༄༅། །ཕྱི་ལོ་ ༢༠༢༡ ཟླ་ ༡ ཚེས་ ༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཀོ་རི་ཡའི་ནང་པ་ཚོས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཉིན་གྲངས་གསུམ་རིང་གི་ཤེས་རབ་སྙིང་པོའི་བཀའ་ཆོས་གནང་སྒོ་ཁག་ལེགས་པར་གྲུབ་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༩ ཙམ་མགོན་པོ་གང་ཉིད་མཆོག་༸རྒྱལ་བའི་གཟིམ་ཆུང་ཕོ་བྲང་ནས་གསུང་ཆོས་གནང་ཡུལ་དུ་ཆིབས་སྒྱུར་གྱིས་བཀའ་སློབ་སྩལ་དོན། དེ་རིང་ཀོ་རི་ཡའི་ཆོས་གྲོགས་ཚོ་དང་ལྷན་སྐད་ཆ་བཤད་རྒྱུ་ཉིན་གསུམ་པ་དེ་རེད། ཉིན་དང་པོ་དང་གཉིས་པར་སྐད་ཆ་བྱུང་བ་དེ་དག་སོ་སོ་གཅིག་པུ་བསྡད་པའི་སྐབས་ངོས་ཀྱིས་བརྗོད་པ་རྣམས་ལ་ཉམས་ལེན་བྱ་རྒྱུ་བྱུང་སོང་ངམ། གང་ལྟར་བླ་མའི་དྲུང་ནས་འཆད་པ་བྱུང་ཚེ་དེ་ཚར་གཅིག་ཐོས་སོང་ཞེས་པ་ཙམ་མིན་པར་ངེས་པར་དུ་བསྐྱར་དུ་བསམ་བློ་བཏང་སྟེ་ཉིན་རེ་བཞིན་ཉམས་ལེན་བྱེད་རྒྱུ་གལ་ཆེན་པོ་རེད། ཉིན་ལྟར་བསམ་བློ་གཏོང་ཡོང་སྐབས་རིམ་བཞིན་ཐོག་མར་ཐོས་བྱུང་གི་གོ་བ་སྐྱེས་པ་རྣམས་རིམ་པའི་བསམ་བློ་གཏོང་དུས་སེམས་ནང་ཕྲན་བུ་ངེས་པ་སྐྱེ་རྒྱུ་དང་། སེམས་ནང་ངེས་པ་སྐྱེ་དགོས་བྱུང་བ་ཡང་ནས་ཡང་དུ་སྒྲིལ་དུས་བསམ་བློའི་ནང་འགྱུར་བ་ཐེབས་ཡོང་གི་ཡོད། གང་ལྟར་ཐོས་པའི་དོན་ལ་ཡང་ནས་ཡང་དུ་བསམ་བློ་བཏང་ནས་དཔེ་ཆ་ཡང་ཀློག་པ་དང་། ངོས་ཀྱིས་བཤད་པ་དང་དཔེ་ཆ་ནང་ཡོད་པ། དེ་བཞིན་ངོས་ཀྱིས་ད་ལྟ་བཤད་པ་འགའ་ཤས་དཔེ་ཆ་ནང་མ་གསལ་བ་དེ་འདྲ་ཡོང་སྲིད་པ་རེད། ངོས་ཀྱིས་སྤྱི་ཡོངས་ཐོག་སྙིང་པོ་མདོར་བསྡུས་ཤིག་ཤོད་ཀྱི་ཡོད། དཔེ་ཆ་ནང་དེའི་འགྲེལ་བཤད་ཞིབ་ཕྲ་ཡོད། ཁྱེད་རང་ཚོ་ཆོས་འབྲེལ་ཐོབ་སོང་ཞེས་ཐོབ་གྲངས་གསོག་རྒྱུའི་སྐད་ཆ་མ་རེད།
རིམ་བཞིན་སོ་སོའི་སེམས་བརྒྱུད་ནང་འགྱུར་བ་ཐེབས་རྒྱུ་དོན་དག་རེད། ངོས་རང་ངོས་ནས་ཆ་བཞག་ན། ལམ་རིམ་དང་དེ་ཚོ་གྲས་ངོས་རང་ཆུང་ཆུང་སྐབས་ནས་ཐོས་ཡོད། བཤད་ལུང་ཞུས་ཡོད། མྱུང་ཁྲི་ཡང་ཞུས་ཡོད། སྐབས་དེ་དུས་བསམ་བློ་གང་ཡང་བཏང་མེད་དུས་དེ་ཙམ་སེམས་ནང་གང་ཡང་མི་འདུག དེ་ནས་རིམ་པའི་སོསས་དེར་ཡང་ནས་ཡང་དུ་བསམ་བློ་བཏང་སྟེ་གཞུང་གཞན་དག་ཕན་ཚུན་འདྲེས་ནས་བསམ་བློ་བཏང་ཡོང་སྐབས་ཏན་ཏན་སེམས་ནང་འགྱུར་བ་འཐེབ་རྒྱུ་གཅིག་དང་སེམས་ནང་འགྱུར་བ་ཐེབས་པའི་ལག་ཆ་ལ་ཞོགས་པ་གཉིད་སད་པ་དང་ལམ་སང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་དྲན་པ། ངོས་ཀྱིས་དུས་རྟག་ཏུ། ཇི་སྲིད་ནམ་མཁའ་གནས་པ་དང་། ཞེས་པའི་ཐོག་བསམ་བློ་འཁོར་གྱི་ཡོད། ཚེ་འདི་ལ་སྐྱེས་པ་ཙམ་མ་ཡིན་པར་ཇི་སྲིད་ནམ་མཁའ་གནས་པའི་བར་ལ་སེམས་ཅན་གྱི་དོན་བྱེད་ཀྱི་ཡིན་ཞེས་སེམས་ཤུགས་སྐྱེ་རྒྱུ་དང་། དེ་བཞིན་ཆོས་ཐམས་ཅད་རང་བཞིན་གྱི་སྒྲུབ་པའི་སྟོང་བ། རྟེན་ཅིང་འབྲེལ་བར་འབྱུང་བ་གང་།། དེ་ནི་སྟོང་པ་ཉིད་དུ་བཤད།། དེ་ནི་བརྟེན་ནས་བཏགས་པ་སྟེ།། དེ་ཉིད་དབུ་མའི་ལམ་ཡིན་ནོ།། ཞེས་མགོན་པོ་ཀླུ་སྒྲུབ་ཀྱི་གསུངས་པ་དེ་ཚོའི་གྲས་དང་། གཞན་ཡང་ཟླ་བ་གྲགས་པའི་གསུངས་དེ་དག་ཧ་ལས་པའི་ཟབ་པོ་རེད་འདུག གང་ལྟར་རྗེ་རིན་པོ་ཆེ་མཆོག་གིས་མར་བསྡོམས་སྐྱོན་ཡོང་དུས་འཕགས་པའི་མཉམ་བཞག་དངོས་པོའི་འཇིག་རྒྱུར་ཐལ་བ་དང་། ཐ་སྙད་བདེན་པ་རིགས་པས་དཔྱད་བཟོད་དུ་ཐལ་བ། དོན་དམ་པའི་སྐྱེ་བ་མི་ཁེགས་པར་ཐལ་བ། ཆོས་ཐམས་ཅད་རང་སྟོང་དུ་གསུངས་པར་མི་འཐད་པར་ཐལ་བ་བཅས་ཐལ་བ་བཞི་པོར་ངོས་ཀྱིས་ཉིན་ལྟར་བསམ་བློ་གཏོང་གི་ཡོད། ཞོགས་པ་ཡར་ལངས་ཏེ་བསྐོར་བ་ཏོག་ཙམ་སྐོར་བའི་སྐབས་དེ་རིགས་ལ་བསམ་བློ་གཏོང་གི་ཡོད།
མགོན་པོ་ཀླུ་སྒྲུབ་ཀྱིས། ཕུང་མིན་ཕུང་པོ་ལས་གཞན་མིན།། དེ་ལ་ཕུང་མེད་དེ་དེར་མེད།། དེ་བཞིན་གཤེགས་པ་ཕུང་ལྡན་མིན།། ཞེས་རང་ལ་ཚུར་སྦྱར་ནས། བདག་ཅེས་བྱ་བ་ཕུང་ལྡན་མིན།། བདག་ཅེས་བྱ་བ་གང་ཞིག་ཡིན།། ཞེས་བསམ་བློ་གཏོང་བཞིན་པ་འདིས་སྟོང་པའི་གོ་བ་ཏོག་ཙམ་ཡོད་པ་དེ་སེམས་ནང་ཚོར་བ་ཡོད་པ་ཞིག་ཡོང་གི་ཡོད། གང་ལྟར་གལ་ཆེན་པོ་ནི་ཡང་ནས་ཡང་དུ་འདྲིས་པར་བྱེད་རྒྱུ་དང་། ཡང་ཡང་བསམ་བློ་བཏང་ནས་རིམ་པས་སེམས་ལ་འགྱུར་བ་ཐེབས་པ་བྱེད་རྒྱུ་རེད། འདིའི་ཐོག་ནས་ད་ལྟ་ཤེས་རབ་སྙིང་པོའི་ནང་གསུངས་པ་བཞིན། ག་ཏེ་ག་ཏེ་པཱ་ར་ག་ཏེ་པཱ་ར་སཾ་ག་ཏེ་བོ་དྷི་སྭ་ཧཱ། ཞེས་བློ་རིམ་པས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ལ་མྱོང་བ་ཤུགས་ཆེ་རུ་དང་ཟབ་ཏུ་ཕྱིན་ནས་རིམ་པས་ཚོགས་ལམ་དང་སྦྱོར་ལམ། མཐོང་ལམ། སྒོམ་ལམ། མི་སློབ་ལམ་བཅས་ང་ཚོས་ཤོད་བཞིན་པ་འདི་དཔེ་ཆའི་ནང་ཡོད་པ་ཙམ་མིན་པར་སོ་སོ་རང་གིས་ཉམས་མྱོང་གི་ཐོག་ལ་དེ་དག་དངོས་སུ་ཡོང་རྒྱུ་གོམས་པའི་སྒོ་ནས་ཡོང་གི་ཡོད། དད་པ་གལ་ཆེན་པོ་རེད་དེ་སེམས་ནང་འགུལ་སྐྱོད་འཐེབ་རྒྱུ་ནི་ཆོས་རབ་ཏུ་རྣམ་འབྱེད་ཀྱི་ཤེས་རབ་ཡང་ཡང་བསམ་བློ་བཏང་སྟེ་དད་པ་དང་ཤེས་རབ་ཟུང་སྦྲེལ་བྱས་ནས་འགྲོ་རྒྱུ་དང་གཙོ་བོ་གོམས་འདྲིས་རེད་འདུག ཅེས་བཀའ་སློབ་སྩལ་རྗེས་ཤེས་རབ་སྙིང་པོའི་བཀའ་ཆོས་འཕྲོ་སྐྱོང་མཛད་དེ་མཇུག་ལེགས་པར་གྲུབ་མཚམས་མགོན་པོ་གང་ཉིད་མཆོག་གིས་མཛད་པའི་བླ་མའི་རྣལ་འབྱོར་གྲུ་འཛིན་ཞིང་གི་ཐེམ་སྐས་ཞེས་བྱ་བའི་ལུང་དང་བྱང་ཆུབ་སེམས་དཔའི་སྡོམ་པ་འབོག་ཆོག་མཛད་པ་དང་།
མཐར་ཆོས་བ་ཞིག་གིས། ནད་ཡམས་འདི་ཡུན་རིང་དྲགས་རྐྱེན་གྱིས་སེམས་གུ་དོག་པོ་ཆགས་བཞིན་འདུག་པས་དེའི་སེལ་བའི་ཐབས་ལམ་གསུང་རོགས། ཞེས་བཀའ་འདྲི་ཞུས་པར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ད་ལྟ་ནད་ཡམས་དེ་ཨ་མེ་རི་ཀའི་ནང་ལ་ཧ་ལས་པའི་ཤུགས་ཆེན་པོ་དང་། དེ་བཞིན་རྒྱ་གར་དང་ཉི་ཧོང་ལ་ཡང་ཤུགས་ཆེན་པོ་ཡོང་གི་འདུག་པས། ཀོ་རི་ཡ་དང་རྒྱ་ནག་གི་སེམས་ལ་དངོས་གནས་དངངས་སྐྲག་སྐྱེ་བ་དང་། སེམས་ཞུམ་པ། སྦུག་སྲུབས་དོག་པོ་ཆགས་ཀྱི་འདུག བསམ་བློ་རྒྱ་ཆེ་ས་ནས་བཏང་བ་ཡིན་ན། ང་ཚོའི་ལུས་འདི་གས་སྐྱེ་རྒ་ན་འཆིའི་སྡུག་བསྔལ་གྱི་རྒྱུ་བྱེད་ཀྱི་ཡོད་པས། སྐྱེ་རྒ་ན་འཆིའི་སྡུག་བསྔལ་དེ་རང་བཞིན་ལྷན་སྐྱེས་ཀྱི་སྲིད་པ་འཁོར་བའི་འཁོར་སྟངས་ཤིག་ཆགས་ཡོད། ནད་ཀྱི་སྡུག་བསྔལ་དེ་ད་ལྟའི་གནས་སྐབས་ལ་ནད་ཡམས་ཤིག་ཁྱབ་ནས་ཡོང་གི་ཡོད་པ་འདི་ཡིན། མཐོང་ཆོས་ལ་ཆ་བཞག་ན་དེ་ཟས་དང་སྤྱོད་ལམ་མང་པོ་ཞིག་དང་འབྲེལ་བ་ཡོད།
སངས་རྒྱས་པའི་ཆོས་པ་ཞིག་གི་ངོས་ནས་བཤད་ན། ཚེ་རབས་མང་པོའི་རྒྱུ་དང་རྐྱེན་ལ་བརྟེན་ནས་ད་ལྟའི་དུས་རབས་འདིར་ནད་ཡམས་འདི་འདྲ་ཞིག་དམིགས་བསལ་ཤུགས་ཆེན་པོ་བྱས་ནས་ཡོང་གི་ཡོད་པ་དང་། དེ་འཛམ་བུ་གླིང་འདིའི་སྒང་གི་མི་སོ་སོས་སྔོན་བསགས་པའི་ལས་ཀྱི་འབྲས་བུ་སྨིན་ནས་ཡོང་བ་ཞིག་ཡིན། ཞིབ་ཚགས་པོ་བྱས་ནས་ལས་ཅི་འདྲ་ཞིག་གིས་འབྲས་བུ་འདི་བྱུང་བ་རེད་ཟེར་ན། ལས་འབྲས་ཀྱི་རྒྱུ་འབྲས་དེ་ཕྲ་ཞིང་ཕྲ་བ་དང་ཤིན་ཏུ་ལྐོག་གྱུར་ཡིན་པས། བཅོམ་ལྡན་འདས་ཀྱི་རྣམ་པ་ཐམས་ཅད་མཁྱེན་པའི་ཡེ་ཤེས་ཀྱིས་གཟིགས་ནས། རྒྱུ་རྐྱེན་འདི་འདྲ་ཞིག་གི་ཐོག་ནས་ནད་ཡམས་འདི་དུས་སྐབས་འདིའི་སྐབས་སུ་བྱུང་བ་རེད་ཅེས་གསུང་རྒྱུ་ཞིག་མ་གཏོགས། ང་ཚོས་འཕྲལ་དུ་ཤེས་ཁག་པོ་ཡིན་ན་ཡང་། ནད་ཡམས་འདི་འདྲ་ཡོང་བའི་རྩ་བ་དེ། ང་ཚོར་སྡུག་བསྔལ་གྱི་རྟེན་བྱེད་པའི་སྡུག་བདེན་གྱི་ཕུང་པོ་ཞིག་ཡོད་པས་རྐྱེན་བྱས་ཏེ། ལས་ངན་བསགས་པའི་འབྲས་བུ་སྨིན་པ་ཞིག་ཆགས་ཡོད་པས། ལས་མ་བྱས་པ་དང་མི་འཕྲད། ལས་བྱས་པ་ཆུད་མི་ཟ་ཞེས་གསུངས་འདུག་པ་ལྟར། ནད་ཡམས་ཡོང་བ་དེ་རང་བཞིན་གྱིས་ང་ཚོའི་ཚེ་རབས་མང་པོའི་ལས་དང་འབྲེལ་བ་ཡོད་པ། ཚེ་འདི་ལ་ཡང་ཕྱི་ནང་གི་རྐྱེན་མང་པོ་ཞིག་གི་ཐོག་ནས་ནད་ཡམས་དེ་དག་ཡོང་གི་ཡོད་པར་བརྟེན། མ་ཚང་མེད་རྒྱུ་དེ་ལ་ནི།། འབྲས་བུ་གང་གིས་ལྡོག་པར་ནུས།། ཞེས་རྒྱུ་མ་ཚང་བ་མེད་པ་ཞིག་གྲུབ་ཚར་བའི་རྗེས་ལ་དེའི་འབྲས་བུ་ལྡོག་ཐབས་ཡོད་པ་མ་རེད་ཅེས་གསུངས་པ་ལྟར་ཡིན་པས། སེམས་མི་སྐྱིད་པ་དང་སེམས་ཁྲལ་བྱས་ནས་བསྡད་ན་ཕན་ཐོགས་མེད།
ནད་ཡམས་འདི་ལྟ་བུ་ཡོང་བའི་སྐབས་སུ་ག་ཚོད་ཐུབ་ཐུབ་ཀྱིས་བསམ་བློ་རྒྱ་ཆེ་ས་ནས་གཏོང་བ། དཔེར་ན། སྡུག་བསྔལ་དང་ལེན་གྱི་དམིགས་པ་ལ་བསམ་བློ་གཏོང་བ་ལྟ་བུ་བྱས་ཏེ། ཡང་སྙིང་བློ་སྦུག་སྲུབས་དོག་པོ་མ་བྱེད། འདུམ་བདེ་ཤོས་དེ་སྤྱོད་འཇུག་ནས། གལ་ཏེ་བཅོས་སུ་ཡོད་ན་ནི།། དེ་ལ་མི་དགའ་བྱར་ཅི་དགོས།། གལ་ཏེ་བཅོས་སུ་མེད་ན་ནི།། དེ་ལ་མི་དགའ་བྱས་ཅི་ཕན།། ཞེས་གསུངས་པ་ལྟར་བཅོས་སུ་ཡོད་མེད་ལ་བསམ་བློ་བཏང་ནས། བཅོས་ཐབས་ཡོད་པ་ཞིག་ཡིན་ན་བློ་ལྷོད་ལྷོད་བྱོས། ནད་ཡམས་འདི་སེལ་རྒྱུར་ཚན་རིག་པ་དང་སྨན་པ་ཚོས་ཧ་ཅང་འབད་བརྩོན་བྱེད་ཀྱི་ཡོད་པ་ལ་རྗེས་སུ་ཡི་རང་ཡོད། ཧ་ཅང་ཡག་པོ་རེད། བཅོས་སུ་མེད་པ་ཞིག་ཡིན་ན་ནི་ང་ཚོའི་སྤྱི་མཐུན་གྱི་ལས་ཡིན་པས་ལྡོག་ཏུ་ཡོད་པ་མ་རེད་བསམས་པ་དང་། སངས་རྒྱས་པའི་ཆོས་པ་ཞིག་གི་ངོས་ནས་བཤད་ན། ཚེ་རབས་ནས་ཚེ་རབས་བཤད་པ་མ་གཏོགས། ཚེ་འདི་གཅིག་པུ་བཤད་རྒྱུ་མ་རེད། དེ་ལྟ་བུའི་ཐོག་ནས་རྐྱེན་ངན་བྱང་ཆུབ་ལམ་དུ་བསྒྱུར་གསུངས་པ་ལྟར། རྐྱེན་ངན་བྱུང་བ་དེས་སེམས་སྦུག་སྲུབས་དོག་པོ་མི་བྱེད་པར། རྐྱེན་ངན་བྱུང་བ་དེ་དག་བྱང་ཆུབ་ཀྱི་ལམ་དུ་བསྒྱུར་ཐུབ་པའི་གོ་སྐབས་ཡོད་པས་དེ་ལྟར་གྱིས། ཞེས་སོགས་དྲི་བ་ཁག་ལྔ་ལ་བཀའ་ལན་སྩལ་རྗེས་ཀོ་རི་ཡའི་དད་ལྡན་མང་ཚོགས་གཙོ་བོར་གྱུར་བའི་དྲ་ལམ་ནས་གསུང་ཆོས་ཞུ་མཁན་རྣམས་ལ་ཉིན་གསུམ་རིང་གི་གསུང་ཆོས་གནང་སྒོ་ལེགས་པར་གྲུབ་ཡོད་པ་བཅས།།
