༄༅། །བོད་རྒྱལ་ལོ་ ༢༡༤༩ རབ་གནས་ཆུ་སྟག་ཟླ་ ༡ ཚེས་ ༡༥ དང་ཕྱི་ཟླ་ ༣ ཚེས་ ༡༨ ཆོ་འཕྲུལ་དུས་ཆེན་ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་སྐྱེས་རབས་ཀྱི་གསུང་ཆོས་དང་། སེམས་བསྐྱེད་ཀྱི་ཆོས་འབྲེལ་བཀའ་དྲིན་སྩལ་ཡོད་པ་རེད།
དེ་ཡང་ཞོགས་པའི་ཆུ་ཚོད་ ༧།༤༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་བཞུགས་སྒར་ཕོ་བྲང་གི་གཟིམ་ཆུང་ནས་གཙུག་ལག་ཁང་དུ་ཆིབས་བསྒྱུར་གྱིས་ཕོ་བྲང་རྒྱལ་སྒོར་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྤྱི་འཐུས་ཚོགས་གཙོ་གཞོན། ཁྲིམས་ཞིབ་པ་བཅས་ལ་མཇལ་ཁ་སྩལ་ཏེ་དད་ལྡན་སེར་སྐྱ་མི་མང་ལ་བརྩེ་བའི་ཕྱག་གཡུགས་དང་བཅས་གསུང་ཆོས་ར་བར་ཆིབས་བསྒྱུར་གྱིས་བཞུགས་ཁྲིར་འཁོད་མཚམས་བཀའ་སློབ་སྩལ་དོན།
ཐོག་མའི་འཆར་གཞི་ལ་དེ་རིང་ལྡི་ལིར་ཕྱིན་ནས་བརྟག་དཔྱད་བྱ་རྒྱུའི་འཆར་གཞི་རེད། ཡིན་ནའང། ངོས་ཀྱི་གཟུགས་པོར་དཀའ་ངལ་གང་ཡང་མི་འདུག ཨེམ་ཆི་ལ་ཁུར་འཛིང་བྱེད་དགོས་ན་ངོས་ཀྱིས་ཡག་པོ་རྩེད་ཐུབ་ཀྱི་འདུག ཅེས་བཞད་མོ་དང་འབྲེལ་བཀའ་ཕེབས་རྗེས་དད་ལྡན་སེར་སྐྱ་མི་མང་གིས་དགའ་སྤྲོའི་ཐལ་མོ་བརྡབས་ཤིང་། གསུང་ཆོས་ར་བར་བདེ་སྐྱིད་ལྡན་པའི་སྤྲོ་སྣང་གིས་ཁེངས་པར་གྱུར། མགོན་པོ་གང་ཉིད་མཆོག་གིས་མུ་མཐུད་ནས་བཀའ་སློབ་ཕེབས་དོན། ལྡི་ལིར་ངེས་པར་དུ་འགྲོ་དགོས་དོན་མི་འདུག དེར་བརྟེན། འགྲོ་མི་དགོས་པ་བྱས་པ་ཡིན། དགུན་ཁ་རྡོ་རྗེ་གདན་ལ་འཆར་ཅན་འགྲོ་བཞིན་ཡོད་པ་རེད། དེའི་ཞོར་ལ་ལྡི་ལིར་སྨན་ཁང་དུ་བརྟག་དཔྱད་ཅིག་བྱ་རྒྱུ་བྱས་པ་ཡིན། ངོས་རང་འདིར་ལྷོད་ལྷོད་ཀྱིས་སྡོད་རྒྱུ་ཡིན། གཟུགས་པོ་ནི་ད་ལྟ་བརྗོད་པ་བཞིན་ཧ་ཅང་བདེ་བོ་འདུག མ་གཞི་མོ་བརྒྱབ་སྟེ་བརྟག་དཔྱད་བྱས་པ་ཡིན། རྡ་རམ་ས་ལར་ལྷོད་ལྷོད་ཀྱིས་བསྡད་ན་དེ་ཡག་པོ་འདུག ལྡི་ལིར་འགྲོ་བའི་འཆར་གཞི་གནས་སྐབས་རིང་མི་དགོས་པ་བྱས་པ་ཡིན། ཁྱོད་རང་ཚོ་བློ་བདེ་བོ་བྱོས། སྐུ་འབུམ་ནས་ཡོང་བའི་བླ་མ་འདི་བདེ་ཐང་གིས་བསྡད་ཡོད། ཁྱོད་རང་ཚོ་བློ་བདེ་བོར་བཞུགས།
དེ་རིང་འདིར་སྐྱེས་རབས་གསུང་ཆོས་རེད། སྔོན་ལ་ངོས་ཀྱིས་འདི་བརྗོད་འདོད་བྱུང་། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང་།། འགྲོ་བའི་སྡུག་བསྔལ་ཕྱག་གིས་མི་སེལ་ལ།། ཉིད་ཀྱི་རྟོགས་པ་གཞན་ལ་འཕོ་མིན་སྟེ།། ཆོས་ཉིད་བདེན་པ་བསྟན་པས་གྲོལ་བ་འགྱུར།། གདུལ་བྱའི་ལུས་ཀྱི་སྡུག་བསྔལ་དང་སེམས་ཀྱི་དངངས་སྐྲག་གི་རྒྱུ་དང་ཉེ་བའི་རིགས་རྣམས་ཆུ་ཡིས་བཀྲུ་རྒྱུ་ཡོད་པ་རེད། སེམས་ཅན་གྱི་སྡུག་བསྔལ་བཅོམ་ལྡན་འདས་ཀྱི་ཕྱག་གིས་སེལ་མི་ཐུབ་པ་དང་། ཁོང་གི་ཐུགས་རྒྱུད་ལ་ཡོད་པའི་ཡོན་ཏན་རྣམས་གདུལ་བྱར་སྦྱིན་རྒྱུ་ཡོད་པ་མ་རེད། བཅོམ་ལྡན་འདས་ཁོང་གི་ཉམས་མྱོང་གི་ཐོག་ནས་སེམས་མ་བཏུལ་བ་འདུལ་བར་བྱེད་པ་དང་། མ་ཞི་བ་ཞི་བར་བྱེད་པ་སོགས་གང་ལྟར་རྗེས་འཇུག་གདུལ་བྱ་རྣམས་ལ་སེམས་མ་བཏུལ་བའི་སྐྱོན་སེལ་ཐབས་ཅི་ལྟར་ཡིན་མིན་གསུངས་པ་ཡིན་པ་རེད། བཅོམ་ལྡན་འདས་ཀྱིས་ཐོག་མར་བདེན་བཞིའི་ཆོས་འཁོར་གསུངས་ཡོད་དང་། དེ་ནས་ཅུང་ཟབ་ཏུ་ཕྱིན་ནས་བྱ་རྒོད་ཕུང་པོའི་རིང་ཤེར་ཕྱིན་གྱི་གཞུང་རྣམས་གསུངས་པ་རེད། དེ་ནི་བཅོམ་ལྡན་འདས་ཀྱི་གསུང་གི་ཉིང་ཁུ་ལྟ་བུ་ཆགས་ཡོད། ང་ཚོས་འཆར་ཅན་འདོན་བཞིན་པའི་ཤེས་རབ་སྙིང་པོའི་ནང་དུ། གཟུགས་སྟོང་པའོ།། སྟོང་པ་ཉིད་གཟུགས་སོ།། གཟུགས་ལས་སྟོང་པ་ཉིད་གཞན་མ་ཡིན། སྟོང་པ་ཉིད་ལས་ཀྱང་གཟུགས་གཞན་མ་ཡིན་ནོ།། ཞེས་སྟོང་ཉིད་བཞི་སྐོར་ནི་བྱ་རྒོད་ཕུང་པོའི་རིར་ཤེར་ཕྱིན་གྱི་གཞུང་མང་པོ་གསུངས་པའི་ནང་གི་སྙིང་བསྡུས་ཤིག་ཤེས་རབ་སྙིང་པོ་ཆགས་ཡོད། ང་ཚོ་ཚང་མས་ཤེས་རབ་སྙིང་པོ་འདོན་བཞིན་ཡོད་པ་མ་རེད། ངོས་རང་ལ་མཚོན་ནའང་ཉིན་རེ་བཞིན་སྟོང་ཉིད་བཞི་སྐོར་ལ་བསམ་བློ་གཏོང་གི་ཡོད། སྟོང་པ་ཉིད་ཀྱི་ལྟ་བ་ལ་ག་ཚོད་ཐུབ་ཐུབ་ཀྱིས་བསམ་བློ་བཏང་ཡོང་སྐབས་སེམས་ལ་ཆགས་སྡང་གི་བློ་དང་། ཚུལ་མིན་ཡིད་བྱེད་ཀྱི་རྣམ་རྟོག་སོགས་མ་ཡོང་བ་ལ་ཧ་ཅང་ཕན་གྱི་འདུག
དེ་དང་ཆབས་ཅིག་བྱང་ཆུབ་སེམས་ཀྱི་སྐོར་ལ། བདག་བདེ་གཞན་གྱི་སྡུག་བསྔལ་དག། ཡང་དག་བརྗེ་བར་མ་བྱས་ན།། སངས་རྒྱས་ཉིད་དུ་མི་འགྲུབ་ཅིང་།། འཁོར་བ་ན་ཡང་བདེ་བ་མེད།། དེ་བས་སྐྱོ་ངལ་ཀུན་སེལ་བའི།། བྱང་ཆུབ་སེམས་ཀྱི་རྟ་ཞོན་ནས།། བདེ་ནས་བདེ་བར་འགྲོ་བ་ལ།། སེམས་ཤེས་སུ་ཞིག་སྒྱིད་ལུག་འགྱུར།། ཞེས་སྤྱོད་འཇུག་ལས་གསུངས་པ་འདི་ལ་བསམ་བློ་གཏོང་གི་ཡོད། དེར་བརྟེན། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་བསམ་བློ་གཏོང་དུས་སེམས་ལ་ཧ་ཅང་ཕན་ཐོགས་ཡོང་གི་འདུག ཅེས་དང་།
དངོས་ཡོད་གནས་ཚུལ་ལ་ང་རང་ཚོའི་སེམས་མ་སྐྱིད་པ་བཟོ་མཁན་ནི་ཕྱི་ལོགས་ནས་དཀྲུགས་པ་མ་ཡིན་པར་ང་རང་ཚོའི་བསམ་བློའི་ནང་ནས་ཆགས་སྡང་ཉོན་མོངས་ཀྱིས་སེམས་འཁྲུངས་ཡོང་གི་ཡོད། དེ་ལ་གཉེན་པོ་བརྟེན་ནས་ཆགས་སྡང་གི་བློ་ཆུང་དུ་འགྲོ་ཐུབ་པ་ཡིན་ན་རྩ་བ་ཤེས་རབ་ཀྱི་ནང་དུ་ཧ་ཅང་གསལ་བོ་ཡོད་པ་བཞིན། ཆགས་སྡང་གི་བློ་ཤུགས་ཆུང་དུ་སོང་བ་ཡིན་ན་སེམས་ལ་ཞི་བདེ་རང་བཞིན་གྱིས་ཡོང་གི་རེད། བྱམས་སྙིང་རྗེ་བྱང་ཆུབ་ཀྱི་སེམས་དང་། འདུན་པ་གཉིས་ལྡན་གྱི་སེམས་བསྐྱེད་བཅས་ནི་ཅུང་ཙམ་ཁག་པོ་རེད། གང་ལྟར་སངས་རྒྱས་བཅོམ་ལྡན་འདས་ཀྱི་སེམས་འདུལ་བའི་བསླབ་བྱ་གཙོ་བོ་ནི་སེམས་པ་བཟང་པོ་བྱ་རྒྱུ་གསུངས་ཀྱི་འདུག ང་རང་ཚོ་བོད་གངས་ཅན་པར་མཚོན་ན་འཕགས་པ་སྤྱན་རས་གཟིགས་ཀྱི་གདུལ་ཞིང་རེད། སྤྱན་རས་གཟིགས་ནི་སྙིང་རྗེའི་ལྷ་མཆོག་རེད། དེར་བརྟེན། ང་ཚོ་བོད་མི་རྣམས་རང་ཤུགས་ཀྱིས་བྱམས་བརྩེ་ཤུགས་ཆེན་པོ་ཡོད་པ་ནི་འཕགས་པ་སྤྱན་རས་གཟིགས་ཀྱི་ཐུགས་རྗེ་བྱིན་རླབས་རེད། དེ་རིང་འདིར་སྨོན་ལམ་གྱི་སྐྱེས་རབས་གསུང་ཆོས་རེད། ཅེས་བཀའ་སློབ་སྩལ་རྗེས་ཤེས་རབ་སྙིང་པོ་སོགས་གསུང་འདོན་དང་འབྲེལ་སྲིད་སྐྱོང་སྤེན་པ་ཚེ་རིང་མཆོག་གིས་མཎྜལ་རྟེན་གསུམ་འདེགས་འབུལ་ཞུས།
དེ་རྗེས་སྲོང་བཙན་སྒམ་པོས་བོད་ཡིག་གསར་བཟོ་དང་དུས་རབས་བརྒྱད་པར་སངས་རྒྱས་པའི་གཞུང་བོད་ཡིག་ནང་དུ་བསྒྱུར་བའི་ལོ་རྒྱུས་སྐོར་བཀའ་སློབ་དང་འབྲེལ་སྔར་ཆོས་རྒྱལ་ཚོས་དགོངས་པ་རྒྱ་ཆེན་པོ་བཞེས་ཡོད་པ་འདི་རྣམས་བོད་རིགས་གཞོན་སྐྱེས་ཚོས་སློབ་གཉེར་བྱ་རྒྱུ་ཧ་ཅང་གལ་ཆེན་པོ་ཡིན་པ་དང་། འཛམ་གླིང་འདིར་བོད་ཀྱི་སངས་རྒྱས་པའི་གཞུང་གིས་ཕན་ཐོགས་བྱེད་དགོས་པའི་བཀའ་སློབ་ཟབ་མོ་ཕེབས་རྗེས་སྐྱེས་རབས་ཀྱི་གསུང་ཆོས་དང་། སངས་རྒྱས་ཆོས་ཚོགས་མའི་སྟེང་ནས་སེམས་བསྐྱེད་ཀྱི་སྡོམ་པ་འབོག་ཆོག་གནང་སྟེ་ཆོ་འཕྲུལ་དུས་ཆེན་ཉིན་གྱི་ཆོས་འབྲེལ་གནང་སྒོ་ལེགས་པར་གྲུབ་ཡོད་པ་དང་། གསུང་ཆོས་འདི་བཞིན་རྒྱ་སྐད། དབྱིན་སྐད། ཧིན་དྷིའི་སྐད། ཉི་ཧོང་སྐད། ཀོ་རི་ཡའི་སྐད། སོག་སྐད། རཱ་ཤི་ཡའི་སྐད། ཝི་ཏི་ནམ་གྱི་སྐད་བཅས་སུ་གསུང་བསྒྱུར་གྱིས་དྲ་ལམ་ཁག་ཏུ་ཐད་གཏོང་ཞུས་ཡོད་པ་བཅས།
