༄༅། །ཕྱི་ལོ་ ༢༠༢༢ ཟླ་ ༡༡ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྡ་རམ་ས་ལའི་བཞུགས་སྒར་ཕོ་བྲང་དུ་སོག་པོའི་ཏེ་ལོ་པ་ཧུ་ཐོག་ཐུ་ཚོགས་པས་ཇི་ལྟར་གསོལ་འདེབས་ཞུས་པ་ལྟར་སོག་ཡུལ་གྱི་དད་ལྡན་མི་གྲངས་ ༦༦ ལྷག་ལ་མཇལ་ཁ་དང་བཀའ་སློབ་སྩལ་ཡོད་པ་རེད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། ཆོས་གང་བྱེད་དང་མི་བྱེད་སོ་སོའི་རང་དབང་རེད། ཆོས་མི་བྱེད་ནའང་སོ་སོའི་རང་དབང་རེད། ཆོས་བྱེད་པ་ཡིན་ན་དད་པ་རྐྱང་པའི་ཐོག་འགྲོ་པའི་ཆོས་དང་། ནཱ་ལེནྡྲ་ནས་བརྒྱུད་པའི་ང་ཚོ་བོད་ཀྱི་ཆོས་འདི་རིགས་པ་ཡང་དག་གི་ཐོག་ནས་སྒྲུབ་ཏེ་སེམས་ཁམས་རིག་པ་དང་འབྲེལ་བ་ཤུགས་ཆེན་པོ་ཡོད་པ་མ་ཟད། སེམས་ཀྱི་ཞི་བདེ་སྒྲུབ་སྟངས་ཧ་ཅང་སྤུས་དག་པོ་ཡོད་དང་འཆར་གཞི་ལྡན་པ་ཞིག་རེད། ཧ་ཅང་ཡག་པོ་འདུག ང་ཚོ་སྔ་མོ་ནས་ནང་པ་རེད། ཆོས་གཞན་པ་ཚང་མ་ཡག་རེད་ལ་གུས་ཞབས་བྱེད་ཀྱི་ཡོད། ཡིན་ནའང་། ཆོས་གཞན་པ་མང་པོ་ཞིག་རྨོངས་དད་ལྟ་བུ་རེད། དེང་སང་སེམས་ཁམས་རིག་པའི་ཐོག་ནས་སེམས་ཀྱི་ཞི་བདེ་ཇི་ལྟར་བསྐྲུན་དགོས་པའི་ཐད་ཚན་རིག་པས་དོ་སྣང་བྱེད་ཀྱི་འདུག ང་ཚོ་ནང་པ་ཚོའི་ངོས་ནས་ཚེ་རབས་ནས་ཚེ་རབས་ཞེས་བཤད་ཀྱི་ཡོད། དེང་སང་གི་ཚན་རིག་པ་ཚོས་ཚེ་རབས་མང་པོའི་སྐད་ཆ་མེད་པར་ཚེ་འདི་རང་ལ་སེམས་ཞི་བདེ་ཡོང་བ་ཞིག་གི་ཐོག་ལ་རེད། དེ་ལྟ་བུའི་སེམས་ཀྱི་ཞི་བདེ་སྒྲུབ་པ་ལ་ནང་པའི་ལྟ་གྲུབ་འདི་ཧ་ཅང་དམིགས་བསལ་བ་ཞིག་འདུག ང་ཚོ་ཕ་མེས་ནས་ནཱ་ལེནྡྲའི་ཆོས་བརྒྱུད་ཉམས་ལེན་བྱེད་མཁན་རེད། དེར་བརྟེན། ཆོས་ཟེར་དུས་དད་པ་གཅིག་པུའི་ངོར་མི་འཇོག་པར་སེམས་ཀྱི་ཞི་བདེ་ཇི་ལྟར་སྒྲུབ་དགོས་པ་དང་། སེམས་ཀྱི་ཞི་བདེ་སྒྲུབ་མཁན་གང་དག་ཡིན་པ་ནང་པའི་གཞུང་ནས་གསུངས་པ་ལ་དོ་སྣང་དང་། སློབ་སྦྱོང་བྱས་ན་ཕན་ཐོགས་ཡོད།
ངོས་རང་ཆུང་ཆུང་སྐབས་ནས་བློ་རིག་དང་རྟགས་རིགས་ལ་བལྟས་ཡོད། བློའི་འགྲོ་སྟངས་དགའ་རབ་ཤེས་པའི་རྐྱེན་གྱིས་དངོས་ཡོད་གནས་ཚུལ་ལ་དཀའ་ངལ་ག་རེ་འཕྲད་པ་ཡིན་ནའང་སེམས་ཀྱི་ཞི་བདེ་ཉར་ཐུབ་ཀྱི་འདུག སངས་རྒྱས་པའི་ཆོས་ཀྱི་ནང་བྱམས་སྙིང་རྗེ་བྱང་ཆུབ་ཀྱི་སེམས་ནི་སོ་སོར་གདེང་འཁེལ་བ་ལ་ཧ་ཅང་གི་རྩ་ཆེན་པོ་རེད། ངོས་རང་གིས་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་ལ་བསམ་བློ་གཏོང་གི་ཡོད། སོ་སོའི་སེམས་ལ་གཏན་འཁེལ་བའི་ཞི་བདེ་ཡོང་བ་ཞིག་འདུག ངོས་རང་ལོ་བརྒྱད་ཅུ་གྱ་བདུན་ལ་སླེབས་ཡོད་ཀྱང་གདོང་ལ་བལྟས་ན་གྱ་བདུན་ལྟ་བུ་ཞིག་འདུག་གམ། ངོས་ཀྱིས་དམིགས་བསལ་གང་ཡང་ཟ་གི་མེད་པར་ཞོགས་པ་ཡར་ལངས་པ་དང་། བྱང་ཆུབ་ཀྱི་སེམས་བསྒོམ་ནས་སྡོད་ཀྱི་ཡོད། བྱང་ཆུབ་ཀྱི་སེམས་ནི་སེམས་ལ་སྦྱོང་བརྡར་བྱས་ཏེ་རྣམ་མཁྱེན་རྒྱལ་བའི་གོ་འཕང་ཐོབ་པའི་དམིགས་ཡུལ་ཡིན་ཀྱང་། དེ་དང་ཆབས་ཅིག་བྱང་ཆུབ་ཀྱི་སེམས་སྒོམ་དུས་སོ་སོའི་གཟུགས་པོའི་འཕྲོད་བསྟེན་གྱི་སྨན་ཆགས་ཀྱི་འདུག དེར་བརྟེན། ང་ཚོ་ཚང་མ་ཕ་མེས་ནས་བྱང་ཆུབ་ཀྱི་སེམས་གོ་མྱོང་མཁན་རེད། བྱང་ཆུབ་ཀྱི་སེམས་ལ་མོས་པ་ཡོད་མཁན་ཆགས་ཡོད་པ་རེད། དེར་བརྟེན། ག་ཚོད་ཐུབ་ཐུབ་ཀྱིས་བྱང་ཆུབ་ཀྱི་སེམས་སྒོམས། རྒྱུ་འབྲས་མན་ངག་བདུན་ཏོག་ཙམ་རྙོག་དྲ་ཚ་བོ་རེད། བདག་གཞན་མཉམ་བརྗེ། ནམ་མཁའི་མཐའི་གཏུགས་པའི་སེམས་ཅན་ཐམས་ཅད་རང་དང་སྒོ་ཀུན་ནས་མཚུངས་པར་བདེ་བ་འདོད་ཅིང་སྡུག་བསྔལ་མི་འདོད་པ་ཤ་སྟག་རེད། རང་གི་དོན་དུ་ཆ་བཞག་ནའང་ཅི་ཙམ་གྱིས་གཞན་གྱི་སྡུག་བསྔལ་བསམ་ནས་གཞན་དོན་ག་ཚོད་ཀྱིས་བློ་ལ་ཤུགས་ཆེ་བ་བྱུང་བའི་ཚོད་ཀྱིས་སོ་སོའི་སེམས་ལ་ཞི་བདེ་ཡོང་ཐུབ་ཀྱི་ཡོད། རང་གཅིག་པུ་བདེ་བ་བྱུང་ན་བསམ་པ་དང་། སྡུག་བསྔལ་མ་བྱུང་ན་བསམ་པའི་བསམ་བློ་དེ་ཧ་ཅང་རྒྱ་ཆུང་ཆུང་རེད། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག། སེམས་ཅན་ཐམས་ཅད་སྡུག་བསྔལ་དང་སྡུག་བསྔལ་གྱི་རྒྱུ་དང་བྲལ་བར་གྱུར་ཅིག། ཅེས་པའི་བསམ་བློ་ཤུགས་ཆེན་པོར་སླེབས་ཡོང་དུས་རང་ཉིད་ཀྱི་སེམས་ལ་རང་བཞིན་གྱིས་ཞི་བདེ་སླེབས་ཡོང་བ་ཞིག་རེད།
ངོས་རང་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་ཤུགས་ཆེན་པོ་ཞིག་བསྒོམ་གྱི་ཡོད། དེས་ཕན་ཐོགས་ཆེན་པོ་ཡོང་གི་འདུག ཁྱོད་ཚོ་ཚང་མ་ངོས་ཀྱི་ཆོས་གྲགས་དང་། ངོས་ལ་ཡིད་ཆེས་བྱེད་ཀྱི་ཡོད་པ་རེད། ག་ཚོད་ཐུབ་ཐུབ་ཀྱིས་བྱང་ཆུབ་ཀྱི་སེམས་ལ་བསམ་བློ་ཐོངས། མཁྱེན་སོང་ངམ། ང་ལ་ཅིག་བྱེད་མི་ཡོང་ངམ་བསམ་པའི་བསམ་བློ་དེ་ཉུང་དུ་ཐོངས། འཛམ་གླིང་འདིའི་སྟེང་གི་མི་དུང་ཕྱུར་བདུན་ཅུ་ལྷག་ཡོད་པ་ཚང་མ་བདེ་བ་དང་ལྡན་པ་ཡིན་ན་བསམ་ཚེ་ཕན་གྱི་རེད། གང་ལྟར་བྱང་ཆུབ་ཀྱི་སེམས་ཀྱི་བསམ་བློ་ནི་ཧ་ཅང་ཧ་ཅང་ཤུགས་ཆེན་པོ་རེད། བསམ་བློ་འདིའི་ཐོག་ནས། ཇི་སྲིད་ནམ་མཁའ་གནས་པ་དང༌།། འགྲོ་བ་ཇི་སྲིད་གནས་གྱུར་པ།། དེ་སྲིད་བདག་ནི་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག། ཅེས་པའི་སྨོན་ལམ་འདི་ཅང་ཤུགས་ཆེན་པོ་འདུག ལོ་མང་པོའི་རིང་བྱང་ཆུབ་ཀྱི་སེམས་དང་བདག་གཞན་མཉམ་བརྗེ་ལ་སྤྱོད་འཇུག་གི་གཞུང་ནས་གཙོ་བོར་བསམ་བློ་གཏོང་གི་ཡོད། གཞུང་གཞན་དག་ཚང་མས་བྱང་ཆུབ་ཀྱི་སེམས། སེམས་པ་བཟང་པོའི་ཕན་ཡོན་ཧ་ཅང་མང་པོ་གསུངས་ཡོད། གང་ལྟར་ངོས་ཀྱིས་བྱང་ཆུབ་ཀྱི་སེམས་ལ་བསམ་བློ་གཏོང་གི་ཡོད་ལ་ཕན་ཐོགས་ཤུགས་ཆེན་པོ་འདུག ཁྱོད་རང་ཚོ་ཚང་མ་ངོས་ཀྱི་ཆོས་གྲོགས་ཡིན་པས་བྱང་ཆུབ་ཀྱི་སེམས་ལ་ག་ཚོད་ཐུབ་ཐུབ་ཀྱིས་བསམ་བློ་ཐོངས། ཞེས་བཀའ་སློབ་སྩལ་ཡོད།
