༄༅། །ཕྱི་ལོ་ ༢༠༢༢ ཟླ་ ༡༡ ཚེས་ ༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་རྡ་ས་རིགས་ལམ་སློབ་གཉེར་ཁང་གི་རིས་མེད་སློབ་དཔོན་སྐབས་ ༩ བ་ཐོན་པའི་སློབ་མ་གྲངས་ ༡༤ དང་། ཟུར་སྦྱོར་བ་ ༢ སྐབས་ ༡༧ པའི་དབུ་མ་རབ་འབྱམས་པའི་སློབ་ཐོན་པ་གྲངས་ ༢༢ དང་། ཟུར་སྦྱོང་བ་ ༤ སྐབས་ ༡༧ པའི་ཕར་ཕྱིན་རབ་འབྱམས་པའི་སློབ་ཐོན་གྲངས་ ༢༥ དང་། ཟུར་སབྱོང་བ་ ༣ བཅས་བསྡོམས་པའི་རྒྱལ་ཁབ་འདྲ་མིན་གྱི་སློབ་གཉེར་བ་གྲངས་ ༦༧ དང་། དགེ་རྒན་ ༦ ལ་རིགས་ལམ་སློབ་གཉེར་ཁང་ཡིག་ཚང་ནས་ཇི་ལྟར་སྔོན་ནས་གསོལ་བ་བཏབ་པ་ལྟར་ཕོ་བྲང་མཇལ་འཕྲད་ཁང་དུ་མཇལ་ཁ་དང་བཀའ་སློབ་སྩལ་ཡོད་པ་རེད།
དེ་ཡང་བཀའ་སློབ་སྩལ་དོན། བཀྲ་ཤིས་བདེ་ལེགས། འཛམ་གླིང་འདིར་དེ་སྔ་ཕན་ཚུན་ལ་འབྲེལ་བ་ཆེན་པོ་མེད་པའི་གནས་སྟངས་དེར་དེང་སང་དྲ་རྒྱའི་ཐོག་ནས་འབྲེལ་བ་བྱ་རྒྱུའི་མཚོན་པས་འབྲེལ་ལམ་ལས་སླ་རུ་ཕྱིན་ཡོད། དེ་ལྟ་བུའི་ཐོག་ནས་སྤྱིར་ཆོས་ལུགས་འདྲ་མིན་ལ་དོ་སྣང་བྱེད་མཁན་ཡོང་གི་ཡོད་པ་རེད། ལྷག་པར་དུ་ང་ཚོ་བོད་གངས་ཅན་གྱི་ཆོས་ལ་དེ་སྔ་དེ་ཙམ་དོ་སྣང་མེད་ཀྱང་བར་སྐབས་ཕར་ཚུར་ལ་འབྲེལ་བ་ཤུགས་ཆེ་རུ་ཕྱིན་པ་དང་། བོད་ཀྱི་ནང་ཆོས་འདི་དམིགས་བསལ་རིགས་ལམ་གྱི་ཐོག་ནས་འགྲེལ་བཤད་རྒྱག་རྒྱུ་ཡོད་པས་དོ་སྣང་བྱེད་ཀྱི་ཡོད། རྒྱ་མི་གུང་ཁྲན་གྱིས་རྨོངས་དད། རྨོངས་དད་ཟེར་གྱི་ཡོད་ཀྱང་བོད་ཀྱི་ནང་ཆོས་འདི་རྨོངས་དད་མིན་པར་རྒྱུ་མཚན་མང་པོར་བསམ་བློ་གཏོང་གི་ཡོད། ནཱ་ལེནྡྲའི་མཁས་དབང་ཚོས་གཙོ་བོ་རིགས་པའི་ལམ་ནས་གཏན་ལ་ཕབ་པ་མ་གཏོགས་བཅོམ་ལྡན་འདས་ཀྱི་བཀའ་རེད་ཅེས་དད་པ་གཅིག་པུའི་ཐོག་འགྲོ་གི་མེད། རྒྱུ་མཚན་ལ་བསམ་བློ་བཏང་ནས་འགྲོ་བཞིན་ཡོད། ང་ཚོ་བོད་གངས་ཅན་གྱི་ལྗོངས་སུ་མཁན་ཆེན་ཞི་བ་འཚོ་དང་སློབ་དཔོན་ཀ་མ་ལ་ཤཱི་ལ་སོགས་ཀྱིས་ཀླུ་སྒྲུབ་ཡབ་སྲས་ཀྱི་དགོངས་པ་གཙོ་འདོན་གྱིས་རིགས་པ་གཙོ་བོར་བྱས་ཡོད།
དེ་སྔ་བོད་དུ་སློབ་སྦྱོང་མེད་མཁན་ཚོ་གནས་ཚུལ་ཁ་ཁ་རེད། སློབ་སྦྱོང་ཡོད་མཁན་ཚོས་རིགས་པའི་ལམ་ནས་དཔྱད་པ་བྱེད་པ་གཙོ་བོར་བྱས་པ་རེད། ང་ཚོ་ཚུར་སླེབས་ནས་ཀྱང་རིགས་པའི་ལམ་ནས་དཔྱད་པ་བྱེད་རྒྱུ་གཙོ་བོ་ཡིན་པས་ཚན་རིག་པའི་ནང་ནས་དམིགས་བསལ་གྱིས་དོ་སྣང་བྱེད་མཁན་ཡོང་གི་འདུག ལྷག་པར་དུ་སེམས་ཁམས་རིག་པ་རེད། ཆོས་ལུགས་མང་ཆེ་བར་དད་པ་གཙོ་བོར་བྱེད་མ་པ་གཏོགས་རྒྱུ་མཚན་ལ་བསམ་བློ་གཏོང་བ་དང་། བསམ་བློའིི་འགྲོ་སྟངས་ཇི་ལྟར་ཡིན་པའམ་སེམས་ཁམས་ཀྱི་འགྲོ་སྟངས་སྐོར་ལ་དེ་ཙམ་དོ་སྣང་ཡོད་པ་མ་རེད། ང་ཚོས་ཐོག་མ་བློ་རིག་ལ་བལྟ་བའི་སྐབས་ནས་བཟུང་བློའི་འགྲོ་སྟངས་བསླབ་ཡོད་པས་དེ་དེང་སང་གི་དུས་ཚོད་ལ་ཆོས་དད་ཡོད་ཀྱང་མེད་ཀྱང་། ནང་པ་ཡིན་ཡང་མིན་ཡང་། སེམས་ཁམས་རིག་པའི་སྐོར་ལ་སློབ་སྦྱོང་བྱས་པ་དེས་ཧ་ཅང་ཕན་ཐོགས་ཡོད་པ་དངོས་ཡོད་གནས་ཚུལ་རེད། ཚན་རིག་པ་ཚོས་ཀྱང་དོ་སྣང་དང་དགའ་བོ་བྱེད་ཀྱི་འདུག དེར་བརྟེན། དེ་སྔ་བོད་གངས་ཅན་ལྗོངས་སུ་མཁས་གྲུབ་གཉིས་ལྡན་གྱི་སྐྱེས་བུ་དམ་པ་མང་པོ་བྱུང་ནས་བསྟན་པའི་ལག་རྗེས་ཡོད་པས་དེང་སང་ཆབ་སྲིད་ཀྱི་ཐོག་ནས་རྒྱ་མི་གུང་ཁྲན་གྱིས་བོད་ལ་དབང་བསྒྱུར་གྱིས་ཧ་ཅང་དམ་དྲག་བྱེད་བཞིན་ཡོད་ཀྱང་། བསམ་བློར་འགྱུར་བ་ཁྱོན་ནས་གཏོང་མ་ཐུབ་པར་ཧ་ཅང་བརྟན་པོ་རེད། བོད་ནང་གི་རྒྱ་ཆེའི་མི་མང་རྣམས་སངས་རྒྱས་པའི་ཆོས་ལ་དད་པ་དང་། ༸རྒྱལ་བ་རིན་པོ་ཆེར་དགའ་བོ་བྱེད་པ་ནི་འགྱུར་བ་མེད་པར་ཧ་ཅང་བརྟན་པོ་རེད།
ངོས་རང་སྐྱེས་ས་མདོ་སྨད་ནས་དབུས་གཙང་དུ་ཡོང་ནས་ཡོངས་འཛིན་རྣམ་པའི་ཐུགས་རྗེ་བཀའ་དྲིན་ལ་རྟེན་ནས་སློབ་གཉེར་ཏོག་ཙམ་བརྒྱབ་པ་དང་། ཐ་མ་ངོས་ཀྱིས་གྲྭ་སྐོར་བྱས་པ་དང་། དགེ་བཤེས་ལྷ་རམས་པའི་དམ་བཅའ་བཞག་པ་ཡིན། ནང་པ་སངས་རྒྱས་པའི་ཆོས་གཅིག་པ་ཐའེ་ལན་དང་། ཝེ་ནམ། ཤྲི་ལངྒ་སོགས་ཆོས་ལ་དད་པ་ཧ་ཅང་ཆེན་པོ་རེད་དེ་སློབ་གཉེར་གཏིང་ཟབ་མོ་ཞིག་ཡོད་པ་མ་རེད། འདི་ཧ་ཅང་གསལ་བོ་རེད། བོད་གངས་ཅན་གྱི་ལྗོངས་སུ་སློབ་གཉེར་ཧ་ཅང་གཏིང་ཟབ་མོ་དང་། ལོ་སུམ་ཅུ་བཞི་བཅུར་པོ་ཏི་ལྔ་ལ་སློབ་སྦྱོང་བྱས་ཏེ་དགེ་བཤེས་འཇོག་གི་ཡོད། དེར་བརྟེན། ནང་པའི་ཡུལ་གྲུ་ཁག་ལས་བོད་ནི་རིགས་ལམ་གྱི་ཐོག་ནས་སློབ་གཉེར་གནང་མཁན་གཅིག་པུ་རེད། ཧ་ཅང་གཏིང་ཟབ་པོ་དང་རྒྱ་ཆེན་པོ་རེད། ཧ་ཅང་ཡག་པོ་རེད།
བོད་དུ་ཡོད་པའི་རྒྱ་ཆེའི་མི་མང་གིས་ང་ཚོའི་ཕ་མེས་ནས་ཡོད་པའི་ལུང་རྟོགས་ཀྱི་བདག་ཉིད་ཅན་གྱི་སངས་རྒྱས་པའི་ཆོས་འདི་ལ་སོ་སོའི་མི་རིགས་ཀྱི་ཞེན་ཁོག་རེད་ལ། གང་ལྟར་བསམ་བློ་ཏོག་ཙམ་ཡོད་མཁན་ཚོས་རྒྱུ་མཚན་ལྡན་པ་ཞིག་ལ་མཐོང་ནས་དམིགས་བསལ་དོ་སྣང་ཞིག་ཡོང་གི་འདུག ངོས་ཀྱི་ངོ་ཤེས་པ་ཁ་ཤས་ཀྱིས། རྒྱའི་མཁས་དབང་དེ་འདྲས་ང་ཚོས་འདི་ནས་དཔར་འདེབས་བྱས་པའི་དེབ་ལ་བལྟས་ཏེ་བོད་ཀྱི་ནང་ཆོས་འདི་ནཱ་ལེནྡྲའི་ཆོས་བརྒྱུད་དྲི་མ་མེད་པ་དང་། ཚན་རིག་དང་མཐུན་པ་རེད་ཅེས་དོ་སྣང་དམིགས་བསལ་བྱེད་མཁན་ཡོང་གི་འདུག་ཟེར། ང་ཚོའི་བོད་པ་ཁ་ཤས་ཀྱིས་བཤད་རྒྱུར། རྒྱ་གུང་ཁྲན་གྱིས་བོད་དབང་བསྒྱུར་བྱས་ནས་བོད་གངས་ཅན་པའི་ཆོས་དང་རིག་གཞུང་གི་བསམ་བློར་འགྱུར་བ་གཏོང་བའི་འབད་བརྩོན་རིམ་པར་བྱས་པ་དང་། འཇམ་རྩུབ་སྣ་ཚོགས་ཀྱི་ཐོག་ནས་ཐབས་ཤེས་མང་པོ་བྱས་ཀྱང་གང་ཡང་བྱུང་མེད། དེའི་ཚབ་ལ་རྒྱ་རིགས་ནང་ནས་བོད་ཀྱི་ནང་ཆོས་ལ་དོ་སྣང་ཤུགས་ཆེ་རུ་འགྲོ་བཞིན་འདུག་ཟེར། ངོས་རང་འདིར་༸རྒྱལ་བ་རིན་པོ་ཆེ་ཞེས་བོད་ཀྱི་ཆོས་དང་སྲིད་ཀྱི་འགན་ཡོད་པ་མཐོང་གི་ཡོད་པ་རེད། དེ་སྔ་ཡིན་ན་རྒྱ་མིས་ཏཱ་ལེ་ལོག་སྤྱོད་པ་ཞེས་བཤད་ཀྱི་ཡོད། དེང་སང་ཏཱ་ལའི་བླ་མ་ཟེར་དུས་ཤེས་ཡོན་ཅན་ཞིག་ལ་བརྩི་གི་འདུག རྒྱ་རིགས་ནང་དུ་ངོས་ཀྱིས་ནང་ཆོས་འགྲེལ་བཤད་བརྒྱབ་པའི་སྐད་འཁོར་ལ་དོ་སྣང་བྱེད་མཁན་ཤུགས་ཆེ་རུ་འགྲོ་གི་འདུག འཛམ་གླིང་འདིར་དངོས་ཡོད་གནས་ཚུལ་ལ་སྤྱིར་ནང་པའི་ཆོས་དང་། དེའི་ནང་ཚན་ནས་བོད་གངས་ཅན་གྱི་ལྗོངས་སུ་ཡོད་པའི་སངས་རྒྱས་པའི་ཆོས་འདི་ལ་དོ་སྣང་བྱེད་མཁན་ཇེ་མང་ཇེ་མང་ལ་འགྲོ་གི་འདུག ཁ་ཤས་ཀྱིས་ངོས་ལ། རྒྱ་མིས་ཆབ་སྲིད་ཀྱི་ཐོག་ནས་བོད་དབང་བསྒྱུར་བྱས་པ་རེད་དེ། ཆོས་ཕྱོགས་ཀྱི་ཐོག་ནས་མར་རྒྱ་ནག་ལ་འགྲོ་དོན་ཤུགས་ཆེ་ཙམ་ཡོང་ཐུབ་པ་བཤད་མཁན་འདུག དེ་ཕལ་ཆེར་ཡོང་སྲིད་པ་ལྟ་བུ་ཞིག་རེད། ང་ཚོའི་མི་རབས་འདིས་སངས་རྒྱས་ཀྱི་བསྟན་པ་དེ་སྔ་དར་བ་དང་། བར་སྐབས་ཉམས་ཡོད་པ་ཚོ་ལ་བསྟན་པ་ཉམས་པ་སླར་གསོ་དང་། དེ་ནས་མི་ཉམས་གོང་ནས་གོང་དུ་སྤེལ་བ་ཡོང་བའི་གནས་ཚུལ་ཞིག་ཆགས་ཀྱི་འདུག ཁྱོད་རང་ཚོས་གྲྭ་སར་སློབ་གཉེར་རྒྱག་ཡོད་པ་རེད། བོད་གངས་ཅན་ལྗོངས་སུ་ལོ་ངོ་སྟོང་ཕྲག་རིང་ལ་ཐོག་མར་བསྡུས་གྲྭ་ནས་བློ་རིགས། རྟགས་རིགས། ཕར་ཕྱིན་སྦྱོང་གི་ཡོད། མང་ཆེ་བས་ཆུང་ཆུང་སྐབས་ནས་མངོན་རྟོགས་རྒྱན་དང་དབུ་མ་འཇུག་པ་བློ་ལ་འཛིན་གྱི་ཡོད། རྒྱ་གར་ལ་སླེབས་ནས་ངོས་ཀྱིས་དང་དོད་བྱས་ཏེ་མཛོད་རྩ་བ་བློ་ལ་བཟུང་བ་ཡིན། ག་ལེར་བསམ་བློ་གཏོང་དུས། ཉི་ཟླ་ལྷུན་པོའི་ཕྱེད་ནའོ།། དཔག་ཚད་ལྔ་བཅུ་གཅིག་དང་བཅས།། ཞེས་སོགས་གསུངས་པ་ལ་ངོས་རང་ཡིད་ཆེས་མེད།
སློབ་དཔོན་དབྱིག་གཉེན་གྱིས་སྐབས་དེའི་རྒྱ་གར་གྱི་ཆོས་པ་ཚོའི་གྲགས་ཚོད་དང་བསྟུན་ནས་གསུངས་པ་མ་གཏོགས་སློབ་དཔོན་དབྱིན་གཉེན་བཞུགས་ཡོད་ན་རི་རབ་གང་དུ་ཡོད་པ་རེད་ཅེས་བཀའ་འདྲི་ཞུ་དགོས། ཉི་ཟླ་ལྷུན་པོའི་ཕྱེད་ནའོ།། དཔག་ཚད་ལྔ་བཅུ་གཅིག་དང་བཅས།། ནམ་ཕྱེད་ཉི་མ་ནུབ་པ་དང༌།། ཉི་མ་ཕྱེད་དང་འཆར་དུས་གཅིག། ཅེས་སོགས་སྐབས་དེར་གྲགས་ཚོད་རེད་མ་གཏོགས་དབྱིན་གཉེན་གྱིས་མཐའ་གཅིག་ཏུ་ཡིད་ཆེས་གནང་གི་ཡོད་ན་མེད་ན་མི་ཤེས། ཡིད་ཆེས་གནང་གི་ཡོད་ན་དེང་སང་ཚ་དང་འཁོར་གསུམ་མང་པོ་རྒྱག་རྒྱུ་ཡོད་པ་རེད།
ཚད་མ་རྣམ་འགྲེལ་ཧ་ཅང་ཡག་པོ་རེད། ཚད་མ་ཀུན་བཏུས་ཀྱི་མཆོད་བརྗོད་དུ། ཚད་མར་གྱུར་པ་འགྲོ་ལ་ཕན་བཞེད་པ།། སྟོན་པ་བདེ་གཤེགས་སྐྱོབ་ལ་ཕྱག་འཚལ་ནས།། ཞེས་གསུངས་པ་ནི་ཧ་ལས་པ་ཞིག་རེད། རྗེ་རིན་པོ་ཆེས་རྟོགས་བརྗོད་འདུན་ལེགས་མ་ལས། ཚད་མ་ཀུན་ལས་བཏུས་པའི་མཆོད་བརྗོད་དོན།། ཚད་མ་གྲུབ་པར་ལུགས་འབྱུང་ལུགས་ལྡོག་གིས།། རྣམ་གྲོལ་དོན་དུ་གཉེར་ལ་བཅོམ་ལྡན་འདས།། ཚད་མར་བསྒྲུབས་ཤིང་དེ་ལས་དེ་ཡི་ནི།། བསྟན་པ་ཁོ་ན་ཐར་འདོད་འཇུག་ངོགས་སུ།། ངེས་པ་གཏིང་ནས་རྙེད་པ་་་།། ཞེས་གཞན་དང་མ་འདྲ་བ་ཞིག་འདུག་གསུངས་པ་ཧ་ཅང་བདེན་པ་རེད། ཧ་ཅང་ཡག་པོ་རེད། ངོས་རང་ལ་ཆ་གཞག་ན་རྒྱ་གར་ལ་སླེབས་ནས་དེ་སྔ་དཔེ་ཆར་བལྟས་ཟིན་པ་ལ་བསྐྱར་ལོག་བརྒྱབ་ནས་བལྟས་ཡོང་དུས་ཚད་མའི་འགྲོ་སྟངས་ནི་ཧ་ཅང་ཡག་པོ་རེད། གང་ལྟར་སངས་རྒྱས་པའི་ཆོས་ལ་རྒྱུ་མཚན་གྱི་ཐོག་ནས་དཔྱད་པ་བྱེད་པ་ཞིག་དང་། དེའི་ཐོག་ལ་ལྟ་གྲུབ་ནི་ཀླུ་སྒྲུབ་ཀྱི་ལྟ་གྲུབ་རྣམས་སྣོན་པ་བརྒྱབ་ཡོང་དུས་བོད་ཀྱི་སངས་རྒྱས་པའི་ཆོས་ཀྱི་འགྲོ་སྟངས་ནི་ཧ་ཅང་ཡག་པོ་རེད། རྒྱུ་མཚན་ལ་བསམ་བློ་བཏང་བ་ཚུར་གཤིས་རྒྱུད་ལ་སྦྱར་ཡོང་སྐབས་བྱམས་སྙིང་རྗེ་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བའི་ཐོག་ལ་བབ་ཡོང་བ་ཧ་ཅང་ཡག་པོ་རེད།
ངོས་ལ་ཆ་གཞག་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བར་རྒྱུན་དུ་བསམ་བློ་གཏོང་གི་ཡོད། དངོས་གནས་དྲང་གནས་ལོ་དང་ཟླ་བར་སྦྲེལ་ནས་བསམ་བློ་གཏོང་དུས་སེམས་ལ་འགུལ་སྐྱོད་ཐེབས་པ་ཞིག་ཡོང་གི་འདུག དེར་བརྟེན། བོད་གངས་ཅན་གྱི་ལྗོངས་ཀྱི་སྔོན་བྱོན་སྐྱེས་བུ་དམ་པ་ཚོས་གཏན་ལ་ཕབ་པའི་གཞུང་ཆེན་མོར་སློབ་སྦྱོང་བྱེད་པ་ནི་སྤོབས་པ་ཚ་དྲག་པའི་སྐྱོན་ཡོད་ན་མ་གཏོགས། ཕལ་ཆེར་འཛམ་བུ་གླིང་གི་སྤྱི་ནོར་ཆགས་ཡོད། དེང་སང་འཛམ་གླིང་འདིར་དངོས་པོ་ཡར་རྒྱས་རྐྱང་པ་མ་གཏོགས་སེམས་ཁམས་རིག་པའི་སྐོར་ལ་བཤད་མཁན་དཀོན་པོ་རེད། སེམས་ཁམས་རིག་པ་བཤད་ནས་བློ་ཇི་ལྟར་འདུལ་ཐབས་བྱེད་ལུགས་ནི་ང་ཚོ་བོད་གངས་ཅན་ལྗོངས་ཀྱི་གཞུང་ཆེན་དག་ལ་སློབ་སྦྱོང་བྱ་རྒྱུ་ཧ་ཅང་ཡག་པོ་རེད། མཐའ་གཅིག་ཏུ་ཆོས་དད་ཡོད་མེད་ཀྱི་སྐད་ཆ་མིན་པར་ཆོས་དད་མེད་ནའང་སེམས་ཇི་ལྟར་ཞི་བདེ་བཟོ་དགོས་པ་ཤེས་དགོས། ཁོང་ཁྲོ་དང་ང་རྒྱལ་གྱིས་སེམས་མ་སྐྱིད་པ་བཟོ་བཞིན་ཡོད། དེ་དག་སེལ་བར་ལྟ་གྲུབ་ཧ་ཅང་གསལ་བོ་ཞིག་བཤད་ཀྱི་ཡོད། བྱང་ཆུབ་སེམས་མཆོག་གི་སྐོར་ཡང་ཧ་ཅང་གསལ་བོ་བཤད་ཀྱི་ཡོད། དེ་དག་ལ་བསམ་བློ་གཏོང་དུས་དངོས་གནས་སེམས་ལ་ཞི་སྒྲུབ་རྒྱུ་ཡོད་པ་ཞིག་དང་། བླ་མ་མཁྱེན་ཟེར་བ་དང་། སངས་རྒྱས་མཁྱེན་ཟེར་བ་གཅིག་པུ་མིན་པར་བསམ་བློ་གཏོང་དུས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བས་ཁ་ཡོད་ལག་ཡོད་ཀྱིས་སེམས་ལ་འགུལ་སྐྱོད་ཐེབས་རྒྱུ་ཡོད་པ་ནི་ཧ་ལས་པ་ཞིག་རེད།
བོད་གངས་ལྗོངས་ཀྱི་སངས་རྒྱས་པའི་ཆོས་ཚུལ་རྒྱ་ཆེ་གཏིང་ཟབ་དང་། ཚན་རིག་གི་ལམ་ནས་མོས་པ་སླེབས་པ། ཚན་རིག་པ་ཚོས་ཡིད་ཆེས་སླེབས་པ་ཞིག་ཡོད་པ་རེད། མཛོད་ལྟེབ་ནས་བཞག་ན་འགྲིག་གི་འདུག དཔལ་ལྡན་ཟླ་བ་གྲགས་པས་དབྱིན་གཉེན་སོགས་ཀྱིས་ཟབ་མོའི་དགོངས་དོན་གསལ་བོ་རྟོགས་ཡོད་པ་མ་རེད། ཅེས་འཇུག་པ་རང་འགྲེལ་ན་གསལ་བོ་འདུག དཔལ་ལྡན་ཟླ་བ་གྲགས་པས་སློབ་དཔོན་དབྱིན་གཉེན་ཧ་ཅང་རྩ་ཆེན་པོ་རེད་ཅེས་ཟུར་ལ་བཞག་ཡོད་པ་རེད། ངོས་ཀྱང་དེ་རང་ཡིན། དཔལ་ལྡན་ཟླ་བ་གྲགས་པའི་རྗེས་འབྲང་དང་རིགས་པའི་ལམ་ནས་དཔྱད་པ་བྱེད་མཁན་ཞིག་ཡིན་པས་གནས་བརྟན་དབྱིག་གཉེན་སོགས་ཀྱིས་བཀའ་མོལ་མང་པོ་མ་གནང་ནས་བཞུགས་རོགས་གནང་ཞུ་དགོས་པ་ལྟ་བུ་ཆགས་ཀྱི་འདུག གང་ལྟར་བོད་གངས་ཅན་གྱི་ལྗོངས་ལ་ཡོད་པའི་དབུ་ཕར་གཙོ་བོ་བྱས་ཏེ། དེ་ཡང་རིགས་ལམ་གྱི་ཐོག་ནས་འགྲོ་རྒྱུ་ཡོད་པ་ནི་ཧ་ཅང་སྤུས་དག་པོ་རེད། ཁྱོད་རང་ཚོ་སློབ་སྦྱོང་བྱེད་མཁན་རེད། ཧུར་ཐག་གནང་ཤོག
བར་སྐབས་བོད་ལ་ས་དགེ་བཀའ་རྙིང་ཟེར་བ་སོགས་གྲུབ་མཐའི་འཐེན་འཁྱེར་ཅུང་ཡོང་གི་ཡོད་པ་རེད། དེ་ནི་བློ་ཆུང་ཕན་བཏགས་ཟེར་བ་དེ་རེད། གང་ལྟར་བོད་གངས་ཅན་གྱི་ལྗོངས་ལ་ཆོས་ལུགས་ཀྱི་འཐེན་འཁྱེར་ཏོག་ཙམ་ཡོང་བསྡད་པ་རེད། ང་ཚོ་བཀའ་བརྒྱུད་པ་ཡིན། ང་ཚོ་ས་སྐྱ་བ་ཡིན། ང་ཚོ་དགེ་ལུགས་ཡིན་ཟེར་བ་ལྟ་བུ་ཡོང་བ་རེད། དེ་དག་ནི་གཞུང་བལྟ་རྒྱུ་ཅུང་མ་འདྲ་བས་རེད། སྔོན་གྱི་ས་དགེ་བཀའ་རྙིང་རིས་སུ་མ་ཆད་པའི་མཁས་པའི་དབང་པོ་ཚོས་མཛད་པའི་གཞུང་དེ་དག་མཐོང་བ་ཡིན་ན་ང་ཚོ་བཀའ་བརྒྱུད་པ་ཡིན། ང་ཚོ་ས་སྐྱ་བ་ཡིན། ང་ཚོ་དགེ་ལུགས་ཡིན་ལྟ་བུ་མང་པོ་བཤད་ས་མེད་པ་རེད། དོན་དག་བྱེ་བྲག་པ་ལ་གསལ་འདོན་བྱས་ཏེ་གསུངས་པ་དེ་འདྲ་ཡོད་པ་རེད། དེ་ནི་གནས་ཚུལ་ཁ་ཁ་རེད། དེར་བརྟེན། ངོས་ཀྱི་ངོས་ནས་ས་དགེ་བཀའ་རྙིང་རིས་སུ་མ་ཆད་པའི་གཞུང་རྣམས་ལ་ཞར་ཞོར་ལ་བལྟས་པ་དང་། གཙོ་བོ་ཀླུ་སྒྲུབ་ཡབ་སྲས་དང་རྒྱ་གར་མཁས་པའི་གཞུང་རྩ་བར་གཞག་ནས་འགྲོ་གི་ཡོད། ཁྱེད་རང་ཚོས་ཀྱང་དེ་བཞིན་དགོངས་པ་བཞེས། དེ་སྔ་མེད་པ་དེང་སང་གནས་ཚུལ་གསར་པ་གཅིག་ནི་ཚན་རིག་གི་གནས་ཚུལ་ཆགས་ཀྱི་ཡོད། དེ་ཡང་ང་ཚོས་དོ་སྣང་བྱེད་དགོས་པ་ཞིག་ཆགས་ཡོད། འགལ་བ་གང་ཡང་ཡོད་པ་མ་རེད། ཚན་རིག་གི་ཐོག་ནས་མཐོང་བ་མངོན་གྱུར་གྱི་སྐོར་བཤད་ཀྱི་ཡོད་པ་རེད་མ་གཏོགས་ཅུང་ཟད་ལྐོག་གྱུར་དང་། ཤིན་ཏུ་ལྐོག་གྱུར་གྱི་སྐོར་ལ་གང་ཡང་ཤེས་ཀྱི་མ་རེད། དེར་བརྟེན། བོད་གངས་ཅན་ལྗོངས་ཀྱི་སྔོན་གྱི་མཁས་པའི་དབང་པོ་ཚོས་སྲེག་བཅད་བརྡར་གསུམ་གནང་བའི་གཞུང་ཆེན་ཡོད་པ་འདི་ང་ཚོའི་ཚོང་དང་འདྲ་ན་མ་རྩ་ལྟེ་བ་རེད། དེའི་ཐོག་ལ་དེང་སང་གི་ཚན་རིག་སྣོན་པ་རྒྱག་རྒྱུ་ཡོད་པ་ཞིག་ཆགས་ཡོད། དེ་ལྟར་ཡིན། ཐུགས་རྗེ་ཆེ། ཞེས་བཀའ་སློབ་སྩལ་ཡོད།
