༄༅། །ཕྱི་ལོ་ ༢༠༢༢ ཟླ་ ༡༢ ཚེས་ ༣༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་ཀྱི་འགྲེལ་པའི་བཀའ་ཆོས་འཕྲོ་སྐྱོང་དང་། སྒྲོལ་མ་ཉེར་གཅིག་གི་རྗེས་གནང་བཀའ་དྲིན་སྩལ་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༨།༠༠ པ་ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡོ་རྗེ་གདན་གྱི་དགའ་ལྡན་འཕེལ་རྒྱས་གླིང་ནས་ཀོར་ཧྥུ་རླངས་འཁོར་(Golf cart)ལ་བཞུགས་ཏེ། དུས་དབང་གསུང་ཆོས་ར་བར་ཆིབས་བསྒྱུར་སྐབས་གནས་མཆོག་རྡོ་རྗེ་གདན་གྱི་གསུང་ཆོས་ཉིན་གསུམ་པའི་སྦྱིན་བདག་ཨ་མ་མེ་ཏོག་དབྱངས་ཅན་ཁྱིམ་ཚང་། འཇམ་དབྱངས་ཆོས་འབྱོར་དང་ཡེ་ཤེས་སྒོམ་པ་ཚང་ནང་མི། ལྷ་ལྡན་ཆོ་འཕྲུལ་སྨོན་ལམ་ཆེན་མོའི་དགེ་རྩ། གཉའ་ནང་ཆུ་སྟེང་སྤུན་མཆེད་ལྔ་ཐུན་མོང་བཅས་ནས་གསུང་ཆོས་ར་བའི་སྡིངས་ཆའི་འགྲམ་ནས་བཞུགས་ཁྲིའི་བར་སྤོས་སྣེས་མདུན་བསུ་དང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་ཁྲིར་འཁོད་མཚམས་རྒྱ་རིགས་ཆོས་ཞུ་བ་སེར་སྐྱ་མི་མང་ཁྲོད་ནས་དགེ་འདུན་པ་དང་སྐྱ་བོ་ཁག་ཅིག་གིས་རྒྱ་སྐད་ཐོག་ཤེས་རབ་སྙིང་པོ་གསུང་འདོན་དང་འབྲེལ་གསུང་ཆོས་སྦྱིན་བདག་རྣམས་ཀྱིས་མཎྜལ་རྟེན་གསུམ་འདེགས་འབུལ་ཞུས། དེ་རྗེས་ཆོས་ཞུ་བ་སྟོང་ཕྲག་མང་པོས་དུས་གཅིག་ཏུ་མཎྜལ་དང་ཇ་མཆོད་གསུང་འདོན་གནང་རྗེས་བཀའ་སློབ་སྩལ་དོན།
དེ་རིང་གནས་མཆོག་རྡོ་རྗེ་གདན་དུ་མི་མང་འདུ་འཛོམས་ཆེན་པོ་ཡོད་སར་དོན་གཉེར་ཅན་སྦྱིན་བདག་ཁ་ཤས་ཀྱིས་སྒྲོལ་མའི་བྱིན་རླབས་ཤིག་གནང་རོགས་ཞེས་གསུང་གི་འདུག །ཁ་སང་ནས་ཞུས་པ་ལྟར་གནས་ཁྱད་པར་ཅན་རེད། གནས་འདི་ལྟ་བུ་ལ་ང་ཚོ་ཚང་མས་བྱང་ཆུབ་ཀྱི་སེམས་དང་སྟོང་ཉིད་སྒོམ་པ། གང་ཟག་གིས་གནས་བྱིན་གྱིས་རླབས་པ་དང་། གནས་ཁྱད་པར་ཅན་གྱིས་གང་ཟག་བྱིན་གྱིས་རླབས་པ་ང་ཚོར་ནམ་རྒྱུན་གསུང་རྒྱུན་ཡོད་པ་རེད། དེ་རིང་གནས་ཁྱད་པར་ཅན་འདིར་གལ་ཆེ་ཤོས་ནི་བྱང་ཆུབ་ཀྱི་སེམས་རེད། བྱང་ཆུབ་ཀྱི་སེམས་ནི། རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱིད།། ཅེས་གསུངས་པ་ལྟར། རང་དོན་སྒྲུབ་ནའང་བྱང་ཆུབ་ཀྱི་སེམས། གཞན་དོན་སྒྲུབ་ནའང་བྱང་ཆུབ་ཀྱི་སེམས། འཕྲལ་དུ་བདེ་བའང་བྱང་ཆུབ་ཀྱི་སེམས། ཕུགས་ཀྱི་ཐམས་ཅད་མཁྱེན་པའི་གོ་འཕང་མངོན་དུ་བྱེད་པ་ལའང་བྱང་ཆུབ་ཀྱི་སེམས། མདོར་ན། རང་གཞན་དོན་གཉིས་སྒྲུབ་པར་བྱང་ཆུབ་ཀྱི་སེམས་ནི་དོན་དང་ལྡན་པ་ཞིག་ཆགས་ཡོད། ང་ཚོ་བོད་གངས་ཅན་ལ་མཁན་ཆེན་ཞི་བ་འཚོ་ནས་བརྒྱུད་པའི་ཆོས་བརྒྱུད་ཀྱིས་བྱང་ཆུབ་ཀྱི་སེམས་ཉམས་ལེན་བྱེད་པ་ནན་ཏན་གྱིས་གསུངས་འདུག །བོད་གངས་ཅན་ལྗོངས་ཀྱི་ས་དགེ་བཀའ་རྙིང་རིས་སུ་མ་ཆད་པ་ཚང་མས་བྱང་ཆུབ་ཀྱི་སེམས་ལ་ཉམས་བཞེས་གནང་བ་དང་། དེ་ལ་བརྟེན་ནས་འཕྲལ་དུ་བདེ་བ་དང་སེམས་སྐྱིད་པ། དེའི་ཐོག་ནས་ཚེ་སྒྲུབ་ཡང་རེད། སེམས་ལ་དངོས་གནས་ཞི་བདེ་ཡག་པོ་ཡོང་བའི་སྐབས་སུ་ལུས་ཀྱི་འབྱུང་བ་སྙོམས་པ་དང་། ལུས་བདེ་ཐང་གིས་ཚེ་རིང་པོ་ཡོང་བ་ཏན་ཏན་རེད། འཕྲལ་དུ་བྱང་ཆུབ་ཀྱི་སེམས་ལ་བསམ་བློ་བཏང་བ་ཡིན་ན་གཉིད་ཡག་པོ་ཁུགས་ཀྱི་རེད། སེམས་ཁྲལ་དང་ཡ་ང་བྱེད་པ། ཞེ་སྡང་ལངས་པ་སོགས་མེད་པར་སེམས་ལྷོད་ཤིག་གེར་སྡོད་པ་དང་། ཉིན་བདེ་བ་དང་མཚན་བདེ་བ། རང་དོན་སྒྲུབ་པ་ལ་དེ་ལས་ལྷག་མེད། གཞན་དོན་སྒྲུབ་པའང་དེ་ལས་ལྷག་མི་འདུག །དེར་བརྟེན། རང་གཞན་དོན་ནི་རབ་བསྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱིད།། ཅེས་གསུངས་པ་འདི་རེད།
གལ་ཆེ་ཤོས་ང་ཚོ་གནས་ཁྱད་པར་ཅན་འདིར་འཛོམས་ནས་བྱང་ཆུབ་ཀྱི་སེམས་སྒོམ་པ་དང་། བྱང་ཆུབ་ཅེས་པའི་བྱང་གི་དོན་དག་ཡག་པོ་ཤེས་པ་ལ་སྒྲིབ་པ་སྤངས་པའི་བྲལ་བའི་ཡོན་ཏན་ལ་བསམ་བློ་གཏོང་དགོས་པ་རེད། གནས་ལུགས་མཐོང་བའི་ཤེས་རབ་ལ་སྒྲིབ་བསྡད་ན་ཡིན་ལུགས་ཆ་ཚང་ཡིད་ལ་ཁོང་དུ་ཆུད་མི་ཐུབ། དེར་བརྟེན། བྱང་ཆུབ་ཀྱི་སེམས་སྤུས་དག་པོ་ཞིག་ཡོང་བ་ལ། སྤྱིར་བཏང་བྱང་ཆུབ་སེམས་དཔར་གྱུར་པའི་མདོ་སྡེ་པ་ཡོད་པ་རེད། སེམས་ཙམ་པ་ཡོད་པ་རེད། དབུ་མ་བ་ཡོད་པ་རེད་དེ། དབང་པོ་རྣོན་པོའི་དབང་དུ་བྱས་པའི་བྱང་ཆུབ་ཀྱི་སེམས་ཡག་པོ་ཞིག་ཡོང་བ་ལ་སྟོང་ཉིད་ཀྱི་ལྟ་བ་ཧ་ཅང་གལ་ཆེན་པོ་རེད། དེ་རིང་གནས་ཁྱད་པར་ཅན་འདི་ལ་ག་ཚོད་ཐུབ་ཐུབ་ཀྱིས་བྱང་ཆུབ་ཀྱི་སེམས་ལ་བསམ་བློ་གཏོང་བ་དང་། སྟོང་ཉིད་ཀྱི་ལྟ་བར་བསམ་བློ་གཏོང་རྒྱུ་ཧ་ཅང་གལ་ཆེན་པོ་རེད།
སྐབས་སུ་བབ་པ་སྒྲོལ་མ་ཉེར་གཅིག་གི་རྗེས་གནང་རེད། དེ་ཟུར་བཀའ་བརྒྱ་རྩའི་ནང་གཅིག་ཡོང་གི་འདུག་པ་དང་། རིན་འབྱུང་ནང་དུ་གཅིག་ཡོང་གི་འདུག །རིན་འབྱུང་བརྒྱ་རྩའི་ནང་སྒྲོལ་མ་ཉེར་གཅིག་ཅིག་ཡོད་པ་རེད། དེ་ངོས་ཀྱིས་ལྷ་ས་ལ་སྟག་བྲག་རིན་པོ་ཆེའི་སྐུ་མདུན་ནས་ཞུས་པ་ཧ་ཅང་གསལ་བོ་དྲན་གྱི་འདུག །བྱིན་རླབས་མང་པོ་དང་དབང་མང་པོ་ཞུས་ཡོད། སྟག་བྲག་རིན་པོ་ཆེའི་སྐུ་མདུན་ནས་དཔེ་ཆ་ཁྲིད་པ་མང་པོ་མེད། གསང་བདེ་འཇིགས་གསུམ་གྱི་དབང་གིས་མཚོན་པའི་དབང་དང་བྱིན་རླབས་ཧ་ཅང་མང་པོ་ཐོབ་ཡོད། ཕྱིས་སུ་རྒྱ་གར་ལ་སླེབས་ནས་སྐྱབས་རྗེ་ཁྲི་བྱང་རིན་པོ་ཆེའི་སྐུ་མདུན་ནས་ཟུར་བཀའ་བརྒྱ་རྩའི་བྱིན་རླབས་ཐོབ་ཡོད། བོད་ནས་སྟག་བྲག་རིན་པོ་ཆེའི་སྐུ་མདུན་ནས་ཞུས་པ་ངོས་ཀྱིས་དྲན་གྱི་མི་འདུག། དེ་རིང་འདིར་གཙོ་བོ་རིན་འབྱུང་བརྒྱ་རྩའི་བྱིན་རླབས་ཐོབ་ཡོད་པ་དང་། དེའི་ཟུར་འདོན་དུ་རྒྱ་གར་ལ་སླེབས་ནས་ཁྲི་བྱང་རིན་པོ་ཆེའི་སྐུ་མདུན་ནས་ཟུར་བཀའ་བརྒྱ་རྩའི་རྗེས་གནང་ཞུས་ཡོད་པ་དེ་ལྟར་ཡིན། ཞེས་བཀའ་སློབ་སྩལ་རྗེས་སྒྲུབ་ཞག་རིང་ཆོས་ཞུ་བ་ཡོངས་ཀྱིས་རྗེ་བཙུན་འཕགས་པ་སྒྲོལ་མའི་གཟུངས་སྔགས་བགྲང་སྟེ་དད་པ་རྩེ་གཅིག་གིས་གནས་དགོས་པར་བཀའ་ཕེབས་ཏེ་སྒྲུབ་ཞག་མཛད།
སྒྲུབ་ཞག་གྲུབ་མཚམས་སྒྲོལ་མ་ཉེར་གཅིག་གི་རྗེས་གནང་དབུ་འཛུགས་ཀྱིས་ཐོག་མར་བྱང་ཆུབ་སེམས་དཔའི་སྡོམ་པ་འབོག་ཆོག་མཛད་ཅིང་། རིམ་བཞིན་མཎྜལ་ཕུལ་བ་དང་། རྗེས་གནང་དངོས་གཞི་དབུ་འཛུགས་ཀྱིས་སྐུ་གསུང་ཐུགས་ཀྱི་རྗེས་གནང་རིམ་པར་སྩལ་གྲུབ་མཚམས་མགོན་པོ་གང་ཉིད་མཆོག་ལ་བཀའ་དྲིན་གཏང་རག་གི་མཎྜལ་འདེགས་འབུལ་ཞུས་པ་དང་། མཐར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་ཀྱི་འགྲེལ་པའི་བཤད་ལུང་འཕྲོ་སྐྱོང་གིས་ཆུ་ཚོད་ ༡༠།༠༠ མ་ཟིན་ཙམ་ལ་ཉིན་གསུམ་རིང་གི་གསུང་ཆོས་གནང་སྒོ་ལེགས་པར་གྲུབ་སྟེ། གསུང་ཆོས་གོ་སྒྲིག་ཚོགས་ཆུང་གིས་རྩིས་ཁྲ་སྙན་སྒྲོན་ཞུས་ཡོད་པ་དང་། ཐེངས་འདིའི་གནས་མཆོག་རྡོ་རྗེ་གདན་གྱི་གསུང་ཆོས་ལ་༸སྐྱབས་རྗེ་དགའ་ལྡན་ཁྲི་པ་ ༡༠༤ པ་རྗེ་བཙུན་བློ་བཟང་བསྟན་འཛིན་རིན་པོ་ཆེ་མཆོག་གིས་གཙོས་ས་སྐྱ་གོང་མ་བདག་ཁྲི་རིན་པོ་ཆེ། ཤར་པ་ཆོས་རྗེ། བྱང་རྩེ་ཆོས་རྗེ། གླིང་རིན་པོ་ཆེ། ཀུན་བདེ་གླིང་རིན་པོ་ཆེ། ཇོ་ནང་རྒྱལ་ཚབ། ས་སྐྱ་ཁྲི་འཛིན་ ༤༢ པ་རཏྣ་བཛྲ་རིན་པོ་ཆེ། ས་སྐྱ་ཁྲི་འཛིན་ ༤༣ པ་ཛྙ་ན་བཛྲ་རིན་པོ་ཆེ། ཀིརྟི་སྐྱབས་མགོན་རིན་པོ་ཆེ། ཞི་བྱེད་ཕ་དམ་པ། སོག་པོ་བླ་མ། ཀོ་རུ་ཡའི་དགེ་འདུན་དགོན་པའི་མཁན་པོ་ཁྲི་པ་ཧོང་བྷོང་(Hyeon Bong) བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག ཨ་རི་ན་ཅལ་མངའ་སྡེའི་བློན་ཆེན་པདྨ་མཁའ་འགྲོ་མཆོག་སོགས་རྒྱལ་ཁབ་བརྒྱད་ཅུ་གྱ་གཅིག་(༨༡)ནས་ཆོས་ཞུ་བ་ཁྱོན་མི་གྲངས་བདུན་ཁྲི་(༧༠༠༠༠)བརྒལ་བ་ཕེབས་བཅར་ཞུས་ཡོད་པ་བཅས། །
