༄༅། །ཕྱི་ལོ་ ༢༠༢༡ ཟླ་ ༡༡ ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨུ་རུ་སུའི་ནང་པའི་རྗེས་འཇུག་པ་རྣམས་ནས་ཇི་ལྟར་གསོལ་བ་བཏབ་པ་ལྟར་དྲ་ལམ་ཐད་གཏོང་བརྒྱུད་རྗེ་བཙུན་བྱམས་པ་མགོན་པོས་མཛད་པའི་མདོ་སྡེའི་རྒྱན་གྱི་ཉིན་གཉིས་རིང་གི་གསུང་ཆོས་གནང་། ཐམས་ཅད་རྣལ་འབྱོར་གྱི་ཆོས་འབྲེལ་ལེགས་པར་གྲུབ་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོའི་ཆུ་ཚོད་༨།༤༠ ཙམ་༸གོང་ས་མཆོག་རྡ་རམ་ས་ལའི་བཞུགས་སྒར་ཕོ་བྲང་གི་གཟིམ་ཆུང་ནས་གསུང་ཆོས་གནང་ཡུལ་དུ་ཆིབས་བསྒྱུར་གྱིས་བཞུགས་ཁྲིར་འཁོད་མཚམས་ཨུ་རུ་སུའི་ཁལ་མིག་ཏུ་ཡོད་པའི་སྟོན་པའི་གསེར་གྱི་ལྷ་ཁང་(Golden Abode of Buddha)དུ་ཏེ་ལོ་རིན་པོ་ཆེ་སོགས་ཀྱིས་དྲ་ལམ་བརྒྱུད་ཤེས་རབ་སྙིང་པོ་གསུང་འདོན་དང་། དེ་རྗེས་ཨུ་རུ་སུའི་རྒྱལ་ས་རྙིང་པ་སན་ཌི་པེ་ཌར་སུ་སྦུར་རྒི་(Saint Petersburg)རུ་ཡོད་པའི་ཀུན་བརྩེ་ཆོས་གནས་གྲྭ་ཚང་གི་དབུ་འཛིན་གཙོས་སེར་སྐྱ་ཁག་ཅིག་ནས་ཤེས་རབ་སྙིང་པོ་རང་སྐད་ཐོག་གསུང་འདོན་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་ཆོས་སྔོན་འགྲོའི་བཀའ་སློབ་སྩལ་དོན།
དེ་རིང་ཨུ་རུ་སུའི་ཁྱབ་ཁོངས་ས་ཁུལ་གྱི་ཆོས་གྲོགས་ཚོར་ཆོས་འབྲེལ་ཉིན་གཉིས་པ་ཡིན། ཆོས་འབྲེལ་ལ་མདོ་སྡེའི་རྒྱན་གྱི་བཤད་ལུང་དགོས་གསུངས་པ་རེད། མ་གཞི་ངོས་རང་ལ་བཤད་ལུང་ཐོབ་ཡོད་ཀྱང་ཧ་ཅང་རིང་པོ་འདུག དེ་མི་དགོས་པ་བྱས་ཏེ་ཁ་སང་བཤད་པ་ལྟར་སྔོན་ལ་ནང་ཆོས་ངོ་སྤྲོད་དང་། ཐམས་ཅད་རྣལ་འབྱོར་གྱི་སེམས་བསྐྱེད་པ། དེ་ནས་དྲི་བ་དྲིས་ལན་ག་ཚོད་ཡོང་ཡོང་ཞིག་བྱེད། ཅེས་བཀའ་སློབ་སྩལ་རྗེས་བདེན་བཞིའི་ཆོས་སྐོར་ངོ་སྤྲོད་མཛད་དོན།
དང་པོ། སྡུག་བསྔལ་བདེན་པ།
སངས་རྒྱས་བཅོམ་ལྡན་འདས་ཀྱིས་ཐོག་མར་ཆོས་འཁོར་བསྐོར་བའི་དུས་སུ་བདེན་པ་བཞི་གསུངས་པ་རེད། དེ་ལ་བདེན་བཞི་ངོ་བོ་ལ་བཟླས་པ། བྱ་བ་ལ་བཟླས་པ། བྱ་བ་འབྲས་བུ་དང་བཅས་པ་ལ་བཟླས་པ་ཞེས་བཟླས་པ་བཞི་གསུངས་བཞིན་ཡོད། དེ་ཧ་ཅང་འདུས་ཆེན་པོ་རེད། སྡུག་བསྔལ་བདེན་པ། ཀུན་འབྱུང་བདེན་པ། འགོག་པའི་བདེན་པ། ལམ་གྱི་བདེན་པ་བཅས་བདེན་པ་བཞི་ལ་སྡོམ་བསྐྱོན་ནས་གསུངས་པ་དང་། དེ་ནས་སྡུག་བསྔལ་ཤེས་པར་བྱ་ཞེས་སྡུག་བསྔལ་ལ་བསམ་བློ་བཏང་ནས་སྡུག་བསྔལ་ཕྲ་རགས་མང་པོ་ཡོད་པ་རེད། ནམ་རྒྱུན་ང་ཚོས་སྡུག་བསྔལ་ལ་བརྩིས་སྡོད་པ་དེ་ཙམ་མ་ཡིན་པར་གཙོ་བོ་འདུ་བྱེད་ཀྱི་སྡུག་བསྔལ་གྱི་ཐོག་ནས་བསམ་བློ་གཏོང་དགོས། དེ་ལྟ་བུའི་སྡུག་བསྔལ་དེ་རྒྱུ་མེད་རྐྱེན་མེད་ལས་བྱུང་བ་མ་རེད། དེར་བརྟེན། སྡུག་བསྔལ་གྱི་རྒྱུ་ཅི་ཞིག་ཡིན་པ་རྩད་གཅོད་བྱེད་དགོས། སྡུག་བསྔལ་གྱི་རྒྱུ་དེས་འབྲས་བུ་སྡུག་བསྔལ་མི་འདོད་པ་ཡིན་པས་དེ་འགྲུབ་བྱེད་ཀྱི་རྒྱུ་དེར་ཀུན་འབྱུང་སྤང་བར་བྱ་ཞེས་གསུངས་ཡོད།
གཉིས་པ། ཀུན་འབྱུང་བདེན་པ།
འོ་ན་ཀུན་འབྱུང་སྤང་ཐུབ་བམ་ཞེ་ན། སྤོང་ཐུབ་པ་རེད། དཔེར་ན། མི་ཚེ་གཅིག་ལ་ཆ་བཞག་ན་ཚེ་སྟོད་ཆགས་སྡང་གི་ཉོན་མོངས་ཤུགས་ཆེན་པོ་ཡོང་བ་དེར་ཕྱིས་སུ་བསམ་བློ་ཡང་ཡང་གཏོང་དུས་ཤུགས་ཆུང་དུ་འགྲོ་བ་ང་ཚོའི་ཉམས་མྱོང་གི་ཐོག་ནས་ཤེས་ཀྱི་འདུག དེར་བརྟེན། སྡུག་བསྔལ་གྱི་རྒྱུ་ཀུན་འབྱུང་ལས་ཉོན་གཉིས་ཡོད་པ་ལས། སྔོན་ལ་མི་དགེ་བཅུ་སྤོང་གི་ཚུལ་ཁྲིམས་ལྟ་བུས་རྨང་གཞི་བྱེད་པ་དང་། རིམ་བཞིན་གཏིང་ཟབ་དུ་བཏང་ནས་ཀུན་འབྱུང་ལས་ཉོན་གཉིས་པོ་ཆགས་སྡང་གིས་ཡོང་གི་ཡོད་པས་ཉོན་མོངས་དུག་གསུམ་རྩད་གཅོད་བྱེད་དགོས། དེ་ནས་ཉོན་མོངས་དུག་གསུམ་ཞེས་པ་ནི་སེམས་གསལ་རིག་གི་ཤེས་པ་ལ་རང་ཆས་སུ་ཡོད་པ་རེད་དམ་ཞེ་ན་མ་རེད། དཔེར་ན། དུག་གསུམ་གྱི་འགལ་ཟླའི་བློ་ལ་བསམ་བློ་བཏང་ནས་ཉམས་མྱོང་སྐྱེ་རྒྱུ་འདུག བློ་ཁག་གཉིས་པོ་དེ་གཅིག་གིས་གཅིག་ལ་འགལ་བ་ཡོད་པ་ཞིག་ཡིན་པས་སྡུག་བསྔལ་གྱི་རྒྱུ་ཀུན་འབྱུང་ལ་ཁོའི་ལྡོག་ཕྱོགས་ཀྱི་བློ་ཡོད་པ་དང་། ལྡོག་ཕྱོགས་ཀྱི་བློ་དེ་ལ་བསམ་བློ་བཏང་ན་གློ་བུར་དུ་ཆགས་སྡང་གི་བློ་སྐྱེས་པ་ཙམ་མ་གཏོགས་རྒྱུ་མཚན་རྩ་བ་ནས་མེད་པ་ཞིག་ཡིན་པས་ཉོན་མོངས་ཟེར་བ་ལ་ཁུངས་ཁྱོན་ནས་མེད་པ་རེད། ཚེ་རབས་ནས་ཚེ་རབས་སུ་གོམས་པའི་དབང་གིས་ཉོན་མོངས་དེ་ལྟ་བུ་ཞིག་སླེབས་པ་མ་གཏོགས་དེར་གཉེན་པོ་ཞིག་ཡོད་པས་ཤུགས་ཆུང་དུ་འགྲོ་བ་ནི་ང་ཚོས་གང་ལ་གང་འཚམ་ཤེས་ཐུབ་ཀྱི་འདུག དེར་བརྟེན། ལས་ཀྱི་ཀུན་འབྱུང་དང་གཙོ་བོ་ཉོན་མོངས་པའི་ཀུན་འབྱུང་ལ་གཉེན་པོ་སྟོབས་ལྡན་ཡོད་པ་དང་། གཉེན་པོའི་ཕྱོགས་ལ་གོམས་ན་རིམ་བཞིན་ཤུགས་ཆུང་དུ་འགྲོ་རྒྱུ་རེད།
གསུམ་པ། འགོག་པའི་བདེན་པ།
འགོག་པ་མངོན་དུ་བྱ་ཞེས་པ་ལ་བསམ་བློ་གཏིང་རིང་པོ་གཏོང་དགོས་པ་ཞིག་རེད། ཉོན་མོངས་ནི་རྣམ་པར་ཤེས་པའི་རང་བཞིན་ལ་མེད་པ་ཞིག་དང་། དྲི་མ་གློ་བུར་བ་ཉིད་དང་།། གསུངས་པ་བཞིན། དེ་འཕྲལ་གྱི་སྐད་ཆ་གཅིག་པུ་མ་ཡིན་པར་ང་ཚོ་ཚེ་རབས་མང་པོར་ཉོན་མོངས་ཀྱི་བློར་ཤུགས་ཆེན་པོ་གོམས་འདྲིས་ཡོད་པ་ཞིག་དང་། རྩ་བའི་སེམས་གསལ་རིག་ཡོད་ཕྱིན་ཆད་ཉོན་མོངས་ཡོང་དགོས་པ་མེད་པ་རེད། དེ་ང་ཚོས་སེམས་གསལ་རིག་གི་ཉམས་མྱོང་སྟེང་ནས་རེད། གང་ལྟར་སྔགས་ཀྱི་གཞུང་དུ་རང་བཞིན་བརྒྱད་ཅུའི་ཀུན་རྟོག་ཅེས་གསུང་གི་ཡོད། དཔེར་ན། འཆི་བ་འོད་གསལ་ཟེར་དུས་རགས་པ་གློ་བུར་བའི་སེམས་དག་འགགས་ནས་སྣང་མཆེད་ཐོབ་གསུམ་གྱི་རྗེས་ལ་ཤར་བ་ཞིག་ཆགས་ཡོད། དེར་བརྟེན། གཉིད་ཁུགས་པའི་སྐབས་སུའང་གོམས་འདྲིས་ཡོད་པ་བྱས་ནས་བསམ་བློ་གཏོང་ཐུབ་པ་ཡིན་ན། གཉིད་ཀྱི་འོད་གསལ་ཐིམ་རིམ་གང་ལ་གང་འཚམ་ཡོང་བ་ཞིག་རེད། གང་ལྟར་སེམས་ཀྱི་རང་བཞིན་ལ་ཞུགས་མེད་པ་ཞིག་དང་། སེམས་ཕྲ་རགས་མང་པོ་ཡོད་པ་ཞིག་དཔེ་ཆའི་ནང་དུ་བཤད་ཡོད་པ་རེད་ལ། སོ་སོས་ཚོད་ལྟ་བྱས་པ་ཡིན་ནའང་གང་ལ་གང་འཚམ་བཤད་ཐུབ་པ་འདུག
ཉོན་མོངས་ཅི་ཙམ་གྱིས་རགས་པ་ཞིག་ཡོད་ནའང་སེམས་ཀྱི་རང་བཞིན་ལ་ཞུགས་མེད། ཉོན་མོངས་ཕྱིན་ཅི་ལོག་གི་བློ་ཡིན་པ་དང་དེ་ལ་གཉེན་པོ་སྟོབས་ལྡན་ཡོད་པ་དངོས་ཡོད་གནས་ཚུལ་ཆགས་ཡོད། དེ་ལྟ་བུའི་ཐོག་ནས་ཉོན་མོངས་ག་ཚོད་ཤུགས་ཆེ་ནའང་སེམས་ཀྱི་རང་བཞིན་ལ་ཞུགས་མེད་པས། དྲི་མ་གློ་བུར་བ་ཉིད་དང་།། ཞེས་གསུངས་པ་དེ་རེད། ཡོན་ཏན་རང་བཞིན་གཉིས་ལྡན་ཕྱིར།། ཞེས་བསམ་བློ་གཏོང་དགོས་པ་ཆགས་ཡོད། དབུ་ཕར་གྱི་གཞུང་དེ་དག་གི་སྟེང་ནས་བསམ་བློ་བཏང་ཡོང་སྐབས་དྲི་མ་གློ་བུར་བ་ཡིན་པ་དང་། ཡོན་ཏན་རང་བཞིན་གཉིས་ལྡན་ཕྱིར་ཞེས་གསུངས་པ་ལ་དངོས་གནས་བྲོ་བ་ཁ་རྒྱུ་ཡོད་པ་ཞིག་དང་། སེམས་ལ་ཚོན་མདངས་ཡོང་བ་ཞིག་རེད། དེའི་ཐོག་ནས་དབུ་མ་འཇུག་པའི་ནང་དུ་གསུངས་པ་འདི་ལ་ངོས་ཀྱིས་ནམ་རྒྱུན་བསམ་བློ་གཏོང་བཞིན་ཡོད། དེ་ལྟར་བློ་གྲོས་ཟེར་གྱིས་སྣང་བ་གསལ་བྱས་ནས།། རང་གི་ལག་ན་གནས་པའི་སྐྱུ་རུ་ར་བཞིན་དུ།། སྲིད་གསུམ་འདི་དག་མ་ལུས་གདོད་ནས་སྐྱེ་མེད་པར།། རྟོགས་ཏེ་ཐ་སྙད་བདེན་པའི་སྟོབས་ཀྱིས་འགོག་པར་འགྲོ།། ཞེས་འགོག་བདེན་ཏན་ཏན་ཡོང་རྒྱུ་ཡོད་པ་ཞིག་རེད། ལས་སླ་བོ་མ་རེད། གོམས་དགོས་པ་རེད། གོམས་ན་དྲི་མ་གློ་བུར་བ་ཡིན་པ་དང་དེའི་གཉེན་པོ་སྟོབས་ལྡན་ཡོད་པ། སེམས་རང་བཞིན་གྱིས་འོད་གསལ་བ་ཡིན་པ་སོགས་ཀྱི་ཐོག་ནས་བསམ་བློ་བཏང་ན་ཉོན་མོངས་སྤངས་པའི་བྲལ་བ་འགོག་བདེན་སྤྱིར་ཤེས་བྱ་ལ་ཡོད་པ། འགོག་བདེན་མངོན་དུ་བྱས་པ་མང་པོ་ཞིག་མིག་དཔེར་བལྟ་ས་ཡོད་པ། རང་གི་ཉམས་མྱོང་ལ་ཆ་བཞག་ནའང་ག་ལེར་བསམ་བློ་བཏང་ན་དྲི་མ་གློ་བུར་བ་ཡིན་པ་དང་། དེ་བྲལ་བའི་སྤངས་པ་ཞིག་ཐོབ་ཐུབ་པ་རེད་བསམ་པའི་ཚོད་ཐིག་པ་ཞིག་འདུག དེར་བརྟེན། སྡུག་བསྔལ་ཤེས་བར་བྱ། ཀུན་འབྱུང་སྤང་བར་བྱ། འགོག་པ་མངོན་དུ་བྱ་ཞེས་གསུངས་པ་དེ་ལྟར་རེད།
བཞི་པ། ལམ་གྱི་བདེན་པ།
དེ་ལྟ་བུའི་མ་སྐྱིད་པ་བཟོ་མཁན་གྱི་ཉོན་མོངས་སྤངས་པའི་བྲལ་བ་ཞིག་ཡོད་པ་ཡིན་ན། དེ་ནི་ང་ཚོ་ཚང་མ་སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་རེད། སྡུག་བསྔལ་གྱི་རྒྱུ་ཀུན་འབྱུང་། དེའི་རྩ་བ་ཉོན་མོངས་པའི་ཀུན་འབྱུང་དང་མ་རིག་པར་ཐུག་ཡོང་དུས་དེ་ལ་གཉེན་པོ་བསྟེན་ནས་སྤོང་བ་བློ་ལ་ཤར་ཡོང་སྐབས་ལམ་སྒོམ་པར་བྱ་ཞེས་ལམ་བསླབ་པ་གསུམ་དང་། གཙོ་བོ་ཤེས་རབ་ཀྱི་བསླབ་པ་རེད། དེ་སྒོམ་རྒྱུ་ནི་བདེན་པ་བཞིའི་ཐོག་ནས་སྡོམ་ཧ་ཅང་ཡག་པོ་ཞིག་སྐྱོན་འདུག ཞེས་སོགས་བཀའ་སློབ་སྩལ་གྲུབ་མཚམས་དྲི་བ་དྲིས་ལན་དང་། ཏེ་ལོ་རིན་པོ་ཆེས་ཐུགས་རྗེ་ཆེ་ཞུ་བའི་གསུང་བཤད་གྲུབ་མཚམས་ཐམས་ཅད་རྣལ་འབྱོར་གྱི་སེམས་བསྐྱེད་པའི་ཆོས་འབྲེལ་བཀའ་དྲིན་སྩལ་བ་དང་། མཐར་ང་ཚོ་དུས་དང་དུས་སུ་ཐུག་ཆོག་གི་རེད། ཅེས་བཀའ་ཕེབས་རྗེས་བསྔོ་བ་མཛད་དེ་ཉིན་གཉིས་རིང་གི་གསུང་ཆོས་ལེགས་པར་གྲུབ་ཡོད་པ་བཅས།། །།
