༄༅། །ཕྱི་ལོ་ ༢༠༢༡ ཟླ་ ༧ ཚེས་ ༧ ཉིན་རྒྱ་གར་གྱི་ཊོག་ཊར་རེ་ཌེ་སིའི་ཐེབས་རྩའི་འཕྲོད་བསྟེན་ཤེས་ཡོན་ཚན་པས་གོ་སྒྲིག་ཞུས་དོན་ལྟར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཕྲོད་བསྟེན་དང་སྨན་བཅོས་ཀྱི་ནང་དུ་བྱམས་བརྩེ་ལག་ལེན་གནང་ཕྱོགས་(Compassion in Healthcare) སྐོར་ལ་ཚོགས་པ་དེ་གའི་ཟུང་འབྲེལ་ཚོགས་གཙོ་དང་འཛིན་སྐྱོང་འགན་འཛིན་པརཱ་སདྷ་ (G.V. Prasad) ལགས་དང་ལྷན་དུ་བགྲོ་གླེང་དང་འཕྲོད་བསྟེན་ཆེད་ལས་པ་ཁག་ཅིག་གི་དྲི་བར་བཀའ་ལན་གནང་ཡོད་པ་རེད།
དེ་ཡང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་རྒྱལ་བའི་ཕོ་བྲང་གཟིམ་ཆུང་ནས་བགྲོ་གླེང་གནང་ཡུལ་དུ་ཆིབས་བསྒྱུར་གྱིས་བཞུགས་ཁྲིར་འཁོད་མཚམས་རྒྱ་གར་གྱི་རེ་ཌེ་སིའི་ནད་རིགས་བརྟག་དཔྱད་ཁང་ (Dr. Reddy’s Laboratories Ltd) གི་ཟུང་འབྲེལ་ཚོགས་གཙོ་དང་འཛིན་སྐྱོང་འགན་འཛིན་པརཱ་སདྷ་ལགས་ཀྱིས་༸གོང་ས་མཆོག་གི་སྐོར་ངོ་སྤྲོད་དང་། ༸སྐུའི་འཁྲུངས་སྐར་ལ་འཚམས་འདྲི་ཞུས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
ཚང་མར་བཀྲ་ཤིས་བདེ་ལེགས། རྣམ་པ་ཚོས་ངོས་ལ་གོ་སྐབས་འདི་གནང་བར་ཐུགས་རྗེ་ཆེ་དང་། རྗེས་སུ་ཡི་རང་ཞུ་བཞིན་ཡོད། ངོས་རང་བོད་ནང་སྐྱེས་པ་རེད། ཡིན་ཡང་ངོས་ཀྱི་མི་ཚེ་ཕལ་ཆེ་བ་ཞི་བདེ་ལྡན་པའི་རྒྱ་གར་ལུང་པ་འདིའི་ནང་བསྐྱལ་ཡོད། རྒྱ་གར་ནང་ཆོས་ལུགས་མཐུན་སྒྲིལ་དང་གསར་འགོད་རང་དབང་ཡོད། ངོས་ཀྱིས་རང་དབང་གི་སྒོ་ནས་སོ་སོའི་བསམ་བློའི་ནང་གང་ཡོད་པ་བརྗོད་ཆོག་གི་ཡོད་ལ། ངོས་ཀྱིས་བཤད་པའི་སྐད་ཆ་དེ་དག་འཛམ་གླིང་གི་ས་ཕྱོགས་གང་སར་སླེབས་ཐུབ་ཀྱི་ཡོད། ངོས་རང་འདིར་སྐྱིད་པོ་འདུག ཁ་སང་ངོས་ཀྱི་སྐྱེས་སྐར་ཉིན་མོར་རྒྱ་གར་གྱི་སྲིད་བློན་མཆོག་དང་། རྒྱ་གར་གྱི་དབུས་གཞུང་དང་མངའ་སྡེ་གཞུང་གི་བློན་ཆེན་རྣམ་པ། དེ་བཞིན་ཨ་རིའི་གྲོས་ཚོགས་འོག་མའི་ཚོགས་གཙོ་ནན་སི་པེ་ལོ་སི་མཆོག་དང་ངོས་ཀྱི་གྲོགས་པོ་རྙིང་པ་རྣམ་པ་སོགས་ནས་འཚམས་འདྲི་གནང་བྱུང་། གོ་སྐབས་འདི་བརྒྱུད་ངོས་ལ་འཚམས་འདྲི་གནང་མཁན་ཡོངས་ལ་ཐུགས་རྗེ་ཞུ་རྒྱུ་ཡིན། ནན་སི་པེ་ལོ་སི་མཆོག་བོད་ནང་གཟིགས་སྐོར་ཕེབས་མྱོང་ཡོད་པ་མ་ཟད། བོད་མི་དང་རྒྱ་རིགས་ཀྱི་འགོ་ཁྲིད་ཚོར་སྐད་ཆ་བཤད་མྱོང་ཡོད། ནན་སི་པེ་ལོ་སི་མཆོག་རྡ་སར་ཕེབས་མྱོང་ཡོད། ངོས་ཀྱི་རྨི་ལམ་ནང་ལོ་ ༡༡༠ ཡང་ན་ལོ་ ༡༡༣ བར་བསྡད་རྒྱུའི་རྟགས་མཚན་སྟོན་གྱི་འདུག ངོས་ཀྱི་ཉམས་ལེན་གཙོ་བོ་བྱམས་བརྩེ་དང་འཚེ་བ་མེད་པ་ཡིན། ང་ཚོར་འཕྲད་བཞིན་པའི་དཀའ་ངལ་མང་པོ་ཞིག་ནི་ང་རང་ཚོ་རང་གིས་བཟོས་པ་ཤ་སྟག་རེད། བྱམས་བརྩེའི་མ་ལྡེང་པར་བརྟེན་ནས་དཀའ་ངལ་དེ་དག་འབྱུང་གི་ཡོད། དེར་བརྟེན། ངོས་ཀྱིས་ཆོས་ལུགས་ལ་མ་བརྟེན་པའི་ཐོག་ནས་བྱམས་བརྩེ་དང་འཚེ་བ་མེད་པ་གོང་མཐོར་གཏོང་གི་ཡོད། ཅེས་དང་།
ངོས་ཀྱི་གྲོགས་པོ་རྒྱ་གར་ཉེན་རྟོག་པ་ཞིག་གིས་ངོས་ལ་སྐུ་རྩེད་དང་འབྲེལ་ནས་ནཱ་ལེནྡྲའི་སློབ་སྤྱི་ཟེར་གྱི་འདུག མིང་དེ་སྙིང་རྗེ་མོ་ཞིག་འདུག དངོས་ཡོད་གནས་ཚུལ་དུ་ངོས་རང་དགེ་སློང་དཀྱུས་མ་ཞིག་དང་། དེའི་ནང་ནས་ཀྱང་བཙན་བྱོལ་བ་ཞིག་ཆགས་ཡོད། དེ་ཡིན་ཡང་ངོས་ཀྱི་རྒྱུན་ལྡན་གྱི་ཉམས་ལེན་ནི་དུས་རབས་བརྒྱད་པ་ནས་བོད་ལ་དར་བའི་ནཱ་ལེནྡྲའི་ཆོས་བརྒྱུད་དྲི་མ་མེད་པ་དེ་རེད། ནཱ་ལེནྡྲའི་མཁས་དབང་མཁན་ཆེན་ཞི་བ་འཚོ་བོད་ལ་གདན་འདྲེན་ཞུས་ནས་བོད་ལ་ནཱ་ལེནྡྲའི་ཆོས་བརྒྱུད་བྱུང་བ་དང་། བོད་ལ་སངས་རྒྱས་ཀྱི་བསྟན་པའི་རྨང་གཞི་ཁོང་གིས་བཙུགས་པ་རེད། ངོས་ནི་ནཱ་ལེནྡྲའི་རྒྱུན་འཛིན་པ་ཞིག་དང་། འུད་ཤོབ་དང་འབྲེལ་ནས་ཞུས་ན་ངོས་རང་ནཱ་ལེནྡྲའི་མཁས་དབང་ཞིག་ལ་བརྩིས་ཆོག་གི་རེད། ཅེས་སོགས་ནཱ་ལེནྡྲའི་ཆོས་བརྒྱུད་དང་ལྟ་གྲུབ་ཀྱི་ཁྱད་ཆོས་སྐོར་ངོ་སྤྲོད་མཛད་པ་དང་། དེ་ནས་མགོན་པོ་གང་ཉིད་མཆོག་གི་མཛད་འགན་བཞི་བ་རྒྱ་གར་གྱི་ནཱ་ལེནྡྲའི་ལེགས་བཤད་དེ་དག་བསྐྱར་གསོ་བྱེད་རྒྱུ་དེ་ཡིན་པ་དང་། མི་ཚང་མས་གཟུགས་པོའི་འཕྲོད་བསྟེན་ལ་བདག་གཅེས་གནང་གི་ཡོད། འོན་ཀྱང་། ང་ཚོས་སེམས་ཀྱི་ཞི་བདེས་གཟུགས་གཞིའི་བདེ་ཐང་ལ་ཤུགས་རྐྱེན་ཐེབས་ཀྱི་ཡོད་པ་དེ་ངོས་འཛིན་ཞུ་དགོས། ཞེས་སོགས་བཀའ་སློབ་སྩལ་བ་དང་།
དེ་ནས་སྐབས་སུ་བབ་པ་འཕྲོད་བསྟེན་དང་སྨན་བཅོས་ཀྱི་ནང་དུ་བྱམས་བརྩེ་ཉམས་ལེན་གནང་ཕྱོགས་སྐོར་ཞུས་པ་ཡིན་ན། ང་ཚོའི་སེམས་ཉོན་མོངས་ཀྱིས་འཁྲུགས་བསྡད་པ་ཡིན་ན་དེའི་དབང་གིས་ཁྲག་ཤེད་དང་སྙིང་གི་བྱེད་ལས་ལ་སྐྱོན་རྒྱག་པ་དང་། དེའི་རྐྱེན་གྱིས་གཉིད་ཡག་པོ་ཁུགས་མ་ཐུབ་པའི་དཀའ་ངལ་ཡོང་གི་ཡོད། སེམས་ཀྱི་ཞི་བདེ་ནི་གཟུགས་པོ་ཡག་པོ་ཡོང་བར་ཧ་ཅང་གལ་ཆེན་པོ་ཆགས་ཡོད། ངོས་རང་ལ་ཆ་བཞག་ན་སེམས་ལ་ཞི་བདེ་ཡོད་པས་མཚན་རེ་བཞིན་ཆུ་ཚོད་དགུའི་རིང་གཉིད་སྐྱིད་པོ་ཁུགས་ཀྱི་ཡོད། ཐེངས་ཤིག་ངོས་རང་རྒྱ་གར་ཤར་ཕྱོགས་ཁུལ་དུ་བསྐྱོད་སྐབས་ལྡི་ལི་ནས་ཕེབས་པའི་བློན་ཆེན་ཞིག་ཀྱང་དེར་ཕེབས་འདུག་པ་ཉིན་ཤས་རིང་ངེད་གཉིས་ངོ་ཤེས་ཡག་པོ་ཆགས་པ་རེད། དེ་སྐབས་ཁོང་གིས་ངོས་རང་གཉིད་ཡག་པོ་ཡོང་ཡོོད་མེད་ལ་བཀའ་འདྲི་གནང་གི་འདུག ངོས་རང་ལ་གཉིད་ཀྱི་ཐད་སེམས་ཁྲལ་རྩ་བ་ནས་མེད་མཚན་རྟག་ཏུ་ཆུ་ཚོད་དགུའི་རིང་གཉིད་སྐྱིད་པོ་ཁུགས་ཀྱི་ཡོད། དེ་རྗེས་ཡར་ལངས་ནས་ཆུ་ཚོད་ཁ་ཤས་རིང་སྒོམ་བརྒྱག་བཞིན་ཡོད། དེའི་དབང་གིས་ཕྱིའི་ཁོར་ཡུག་ཇི་འདྲ་ཡིན་ནའང་ངོས་ཀྱི་ནང་སེམས་མི་འཁྲུགས་པར་སྡོད་ཀྱི་ཡོད་པས་གཟུགས་པོ་ཡང་བདེ་བོ་ཡིན་ཞུས་པ་ཡིན། ཁོང་གིས་ཁོ་རང་ཆབ་སྲིད་པ་ཞིག་ཡིན་པས་ཆ་ནས་ཆུ་ཚོད་བཞི་ལྔ་ཙམ་མ་གཏོགས་གཉིད་ཁུགས་ཐུབ་ཀྱི་མི་འདུག་གསུངས་ཀྱི་འདུག ཁོས་གཉིད་མང་ཙམ་ཁུགས་ཐུབ་ན་བསམ་པའི་འདུན་པ་བསྟན་སོང་། གཉིད་ནི་ཆབ་སྲིད་པ་ཡིན་ནའང་རེད། ཚོང་པ་ཡིན་ནའང་རེད། འགྲོ་བ་མི་ཞིག་ཡིན་པས་ཆ་ནས་གཉིད་དགོས་ཀྱི་ཡོད་པ་རེད། གཉིད་ལྡེང་ངེ་ཞིག་ཡོད་པ་ཡིན་ན་གཟུགས་པོའི་འཕྲོད་བསྟེན་ཡང་ཆ་སྙོམས་ཡག་པོ་ཡོང་བ་ཞིག་ཡོད་པ་རེད།
མི་ཚང་མས་འཕྲོད་བསྟེན་སྐོར་ལ་ཐུགས་སྣང་གནང་གི་ཡོད་པ་རེད། འཕྲོད་བསྟེན་ལ་སེམས་ཀྱི་འཕྲོད་བསྟེན་དང་གཟུགས་པོའི་འཕྲོད་བསྟེན་ཕན་ཚུན་འབྲེལ་བ་ཆེན་པོ་ཡོད་པ་མཁྱེན་དགོས་པ་རེད། སེམས་ཀྱི་འཕྲོད་བསྟེན་ཡག་པོ་ཡོང་བར་སྒོམ་སྒྲུབ་དང་འབྲེལ་བའི་ཐོག་ནས་བྱམས་སྙིང་རྗེ་ཉམས་ལེན་གནང་དགོས་པ་དང་། དུས་རབས་སྔོན་མའི་ནང་དུ་གྷན་རྡེ་རྗེ་ཡིས་འཛམ་གླིང་ནང་འཚེ་མེད་ཞི་བ་གལ་ཆེན་པོ་ཡིན་པའི་སྐོར་ལམ་སྟོན་གནང་ཡོད་པ་རེད། དེང་སང་སློབ་སྦྱོང་གི་ལམ་ལུགས་ཐོག་ནས་སྒོམ་དང་འབྲེལ་བའི་བྱམས་བརྩེའི་ཉམས་ལེན་འཛམ་གླིང་ཐོག་སྤེལ་ཐུབ་རྒྱུ་ཧ་ཅང་གལ་ཆེན་པོ་རེད། བྱམས་སྙིང་རྗེ་དང་འབྲེལ་བའི་རྒྱ་གར་གྱི་གནའ་རབས་རིག་གཞུང་དེ་དང་དེང་དུས་ཀྱི་སློབ་སྦྱོང་གཉིས་ཟུང་འབྲེལ་གནང་དགོས་པ་ཧ་ཅང་གལ་ཆེན་པོ་རེད། ཅེས་བཀའ་སློབ་སྩལ་རྗེས་འཕྲོད་བསྟེན་ཆེད་མཁས་པས་བཀའ་འདྲི་ཁག་གཅིག་ལ་བཀའ་ལན་སྩལ་སྐབས། སྨན་པ་དང་སྨན་ཞབས་པ་ཚོས་ནད་པར་བྱམས་བརྩེའི་སྒོ་ནས་ལྟ་རྟོག་གནང་དགོས་པ་དང་། སྨན་པ་དང་སྨན་ཞབས་པའི་ལས་ཀ་ནི་མི་གཞན་ལ་རོགས་རམ་གནང་རྒྱུ་ཡིན་སྟབས། བྱམས་བརྩེ་ངེས་པར་དགོས་མཁོ་ཡོད་པ་ཞིག་ཆགས་ཡོད། ཏོག་དབྱིབས་གཉན་རིམས་ཀྱི་དཀའ་ངལ་འཕྲད་བཞིན་པའི་སྐབས་འདིར་རྒྱལ་ཁབ་དང་མི་རིགས་ཚང་མར་དཀའ་ངལ་དེ་དག་སེལ་བར་ཐུན་མོང་གི་འགན་ཡོད། གཞན་ལ་ལྟ་རྟོག་བྱེད་བཞིན་པའི་སྐབས་སྨན་པ་དང་སྨན་ཞབས་པ་སོགས་འདས་གྲོངས་སུ་གྱུར་བ་ཡིན་ན། ཁོང་ཚོའི་ནང་མི་རྣམས་ཀྱིས་སྤོབས་པ་བྱེད་དགོས། དེ་དང་ཆབས་ཅིག་ཏུ་འདས་པོ་རྣམས་ཀྱི་བདེ་དོན་ཆེད་དུ་སྨོན་ལམ་རྒྱག་དགོས། ཞེས་སོགས་ཀྱི་བཀའ་ལན་ཕེབས་ཡོད་པ་བཅས།
