༄༅། །ཕྱི་ལོ་ ༢༠༢༡ ཟླ་ ༨ ཚེས་ ༡༡ ཉིན་ཨིན་ཌོ་ནེ་ཤི་ཡའི་ནང་པའི་ཆོས་ཚོགས་བཀའ་གདམས་ཆོས་གླིང་གིས་ཇི་ལྟར་གསོལ་བ་བཏབ་པ་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དྲ་ལམ་ཐད་གཏོང་བརྒྱུད་ཨིན་ཌོ་ནེ་ཤི་ཡའི་རྒྱལ་ཡོངས་སློབ་གྲྭ་འདྲ་མིན་གྱི་སློབ་ཕྲུག་རྣམས་ལ་ནང་ཆོས་ངོ་སྤྲོད་དང་དྲི་བར་བཀའ་ལན་སྩལ་ཡོད་པ་རེད།
དེ་ཡང་རྒྱ་གར་གྱི་ཆུ་ཚོད་ ༩ པ་ཙམ་ལ་རྡ་རམ་ས་ལའི་བཞུགས་སྒར་ཕོ་བྲང་གཟིམ་ཆུང་ནས་ཆིབས་བསྒྱུར་གྱིས་གསུང་ཆོས་གནང་ཡུལ་དུ་༸ཞབས་སོར་འཁོད་མཚམས་ཨིན་ཌོ་ནེ་ཤི་ཡའི་རྩོམ་པ་པོ་དང་གཞས་པ། གཞས་ཚིག་རྩོམ་མཁན་ལྕམ་Dewe Dee Lestari ལགས་ཀྱིས་འཚམ་འདྲི་དང་འབྲེལ་ཨིན་ཌོ་ནེ་ཤི་ཡའི་སློབ་གྲྭ་ཁག་མི་འདྲ་བ་མང་པོ་ཞིག་ནས་སློབ་ཕྲུག་སྟོང་ཕྲག་གཅིག་འདིར་དངོས་སུ་མཉམ་ཞུགས་བྱས་ཡོད་པ་དང་། དྲ་ལམ་བརྒྱུད་ནས་དེ་ལས་མང་པོ་མཉམ་ཞུགས་ཞུས་ཡོད། བཀའ་ཆོས་འདི་ནི་ཨིན་ཌོ་ནེ་ཤི་ཡའི་ནང་སློབ་གྲྭ་འདྲ་མིན་དུ་སྟོན་པ་བཅོམ་ལྡན་འདས་ཀྱི་སྐྱེས་རབས་འཆད་སྤེལ་གྱི་ལས་རིམ་ཁོངས་སུ་གོ་བསྒྲིགས་ཞུས་པ་ཞིག་ཡིན། ཞེས་སོགས་ངོ་སྤྲོད་དང་ཐུགས་རྗེ་ཆེ་ཞུས་རྗེས། ཨིན་ཌོ་ནེ་ཤི་ཡའི་གཞས་པ་དང་གློག་བརྙན་འཁྲབ་སྟོན་པ་ Morgan Oey ལགས་ཀྱིས་དྲ་ལམ་བརྒྱུད་མཎྜལ་འདེགས་འབུལ་ཞུས་གྲུབ་མཚམས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
སྔ་དྲོ་བདེ་ལེགས། དེ་རིང་འདིར་ཨིན་ཌོ་ནེ་ཤི་ཡའི་གཞོན་སྐྱེས་གཙོ་བོར་གྱུར་བའི་ནང་ཆོས་ལ་ཐུགས་སྣང་ཡོད་མཁན་ཚོར་ངོ་སྤྲོད་མདོར་བསྡུས་ཤིག་ཞུ་རྒྱུ་ཡིན། ངོས་རང་ནི་སངས་རྒྱས་ཀྱི་ཆོས་པ་ཞིག་ཆགས་ཡོད་པ་དང་། ངོས་སྒེར་གྱི་དམ་བཅའི་ནང་གི་གཙོ་བོ་གཅིག་ནི་ཆོས་ལུགས་མཐུན་འབྲེལ་སྐོར་ཡིན། འཛམ་གླིང་འདིར་ཡོད་པའི་ཆོས་བརྒྱུད་ཆེ་ཁག་ཧིན་དྷི། གཅེར་པུ་བ། ཁ་ཆེ། ཡེ་ཤུ། འཇོའུ་ལ་སོགས་པའི་ཆོས་ལུགས་མང་པོ་ཡོད་པ་ཆ་ཚང་གི་ཐུན་མོང་གི་བསླབ་བྱ་ནི་སྙིང་རྗེའི་ཉམས་ལེན་གསུང་གནང་གི་ཡོད། རང་རང་གི་གཞུང་ནས་གསུངས་པའི་བྱམས་བརྩེའི་བསླབ་བྱ་དེ་སྲ་བརྟན་དང་ངེས་པ་རྙེད་པའི་ཆེད་དུ་ལྟ་གྲུབ་མི་འདྲ་བའི་སྒྲུབ་བྱ་བཀོད་ཀྱི་ཡོད། ལྟ་གྲུབ་དེ་དག་གི་ནང་དུ་ཁ་ཤས་ཀྱིས་འཇིག་རྟེན་བཀོད་པ་པོ་འདོད་པ་དང་། ཁ་ཤས་ཀྱི་མི་འདོད། འདི་དག་ནི་བྱམས་བརྩེ་སྤེལ་བའི་ཐབས་ལམ་རེད། ཐབས་ལམ་དེ་དག་བསྟེན་པའི་བསྒྲུབ་བྱ་ནི་མི་སྙིང་རྗེ་ཅན་ཞིག་དང་བསམ་ཤེས་ཅན་ཞིག་ཆགས་དགོས་ཀྱི་ཡོད།
ཆོས་ལུགས་སྣ་ཚོགས་པ་འདི་དག་གི་ལྟ་གྲུབ་མི་འདྲ་ཡང་བསླབ་བྱ་གཅིག་གྱུར་ཆགས་ཡོད། དཔེར་ན། ཁ་ཆེས་འཇིག་རྟེན་བཀོད་པ་པོ་ཨ་ལ་( Allah)འདོད་ཀྱི་ཡོད་པ་དང་། ཨ་ལ་ག་འདྲ་ཞིག་རེད་ཅེས་འགྲེལ་བརྗོད་གནང་སྐབས་བྱམས་བརྩེ་མཐར་ཐུག་པའི་བདག་ཉིད་ཅན་གྱི་སྐྱབས་ཤིག་དང་། དེ་བཞིན་ཡེ་ཤུའི་མ་ཤུ་ཀ་ jesus christ ཡིན་ནའང་བྱམས་བརྩེའི་བདག་ཉིད་མཐར་ཐུག་པ་ཞིག་ཡིན་པ་ཁོ་རང་ཚོས་ངོས་འཛིན་བྱེད་ཀྱི་ཡོད་པ་རེད། གང་ལྟར་ཨ་ལ་དང་ཡེ་ཤུའི་དཀོན་མཆོག ཡང་ན་སྟོན་པ་མ་ཤུ་ཀ་བཅས་འཇིག་རྟེན་བཀོད་པ་པོར་འདོད་ནས་དཀོན་མཆོག་གིས་བཀོད་ཡོང་བ་ལ་ངོས་འཛིན་བྱེད་པས་སོ་སོ་བཟོ་མཁན་ཡིན་པའི་ཆ་ནས་རང་བཞིན་གྱིས་དད་པ་འཕེལ་བ་ཞིག་ཡོང་གི་ཡོད། ནང་པ་དང་ལས་འབྲས་འདོད་མཁན་གྱི་ཆོས་ཀྱི་གསུངས་སྟངས་ནི་ལས་ཀྱིས་བྱུང་བར་གསུངས་བཞིན་ཡོད། དེ་དག་ལ་མི་འདྲ་བའི་ཁྱད་པར་ཇི་འདྲ་ཞིག་ཡོད་ནའང་སྒྲུབ་བྱ་གཙོ་བོ་ནི་བྱམས་སྙིང་རྗེའི་ཉམས་ལེན་ཆགས་ཡོད། དེར་བརྟེན། ཆོས་ལུགས་ནང་ཕན་ཚུན་ལ་གུ་ཡངས་ཀྱི་བསམ་པ་དང་བསམ་ཤེས་རྒྱ་ཆེ་རུ་གཏོང་རྒྱུ་ནི་ངོས་རང་གི་སྒེར་གྱི་དམ་བཅའ་ཞིག་ཆགས་ཡོད།
ངོས་རང་རྒྱ་གར་དུ་ལོ་ངོ་ཧ་ཅང་མང་པོར་བསྡད་པ་རེད། རྒྱ་གར་དུ་ལོ་ངོ་སྟོང་ཕྲག་གི་གོང་ནས་ཆོས་ལུགས་མི་འདྲ་བ་སྣ་ཚོགས་མཉམ་དུ་འཚོ་བཞིན་ཡོད་པ་རེད། རྒྱ་གར་ནི་འཛམ་གླིང་ནང་མི་འབོར་ཆེ་ཤོས་ཤིག་ཆགས་ཡོད་པའི་ཐོག་ལ་ཆོས་ལུགས་མང་པོ་མཉམ་གནས་ཀྱིས་མཐུན་འབྲེལ་གནང་ཐུབ་ཀྱི་ཡོད། དེ་དཔེར་མཚོན་དུ་བྱས་ནས་འཛམ་གླིང་གང་སར་ཆོས་ལུགས་མཐུན་འབྲེལ་གོང་མཐོར་གཏོང་ཐུབ་པའི་ནུས་པ་ཞིག་མཐོང་གི་འདུག དེར་བརྟེན། ངོས་ཀྱིས་ཆོས་ལུགས་མཐུན་འབྲེལ་གྱི་སྐོར་ལ་འབད་བརྩོད་བྱ་རྒྱུ་ནི་དམ་བཅའ་གཅིག་ལ་སྲུང་བཞིན་ཡོད། དེ་རིང་འདིར་ཨིན་ཌོ་ནེ་ཤི་ཡའི་ཁ་ཆེའི་ཆོས་གྲོགས་མང་པོ་ཞིག་ཕེབས་ཡོད་པ་ལ་མཇལ་བར་ཧ་ཅང་དགའ་བོ་བྱུང་། ཨིན་ཌོ་ནེ་ཤི་ཡ་ལ་ཆ་བཞག་ན་ཁ་ཆེའི་ཆོས་ཉམས་ལེན་བྱེད་མཁན་མང་པོ་ཞིག་ཡོད་པ་རེད། སྤྱིར་བཏང་ཆོས་ཉམས་ལེན་བྱེད་དང་མི་བྱེད་དང་། ཁས་ལེན་དང་མི་ལེན་ནི་སོ་སོའི་འདོད་མོས་རེད། ཡིན་ནའང་། ང་ཚོ་འགྲོ་བ་མི་ཡིན་པའི་ཆ་ནས་སྐྱེས་ཙམ་ཉིད་ནས་མ་ཡི་བྱམས་བརྩེས་འཚོ་བསྡད་པ་དང་། ཨ་མས་བྱམས་བརྩེ་ཡིས་བསྐྱངས་མེད་ཚེ་ཕལ་ཆེར་སྲོག་འཚོ་ཐུབ་མེད་པ་རེད། དེ་ནི་ང་ཚོ་འགྲོ་བ་མི་ཙམ་མིན་པར་མ་ཡི་བརྩེ་བར་བརྟེན་པའི་སེམས་ཅན་ཆ་ཚང་ལ་གཅིག་མཚུངས་རེད། བྱམས་བརྩེ་ནི་རང་ཉིད་འཚོ་བའི་འཚོ་བཅུད་གཙོ་བོ་ཆགས་ཡོད།
དེང་གི་འཛམ་གླིང་ལ་ཆ་བཞག་ན་གནས་ཚུལ་རྙོག་དྲ་ཅན་ཧ་ཅང་མང་པོ་ཡོད་པ་དང་། འདས་པའི་ལོ་རྒྱུས་ནང་དུའང་དེ་ལྟ་བུའི་རྙོག་དྲ་མང་པོ་བྱུང་བ་རེད། དེ་དག་ཆ་ཚང་བྱམས་བརྩེའི་ཉམས་ལེན་གྱིས་ཕོངས་པ་དང་། ཕན་ཚུན་གཉེན་བཤེས་ཀྱི་འདུ་ཤེས་མེད་པའི་དབང་གིས་བྱུང་བ་རེད། ཆུང་ཆུང་རང་མགོ་མ་ཐོན་པའི་སྐབས་སུ་ཕ་མས་བྱམས་བརྩེས་བསྐྱངས་ནས་བྱམས་བརྩེ་དགོས་མཁོ་ཆེན་པོ་ཆགས་ཡོད། ནར་སོན་ནས་རང་མགོ་ཐོན་པའི་སྐབས་སུ་གཞན་ལ་འགྲན་བསྡུར་དང་ཁ་གཏད་གཅོག་པ། བརྙས་བཅོས་བྱེད་པ་སོགས་ཀྱི་དབང་གིས་དམག་མང་པོ་བརྒྱག་པ་དང་། འཁྲུག་རྩོད་བྱུང་བ། གདུག་རྩུབ་ཅན་གྱི་བྱ་སྤྱོད་མང་པོ་ཞིག་དེ་ལྟར་བྱུང་བ་རེད། ཡང་ཕྱོགས་གཅིག་ནས་འགྲོ་བ་མི་སྤྱི་ཡོངས་ནས་བསམ་བློ་ཡར་ཐོན་ཅན་ཆགས་ནས་གདུག་རྩུབ་ཅན་དང་། དྲག་རྩུབ་ཀྱི་བྱ་སྤྱོད་ལ་རང་བཞིན་གྱིས་མི་དགའ་བ་ཆགས་ཡོད། འདི་ལྟ་བུའི་ཁོར་ཡུག་ནང་དུ་བྱམས་སྙིང་རྗེའི་ཉམས་ལེན་གོང་འཕེལ་གཏོང་རྒྱུར་ང་ཚོ་ཚང་མ་ལ་འགན་ཡོད། དེ་ཡང་བྱམས་སྙིང་རྗེ་ཉམས་ལེན་གྱི་གཞི་འཇོག་ས་ནི་འགྲོ་བ་མིར་གཅིག་མཚུངས་ཀྱི་འདུ་ཤེས་བཅིངས་པའི་ཐོག་ནས་གོང་འཕེལ་གཏོང་རྒྱུ་ཧ་ཅང་གལ་ཆེན་པོ་རེད། ང་ཚོས་འདོད་ཀྱང་མི་འདོད་ཀྱང་འགྲོ་བ་མི་ཐེར་འབུམ་བདུན་ཙམ་འཛམ་གླིང་གོ་ལ་འདིའི་ནང་དུ་མཉམ་དུ་འཚོ་དགོས། ཁ་ཆེའི་ཆོས་གྲོགས་ཚོ་མི་འབོར་ཆེན་པོ་ཡིན་པའི་ཆ་ནས་འཛམ་གླིང་ནང་ཞི་བདེ་གོང་འཕེལ་གཏོང་བར་དམིགས་བསལ་གྱིས་ཐུགས་འགན་ཞིག་ཡོད་པ་རེད་ལ་དེ་རིང་འདིར་ཐུག་པར་ཧ་ཅང་དགའ་བོ་བྱུང་། ཅེས་སོགས་བཀའ་སློབ་སྩལ་རྗེས་དྲི་བ་ཁག་ལ་བཀའ་ལན་སྩལ་བ་དང་། མཐར་དུས་ཡུན་སྐར་མ་གཅིག་གི་རིང་བྱམས་བརྩེའི་ཐོག་སྒོམ་སྒྲུབ་མཛད་དེ་མཛད་རིམ་ལེགས་པར་གྲུབ་ཡོད་པ་བཅས།།
