༄༅། །ཕྱི་ལོ་ ༢༠༢༢ ཟླ་ ༡༢ ཚེས་ ༡༣ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྡ་རམ་ས་ལའི་བཞུགས་སྒར་ཕོ་བྲང་དུ་གཏོང་ལེན་ཚོགས་པའི་དགེ་ལས་སློབ་ཕྲུག་རྣམས་ལ་མཇལ་ཁ་དང་བཀའ་སློབ་སྩལ་ཡོད་པ་རེད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕོ་བྲང་ཚོགས་ཁང་དུ་༸ཞབས་སོར་འཁོད་སྐབས་གཏོང་ལེན་ཚོགས་པའི་དབུ་འཛིན་སྐུ་ཞོགས་འཇམ་དབྱངས་ལགས་ཀྱིས་ཕེབས་བསུའི་མཇལ་ཁ་ཞུས་པ་དང་། སློབ་ཕྲུག་དགེ་ལས་རྣམས་ཀྱིས་ཕེབས་བསུ་དང་བཅས་ཞབས་སྟེགས་སུ་འཁོད་མཚམས་གཏོང་ལེན་ཚོགས་པའི་ལས་བསྡོམས་ལྗགས་ཀློག་དང་། སློབ་ཕྲུག་ཚོར་ཧིན་སྐད་ནང་དུ་མཚན་ཉིད་རྩོད་སྟངས་སློབ་བཞིན་ཡོད་སྐོར་ལ་བསྔགས་བརྗོད་དང་། གཏོང་ལེན་སློབ་གྲྭའི་སློབ་ཕྲུག་རྣམས་ཀྱིས་ཧིན་སྐད་ཐོག་རྟགས་གསལ་གཟིགས་འབུལ་ཞུས་རྗེས་བཀའ་སློབ་སྩལ་དོན། ང་ཚོས་ཆོས་རའི་ནང་དམ་བཅའ་འཇོག་པའི་སྐབས་སུ་མདོ་དང་བསྟན་བཅོས་ཀྱི་ལུང་དྲངས་པ་ཡིན་ནའང་། ལུང་དེ་ཁས་ལེན་མ་འདོད་ན་སྟོན་པའི་བཀའ་དང་མཁས་གྲུབ་ཚད་ལྡན་ཚོའི་བཀའ་ཡིན་པས་གུས་ཞབས་མཚོན་བྱེད་དུ་ཞྭ་མོ་ཕུད་ནས་ལུང་ལ་ཉན་པ་དང་། དེའི་རྗེས་སུ་ཞྭ་མོ་ཡར་གོན་ནས་ཁྱབ་པ་མ་བྱུང་ཞེས་ལུང་དེ་ལྟ་བུ་ཡོད་ནའང་ཁས་ལེན་གྱི་མ་རེད། དེར་བརྟེན། ང་ཚོས་རིགས་པས་དཔྱད་པ་བྱེད་པ་མ་གཏོགས་ལུང་ཙམ་ལ་ཁྱབ་པ་མ་བྱུང་ཞེས་པ་དེ་བཤད་ཀྱི་ཡོད།
ང་ཚོ་བོད་གངས་ཅན་གྱི་ལྗོངས་སུ་ཡོད་པའི་ནཱ་ལེནྡྲའི་ཆོས་བརྒྱུད་ཀྱིས་རིགས་པས་དཔྱད་རྒྱུ་གཙོ་བོ་བྱས་ཏེ་ལུང་ཙམ་ལ་སྐྱབས་སུ་མཆི་ཡི་མེད། དེ་ནི་ཧ་ཅང་རླབས་ཆེན་རེད། ཟླ་བ་གྲགས་པ་རང་གིས་ལུང་དོན་བཞག་ནས་དབྱིག་གཉེན་སོགས་ཀྱིས་གསུངས་པ་ལ་དེ་ཁོ་ན་ཉིད་ལ་དཔྱོད་པའི་རིག་པ་ཕྲ་མོས་དཔྱད་ཡོང་སྐབས་གསུང་འདི་དག་ལ་འགལ་འདུ་འདུག་ཅེས་ཁས་ལེན་གྱི་མེད། རིག་པ་ཁོ་ན་ཁས་བླངས་ནས་འགྲོ་བ་དེ་ནི་ཧ་ཅང་ཡག་པོ་རེད། དེང་སང་སེམས་ཁམས་རིག་པའི་སྐོར་ལ་ཚན་རིག་པ་དང་མཉམ་དུ་ང་ཚོས་སྐད་ཆ་བཤད་རྒྱུ་ཡོང་གི་འདུག ང་ཚོས་རིག་པ་གཙོ་བོར་བྱེད་པ་མ་གཏོགས་ལུང་ཙམ་ལ་བརྟེན་གྱི་མེད་པས་ཚན་རིག་པ་དང་མཉམ་དུ་སྐད་ཆ་བཤད་པར་སྤོབས་པ་འདུག ཅེས་བཀའ་སློབ་སྩལ་ཡོད།
