༄༅། །ཕྱི་ལོ་ ༢༠༢༠ ཟླ་ ༩ ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨེ་ཤི་ཡའི་ཆོས་ཞུ་བ་རྣམས་ལ་དངུལ་ཆུ་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མའི་བཤད་ལུང་འཕྲོ་སྐྱོང་དང་། རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་གྱི་བཀའ་ཆོས་སྩལ་ཡོད་པ་རེད།
དེ་ཡང་སྔ་དྲོ་ཆུ་ཚོད་ ༩ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྡ་རམ་ས་ལའི་གཟིམ་ཆུང་ནས་བཀའ་ཆོས་གནང་ཡུལ་དུ་ཆིབས་སྒྱུར་གྱིས་བཞུགས་ཁྲིར་༸ཞབས་སོར་འཁོད་མཚམས་པཱ་ལིའི་སྐད་དང་ཀོ་རི་ཡའི་སྐད་ཐོག་ནས་ཤེས་རབ་སྙིང་པོ་རིམ་པར་གསུང་འདོན་གནང་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་མཚན་ཉིད་ཚང་བའི་དགེ་བའི་བཤེས་གཉེན་གྱི་སྐོར་ལ་ལམ་སྟོན་བཀའ་སྩལ་དོན། དགེ་རྒན་དང་དགེ་ཕྲུག་གི་འབྲེལ་བ་གལ་ཆེན་པོ་འདུག འཛིན་གྲྭའི་ནང་དུ་ཡོད་པའི་ཕྲུ་གུ་ཚོས་མི་ཚེ་ཡག་པོ་ཡོང་བའི་དོན་དུ་དེར་སློབ་སྦྱོང་བྱེད་ཀྱི་ཡོད། དགེ་རྒན་གྱིས་ཕོགས་ཟ་ཐུབ་ཙམ་མིན་པར་བསམ་བློའི་ནང་དུ་དངོས་གནས་ཤ་ཚ་བྱས་ཏེ་ཕྲུ་གུ་ཚོའི་མི་ཚེ་གང་བོར་ཡག་པོ་ཡོང་བར་སེམས་ཁུར་ཞིག་ཡོད་པ་བྱེད་རྒྱུ་ལས་སེམས་ཁུར་མེད་པར་ཕྱིན་ན་དགེ་ཕྲུག་ཕྲུ་གུ་ཚོའི་ངོས་ནས་ཀྱང་གུས་ཞབས་སླེབས་ཀྱི་མ་རེད། དེར་བརྟེན། ཚུར་གུས་ཞབས་སླེབས་པ་ལ་ཕར་ཤ་ཚ་དགོས་པ་རེད།
སློབ་སྦྱོང་སྤྲོད་མཁན་གྱི་དགེ་རྒན་ཞིག་ཡིན་ན་གཞན་ལ་བརྩེ་བ་དང་། གཞན་ལ་བརྩེ་བ་དེའང་འདོད་ཆགས་དང་འབྲེལ་བའི་བློ་རྒྱ་ཆུང་ཆུང་མིན་པར་ཕྲུ་གུ་དེའི་རིག་པ་ཇི་འདྲ་ཡོད་པ་དང་། མ་འོངས་པར་ཕྲུ་གུ་དེས་མཐོ་རིམ་སློབ་སྦྱོང་བྱེད་དུས་གང་གི་སྟེང་དུ་ཕྱིན་ན་ཡག་པོ་ཡོད་པ་ལ་དགེ་རྒན་གྱིས་ཞིབ་འཇུག་བྱེད་དགོས་པ་ཞིག་འདུག ཕྲུ་གུ་ཁོ་རང་གི་ཁམས་དང་མོས་པ་ལ་བལྟ་ཡོང་སྐབས་དམིགས་བསལ་གྱི་སློབ་སྦྱོང་འདིའི་སྟེང་དུ་བྱེད་ན་ཡག་པོ་འདུག་ཅེས་དགེ་རྒན་གྱིས་སློབ་སྟོན་བྱ་རྒྱུ་གལ་ཆེན་པོ་འདུག ཕྲུ་གུའི་སློབ་སྦྱོང་ཡག་པོ་ཡོང་བ་ལ་དགེ་རྒན་གྱིས་སེམས་ཁུར་བླངས། དགེ་ཕྲུག་གིས་ཀྱང་རྒན་གྱི་ཁ་ལ་ཉན་པོ་བྱ་རྒྱུ་གལ་ཆེན་པོ་ཆགས་ཡོད།
ཆོས་ཕྱོགས་ཀྱི་ཐོག་ལ་སླེབས་ཡོང་སྐབས་སྔོན་ལ་དགེ་བའི་བཤེས་གཉེན་དེ་མཚན་ཉིད་ཚང་བ་ཞིག་དགོས། བཤེས་གཉེན་དུལ་བ་ཞི་བ་ཉེར་ཞི་བ།། ཡོན་ཏན་ལྷག་པ་བརྩོན་བཅས་ལུང་གིས་ཕྱུག། དེ་ཉིད་རབ་ཏུ་རྟོགས་པ་སྨྲ་མཁས་ལྡན།། བརྩེ་བའི་བདག་ཉིད་སྐྱོ་བ་སྤངས་ལ་བརྟེན།། ཞེས་དགེ་བའི་བཤེས་གཉེན་མཚན་ཉིད་ཚང་བ་ཞིག་དགོས་ཀྱི་ཡོད། བླ་བྲང་ཆེན་པོ་ཡོད་པ་དང་ཁྲི་མཐོན་པོ་ཡོད་པ་ཙམ་གྱིས་ཕན་གྱི་ཡོད་པ་མ་རེད། རྗེ་རིན་པོ་ཆེས། རང་མ་དུལ་བས་གཞན་འདུལ་བ་གནས་མེད་པར་གསུངས་པས་གཞན་འདུལ་བའི་བླ་མ་དེས་ཐོག་མར་རང་གི་རྒྱུད་བཏུལ་བ་ཞིག་དགོས་སོ།། འོ་ན་ཇི་ལྟར་བཏུལ་བ་ཞིག་དགོས་སྙམ་ན། གང་བྱུང་བྱུང་གི་སྒྲུབ་པ་བྱས་ནས་རྟོགས་པའི་ཡོན་ཏན་དུ་མིང་བཏགས་པ་རེ་རྒྱུད་ལ་ཡོད་པས་མི་ཕན་པས་རྒྱལ་བའི་བསྟན་པ་སྤྱི་དང་མཐུན་པའི་རྒྱུད་འདུལ་ལུགས་ཤིག་དགོས་སོ།། ཞེས་གསུངས་པ་དང་། དེ་ཅི་ཞིག་རེད་ཅེ་ན། མདོ་སྡེ་རྒྱན་གྱི་ནང་། བཤེས་གཉེན་དུལ་བ་ཞི་བ་ཉེར་ཞི་བ།། ཞེས་པས་བསླ་པ་གསུམ་གྱི་ཉམས་ལེན་དང་། ཡོན་ཏན་ལྷག་པ་བརྩོན་བཅས་ལུང་གིས་ཕྱུག། དེ་ཉིད་རབ་ཏུ་རྟོགས་པ་སྨྲ་མཁས་ལྡན།། བརྩེ་བའི་བདག་ཉིད་ཅན་གྱི་བླ་མ་ཞིག་དགོས་ཀྱི་ཡོད་པ་རེད། ཅེས་སོགས་བཀའ་སློབ་དང་། ལག་ལེན་སོ་བདུན་མའི་གསུང་ཆོས་འཕྲོ་སྐྱོང་དང་། ལམ་གཙོ་རྣམ་གསུམ་གྱི་བཤད་ལུང་བཀའ་དྲིན་སྩལ་རྗེས་ཆོས་ཞུ་བའི་བཀའ་འདྲི་ཁག་ཅིག་ལ་བཀའ་ལན་སྩལ་ཏེ་ཉིན་གཉིས་པའི་གསུང་ཆོས་གནང་སྒོ་ལེགས་པར་གྲུབ་ཡོད་པ་བཅས།།
