༄༅། །ཕྱི་ལོ་ ༢༠༢༡ ཟླ་ ༧ ཚེས་ ༡༣ ཉིན་་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནང་པའི་ཚོགས་པ་དང་། ལ་དྭགས་དགོན་པའི་ཚོགས་པ། ཁྲིག་སེ་རིན་པོ་ཆེ་བཅས་ནས་ཇི་ལྟར་གསོལ་བ་བཏབ་པ་ལྟར་དྲ་ལམ་བརྒྱུད་ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི་བྱང་ཆུབ་ལམ་གྱི་སྒྲོན་མའི་གསུང་ཆོས་དང་དྲི་བ་དྲིས་ལན་དབུ་འཛུགས་མཛད་ཡོད་པ་རེད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩ པ་ཙམ་ལ་རྡ་རམ་ས་ལའི་བཞུགས་སྒར་ཕོ་བྲང་གི་གཟིམ་ཆུང་ནས་གསུང་ཆོས་གནང་ཡུལ་དུ་ཆིབས་བསྒྱུར་གྱིས་བཞུགས་ཁྲིར་འཁོད་མཚམས་ལ་དྭགས་ནས་དྲ་ལམ་བརྒྱུད་མཎྡྲལ་རྟེན་གསུམ་འདེགས་འབུལ་ཞུས་རྗེས་ལ་དྭགས་ནང་པའི་ཚོགས་པའི་ཚོགས་གཙོ་ཐུབ་བསྟན་ཚེ་དབང་ལགས་ནས་གླེ་ཇོ་བོ་གཙུག་ལག་ཁང་དུ་དྲ་ལམ་བརྒྱུད་གསུང་ཆོས་གོ་སྒྲིག་གནང་མཁན་ཡོངས་ཀྱི་ཚབ་ཞུས་ཏེ་གུས་ཕྱག་དང་། ཕྱི་ལོ་ ༢༠༢༠ དང་ ༢༠༢༡ ལོ་གཉིས་རིང་ལ་དྭགས་སུ་ཆིབས་བསྒྱུར་བསྐྱངས་མ་ཐུབ་པར་མི་མང་རྣམས་སེམས་ཕམ་ཆེན་པོ་བྱུང་ཡོད་པ་དང་། མི་མང་ནས་ལ་དྭགས་སུ་ཆིབས་བསྒྱུར་བསྐྱང་རྒྱུའི་གསོལ་འདེབས་ཞུས་ཡོད་ཀྱང་ཏོག་དབྱིབས་ནད་ཡམས་ཀྱི་རྐྱེན་གྱིས་ཆིབས་བསྒྱུར་བསྐྱངས་ཐབས་བྲལ་བས་སྐྱབས་རྗེ་ཁྲིག་སེ་རིན་པོ་ཆེ་མཆོག་དང་། ལ་དྭགས་ནང་ཚོགས་དང་དགོན་ཚོགས་ནས་དྲ་ལམ་བརྒྱུད་གསུང་ཆོས་སྩོལ་རྒྱུའི་གསོལ་འདེབས་ཞུས་པར་༸གོང་ས་མཆོག་ཐུགས་སྤྲོ་བའི་ངང་བྱབ་ཆུབ་ལམ་སྒྲོན་གྱི་གསུང་ཆོས་གནང་རྒྱུའི་ཞལ་བཞེས་མཛད་པ་དང་། སངས་རྒྱས་ཐུགས་རྗེ་ཅན་གྱིས་ཆོས་ཀྱི་འཁོར་ལོ་ཐོག་མར་བསྐོར་གནང་མཛད་པའི་དུས་ཆེན་ཁྱད་པར་ཅན་དང་། དུས་འདིར་ཟབ་རྒྱས་ཆོས་ཀྱི་འཁོར་ལོ་བསྐོར་བར་མཛད་པ་ལ་ང་ཚོ་དད་ལྡན་རྒན་གཞོན་ཡོངས་ཀྱི་ཚབ་ཞུས་ཏེ་དགའ་བསུ་དང་བཀྲ་ཤིས་བདེ་ལེགས་ཞུ། ཞེས་དང་། ༸གོང་ས་མཆོག་གི་གསུང་ཆོས་ཟབ་མོར་ཉན་ཆེད་གླེ་ཇོ་བོ་གཙུག་ལག་ཁང་དང་། ལྡུམ་རྭ། བྱང་ཐང་། ཁ་རོ། གཤམ། དཀར་འཁྱིལ། ཟངས་དཀར་སོགས་སུ་གྲ་སྒྲིག་ཞུས་ཡོད་ཅེས་༸སྙན་སྒྲོན་ཞུས་རྗེས་༸གོང་ས་མཆོག་གིས་བཀའ་ཕེབས་དོན།
དེ་རིང་འདིར་ཁྱོད་རང་ཚོ་ལ་དྭགས་ཀྱི་དད་ལྡན་སེར་སྐྱ་མི་མང་གིས་ཇོ་བོ་རྗེས་མཛད་པའི་ལམ་སྒྲོན་གྱི་ཆོས་འབྲེལ་གནང་རོགས་ཞེས་རེ་སྐུལ་གནང་བ་རེད། ངོས་རང་ཡང་ཧ་ཅང་དགའ་བོ་བྱུང་། བོད་ལ་བསྟན་པ་སྔ་དར་དང་ཕྱི་དར་ཞེས་བར་སྐབས་བསྟན་པ་ཧ་ཅང་ཉམས་ཆག་ཕྱིན་པའི་དུས་ཚོད་ལ་མངའ་རིས་ཆོས་རྒྱལ་ཞེས་རྒྱལ་ཕྲན་ཆུང་ཆུང་ཞིག་ཆགས་ཡོད་པ་རེད། དེས་གླང་དར་སྐབས་ནས་བསྟན་པ་ཧ་ཅང་ཉམས་ཆག་ཕྱིན་པ་དེ་ལ་བདག་པོ་ཞིག་རྒྱག་ཐུབ་ན་ཞེས་ཇོ་བོ་རྗེ་ལྷ་གཅིག་དཱི་པཾ་ཀ་ར་གདན་ཞུ་གནང་བ་རེད། ཇོ་བོ་རྗེ་མཐོ་ལྡིང་ལ་ཕེབས་ནས་བྱང་ཆུབ་ལམ་སྒྲོན་འདི་མཛད་པ་རེད། བོད་ཀྱི་མངའ་རིས་ཆོས་རྒྱལ་ཧ་ཅང་དྲང་པོ་རེད། ཁོང་གིས་བཀའ་ཆོས་ཧ་ཅང་རྒྱས་པོ་དེ་འདྲ་གནང་མི་དགོས། ཞེས་ཞུས་པ་རེད། བཀའ་ཆོས་རྒྱས་པོ་གནང་བ་ཡིན་ན་བཀའ་བསྟན་འགྱུར་ལ་འབྲེལ་དགོས་པ་རེད། དེར་བརྟེན། བར་སྐབས་དེར་བོད་ལ་བསྟན་པ་ཧ་ཅང་ཉམས་ཆག་ཕྱིན་ཡོད་པས་བསྡུས་བསྡུས་གོ་བདེ་བོ་ཞིག་གསུངས་རོགས་གནང་ཞེས་ཇོ་བོ་རྗེ་ལ་ཞུས་པ་རེད། ཇོ་བོ་རྗེ་ཧ་ཅང་མཉེས་པོ་བྱུང་ནས་ལམ་སྒྲོན་གསུངས་འདུག སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས།། ཞེས་གསུངས་པ་དེ་སྐད་གྲགས་ཆེ་མིན་དང་། འབུལ་བ་ཆེ་མིན་གྱི་སྐད་ཆ་མིན་པར་དངོས་ཡོད་གནས་ཚུལ་དང་མཐུན་པའི་གསུང་ཞིག་གནང་རོགས་ཞེས་ཞུས་པ་ཡིན་པས་ཇོ་བོ་རྗེ་ཧ་ཅང་ཐུགས་མཉེས་པོ་བྱུང་ནས། སློབ་མ་བཟང་པོ་བྱང་ཆུབ་འོད་ཀྱིས་བསྐུལ་གྱུར་པས།། ཞེས་གསུངས་འདུག
ང་ཚོ་བོད་ལ་ས་སྐྱའི་ལམ་འབྲས་ལ་ཆ་བཞག་ན་ལམ་རིམ་གྱི་སྐོར་ཕལ་ཆེར་གཅིག་པ་ཡོད་པ་རེད། བཀའ་བརྒྱུད་ལ་ཆ་བཞག་ན་དྭགས་པོའི་ཐར་རྒྱན་ལམ་རིམ་རང་ཆགས་ཡོད་པ་རེད། རྗེ་རིན་པོ་ཆེའི་ལམ་རིམ་ཆེ་འབྲིང་ཆུང་གསུམ་ཞེས་རྒྱས་པ་གཞུང་ཆེན་མོ་དང་སྦྲེལ་ནས་གསུངས་པ་རྒྱ་ཆེན་པོ་རེད། ལམ་རིམ་འབྲིང་པོ་དེ་ལས་ཅུང་བསྡུས་པ་དང་། ཤིན་ཏུ་བསྡུས་པ་ལམ་རིམ་ཉམས་མགུར་ཞེས་རྗེ་རིན་པོ་ཆེ་ཁོང་གིས་ཉམས་ལེན་མགུར་མའི་ཚུལ་དུ་གསུངས་པ་ལམ་རིམ་ཉམས་མགུར་ཞེས་པ་དེ་ལྟར་རེད། བོད་ལ་ས་དགེ་བཀའ་རྙིང་རིས་སུ་མ་ཆད་པ་ཚང་མའི་ཐུན་མོང་ལམ་སྦྱང་གི་ཁུངས་གཏུགས་ས་ཇོ་བོ་རྗེའི་ལམ་སྒྲོན་ཆགས་ཡོད། དེ་རིང་འདིར་ཁྱོད་ཚོ་ལ་དྭགས་སེར་སྐྱ་མི་མང་གཙོ་བོར་གྱུར་བའི་ལམ་སྒྲོན་བཤད་རོགས་ཞེས་སྐུལ་བ་རེད། སང་ཉིན་ཆོས་འཁོར་དུས་ཆེན་རེད། ཆུ་སྟོད་ཟླ་བའི་ཚེས་བཞི་བོད་ཟླ་དྲུག་པའི་ཚེས་བཞི་ནི་སྟོན་པ་བཅོམ་ལྡན་འདས་ཀྱིས་བདེན་བཞིའི་ཆོས་འཁོར་དང་པོ་གསུངས་དུས་ཆགས་ཡོད། དུས་ཆེན་ཁྱད་པར་ཅན་རེད། ང་ཚོར་ལེགས་སྦྱར་གྱི་ཆོས་བརྒྱུད་དང་པཱ་ལིའི་ཆོས་བརྒྱུད་ཀྱི་སྐད་ཆ་མེད་པར་ཚང་མར་ཁྱབ་ཡོད་པ་ནི་བདེན་བཞིའི་ཆོས་འཁོར་རེད། སང་ཉིན་བཅོམ་ལྡན་འདས་ཀྱིས་བདེན་བཞིའི་ཆོས་འཁོར་བསྐོར་བའི་དུས་ཆེན་ཆགས་ཡོད།
དེ་རིང་འདིར་མགོ་འཛུགས་དང་སང་ཉིན་འཕྲོས་དང་སེམས་བསྐྱེད་ཅིག་བཏོན་ན་ཏག་ཏག་ཅིག་མིན་འགྲོ་དྲན་སོང་། ངོས་ཀྱིས་ལམ་སྒྲོན་སྟག་བྲག་རིན་པོ་ཆེའི་སྐུ་མདུན་ནས་གཅིག་ཞུས་ཡོད། གླིང་རིན་པོ་ཆེའི་སྐུ་མདུན་ནས་ཞུས་ཡོད། ཁྲི་བྱང་རིན་པོ་ཆེའི་སྐུ་མདུན་ནས་ཞུས་ཡོད། ཁུ་ནུ་བླ་མ་རིན་པོ་ཆེ་བསྟན་འཛིན་རྒྱལ་མཚན་གྱི་སྐུ་མདུན་ནས་ཞུས་ཡོད་པ་རེད། གང་ལྟར་བླ་མ་མང་པོའི་མདུན་ནས་ངོས་ལ་ཐོབ་པ་ཡིན། ལམ་རིམ་དང་བློ་སྦྱོང་གི་ཉམས་ལེན་ངོས་ཀྱིས་ཉིན་རེ་བཞིན་དུ་རྒྱ་ཆེན་སྤྱོད་རྒྱུད་ཀྱི་བྱང་ཆུབ་ཀྱི་སེམས་དང་། དེའི་སྔོན་འགྲོར་ངེས་འབྱུང་གི་སྐོར་དང་། ཟབ་མོ་ལྟ་རྒྱུད་ཀྱི་ཟབ་པ་སྟོང་ཉིད་ཀྱི་སྐོར་དང་། ཉམས་ལེན་བྱིན་རླབས་རྒྱུད་ཀྱི་གསང་བདེ་འཇིགས་གསུམ་གཙོ་བོར་གྱུར་བའི་རྒྱུད་སྡེ་ཁག་ངོས་ཀྱིས་ཉམས་ལེན་བྱེད་བཞིན་ཡོད། ས་སྐྱའི་ཀྱེ་རྡོར་ཉམས་ལེན་བྱེད་བཞིན་ཡོད། དེ་མིན་གྱི་རྣལ་འབྱོར་མ་སོགས་ཉམས་ལེན་བྱེད་བཞིན་ཡོད། འདི་དག་ཉམས་ལེན་བྱིན་རླབས་རྒྱུད་རེད། དེ་ནས་རླབས་ཆེན་སྤྱོད་རྒྱུད་ལ་སྤྱོད་འཇུག་གི་རྒྱུད་པ་དེ་གཙོ་བོ་རེད། བདག་གཞན་མཉམ་བརྗེ་བློ་ངོས་ཀྱིས་ཉམས་ལེན་གཙོ་བོ་ཆགས་ཡོད། ངོས་ཀྱིས་ཉིན་རེ་བཞིན་རྒྱ་ཆེན་སྤྱོད་རྒྱུད། ཟབ་མོ་ལྟ་རྒྱུད། ཉམས་ལེན་བྱིན་རླབས་རྒྱུད། རླབས་ཆེན་སྤྱོད་རྒྱུད་བཅས་ཉིན་རེ་བཞིན་དུ་བསམ་བློ་བཏང་ཉམས་ལེན་བྱེད་བཞིན་ཡོད། འདིར་ལམ་སྒྲོན་ཞུ་བ་ལ་ང་ཚོ་བོད་ཀྱི་རྒྱ་གར་ནས་བསྒྱུར་བའི་གཞུང་ཚང་མར་རྒྱ་གར་ནས་བསྒྱུར་བ་ཡིན་པས་རྒྱ་གར་སྐད་དུ་ཞེས་སྨྲས་ཡོད་པ་རེད། རྒྱ་ནག་ནས་བསྒྱུར་བ་ཁ་ཤས་ཤིག་ཡོད་པ་རེད། དེ་མིན་བཀའ་བསྟན་མང་ཆེ་ཤོས་རྒྱ་གར་ནས་བསྒྱུར་བ་རེད། ཅེས་སོགས་གསུང་ཆོས་དངོས་གཞི་དབུ་འཛུགས་ཀྱིས་མཐར་ཆོས་ཞུ་བའི་དྲི་བ་ཁག་གཅིག་ལ་བཀའ་ལན་སྩལ་ཡོད་པ་བཅས། །
