༄༅། །ཕྱི་ལོ་ ༢༠༢༢ ཟླ་ ༡༠ ཚེས་ ༢༦ ཉིན་གྱི་སྔ་དྲོ་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་ཕྲུག་ཁྱིམ་སྡེའི་དགེ་ལས་སློབ་ཕྲུག་དང་། དགེ་ལས་སློབ་ཟུར་ཡོངས། དེ་བཞིན་བྱང་ཨ་རིའི་བོད་རིགས་སྤྱི་མཐུན་ཚོགས་པ་ཁག་ཐུན་མོང་ནས་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་བསྟར་འབུལ་ཞུས་ཡོད་པ་རེད།
དེ་ཡང་ཞོགས་པའི་ཆུ་ཚོད་ ༨།༠༠ ཐོག་རྡ་རམ་ས་ལའི་བཞུགས་སྒར་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་སྒྱུར་སྐབས་ཕོ་བྲང་རྒྱལ་སྒོ་རུ་རྣམ་གྲྭའི་སྤྱན་རྒྱ་སྤོས་འཛིན་དང་། སྦྱིན་བདག་ཁག་གཉིས་ནས་སྤོས་སྣེ། རང་རིགས་གཙོས་སེར་སྐྱ་སྟོང་ཕྲག་མང་པོས་ཕེབས་བསུ་གཟབ་རྒྱས་དང་བཅས་བཞུགས་ཁྲིར་༸ཞབས་སོར་འཁོད་མཚམས་བརྟན་བཞུགས་ཀྱི་དབུ་བཞུགས་གླིང་མཆོག་སྤྲུལ་རིན་པོ་ཆེ་མཆོག་གིས་མཇལ་དར་རྐྱལ་འབུལ་ཞུས་པ་དང་། གུ་རུའི་ཐུགས་དམ་གནད་བསྐུལ་དང་༸རྒྱལ་བའི་འཁྲུངས་རབས་གསོལ་འདེབས་གསུང་མུར་རྟེན་འབྱུང་གྲོ་མ་འབྲས་སིལ་སོགས་རིམ་པར་ཕེབས་ཏེ། བརྟན་བཞུགས་དངོས་གཞི་བླ་མ་ལྷར་བསྐྱེད་ནས་བཟུང་ཞལ་འདོན་ཐར་ཆགས་སུ་གསུང་པ་སོགས་བརྟན་བཞུགས་ཀྱི་ཆོ་ག་རིམ་པར་ཕེབས་ཏེ་བོད་ཁྱིམ་སྤྱི་ཁྱབ་གཙོ་འཛིན་བསོད་ནམས་སྲིད་གཅོད་ལགས་དང་། བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་སྒྲུབ་ལགས་གཉིས་ཀྱིས་མཎྜལ་ཚོམ་བུ་ཟུར་འདེགས་ཞུས་པ་དང་། ༸རྒྱལ་བའི་ཞབས་བརྟན་གསུངས་མུར་བྱང་ཨ་རིའི་སྐུ་ཚབ་དོན་གཅོད་དང་། བོད་ཁྱིམ་སྤྱི་ཁྱབ་ཟུར་པ་སྐུའི་གཅུང་མོ་རྗེ་བཙུན་པདྨ་མཆོག་རྣམ་གཉིས་ཀྱིས་མཎྜལ་རྟེན་གསུམ་འདེགས་འབུལ་དང་འབྲེལ་བརྟན་བཞུགས་གོ་སྒྲིག་ཞུ་མཁན་གྱི་འཐུས་མི་ཉི་ཤུ་སྐོར་ལ་མཇལ་ཁ་སྩལ་བ་དང་། བོད་ཁྱིམ་སློབ་ཕྲུག་ནས་༸གོང་ས་མཆོག་གི་སྐུ་ཚེ་ཞབས་པད་བརྟན་པའི་གསོལ་འདེབས་བསྟོད་གླུ་གཟིགས་འབུལ་རྗེས་བཀའ་སློབ་སྩལ་དོན།
དེ་རིང་འདིར་དངོས་སུ་ང་ཚོ་བཙན་བྱོལ་ལ་ཡོད་པའི་བོད་མི་སེར་སྐྱ་རྒན་གཞོན་ཚང་མས་གདུང་ཤུགས་གཅིག་སྒྲིལ་གྱི་ཐོག་ནས་བརྟན་བཞུགས་ཕུལ་བ་རེད། དེ་ནས་ལུས་པོ་འདིར་འཁོད་མེད་ཀྱང་བོད་གངས་ཅན་གྱི་ལྗོངས་སུ་ཡོད་པའི་བོད་མི་སེར་སྐྱ་ས་ཡ་ཁ་ཤས་ཤིག་ཡོད་པ་ཚང་མ་སྙིང་ཁུངས་རུས་པའི་གཏིང་ནས་ངོས་ལ་དགའ་བ་དང་། དད་པ་ཡོད་མཁན་ཡིན་པས་ཚང་མས་སྨོན་ལམ་རྒྱག་གི་རེད། དེ་ཙམ་དུ་མ་ཟད་ངོས་ལ་དགའ་བོ་བྱེད་མཁན་འཛམ་གླིང་ལྷོ་བྱང་ཤར་ནུབ་གང་སར་ཡོད་པ་རེད། དེ་དག་ཚང་མས་དེ་རིང་༸རྒྱལ་བ་རིན་པོ་ཆེར་བརྟན་བཞུགས་ཕུལ་གྱི་ཡོད་པ་རེད་ཅེས་སེམས་དགའ་སྤྲོའི་ངང་བསྡད་ཡོད་པ་རེད། དེ་དག་ཚང་མར་ངོས་ཀྱིས་ཐུགས་རྗེ་ཆེ་ཞུ་རྒྱུ་ཡིན།
བོད་གངས་ཅན་གྱི་ལྗོངས་འདི་འཕགས་པ་སྤྱན་རས་གཟིགས་ཀྱི་གདུལ་ཞིང་ཡིན་པ་ང་ཚོ་ཚང་མས་ཤེས་གསལ་དང་། ཡོངས་གྲགས་རེད། འཕགས་པ་སྤྱན་རས་གཟིགས་ཟག་བཅས་ཉེར་ལེན་གྱི་ཕུང་བོ་དང་བཅས་གདུལ་བྱ་ལ་དོན་བྱེད་མཁན་གྱི་ལུང་སྐུ་དང་སྤྲུལ་སྐུའི་རྣམ་པར་དངོས་སུ་མཐོང་རྒྱུ་ཡོད་པ་མ་རེད། འཕགས་པ་སྤྱན་རས་གཟིགས་ཀྱིས་བྱིན་གྱིས་རླབས་པའི་ལས་དང་སྨོན་ལམ་གྱི་འབྲེལ་བ་ཞིག་གི་ཐོག་ནས་འབྲེལ་བ་ཡོང་གི་ཡོད་པ་རེད། ངོས་རང་ལ་མཚོན་ན་བོད་བྱང་ཤར་གྱི་མཚམས་ནས་སྐྱེས་པ་ཞིག་དང་། ལས་དང་སྨོན་ལམ་གྱི་ཐོག་ནས་འབྲེལ་བ་ཤུགས་ཆེན་ཏན་ཏན་ཡོད་པ་ཞིག་རེད། དུས་ད་ལྟའི་བར་གྱི་ལོ་ཡུན་འདིར་ངོས་ཀྱིས་དངོས་གནས་བོད་བསྟན་སྲིད་རིག་གཞུང་གི་ཐོག་ལ་བྱས་རྗེས་བཞག་ཡོད། མིག་མཐོང་ལག་ཟིན་གྱི་བྱས་རྗེས་ཤིག་ངོས་ཀྱིས་བཞག་ཡོད། བོད་ཀྱི་ཆོས་དང་རིག་གཞུང་ཟེར་དུས་འཛམ་གླིང་འདིར་མཐོང་ཡོད་པ་ཞིག་ཆགས་ཡོད། དེ་ངོས་ཀྱིས་བྱས་རྗེས་བཞག་པ་རེད། དེ་ནི་འཕགས་པ་སྤྱན་རས་གཟིགས་ལ་སྒྲུབ་པའི་མཆོད་པ་ཡིན། འཕགས་པ་སྤྱན་རས་གཟིགས་ཐུགས་དགྱེས་པའི་སྒོ་ནས་ངོས་ལ་བྱིན་རླབས་གནང་སྟེ་ད་དུང་འབྱུང་འགྱུར་ལོ་བཅུ་ཕྲག་གཉིས་རིང་སྡོད་ཐུབ་པ་ཞིག་དང་། ངོས་ཀྱི་རྨི་ལམ་དུའང་ལོ་བརྒྱ་དང་བཅུ་སྐོར་ཐོན་ཡོང་གི་འདུག དེར་བརྟེན། ངོས་ཀྱིས་མུ་མཐུད་དུ་བོད་བསྟན་སྲིད་ཀྱི་དོན་དུ་འཕགས་པ་སྤྱན་རས་གཟིགས་ཀྱི་བྱིན་རླབས་འཁྱེར་ནས་བྱས་རྗེས་འཇོག་གི་རེད། ངོས་ཀྱིས་ལྷག་བསམ་རྣམ་དག་བྱས་པའི་རིན་པ་ལྟ་བུ་ལ་འཛམ་གླིང་གི་མི་མང་པོས་ངོས་ལ་དགའ་བོ་བྱེད་ཀྱི་འདུག དངུལ་སྤྲད་ནས་དགའ་བོ་བྱེད་ཀྱི་ཡོད་པ་མ་རེད། ངོས་ཀྱིས་བསམ་པ་རྣམ་དག་གིས་ཕན་སེམས་བྱས་པས་མི་མང་པོས་དགའ་བོ་བྱེད་ཀྱི་འདུག ངོས་ཀྱིས་འཕགས་པ་སྤྱན་རས་གཟིགས་ཀྱི་སྐུ་ཡི་སྐུ་ཚབ་དང་། ཐུགས་ཀྱི་ཐུགས་ཚབ། གསུང་གི་གསུང་ཚབ་བྱས་ཏེ་མོས་གུས་བྱེད་པ་ནི་འཕགས་པ་སྤྱན་རས་གཟིགས་ལ་སྒྲུབ་པའི་མཆོད་པ་ཡིན། ཞེས་དང་།
མུ་མཐུད་བྱང་ཆུབ་ཀྱི་སེམས་ཀྱི་སྐོར་ལ་བཀའ་སློབ་སྩལ་དོན། ངོས་ཀྱིས་ད་ལྟའི་བར་དུ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམ་གྱི་ཡོད། བྱང་ཆུབ་ཀྱི་སེམས་སྒོམ་པའི་ལག་རྗེས་ལ་སེམས་སྐྱིད་པ་དང་། སེམས་སྐྱིད་པའི་ཐོག་ནས་ལུས་པོ་བདེ་བ་ཏན་ཏན་འདུག ཉིན་རེ་བཞིན་དུ་ཞོགས་པ་ཡར་ལངས་པ་བྱང་ཆུབ་ཀྱི་སེམས་ལ་བསམ་བློ་གཏོང་གི་ཡོད། སྙིང་ཁུངས་རུས་པའི་གཏིང་ནས་ཞི་བདེ་ཞིག་དང་། སེམས་ལྷོད་ཤིག་གེར་སྡོད་པ་ཞིག་ཡོང་གི་འདུག ཞེད་སྣང་དང་། དངངས་སྐྲག་ཁྱོན་ནས་མེད་པར་སྙིང་སྟོབས་ཤིག་ཀྱང་ཡོང་གི་འདུག དེར་བརྟེན། ངོས་ཀྱིས་ཞི་བ་ལྷའི་དགོངས་པ་ལྟར་བྱང་ཆུབ་ཀྱི་སེམས་སྒོམ་པ་ནི་ཉམས་ལེན་གྱི་མཐིལ་དུ་བྱེད་བཞིན་ཡོད། གཞན་དོན་དུ་རྫོགས་བྱང་དོན་གཉེར་གྱི་བློ་སྒོམ་གྱི་ཡོད་ཀྱང་། ཕན་པ་ནི་ངོས་རང་ཉིད་ཀྱི་ལུས་པོ་བདེ་ཐང་དང་སེམས་ཀྱི་ཞི་བདེ་ལ་ཧ་ཅང་ཕན་གྱི་འདུག དེར་བརྟེན། ངོས་ཀྱི་ཆོས་གྲོགས་ཚོས་ཀྱང་བྱང་ཆུབ་ཀྱི་སེམས་ལ་དགོངས་པ་ཡག་པོ་བཞེས་དང་། སོ་སོའི་ལུས་བདེ་བ་དང་སེམས་སྐྱིད་པ་ཡོང་གི་རེད། རང་གཞན་དོན་ནི་རབ་སྒྲུབ་ཕྱིར།། བྱང་ཆུབ་སེམས་ནི་བསྐྱེད་པར་བགྱིད།། ཅེས་གསུངས་པ་ལྟར་རང་དོན་བྱང་ཆུབ་ཀྱི་སེམས་ཀྱི་ཐོག་ནས་འགྲུབ་པ་དང་། གཞན་དོན་ཡང་བྱང་ཆུབ་ཀྱི་སེམས་ཀྱི་ཐོག་ནས་འགྲུབ་ཀྱི་འདུག ཚོགས་བསགས་པའང་བྱང་ཆུབ་ཀྱི་སེམས་ཀྱི་ཐོག་ནས་རེད། སྒྲིབ་པ་སྦྱང་རྒྱུའང་བྱང་ཆུབ་ཀྱི་སེམས་ཀྱི་ཐོག་ནས་ཡོང་གི་ཡོད།
ངོས་ཀྱིས་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་ཀྱི་ཐོག་ལ་བསམ་བློ་གཏོང་གི་ཡོད་པས་ཁྱོད་ཚོ་ཆོས་གྲོགས་ཚོས་ཀྱང་བྱང་ཆུབ་ཀྱི་སེམས་ལ་དགོངས་པ་བཞེས་ཤིག དངོས་གནས་ལུས་བདེ་བ་དང་། སེམས་སྐྱིད་པ། ཚེ་འདིའི་བདེ་བ་ཙམ་དུ་མ་ཟད་པའི་ཚེ་རབས་ནས་ཚེ་རབས་ལ་བདེ་ཞིང་སྐྱིད་པ་ཞིག་ཡོང་ཐུབ་པ་ཞིག་ཏན་ཏན་རེད། ཚང་མས་བྱང་ཆུབ་ཀྱི་སེམས་ཉམས་ལེན་གནང་རྒྱུར་ཧུར་ཐག་གནང་རོགས་ཞུ་རྒྱུ་ཡིན། ངོས་ཀྱིས་བྱང་ཆུབ་ཀྱི་སེམས་སྒོམ་པ་ནི་འཕགས་པ་སྤྱན་རས་གཟིགས་ལ་སྒྲུབ་པའི་མཆོད་པ་ཡིན་པ་དང་། བྱིན་རླབས་ཀྱང་དེའི་ཐོག་ནས་ཡོང་གི་ཡོད། ངོས་རང་བོད་མིའི་མགོ་ཁྲིད་ཅིག་ལ་ལས་དང་སྨོན་ལམ་གྱིས་སྐྱེས་ཡོད། འཕགས་པ་སྤྱན་རས་གཟིགས་ཀྱི་བྱིན་རླབས་ཀྱི་ཐོག་ནས་ད་དུང་ལོ་བཅུ་ཕྲག་གཉིས་རིང་སྡོད་ཐུབ་པར་འཕགས་པ་སྤྱན་རས་གཟིགས་ཀྱིས་བྱིན་རླབས་གནང་ཤོག ངོས་རང་ལོ་ཡར་རྒས་ཡོད་ཀྱང་ཁ་ཧ་ཅང་བདེ་ཐག་ཆོད་ཡོད། པུས་མོ་ཏོག་ཙམ་མ་བདེ་བ་ཡོད་པས་གོམ་པ་སྤོ་རྒྱུར་ཏོག་ཙམ་དཀའ་ངལ་འདུག མར་བསྡད་པ་ཡིན་ན་ཁ་ནས་མང་པོ་བཤད་ཀྱི་ཡོད། ཅེས་དང་།
ཚེ་འདིར་ངོས་དང་དམིགས་བསལ་གྱིས་འབྲེལ་བ་ཡོད་པ་རྣམས་ཚེ་རབས་ནས་ཚེ་རབས་སུ་འཕགས་པ་སྤྱན་རས་གཟིགས་ཀྱིས་རྗེས་སུ་བཟུང་ནས་གཏན་གྱི་འདུན་མ་འགྲུབ་ཐུབ་པ་ཞིག་ཏན་ཏན་ཡོད་པ་རེད། ཁྱོད་ཚོ་ཚང་མས་ངོས་ལ་དད་པ་དང་དགའ་ཞེན་བྱས་པ་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་བཀའ་སློབ་སྩལ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གང་ཉིད་ཀྱིས་བཀའ་རྩོམ་མཛད་པའི་སྤྱན་རས་གཟིགས་བླ་མའི་རྣལ་འབྱོར་གྱི་བཤད་ལུང་བཀའ་དྲིན་སྩལ་བ་དང་། མཐར་བཀའ་དྲིན་གཏིང་རག་གི་མཎྜལ་ཕུལ་ནས་བརྟན་བཞུགས་གནང་སྒོ་ལེགས་པར་གྲུབ་ཡོད་པ་བཅས།
