༄༅། །ཕྱི་ལོ་ ༢༠༢༡ ཟླ་བ་ ༣ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ར་ཤཱི་ཡའི་གཙུག་ལག་སློབ་གཉེར་ཁང་ལྔ་ཡི་སློབ་ཕྲུག་རྣམས་ལ་འགྱུར་ལྡོག་དུས་རིམ་ཁྲོད་ཀྱི་ང་ཚོའི་འཛམ་གླིང་(the theme Our World in the Time of Change)ཞེས་པའི་བརྗོད་གཞིའི་ཐོག་དྲ་ལམ་བརྒྱུད་བཀའ་སློབ་དང་དྲི་བར་བཀའ་ལན་སྩལ་ཡོད་པ་རེད།
དེ་ཡང་སྔ་དྲོའི་ཆུ་ཚོད་ ༩ པ་ཙལ་མ་རྡ་རམ་ས་ལའི་བཞུགས་སྒར་གཟིམ་ཆུང་ནས་བཀའ་སློབ་གནང་ཡུལ་དུ་ཆིབས་བསྒྱུར་གྱིས་བཞུགས་ཁྲིར་འཁོད་མཚམས་བགྲོ་གླེང་གོ་སྒྲིག་ཚོགས་པའི་འཐུས་མིས་འཚམ་འདྲི་དང་འབྲེལ་བགྲོ་གླེང་གི་བརྗོད་གཞི་ངོ་སྤྲོད་མཛད་རྗེས་གཉན་ཕྲེང་ཅན་གྱི་དུས་རིམ་འདིར་འགྲོ་བ་མི་ཡོངས་དང་ལྷག་པར་དུ་གཞོན་སྐྱེས་མི་ཚེ་མགོ་འཛུགས་མཁན་ཚོར་ལམ་སྟོན་བཀའ་སློབ་ཞུ་རྒྱུ་ཡིན་ཞེས་སོགས་གསུང་བཤད་གནང་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩལ་དོན།
ང་ཚོ་ཚང་མ་འགྲོ་བ་མི་ཡིན་པ་གཅིག་མཚུངས་ཡིན་པ་མ་ཟད། ང་ཚོ་ཚང་མ་མི་ཚེ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་མཚུངས་ཡིན། ཐ་ན་འབུ་སྲིན་ཕྲ་མོ་ཚུད་པའི་སེམས་ཅན་ཚང་མ་བདེ་བ་འདོད་ཀྱི་ཡོད་པ་གཅིག་མཚུངས་ཡིན། འགྲོ་བ་མི་ལ་སེམས་ཅན་གཞན་ལས་ཁྱད་དུ་འཕགས་པའི་ཁྱོད་ཆོས་ནི་ཆོས་རབ་ཏུ་འབྱེད་པའི་རྣམ་དཔྱོད་ཅིག་ཡོད། དེར་བརྟེན། ང་ཚོས་བདེ་སྐྱིད་སྒྲུབ་ཆེད་ཆོས་རབ་ཏུ་འབྱེད་པའི་རྣམ་དཔྱོད་བེད་སྤྱོད་བྱེད་ཀྱི་ཡོད། ང་ཚོར་ཁྱད་དུ་འཕགས་པའི་ཆོས་རབ་ཏུ་འབྱེད་པའི་རྣམ་དཔྱོད་ཅིག་ཡོད་ཀྱང་སྐབས་རེར་མཐོང་རྒྱ་ཆུང་དྲགས་པ་དང་བསམ་བློ་གུ་དོག་པའི་དཀའ་ངལ་མང་པོ་ཡོང་གི་རེད།
དུས་རབས་གོང་མའི་ནང་མི་རྣམས་ཀྱིས་མིག་རྒྱང་ཐུང་དྲགས་པ་དང་བསམ་བློ་གུ་དོག་པོ་ཡོད་པར་བརྟེན་ང་དང་ངའི་ཞེས་རང་ཕྱོགས་གཅིག་པུར་བསམ་བློ་བཏང་ཡོད། དཔེར་ན་བོད་ལ་མཚོན་ན་སྤྱིར་བཏང་ང་ཚོས་སེམས་ཅན་ཐམས་ཅན་གྱི་ཆེད་དུ་སྨོན་ལམ་རྒྱག་གི་ཡོད་ནའང་ལག་ལེན་ངོ་མའི་ཐོག་ནས་བོད་མི་གཅིག་པུར་བསམ་བློ་གཏོང་གི་ཡོད། འདས་པའི་དུས་རབས་སྔ་མིའི་དོན་ལ་ཕྱི་མིག་བལྟ་དགོས་པ་ཧ་ཅང་གལ་ཆེན་པོ་རེད། འཛམ་གླིང་གི་དམག་ཆེན་དང་པོ་དང་གཉིས་པ་ཆ་ཚང་མིའི་བཟོས་པའི་དཀའ་ངལ་རེད། མིའི་རྣམ་དཔྱོད་བེད་སྤྱོད་བཏང་ནས་དུས་རབས་སྔ་མ་ནས་བཟུང་ཚན་རིག་སློབ་སྦྱོང་བྱེད་པར་ཧ་ཅང་ཡར་རྒྱས་ཕྱིན་ཡོད་ཀྱང་། བེད་སྤྱོད་ནི་དམག་རྒྱག་པ་དང་གོ་མཚོན་བཟོ་བ། ལྷག་པར་དུ་རྡུལ་ཕྲན་མཚོན་ཆ་བཟོ་བ། མེ་ཤུགས་འཕུར་མདའ་བཟོ་བ་སོགས་ཀྱི་ཐོག་ཏུ་རྣམ་དཔྱོད་འཕྲོ་བརླག་ལ་བཏང་ཡོད། ད་ལྟ་སོ་སོའི་རྒྱལ་ཁབ་གཅིག་པུར་བསམ་བློ་བཏང་ནས་མ་བསྡད་པར་འགྲོ་བ་མི་སྤྱི་ལ་བསམ་བློ་གཏོང་དགོས་པའི་དུས་ལ་བབས་ཡོད། འཛམ་གླིང་ཆུང་ཆུང་འདིའི་སྒང་ལ་ང་ཚོ་ཚང་མ་གཅིག་ལ་གཅིག་བརྟེན་ནས་འཚོ་དགོས། འཛམ་གླིང་སྟེང་མི་ཐེར་འབུམ་བདུན་ཡོད་པ་རྣམས་ནང་ཁུལ་དབྱེ་བ་ཕྱེ་ནས་ང་ཚོ་དང་ཁོང་ཚོ་ཞེས་དམག་འཁྲུག་རྒྱག་རྒྱུའི་གཞི་རྩ་མེད། དེ་ནི་དངོས་ཡོད་གནས་ཚུལ་དང་མ་མཐུན་པ་ཞིག་ཡིན་པ་མ་ཟད། དེ་ལྟ་བུའི་བསམ་བློ་གཏོང་སྟངས་དེ་རྙིང་པ་རེད།
འགྲོ་བ་མི་དང་འཛམ་གླིང་བདེ་སྐྱིད་ལྡན་པ་ཞིག་བསྐྲུན་པར་མི་རིགས་དང་། ཆོས་ལུགས། རིག་གཞུང་བཅས་ཀྱི་ཁྱད་པར་ཡོད་པ་ནི་རིམ་པ་གཉིས་པ་རེད། གལ་ཆེ་ཤོས་ནི་ང་ཚོ་ཚང་མ་འགྲོ་བ་མི་ཡིན་པ་གཅིག་མཚུངས་ཡིན། འཛམ་གླིང་ཆུང་ཆུང་འདིའི་སྒང་ལ་ང་ཚོ་ཚང་མ་གཅིག་ལ་གཅིག་བརྟེན་ནས་འཚོ་དགོས། ང་ཚོར་ཞི་བདེ་དང་བདེ་སྐྱིད་ལྡན་པའི་འཛམ་གླིང་དགོས་ཀྱི་ཡོད། དུས་རབས་ ༢༡ པའི་ནང་ང་ཚོས་འགྲོ་བ་མི་ཐེར་འབུམ་བདུན་ཡོད་པ་ཚང་མ་ཁྱིམ་ཚང་གཅིག་གི་ནང་མི་ཡིན་པ་ལྟ་བུའི་བསམ་བློ་གཏོང་དགོས།
ར་ཤཱི་ཡ་ནི་རྒྱལ་ཁབ་ཆེན་པོ་ཞིག་ཡིན་སྟབས་འཛམ་གླིང་བདེ་སྐྱིད་ལྡན་པ་ཞིག་བསྐྲུན་རྒྱུའི་ནུས་པ་ཆེན་པོ་ཡོད། ངོས་ལ་རྣམ་པ་ཚོ་དང་ལྷན་བགྲོ་གླེང་བྱེད་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང་། དྲི་བ་ཡོད་ན་ང་ཚོས་ཕན་ཚུན་ནང་ཚགས་བྱས་ནས་བགྲོ་གླེང་བྱེད་ཆོག་གི་རེད། འདྲ་ཆགས་པོ་དེ་འདྲ་དགོས་པ་མ་རེད། ཁྱེད་རང་ཚོས་མི་གཞན་ཞིག་དང་ལྷན་སྐད་ཆ་བཤད་ཀྱི་ཡོད་བསམ་ན་འགྲིག་གི་ཡོད། ལུས་སེམས་དང་མྱོང་ཚོར་གྱི་ཆ་ནས་ང་ཚོ་གཅིག་པ་རེད། ང་ཚོ་ཚང་མས་མི་ཚེ་བདེ་སྐྱིད་འདོད་ཀྱི་ཡོད། ང་ཚོ་ཚང་མས་བདེ་སྐྱིད་ལྡན་པའི་འཛམ་གླིང་འདོད་ཀྱི་ཡོད། ངོས་རང་ར་ཤཱི་ཡའི་མཐོ་སློབ་ཁག་གི་གྲོགས་པོ་ཚོ་དང་ལྷན་བགྲོ་གླེང་བྱེད་རྒྱུར་ཧ་ཅང་དགའ་པོ་ཡོད། ཅེས་བཀའ་སློབ་སྩལ་རྗེས་སློབ་ཕྲུག་རྣམས་ཀྱི་དྲི་བ་ཁག་ལ་བཀའ་ལན་སྩལ་ཡོད་པ་རེད།
ཐེངས་འདིའི་བགྲོ་གླེང་ལས་རིམ་གསོལ་འདེབས་ཞུ་མཁན་དང་མཉམ་ཞུགས་གནང་མཁན་གྱི་གཙུག་ལག་སློབ་ཆེན་ཁག་ལྔ་ནི་མོ་སི་ཁོ་གཙུག་ལག་མཐོ་སློབ། (Moscow State University)སེནཌ་པི་ཀྲར་སི་རྦརྒ་གཙུག་ལག་མཐོ་སློབ། (St. Petersburg State University) ཀལ་མུག་མངའ་སྡེའི་གཙུག་ལག་མཐོ་སློབ། (Kalmyk State University) འབུར་ཡ་ཏ་གཙུག་ལག་མཐོ་སློབ། (Buryat State University) དང་ and ཐུ་ཝ་གཙུག་ལག་མཐོ་སློབ། (Tuvan State University) བཅས་ཡིན་པ་རེད།
