༄༅། །ཕྱི་ལོ་ ༢༠༢༡ ཟླ་ ༦ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་ཆོས་གོ་སྒྲིག་ཚོགས་པ་ནས་ཇི་ལྟར་གསོལ་འདེབས་ཞུས་པ་ལྟར་བོད་རིགས་གཞོན་སྐྱེས་རྣམས་ལ་དྲ་ལམ་བརྒྱུད་རྗེ་ཙོང་ཁ་པ་ཆེན་པོས་མཛད་པའི་རྟོགས་བརྗོད་འདུན་ལེགས་མའི་གསུང་ཆོས་དབུ་འཛུགས་མཛད་ཡོད་པ་རེད།
དེ་ཡང་སྔ་དྲོ་ཆུ་ཚོད་དགུ་བ་ཙམ་ལ་རྡ་རམ་ས་ལའི་བཞུགས་སྒར་ཕོ་བྲང་གཟིམ་ཆུང་ནས་གསུང་ཆོས་གནང་ཡུལ་དུ་ཆིབས་བསྒྱུར་གྱིས་བཞུགས་ཁྲིར་འཁོད་དེ་མཎྜལ་རྟེན་གསུམ་འདེགས་འབུལ་ཞུས་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན། དེ་རིང་ཕྱི་ཟླ་ ༦ ཚེས་ ༡ ཉིན་རེད། ནམ་རྒྱུན་སློབ་ཕྲུག་ཚོ་དང་ཐུག་གི་ཡོད་པ་རེད། ད་ལྟའི་ཆར་ནད་ཡམས་ཀྱི་རྐྱེན་གྱིས་ངོས་རང་ཕྱི་ལ་ཐོན་གྱི་མེད་པས་དྲ་རྒྱའི་ཐོག་ནས་སློབ་ཕྲུག་ཚོ་དང་ལྷན་དུ་སྐད་ཆ་བཤད་ཀྱི་ཡོད། དེ་རིང་གི་བཀའ་ཆོས་ནི་རྟོགས་བརྗོད་འདུན་ལེགས་མའི་བཤད་ལུང་ཞུ་རྒྱུ་དང་། རྗེས་སུ་དྲི་བ་དྲིས་ལན་བྱ་རྒྱུ་བྱེད། དེ་ཧ་ཅང་ཡག་པོ་འདུག ང་རང་ཚོ་བོད་རིགས་ཆགས་ཡོད། ཧི་མ་ལ་ཡའི་རི་རྒྱུད་ནས་ཀྱང་ཡོད་ཀྱི་རེད། ངོས་ཀྱིས་ནམ་རྒྱུན་རྗོད་བཞིན་ཡོད། ཆོས་རྒྱལ་སྲོང་བཙན་སྒམ་པོས་རྒྱ་བཟའ་དང་བལ་བཟའ་ལ་འཁྲུངས་ས་སྐྱོན་པ་ཡིན་ནའང་། ང་ཚོ་བོད་ལ་བོད་ཡིག་ཟུར་དུ་དགོས་ཀྱི་ཡོད་པ་དགོངས་པ་ནི་ངོས་ཀྱིས་རླབས་ཆེན་པོར་མཐོང་གི་འདུག བོད་ཡིག་དེ་རྒྱ་ཡིག་ལ་དཔེ་བལྟས་པ་མ་ཡིན་པར་རྒྱ་གར་ཆོས་ཀྱི་འབྱུང་ཁུངས་ཀྱི་དབྱངས་དང་གསལ་བྱེད་ཡོད་པའི་ཡི་གེར་དཔེ་བལྟས་ནས་བཟོས་པ་རེད།
དེ་ནས་ཆོས་རྒྱལ་ཁྲི་སྲོང་ལྡེ་བཙན་ཕེབས་པའི་སྐབས་སུ་བོད་ཡིག་ཟུར་དུ་ཡོད་པས་ལེགས་སྦྱར་སྐད་དང་པ་ལའི་སྐད་སློབ་མི་དགོས་པར་ལེགས་སྦྱར་དང་པ་ལའི་སྐད་དུ་ཡོད་པའི་གཞུང་རྣམས་བོད་ཡིག་ཏུ་བསྒྱུར་བ་དང་། བོད་པ་ཚོས་སོ་སོའི་ཡི་གེའི་ཐོག་ནས་སློབ་སྦྱོང་བྱ་རྒྱུ་ཞིག་བྱུང་བ་རེད། ངོས་ཀྱི་ངོ་ཤེས་པ་ཁ་ཤས་ཀྱིས་མཁན་ཆེན་ཞི་བ་འཚོ་ཁོང་གིས་བོད་ཡིག་ལ་དོ་སྣང་གནང་བ་རེད་ཟེར་བ་ཞིག་བརྗོད་བྱུང་། གང་ལྟར་ང་ཚོ་བོད་པ་ཧ་ཅང་གྲུང་པོ་རེད། དུས་རབས་བདུན་པའི་སྐབས་སུ་ཆོས་རྒྱལ་སྲོང་བཙན་སྒམ་པོས་བོད་ཡིག་བཟོས་པ་དང་། དུས་རབས་བརྒྱད་པའི་ནང་དུ་ཆོས་རྒྱལ་ཁྲི་སྲོང་ལྡེ་བཙན་གྱིས་ལེགས་སྦྱར་དང་པ་ལའི་ནང་དུ་ཡོད་པའི་ནང་པའི་གཞུང་རྣམས་བོད་ཡིག་ཏུ་བསྒྱུར་རྒྱུ་བྱས་ཏེ་རིམ་བཞིན་ལོ་ཙ་བ་ཚོས་བཀའ་འགྱུར་པོ་ཏི་བརྒྱ་ལྷག་དང་བསྟན་འགྱུར་པོ་ཏི་ཉིས་བརྒྱ་ལྷག ཁྱོན་པོ་ཏི་སུམ་བརྒྱ་ལྷག་བསྒྱུར་ཏེ་ནང་པའི་གཞུང་གལ་ཆེ་བ་ཚང་མ་འདིའི་ནང་དུ་ཡོད། ང་ཚོ་བོད་པ་ཚོས་སོ་སོའི་སྐད་ཡིག་རང་གི་ཐོག་ལ་རང་མགོ་ཆ་ཚང་ཐོན་ཡོད། སྐད་ཡིག་འདིའི་ཐོག་ནས་ས་དགེ་བཀའ་རྙིང་རིས་སུ་མ་ཆད་པའི་མཁས་གྲུབ་གཉིས་ལྡན་གྱི་སྐྱེས་བུ་དམ་པ་ག་ཚོད་ཅིག་བྱུང་ཡོད་པ་རེད། ལྷག་པར་དུ་ས་པཎ་ཡབ་སྲས་ནས་རིགས་ལམ་གྱི་སྐོར་ལ་དམིགས་བསལ་གྱིས་ཐུགས་སྣང་གནང་ཡོད། དེ་ནས་རྗེ་རིན་པོ་ཆེས་ཚད་མའི་གཞུང་ལ་དམིགས་བསལ་གྱིས་ཐུགས་སྣང་གནང་བ་རེད།
དེང་སང་སངས་རྒྱས་པའི་ཆོས་ཚད་མ་རིག་པའི་ཐོག་ནས་འགྲེལ་བཤད་རྒྱག་རྒྱུ་ཡོད་པ་ནི་ཕལ་ཆེར་བོད་པ་གཅིག་པུ་ལས་རྒྱ་ནག་ནང་དུ་སྒོམ་རྒྱག་རྒྱུ་མ་གཏོགས་དེ་ལྟ་བུའི་སློབ་སྦྱོང་ལ་དམིགས་བསལ་དོ་སྣང་བྱེད་ཀྱི་མི་འདུག པ་ལའི་ཆོས་བརྒྱུད་འཛིན་གནང་མཁན་གྱི་འབར་མ་དང་ཐའེ་ལན། ཤྲི་ལིངྐ་སོགས་ཀྱིས་ཚད་མ་རིག་པར་སློབ་སྦྱོང་ཡོད་པ་མ་རེད། ངོས་ཀྱིས་ནམ་རྒྱུན་རྗོད་བཞིན་ཡོད། ཐའེ་ལན་གྱི་དགེ་སློང་དང་འབར་མའི་དགེ་སློང་འདུལ་བ་འཛིན་པ་དངོས་གནས་ཡག་པོ་དེ་འདྲ་ཡོད། ཁོ་ཚོ་ཁ་ཤས་ངོས་ཀྱི་འདིར་བཀའ་ཆོས་ཞུ་བར་སླེབས་ཀྱི་ཡོད། ངོ་ཤེས་ནང་ཚགས་ཡིན་པས་ངོས་ཀྱིས་ཁོ་ཚོར་ཁྱོད་རང་ཚོས་པ་ལའི་གཞུང་སྦྱང་ནས་བཅོམ་ལྡན་འདས་ཀྱིས་གསུངས་པ་རེད་ཟེར་བ་མ་གཏོགས་རིགས་པའི་སྒྲུབ་བྱེད་ཀྱི་ཐོག་ནས་བཅོམ་ལྡན་འདས་ཀྱི་བཀའ་ཡང་དག་པ་ཞིག་ཡིན་པ་བཤད་རྒྱུ་ཡོད་པ་མ་རེད། དེར་བརྟེན། ཁྱོད་རང་ཚོ་སོ་མེད་པ་དང་གཅིག་པ་རེད་ཅེས་བཤད་ཀྱི་ཡོད། སོ་མེད་མཁན་གྱི་མི་ཚོས་ཟ་མ་མཁྲེགས་པོ་བྱུང་ན་མུར་སྡོད་པ་ལས་གཞན་མེད་པ་དང་། སོ་ཡོད་མཁན་ཚོས་སོ་བརྒྱབ་ནས་ཟ་རྒྱུ་ཞིག་ཡོད་པ་རེད། དེར་བརྟེན། ཚད་མ་རིག་པ་ཡོད་པ་འདི་ཡིས་དོན་དག་གང་ཞིག་ཡིན་ཀྱང་དཔྱད་པ་བྱས་ནས་འགྲོ་རྒྱུ་ཡོད་པ་རེད།
བར་སྐབས་ནས་ངོས་ཀྱིས་ཚད་རིག་པ་དང་མཉམ་དུ་འབྲེལ་བ་བྱས་པ་རེད། ང་ཚོར་དབུ་ཚད་ཀྱི་གཞུང་མེད་པར་འདུལ་བའི་འགྲོ་སྟངས་རྐྱང་བའི་ཐོག་ནས་ཕྱིན་པ་ཡིན་ན་ཚན་རིག་པ་དང་མཉམ་དུ་འབྲེལ་བ་བྱེད་རྒྱུ་ཕལ་ཆེར་མེད་པ་རེད། བོད་ལ་དབུ་ཚད་སེངྒེའི་མཇིང་བསྣོལ་ཞེས་གསུངས་པ་ནང་བཞིན་བོད་ཀྱི་སྐྱེས་བུ་དམ་པ་མང་པོ་ཞིག་གིས་ཆོས་རྒྱལ་ཚོའི་སྐབས་སུ་ང་ཚོར་ལམ་སྟོན་གནང་བ་དེ་མཐའ་འཁྱོངས་པ་གནང་བས་དེང་སང་བོད་ཀྱི་ནང་ཆོས་འདི་ཁྱད་དུ་འཕགས་པ་ཞིག་རེད། ཚན་རིག་པ་ཚོའི་མཉམ་དུ་གོ་བསྡུར་བྱེད་པའང་ང་ཚོར་སྤོབས་པ་ཡོད་པ་ཞིག་ཆགས་ཡོད། སྤྱིར་སངས་རྒྱས་པའི་ཆོས་རྒྱ་གར་ནས་ཡོང་བ་འདི་ལ་སེམས་ཁམས་རིག་པ་དང་སྒོམ་གྱི་སྐོར་ཤུགས་ཆེན་པོ་ཡོད་པ་རེད། འདི་དག་ང་ཚོར་ཡོད་པའི་ཐོག་ལ་དབུ་ཚད་སེངྒེའི་མཇིང་བསྣོལ་ཟེར་བའི་ཐོག་ཕྱིན་པའི་སྐབས་སུ་རིགས་པ་རང་གི་ཐོག་ནས་བཤད་རྒྱུ་དང་འགྲེལ་བཤད་ཡོད་པ་ཞིག་རེད། དེར་བརྟེན། ཚན་རིག་པ་དང་མཉམ་དུ་ང་ཚོས་སྤོབས་པ་བྱས་ནས་གོ་བསྡུར་དང་བགྲོ་གླེང་བྱེད་པའི་རྒྱུ་རྐྱེན་གཙོ་བོ་ནི་དབུ་ཚད་སེངྒེའི་མཇིང་བསྣོལ་གྱི་ཆོས་བརྒྱུད་ཅིག་ཡོད་པས་རེད།
ད་ཆ་ང་ཚོར་སོ་སོའི་ལུང་པའི་ནང་དུ་ཧ་ཅང་དཀའ་ངལ་ཞིག་འཕྲད་ཡོད་ཀྱང་། ང་ཚོ་བཙན་བྱོལ་བ་ཉུང་ཤོས་འདི་ཡིས་ང་ཚོའི་སྐད་ཡིག་དང་། སྐད་ཡིག་དེའི་ནང་དུ་དབུ་ཚད་སེངྒེའི་མཇིང་བསྣོལ་ཞེས་སངས་རྒྱས་པའི་ཆོས་ཚུལ་རིགས་པའི་ལམ་ནས་འགྲེལ་བཤད་རྒྱག་རྒྱུ་དང་སྤུས་དག་པོ་ཞིག་ཡོད་པས་དང་པོ་པཎྜི་ཏ་ནེ་རུ་ལ་ང་ཚོར་སྐད་ཡིག་ཟུར་དུ་ཡོད་པས་བོད་ཀྱི་སློབ་གྲྭ་ཞིག་དགོས་ཀྱི་འདུག་ཅེས་ཞུས་པར་ཁོང་གིས་རྒྱབ་སྐྱོར་གཙང་མ་གནང་ནས་བཙན་བྱོལ་ནང་སློབ་གྲྭ་ཟུར་དུ་བཙུགས་པ་རེད། བོད་ཀྱི་སློབ་གྲྭའི་ནང་དུ་ཤེས་ཡོན་སྤྱི་བྱིངས་ཀྱི་དགེ་རྒན་ཡོད་པའི་ཐོག་ལ་ནང་པའི་གཞུང་སློབ་མཁན་གྱི་ཆོས་དགེ་འཛུགས་དགོས་ཀྱི་འདུག་ཅེས་སློབ་གྲྭ་ཚོའི་གནས་ཚུལ་དང་། གལ་ཆེན་ཤོས་བཙན་བྱོལ་ནང་དུ་གྲྭ་ས་ནས་སྐྱབས་བཅོལ་ལ་ཡོང་མཁན་སྟོང་ཕྲག་ཁ་ཤས་ཤིག་ཡོད་པ་རེད། ངོས་རང་དེ་དུས་སིམ་ལ་དང་ཅམ་པ་ལ་ལམ་བཟོར་རྒྱུགས་མཁན་ལ་ལྟ་སྐོར་དུ་ཕྱིན་མྱོང་། ཅམ་པ་ལ་གྲྭ་ས་ནས་ཡོང་བའི་དགེ་འདུན་པ་ལམ་བཟོར་རྒྱུགས་མཁན་མང་པོ་འདུག ཁོང་ཚོ་སྡོམ་གཙང་རེད། དཔེ་ཆར་བལྟས་ཡོད་པས་ཅམ་པ་རུ་གྲྭ་ས་ནས་ཡོང་བ་ཚོ་རུག་རུག་གིས་རྟགས་གསལ་བཏང་བ་རེད། ང་ཚོར་གཟན་སྐེར་པར་དཀྲི་རྒྱུ་ཡོད་པ་རེད། ཁོ་ཚོས་ཕྱུ་པ་གོན་ཡོད་པས་ཕུ་ཐུང་སྐེད་པར་དཀྲིས་ནས་རྟགས་གསལ་བཏང་བ་རེད། སྙིང་རྗེ། ང་ཚོ་བོད་པ་བཙན་བྱོལ་བ་ཚོས་ཉག་ཕྲ་བའི་དུས་ཚོད་ལ་ང་ཚོའི་རིག་གཞུང་ལ་གཅེས་སྐྱོང་བྱས་པ་རེད། དེ་ལྟ་བུའི་གཞི་རྩ་ཞིག་ཡོད་པས་གདན་ས་ཁག་བཙུགས་པ་རེད། དེང་སང་སེ་འབྲས་དགེ་གསུམ་གཙོ་བོ་རེད། བཀྲ་ཤིས་ལྷུན་པོ་དང་རྒྱུད་གྲྭ་སྨད་སྟོད་སོགས་གདན་ས་དེ་དག་སློབ་གཉེར་ཡག་ཐག་ཆོད་ཡོད་པ་རེད། དེ་ནི་ང་ཚོ་བཙན་བྱོལ་བའི་གཟི་བརྗིད་ཆགས་ཡོད།
རང་གི་ལུང་པར་བྲལ་ནས་བཙན་བྱོལ་བ་ཆགས་ཡོད་ཀྱང་ཆོས་དང་རིག་གཞུང་མི་ཉམས་གོང་འཕེལ་ཡོང་བའི་ཐབས་ཤེས་གང་ཡོང་བྱས་ཏེ་ཡག་ཐག་ཆོད་རེད། དེའི་ཐོག་ལ་ཚན་རིག་གི་སློབ་ཚན་ཞིག་གསར་པ་བཙུགས་ཡོད། དེ་སྔ་ཡོད་པ་མ་རེད། སྔར་མེད་པའི་སློབ་ཚན་ཚན་རིག་གི་སྐོར་གདན་ས་ཚོའི་ནང་དུ་སློབ་གཉེར་བྱེད་རྒྱུ་ཡོད་པ་རེད། ངོས་ཀྱིས་ཡོངས་གྲགས་ཐོག་དེང་གི་ནང་པ་ཚོ་དུས་རབས་ཉི་ཤུ་རྩ་གཅིག་པའི་ནང་པ་བྱེད་དགོས་པ་རེད་ཅེས་རྗོད་བཞིན་ཡོད། དེའི་དོན་ནི་ང་ཚོའི་ཕ་མེས་ནས་ཡོད་པའི་སངས་རྒྱས་པའི་ལྟ་གྲུབ་རྣམས་ཡོད་པའི་ཐོག་དེང་གི་ཚན་རིག་གི་རྣམ་གཞག་རྣམས་ཤེས་པ་བྱེད་དགོས། ང་ཚོ་ཚན་རིག་པའི་མཉམ་དུ་སྐད་ཆ་བཤད་པར་ཞུམ་དགོས་པ་ཁྱོན་ནས་མི་འདུག སྤོབས་པ་བྱེད་རྒྱུ་ཞིག་རེད། ངོས་ཀྱིས་ཚན་རིག་པའི་མཉམ་དུ་འབྲེལ་བ་བྱས་ནས་ལོ་བཅུ་གྲངས་ཁ་ཤས་ཤིག་ཕྱིན་པ་རེད། གང་ལྟར་ཚན་རིག་པ་ལ་ཕར་བློ་བསྐྱེད་དང་ལེགས་བཤད་སྟེར་བ་ཞིག་མ་གཏོགས་ང་ཚོའི་ཆོས་དད་ཉུང་དུ་འགྲོ་བ་དང་། ཆོས་ལ་ཐེ་ཚོ་ཟ་བ་ལྟ་བུ་རྩ་བ་ཉིད་ནས་མི་འདུག ཅེས་བཀའ་སློབ་སྩལ་རྗེས་རྟོགས་བརྗོད་འདུན་ལེགས་མའི་བཤད་ལུང་དབུ་འཛུགས་དང་། མཐར་སློབ་ཕྲུག་ཁག་ཅིག་གི་དྲི་བར་བཀའ་ལན་སྩལ་ཡོད་པ་བཅས།།
