ཁྲི་སྲོང་ལྡེ་བཙན་གྱིས་མཁན་ཆེན་ཞི་བ་འཚོ་བོད་ལ་གདན་འདྲེན་ཞུས་ཏེ་དཔལ་ནཱ་ལེནྡྲའི་ཆོས་བརྒྱུད་དྲི་མ་མེད་པ་སྤེལ་གནང་བའི་སྐོར་བཀའ་ཕེབས་པ་དང་འབྲེལ་བོད་པ་རྣམས་བཙན་བྱོལ་ལ་ཐོག་མར་འབྱོར་མཚམས་ནེ་ཧ་རུ་ལ་རེ་བ་ཞུས་དོན་ལྟར་བོད་ཀྱི་སློབ་གྲྭ་ཟུར་འཛུགས་ཀྱིས་བོད་ཀྱི་ཆོས་དང་རིག་གཞུང་སྲུང་སྐྱོབ་མཛད་ཡོད་པའི་སྐོར་སོགས་བྱུང་རིམ་ངོ་སྤྲོད་མཛད་རྗེས་ཞོ་སྟོན་ཐེངས་ཉེར་ལྔ་པར་བཅར་བའི་ལྷ་མོའི་ཚོགས་པ་བརྒྱད་ཀྱི་ཟློས་གར་བ་རྣམས་ཀྱིས་རིམ་བཞིན་རྣམ་ཐར་གཟིགས་འབུལ་ཞུས།
དེ་རྗེས་དབུ་མའི་ལམ་དང་འབྲེལ་ནས་བཀའ་སློབ་སྩལ་དོན། ང་ཚོས་འདིར་དབུ་མའི་ལམ་ཞེས་མཐའ་གཅིག་ཏུ་རྒྱ་མི་དང་དགྲ་ཟླ་དགྲ་གཤེད་ལྟར་རང་བཙན་གྱི་སྐད་ཆ་མེད་པར། གང་ལྟར་ཆེ་ས་ནས་བསམ་བློ་བཏང་ཡོང་དུས་བོད་གཅིག་པུ་མ་ཡིན་པར་རྒྱ་ནག་རང་དུའང་འགྱུར་བ་འགྲོ་ཞིག་རེད། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཟེར་བ་དེའི་ནང་དུ་བསྡད་ནས་བོད་རང་སྐྱོང་ཞེས་བོད་ཆོལ་ཁ་གསུམ་ཆ་ཚང་བར་རང་སྐྱོང་མིང་དོན་མཚུངས་པ་ཞིག་དང་། རང་སྐྱོང་ཟེར་བ་ནི་ཆབ་སྲིད་ཀྱི་འཛིན་སྐྱོང་གི་སྐད་ཆ་ཙམ་མ་ཡིན་པར་སོ་སོའི་ཆོས་དང་རིག་གཞུང་འཛམ་གླིང་འདིར་ངོམས་ཆོག་པ་ཞིག་ཡོད་པ་དེར་ང་ཚོས་བདག་པོ་ཡག་པོ་རྒྱག་ཐུབ་པ་ཞིག་ལ་ང་ཚོར་ཐོབ་ཐང་ཡོད་པ་རེད་ལ། རང་དབང་ཆ་ཚང་ཞིག་བྱུང་བ་ཡིན་ན་གོང་དུ་ཞུས་པ་ལྟར་རིམ་བཞིན་རྒྱ་ནག་ཏུ་ཆོས་དང་རིག་གཞུང་གིས་དབང་བསྒྱུར་ཐུབ་པ་ཞིག་ཡོང་བའི་བཟོ་ལྟ་ཞིག་སླེབས་ཡོང་གི་འདུག དེར་བརྟེན། རྒྱ་ནག་གི་གདུག་རྩུབ་ཆེ་བའི་སྲིད་བྱུས་དེས་ཁུངས་འཁྱོལ་གྱི་མ་རེད། དེར་འགྱུར་བ་འགྲོ་ངེས་རེད། ང་ཚོས་འདིར་རྒྱུ་མཚན་ལྡན་པ་དང་དོན་དམ་པའི་སེམས་ཀྱི་ཞི་བདེ་སྒྲུབ་པའི་རིག་གཞུང་གཏིང་ཟབ་ཅིག་ཡོད་པ་མུ་མཐུད་ནས་ཡར་རྒྱས་སུ་འགྲོ་བ་མ་གཏོགས་ཉམས་ཀྱི་མ་རེད། དེར་བརྟེན། ཚང་མས་སེམས་ལ་སྤོབས་པ་དང་སྐྱིད་པོ་བྱོས་ནས་སྡོད། བཀྲ་ཤིས་བདེ་ལེགས་ཞེས་བཀའ་སློབ་སྩལ་ཡོད་པ་བཅས།
