༄༅། །ཕྱི་ལོ་ ༢༠༢༠ ཕྱི་ཟླ་ ༥ ཚེས་ ༡༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གོ་ལའི་ཤར་ནུབ་ཀྱི་ཡུལ་གྲུ་གང་སར་གནས་འཁོད་དད་ལྡན་མང་ཚོགས་སྤྱི་སྒེར་དུ་མས་ཡང་ཡང་ཇི་ལྟར་གསོལ་བ་བཏབ་དོན་ལྟར་བཞུགས་སྒར་ཕོ་བྲང་དུ་དྲ་ལམ་ཐད་གཏོང་བརྒྱུད་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་ལེའུ་དང་པོ་དང་བཞི་པ་གཉིས་ཀྱི་བཀའ་འཁྲིད་དང་འབྲེལ་ད་ལྟའི་དུས་འདིར་རྐྱེན་ངན་ལ་གདོང་ལེན་བྱེད་ཕྱོགས་ཀྱི་ལམ་སྟོན་གནང་སྒོ་ལེགས་པར་གྲུབ་ཡོད་པ་རེད།
དེ་ཡང་སྔ་དྲོ་ཆུ་ཚོད་༨།༠༠ ཙམ་ལ་གཟིམ་ཆུང་ནས་ཕོ་བྲང་གི་གསུང་ཆོས་གནང་ཡུལ་དུ་ཆིབས་བསྒྱུར་གྱིས་བཞུགས་ཁྲིར་འཁོད་མཚམས་བཀའ་ཁྲིད་དབུ་འཛུགས་ཀྱིས་བཀའ་སློབ་སྩལ་དོན། དེ་རིང་ཉི་མ་གསར་པ་འདིར་ངོས་ཀྱི་གྲོགས་པོ་དང་ལྷག་པར་ཆོས་གྲོགས་ཚོར་སྔ་དྲོ་བཀྲ་ཤིས་བདེ་ལེགས་ཞུ་རྒྱུ་ཡིན། ཁ་སང་ཞུས་པ་ནང་བཞིན་རེད། ང་ཚོ་ཚང་མས་སྡུག་བསྔལ་མི་འདོད་པ་དང་བདེ་བ་འདོད་པ་ཤ་སྟག་རེད། སྤྱིར་འཛམ་བུ་གླིང་འདིར་དུད་འགྲོ་ཚོར་ཡང་ཆགས་སྡང་གི་ཐོག་ནས་རྙོག་གྲ་ཡོང་གི་ཡོད་ཀྱང་། ང་ཚོ་མིའི་རྣམ་དཔྱོད་འདིས་ཆགས་སྡང་ལ་ཞབས་འདེགས་བསྒྲུབས་ནས་མི་ཁྲི་ཕྲག་འབུམ་ཕྲག་གི་སྲོག་འགྲོ་བ་དང་དཀའ་ངལ་འཕྲད་པའི་རིགས་བཟོ་བཞིན་ཡོད། རང་ཉིད་སེམས་མི་བདེ་བའི་དབང་གིས་ནང་ཁུལ་རྙོག་གྲ་ཡོང་བ་ཙམ་དུ་མ་ཟད། འཛམ་གླིང་འདིའི་སྟེང་གི་སྲོག་ཆགས་གྲངས་ཀྱིས་མི་ལངས་པ་མང་པོ་ཞིག་ལ་མིས་བརྡབ་གསིག་གཏང་རྒྱུ་སོགས་མང་པོ་ཞིག་འདུག དེར་བརྟེན། རིམ་པ་དང་པོ་དེར་མི་རང་ཉིད་ཀྱིས་ཁ་གཅིག་གྲག་བྱས་ནས་ཞི་བདེ་ཞེས་ཟེར་གྱི་ཡོད་པ་རེད། དངོས་འབྲེལ་ཞི་བདེ་དངོས་མ་ཡོང་བར་གཙོ་བོ་མི་ལ་ཐུག་འདུག འཛམ་གླིང་འདིའི་སྟེང་སྔར་ལོ་རྒྱུས་ཐོག་འཁྲུག་པ་བརྒྱག་རྒྱུ་ལྟ་བུ་ཧ་ཅང་མང་པོ་ཡོང་གི་ཡོད། དམག་ཆེན་གཉིས་པ་བར་དུ་འཁྲུག་པ་བརྒྱག་རྒྱུ་ཧ་ཅང་མང་པོ་ཡོང་བ་དང་། ད་ལྟ་ཡིན་ནའང་འཁྲུག་པ་རྒྱག་བཞིན་ཡོད་པ་འདི་དག་ང་ཚོ་དང་ཁྱོད་ཚོ་ཞེས་པའི་རྐྱེན་གྱིས་ཡོང་བཞིན་ཡོད་པ་ཞིག་དང་། ལོ་རྒྱུས་ནང་ཆ་བཞག་པ་ཡིན་ནའང་རྒྱལ་པོ་ཚོས་སོ་སོའི་མངའ་ཐང་སོགས་སྐྱོབ་པའི་དོན་དུ་འཁྲུག་པ་བརྒྱབ་པ་ཞིག་ཡོང་བཞིན་འདུག ངོས་ཀྱིས་སྐབས་རེར་དམག་འཁྲུག་ནི་ཞིང་བྲན་ལམ་ལུགས་དང་འབྲེལ་བ་འདུག ཅེས་འདི་ལྟར་ཤོད་ཀྱི་ཡོད། ཞིང་བྲན་ལམ་ལུགས་བྱས་ནས་མི་གཅིག་གིས་དབང་ཆ་ཆ་ཚང་བཟུང་ནས་ཁོ་རང་གི་སྡེ་ལྟ་བུ་བཟུང་བའི་ཐོག་ནས་ཡོང་བ་ཞིག་རེད།
དེང་སྐབས་ཀྱི་འཛམ་གླིང་འདི་བསམ་བློ་ཆེ་ས་ནས་བཏང་ཡོང་དུས་མི་སྤྱི་ལ་བསམ་བློ་གཏོང་རྒྱུ་དང་། གཞི་རྩའི་འཛམ་གླིང་འདིའི་སྟེང་འགྱུར་བ་མང་པོ་བྱུང་ཡོད། འཛམ་གླིང་དམག་ཆེན་གཉིས་པའི་རྗེས་སུ་རྒྱལ་ཁབ་སོ་སོའི་སྐད་ཆ་མིན་པར་འཛམ་གླིང་སྤྱིའི་རྒྱལ་ཚོགས་ཤིག་བཙུགས་ཡོད། ཡུ་རོབ་ལ་ཆ་བཞག་ན་འཁྲུག་པ་མང་ཤོས་བརྒྱབ་ཡོད་ཀྱང་ཡོ་རུབ་སྤྱི་མཐུན་གྱི་ཚོགས་པ་ཞིག་བཙུགས་པའི་རྐྱེན་གྱིས་ཞི་བདེ་ཡོང་བར་ཧ་ཅང་ཕན་ཐོགས་བྱུང་ཡོད། ངོས་ཀྱིས་རྟག་པར་རྗོད་བཞིན་ཡོད། གལ་སྲིད་ཡུ་རོབ་མཉམ་འབྲེལ་བཙུགས་མེད་ན་འདས་པའི་ལོ་བཅུ་ཕྲག་འགའ་ཤས་རིང་ཏན་ཏན་འཁྲུག་པ་རྒྱག་སྲིད་ཀྱི་རེད། ཡུ་རོབ་མཉམ་འབྲེལ་བཙུགས་པར་བརྟེན་དེ་གའི་ཚོགས་མི་ཡིན་པའི་རྒྱལ་ཁབ་ཁག་གིས་འཁྲུག་པ་ཁྱོན་ནས་རྒྱག་གི་མེད། མི་གསོད་རེས་བཏང་མེད། དེར་བརྟེན། འདི་དཔེ་མཚོན་རྒྱུ་ཞིག་རེད་འདུག དེ་བཞིན་རྒྱ་གར་ལ་དཔེ་བལྟས་པ་ཡིན་ན། རྒྱ་གར་ལ་རྒྱལ་ཕྲན་ཧ་ཅང་མང་པོ་འདུག འོན་ཀྱང་། རྒྱ་གར་སྤྱི་མཐུན་གྱི་རྒྱལ་ཁབ་བཙུགས་ནས་རྒྱལ་ཕྲན་དེ་དག་སོ་སོ་ཆུང་ཆུང་བཞག་པ་མ་གཏོགས་སྤྱི་ལ་ཇུས་གཏོགས་གང་ཡང་མེད་པར་དེ་ལྟར་འགྲོ་བཞིན་འདུག མཉམ་འབྲེལ་དང་སྤྱི་མཐུན་བྱ་རྒྱུ་འདི་ལ་ཁྱད་པར་ཆེན་པོ་འདུག ད་ལྟ་ཆ་བཞག་ན་འཛམ་གླིང་རྒྱལ་ཚོགས་ཀྱིས་འཛམ་གླིང་འདིའི་སྟེང་མིར་དཀའ་ངལ་འཕྲད་བཞིན་པ་བཙན་བྱོལ་བ་ལྟ་བུར་གང་ཐུབ་ཕན་ཐོགས་དང་དོ་སྣང་བྱེད་བཞིན་འདུག ཧ་ཅང་རྩ་ཆེན་པོ་རེད་འདུག འདི་དཔེ་མཚོན་རེད། ང་ཚོས་སྤྱི་ལ་བསམ་བློ་གཏོང་དགོས།
ཁ་སང་ཞུས་པ་ནང་བཞིན་རེད། འཛམ་གླིང་འདིའི་སྟེང་འགྲོ་བ་མི་ཐེར་འབུམ་བདུན་ཡོད་པ་ཚང་མ་གླིང་གཅིག་གི་སྟེང་གནས་ཡོད། ང་ཚོ་ཚང་མ་སྐྱིད་ན་སྐྱིད་མཉམ་དང་སྡུག་ན་སྡུག་མཉམ་བྱེད་དགོས་པ་ཞིག་ཆགས་འདུག དེར་བརྟེན། མི་གཅིག་གྱུར་གྱི་འདུ་ཤེས་བཞག་ནས་མི་ཀུན་ལ་ཕན་པ་དང་བདེ་བ་ཡོང་བ་དང་། ང་དང་ཁྱོད། ང་ཚོ་དང་ཁྱོད་ཚོ་ཟེར་བའི་དུས་ཚོད་རྫོགས་པའི་སྐད་ཆ་རེད། ཁྱིམ་ཚང་གཅིག་ལ་ཆ་བཞག་ནའང་ས་གནས་དེ་གར་ཇི་ཙམ་འཆམ་པ་དང་མཐུན་པ་བྱུང་ན་ཕན་གྱི་འདུག དཔེར་ན། ཁྱིམ་ཚང་ཞིག་ལ་ཇི་ཙམ་རོགས་པ་དང་བློས་འཁེལ་བའི་གྲོགས་པོ་མང་བ་ཡོད་ན་སེམས་ནང་ལ་རང་བཞིན་གྱིས་དཀའ་ངལ་འཕྲད་ན་ལབ་ས་ཡོད་སྙམ་པ་ཞིག་ཡོང་བཞིན་ཡོད། དེར་བརྟེན། སྤྱི་སེམས་འཁྱེར་རྒྱུ་ཧ་ཅང་གལ་ཆེན་པོ་རེད། དེང་སང་ང་ཚོ་ཞེས་ཁ་ཐུག་དེ་ལ་ང་དང་དེ་ནས་ང་ཚོའི་ཚོགས་པ་ང་ཚོའི་སྤྱི་ཚོགས། ང་ཚོའི་རྒྱལ་ཁབ་ཟེར་བའི་སྔ་མོའི་བག་ཆགས་དེ་ཤུགས་ཆེན་པོ་འདུག དེ་ལ་ང་ཚོ་མི་ཡི་ཁྱིམ་ཚང་གཅིག་གྱུར་ཡིན་པའི་འདུ་ཤེས་དེ་ཧ་ཅང་གལ་ཆེན་པོར་མཐོང་གི་འདུག
ཆོས་བརྒྱུད་ཁག་གི་བསླབ་བྱ་ལ་མི་གཅིག་གྱུར་བཤད་པ་མ་གཏོགས་མི་ལ་དབྱེ་འབྱེད་གཏོང་གི་མི་འདུག ནང་པ་སངས་རྒྱས་པའི་ཆོས་ལ་ཆ་བཞག་ན་ནམ་མཁའི་མཐའ་དང་མཉམ་དུ་སེམས་ཅན་ཐམས་ཅད་ཅེས་བཤད་བཞིན་ཡོད། དེ་ཚོའི་གྲས་དངོས་ཡོད་གནས་ཚུལ་ལ་ཕན་ཐོགས་ཡོད་པ་ཞིག་རེད། ཁ་སང་རོབ་ཙམ་ཞུས་པ་ལྟར། མི་གཅིག་གྱུར་ཡིན་པའི་འདུ་ཤེས་བཟུང་ནས་སྤྱི་སེམས་འཛིན་རྒྱུ་ནི་ཧ་ཅང་གལ་ཆེན་པོ་རེད། ཆོས་བརྒྱུད་ཁག་ལ་ཆ་བཞག་ནའང་མིའི་ཆོས་ལུགས་ཆགས་ཡོད་པ་རེད། མིའི་བྱམས་བརྩེ་གོང་མཐོར་སྤེལ་བཞིན་ཡོད་པས་མི་ལ་ཕན་གྱི་ཡོད་པ་རེད། ལྟ་གྲུབ་འདྲ་མིན་ནི་ཟས་ནང་བཞིན་རེད། དཔེར་ན། ཟ་ཁང་ཞིག་གི་ནང་དུ་ཟ་མ་སྣ་གཅིག་རྐྱང་བ་བཏང་བ་ཡིན་ན་གང་འཚམ་ཞིག་ནས་ཟ་ཁང་དེའི་ནང་དུ་མི་ཡོང་མཁན་ཡོད་པ་མ་རེད། ཟས་རིགས་སྣ་ཚོགས་ཡོད་ཚེ་བྲོ་བ་མི་འདྲ་བ་ལ་དགའ་མོས་བྱས་ཏེ་ཡོང་གི་རེད། དེ་ནང་བཞིན་ཆོས་ཕྱོགས་ཀྱི་ཐོག་ནས་ལྟ་གྲུབ་དེའང་འདྲ་མིན་ཡོད་པ་ཡིན་ན་མི་མང་པོ་ལ་དོ་སྣང་སླེབས་པ་དང་། རྣམ་དཔྱོད་སླེབས་པར་ཕན་གྱི་རེད། གཅིག་རྐྱང་པ་སྐོར་བ་བརྒྱབ་ནས་བསྡད་ཚེ་གང་འཚམ་ཞིག་ནས་གྲི་དང་འདྲ་ན་རྣོ་མེད་པ་ལྟ་བུ་ཡོང་རྒྱུ་རེད། དེར་བརྟེན། ཆོས་བརྒྱུད་མང་པོ་ཡོད་པ་དེས་མི་ལ་ཕན་གྱི་འདུག་བསམ་གྱི་འདུག གལ་ཆེ་ཤོས་ནི་ཆོས་བརྒྱུད་ཚང་མའི་བསླབ་བྱ་གཅིག་གྱུར་ཡིན་པ་དེ་ལ་ང་ཚོས་བསམ་བློ་གཏོང་དགོས་པ་རེད། ལོ་རྒྱུས་ཀྱི་ནང་དུ་ཆོས་ལུགས་ཕན་ཚུན་འཁྲུག་པ་རྒྱག་པ་དང་གསོད་རེས་བཏང་བ་ཡོང་གི་ཡོད་པ་རེད། ཡིན་ནའང་། དེ་ཚོ་གཙོ་བོ་ཆབ་སྲིད་དང་འབྲེལ་ནས་ཡོང་གི་ཡོད་པ་རེད། ཆོས་བརྒྱུད་དེ་ལ་འབྲེལ་བ་ཡོད་པའི་རྒྱལ་པོ་ཚོས་བེད་སྤྱོད་བཏང་བ་ལྟ་བུ་འདུག ད་ལྟ་ང་ཚོ་དུས་རབས་གསར་པ་ཞིག་གི་ནང་དུ་སླེབས་ཡོད་པས་མི་གཅིག་གྱུར་གྱི་འདུ་ཤེས་མ་རྩ་ལ་བཞག་པའི་ཐོག་ནས་ཆོས་ལུགས་ཚང་མའང་མིའི་ཆོས་ལུགས་དང་མི་ལ་ཕན་གྱི་ཡོད་པས་ཆོས་ལུགས་མཐུན་འབྲེལ་བྱེད་དགོས་པ་ཁ་སང་ཞུས་པ་ལྟར་ཡིན།
དེ་རིང་འདིར་ནང་ཆོས་ངོ་སྤྲོད་ལྟ་བུར་ཞུ་རྒྱུ་ནི། བསོད་ནམས་མིན་པ་དང་པོར་ཟློག། བར་དུ་བདག་ནི་ཟློག་པར་བྱེད།།མཐའ་མར་ལྟ་ཞིག་ཀུན་ཟློག་པ།། གང་གིས་ཤེས་ཏེ་མཁས་པ་ཡིན།། ཞེས་པའི་བསོད་ནམས་མིན་པ་དང་པོར་ཟློག་ཅེས་པ་ནི་དབུ་མ་རིན་ཆེན་ཕྲེང་བའི་ལེའུ་དང་པོའི་ནང་གི་མངོན་མཐོ་སྒྲུབ་པའི་ཆོས་བཅུ་དྲུག་གསུངས་ཟིན་པ་དེ་རེད། འདི་ཡིས་འཕྲལ་གྱི་མི་ཚེ་འདི་རང་ཡང་སྐྱིད་པ་ཞིག་དང་། མི་ཚང་ཕན་ཚུན་ལ་མགོ་སྐོར་གཡོ་སྒྱུ་མ་བྱས་པར་འཆམ་པོ་བྱེད་པ་དང་ཕན་སེམས་བྱས་ནས་ཡོང་བས་མངོན་མཐོའི་བདེ་བ་དེ་ལྟར་ཡོང་གི་ཡོད། དེའི་ཐོག་ལ་རང་བཞིན་གྱིས་མིའི་སེམས་བཟང་པོ་ཡོད་པ་དང་། རྣམ་དཔྱོད་ཀྱིས་ཕུགས་རྒྱང་རིང་པོར་བལྟས་ནས་བསམ་བློ་གཏོང་རྒྱུ་ཡོད་པ་དེ་གྲས་ནི་ར་བཟི་ན་དེ་ལྟ་བུའི་བསམ་བློ་འཁོར་མ་ཐུབ་པ་ཡོང་གི་ཡོད་པ་རེད། དེར་བརྟེན། ཆང་མི་འཐུང་བ་ཞེས་གསུངས་པ་དེ་རེད། སྔོན་མ་ངོས་ཀྱི་ཡོངས་འཛིན་རྣམ་གཉིས་བཞུགས་པའི་སྐབས་སུ་གླིང་རིན་པོ་ཆེས་ངོས་ལ་ལོ་རྒྱུས་ཤིག་གསུངས་མྱོང་། ཉིན་གཅིག་རྡ་རམ་ས་ལར་སྡོད་མཁན་གྱི་སྟོད་པའི་སྤོ་ལགས་ཤིག་ལ་དགེ་བསྙེན་སྒྲུབ་སྐབས་ཆང་འཐུང་རྒྱུ་ཡོད་པ་མ་རེད་ཅེས་གསུངས་འདུག སྤོ་ལགས་དེས་ངས་ཆང་ཁྱོན་ནས་འཇོག་ཐུབ་ཀྱི་མི་འདུག་ཅེས་ཞུ་བཞིན་འདུག་གསུངས་སོང་། ཡོང་འཛིན་རིན་པོ་ཆེས་དེས་ན་ཁྱད་པར་ཡོད་པ་མ་རེད། ཉུང་ཙམ་ཉུང་ཙམ་འཐུང་། མང་པོ་མ་འཐུང་གསུངས་པ་ཡིན་ཟེར། དེ་བདེན་པ་རེད།
འཛམ་གླིང་འདིར་ཆང་དང་ཨ་རག་དར་སྲོལ་ཆེན་པོ་ཡོད་པ་རེད། ཉུང་ཙམ་ཉུང་ཙམ་འཐུང་། ཚོད་མ་ཟིན་པར་སོ་སོ་རྣལ་དུ་མ་གནས་པ་བྱེད་བཞིན་པ་ཉུང་དུ་ཐོངས། བསོད་ནམས་མིན་པ་དང་པོར་ཟློག་ཅེས་པ་དེ་རེད། ཅེས་སོགས་ཐ་སྙད་པའི་དབང་གིས་བདག་ཡོད་ཀྱང་དེ་བློ་ལ་ཨ་འཐས་ཀྱི་འཛིན་པ་དམ་པོར་སྐྱེས་པའི་གཞི་མེད་པ་དང་། ལམ་སེང་སྟོང་ཉིད་ཕྲ་མོའི་སྟེང་ལ་བསམ་བློ་གཏོང་མ་ཐུབ་ཚེ་གང་ཟག་གི་བདག་མེད་རགས་པ་གང་ཟག་རང་སྐྱ་ཐུབ་པའི་རྫས་ཡོད་ཅེས་གང་ཟག་དང་ང་ཅེས་པ་ཕུང་པོ་ལ་དབང་བསྒྱུར་མཁན་ཞིག་བློ་ལ་ཤར་སྡོད་པ་དེ་མེད་པ་དང་། ཟབ་ཏུ་ཕྱིན་པ་ཡིན་ན་ཆོས་ཐམས་ཅད་མིང་རྐྱང་བཏགས་ཡོད་ཙམ་ཞེས་བཤད་ཡོང་དུས་ཆགས་སྡང་སླེབས་པའི་གང་ཟག་ང་ཞེས་པ་བཏགས་དོན་བཙལ་ན་རྙེད་རྒྱུ་མེད་པ་དང་། ཚད་རྡུལ་དངོས་ཁམས་རིག་པའི་ཐོག་ནས་དེ་ཤོད་བཞིན་ཡོད་པ་དང་། བདག་མེད་པའི་ལྟ་བ་ནི་ཆགས་སྡང་མེད་པར་གཏོང་བར་གནད་ཆེ་བ་སོགས་ཆོས་འབྲེལ་བཀའ་སློབ་སྩལ་རྗེས་ཧི་མ་ལ་ཡའི་རི་རྒྱུད་ཀྱི་ནང་ཆོས་དོན་གཉེར་བ་རྣམས་ལ་དམིགས་བསལ་ལམ་སྟོན་སྩལ་བ་བཅས་བཀའ་སློབ་རིམ་པར་གནང་རྗེས།
དེ་རིང་ཞུ་འདོད་པ་གཅིག་ནི་ནད་ཡམས་ཤིག་གིས་འཛམ་བུ་གླིང་གང་སར་ཛ་དྲག་ཅིག་ཆགས་འདུག དེ་ཚོའི་ཐོག་ལ་ད་ལྟའི་བར་དུ་ཚན་རིག་མཁས་དབང་དང་། དེ་བཞིན་ཁ་ཡོད་ལག་ཡོད་ཀྱིས་ནད་པ་ལ་ལྟ་རྟོག་བྱེད་མཁན་གྱི་སྨན་པ་ཁག་དང་། ནད་གཡོག་སོགས་ཁ་ཤས་ཀྱིས་སོ་སོའི་སྲོག་ཤོར་བའང་བྱུང་བ་རེད། རྗེས་སུ་ཡི་རང་ཡོད། འཛམ་བུ་གླིང་འདིའི་སྒང་ལ་དམིགས་བསལ་གྱིས་ནད་ཡམས་ཤིག་སླེབས་བསྡད་པ་དེ་ལ་ཚང་མས་ཁུར་ལེན་གྱི་ཡོད་པ་རེད་ལ། ལྷག་པར་དུ་ཡང་སྨན་པ་དང་སྨན་གཡོག་ཚོས་ཧུར་ཐག་འབད་ཐག་གནང་བ་དེར་རྗེས་སུ་ཡི་རང་ཞུ་གི་ཡོད། ཐུགས་རྗེ་ཆེ་ཞེས་ཞུ་གི་ཡིན།
དེ་ལྟ་བུའི་ཛ་དྲག་གི་གནས་ཚུལ་ཡོང་བའི་སྐབས་སུ་ཡིད་ཞུམ་བྱས་ནས་འཁུམ་བསྡད་ན་ཕན་གྱི་མེད་པར་གང་ལྟར་མིའི་དཀའ་ངལ་ཞིག་ཆགས་ཡོད་པས་དཀའ་ངལ་དེ་མིས་མ་སེལ་ན་སུས་སེལ། ཆོས་ཀྱི་ཐོག་ནས་སྨོན་ལམ་བརྒྱབ་པ་གཅིག་པུས་ཀྱང་ལྡང་གི་མེད། དེར་བརྟེན། ང་རང་ཚོ་སོ་སོའི་སེམས་ལ་སྤོབས་པ་ཡོད་པ་དང་། ལྷག་བསམ་གྱི་སྙིང་སྟོབས་བསྐྱེད་ནས་ད་ལྟའི་བར་དུ་གདོང་ལེན་གནང་བ་རེད་ལ་མུ་མཐུད་གནང་རོགས་ཞུ་རྒྱུ་ཡིན།
ད་ལྟ་རྒྱ་གར་ལའང་ནད་ཡམས་དེ་གང་འཚམ་ཡོང་བཞིན་ཡོད་པས་ང་ཚོའི་ཆོས་སྡེ་ཁག་དང་། དེ་བཞིན་དགོན་པ་ཆེ་ཆུང་སོགས་མི་མང་འདུ་འཛོམས་ཡོད་ས་ཚང་མས་ནད་ཡམས་ཀྱི་ཆེད་དུ་དམིགས་ནས་སྨན་བླའི་གཟུངས་སྔགས་བགྲང་རྒྱུ་ལྟ་བུ་དང་། སྒྲོལ་མའི་གཟུངས་སྔགས་བསགས་པ་སོགས་མང་པོ་བྱེད་བཞིན་ཡོད་པ་རེད། དེར་བརྟེན། དེ་རིང་འདིར་དེ་དག་གི་ལུང་ཞིག་བྱེད་རོགས་ཞེས་ངོས་ཀྱི་ངོ་ཤེས་པ་དེ་འདྲ་བཤད་མཁན་བྱུང་། ཞེས་བཀའ་ཕེབས་རྗེས། ཐུབ་པའི་མཚན་སྔགས་དང་། སྨན་བླའི་གཟུངས་སྔགས། མ་ཎི་ཡིག་དྲུག དམིགས་བརྩེ་མ། བཛྲ་གུ་རུ། སྒྲོལ་མའི་གཟུངས་སྔགས། བཅས་ཀྱི་ལུང་གནང་སྟེ་ཉིན་གཉིས་རིང་གི་ཆོས་འབྲེལ་གནང་སྒོ་ལེགས་པར་གྲུབ་ཡོད་པ་བཅས།།
