༄༅། །ཕྱི་ལོ་ ༢༠༡༨ ཟླ་ ༦ ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་རྡ་རམ་ས་ལ་ནས་ཆིབས་ཐོན་གྱིས་རྒྱ་གར་གྱི་རྒྱལ་ས་ལྡི་ལིར་༸ཞབས་སོར་འཁོད་པ་དང་། ཟླ་ ༧ ཚེས་ ༡ ཉིན་རྒྱལ་ས་ལྡི་ལི་རུ་ཤྲཱི་ལངྐ་ (Sri Lanka) དང་། མ་ཡན་མཱརསས། (Myanmar) ཐའི་ལེནྜི། (Thailand) ཝི་ཏི་ནམ། (Vietnam) ཐའེ་ཝན། (Taiwan) དེ་བཞིན་རྒྱ་གར་བཅས་ནས་ཕེབས་པའི་ནང་པའི་སྐུ་ཚབ་དང་བོད་བརྒྱུད་ནང་བསྟན་གྱི་སྐུ་ཚབ་དབར་དམ་ཆོས་འདུལ་བའི་བགྲོ་གླེང་ཐེངས་གཉིས་པའི་ཚོགས་མགོན་དུ་ཆིབས་བསྒྱུར་བསྐྱངས་པའི་མཛད་འཕྲིན་ནས་དབུ་བཙུགས་ཏེ་ཟླ་གཅིག་དང་ཉིན་ ༡༤ རིང་ལ་དྭགས་དང་རྒྱ་གར་ལྷོ་ཕྱོགས་སུ་ཆོས་འབྲེལ་དང་མི་མང་ལ་གསུང་བཤད་སོགས་ཀྱི་མཛད་འཕྲིན་རྒྱ་ཆེར་བསྐྱངས་རྗེས་རྡ་རམ་ས་ལའི་བཞུགས་སྒར་དུ་༸ཞབས་སོར་བདེ་བོར་འཁོད་ཡོད་པ་རེད།
དེ་ཡང་ཟླ་ ༧ ཚེས་ ༡ ཉིན་རྒྱལ་ས་ལྡི་ལི་རུ་ཤྲཱི་ལངྐ་ (Sri Lanka) དང་། མ་ཡན་མཱར། (Myanmar) ཐའི་ལེནྜི། (Thailand) ཝི་ཏི་ནམ། (Vietnam) ཐའེ་ཝན། (Taiwan) དེ་བཞིན་རྒྱ་གར་བཅས་ནས་ཕེབས་པའི་ནང་པའི་སྐུ་ཚབ་དང་བོད་བརྒྱུད་ནང་བསྟན་གྱི་སྐུ་ཚབ་དབར་དམ་ཆོས་འདུལ་བའི་བགྲོ་གླེང་ཐེངས་གཉིས་པའི་ཚོགས་མགོན་དུ་ཆིབས་བསྒྱུར་བསྐྱངས་སྟེ་བཀའ་སློབ་སྩལ་བ་དང་། ཚེས་ ༢ ཉིན་ལྡི་ལི་མངའ་སྡེ་གཞུང་གིས་གཞུང་འབྲེལ་སློབ་གྲྭ་ཡོངས་ཀྱི་སྔོན་འགྲོ་ནས་འཛིན་རིམ་ ༨ བར་གྱི་སློབ་ཚན་ནང་མི་ཚེའི་ནང་བདེ་སྐྱིད་བསྐྲུན་ཐབས་སྐོར་གྱི་སློབ་ཚན་གསར་འཇུག་གཏན་འབེབ་གནང་ཡོད་པའི་དབུ་འབྱེད་མཛད་སྒོར་གདན་ཞུ་ཞུས་དོན་ལྟར་ཆིབས་བསྒྱུར་བསྐྱངས་ནས་སློབ་གྲྭ་སྟོང་གཅིག་གི་སློབ་སྤྱི་དང་། དགེ་རྒན་བཞི་སྟོང་བཅས་ཁྱོན་སློབ་སྤྱི་དང་དགེ་རྒན་སྟོང་ལྔ་ལ་བཀའ་སློབ་སྩལ།
ཚེས་ ༣ ཉིན་ལྡི་ལི་ནས་མཁའ་ལམ་བརྒྱུད་རྒྱ་གར་བྱང་ཕྱོགས་ལ་དྭགས་རྒྱལ་ས་སླེའི་གནམ་ཐང་དུ་༸ཞབས་སོར་བདེ་བར་འཁོད་སྐབས་མངའ་སྡེའི་གྲོས་ཚོགས་འཐུས་མི་རྣམ་པ་དང་། ལ་དྭགས་ནང་པའི་ཚོགས་པ་ དང་། ལ་དྭགས་རི་ལྗོངས་ཡར་རྒྱས་ལྷན་ཚོགས། དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་དང་། སྟག་ལུང་མ་སྤྲུལ་རིན་པོ་ཆེ་མཆོག འབྲི་གུང་སྐྱབས་མགོན་ཆེ་ཚང་རིན་པོ་ཆེ་མཆོག ཁྲིག་རྩེ་རིན་པོ་ཆེ་མཆོག་སོགས་ཀྱིས་དབུས་བླ་སྤྲུལ་དགེ་བཤེས་རྣམ་པ། ལ་དྭགས་ཨ་མ་ཚོགས་པ། དགོན་པའི་ཚོགས་པ། ས་གནས་རྫོང་དཔོན་དང་ཉེན་རྟོག་འགོ་དཔོན། ལ་དྭགས་ཁ་ཆེ་ཚོགས་པ། ལ་སྤྱིས་གཙོས་གཞུང་དང་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་འཐུས་མི་སོགས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས།
ཚེས་ ༦ ཉིན་ལ་དྭགས་གླེ་ཞི་བའི་ཚལ་ཕོ་བྲང་དུ་མགོན་པོ་གང་ཉིད་མཆོག་དགུང་གྲངས་ ༨༣ བཞེས་པའི་༸སྐུའི་འཁྲུངས་སྐར་དུས་ཆེན་གྱི་མཛད་སྒོར་དབུ་བཞུགས་དང་བཀའ་སློབ་བཀའ་དྲིན་སྩལ་བ་དང་། ཚེས་ ༡༠ ཉིན་ཇམ་མུ་ཀ་ཤི་མིར་མངའ་སྡེའི་སྲིད་སྐྱོང་ན་རེནྡྲ་ན་ཐི་ཝོ་ར་ Shri Narinder Nath Vohra མཆོག་ལ་དྭགས་ཀྱི་རྒྱལ་ས་སླེ་ཁུལ་དུ་གཞུང་འབྲེལ་འཚམས་གཟིགས་སུ་ཕེབས་སྐབས་ལ་དྭགས་ཞི་བ་ཚལ་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་མཇལ་འཕྲད་ཞུས། ཚེས་ ༡༢ ཉིན་གྱི་སྔ་དྲོ་ཆུ་ཚོད་ ༡༠ ཡོལ་ཙམ་ལ་ལ་དྭགས་ས་ཁུལ་ལྡུམ་རར་རྟེན་གཞི་བྱས་པའི་བདེ་སྐྱིད་བཀྲ་ཤིས་ཆོས་གླིང་དགོན་པར་༸ཞབས་སོར་བདེ་བར་འཁོད་པ་དང་། ཚེས་ ༡༣ བློ་སྦྱོང་ཚིག་བརྒྱད་མ་དང་། རྟེན་འབྲེལ་བསྟོད་པའི་བཀའ་ཆོས་སྩལ་བ་དང་། ཕྱི་ཚེས་ ༡༤ ཉིན་གྱི་སྔ་དྲོ་བསམ་གཏན་གླིང་དགོན་པར་ཆིབས་སྒྱུར་བཀའ་དྲིན་བསྐྱངས།
ཚེས་ ༡༥ ཉིན་སྔ་དྲོ་ཆུ་ཚོད་ ༩ ཙམ་ལ་ལ་དྭགས་ལྡུམ་ར་བསམ་གཏན་གླིང་དགོན་པའི་གསུང་རའི་ནང་ལ་དྭགས་དབྱར་ཆོས་ཆེན་མོ་ཐེངས་དྲུག་པ་དབུ་འབྱེད་དང་བཀའ་སློབ་བཀའ་དྲིན་སྩལ། ཚེས་ ༡༦ ཉིན་ལ་དྭགས་ལྡུམ་ར་བསམ་གཏན་གླིང་དགོན་པར་དགའ་ལྡན་ཁྲི་ཟུར་རི་རྫོང་རིན་པོ་ཆེ་མཆོག་དང་ཁྲིག་རྩེ་རིན་པོ་ཆེ་མཆོག་གིས་གཙོས་དགེ་བཤེས་བླ་སྤྲུལ་ཁག་གཅིག་དང་། གཞན་ཡང་ཆབ་སྲིད་དབུ་ཁྲིད་དང་མི་མང་སྟོང་ཕྲག་བརྒལ་བར་རྗེ་ཙོང་ཁ་པ་ཆེན་པོས་མཛད་པའི་ལམ་གཙོ་རྣམ་གསུམ་དང་། སེམས་སྐྱེས་བཀའ་བརྒྱ་མ། དེ་བཞིན་འཇམ་དཔལ་མཚན་བརྗོད་ཀྱི་ལྗགས་ལུང་སྩལ། ཚེས་ ༡༧ ཉིན་གྱི་སྔ་དྲོ་ཆུ་ཚོད་ ༩ ཐོག་ལ་དྭགས་ལྡུམ་ར་བསམ་གླིང་སེར་སྐྱ་མང་ཚོགས་གཙོ་བོར་གྱུར་བའི་ལ་དྭགས་ས་གནས་འདྲ་མིན་ནས་འདུས་པའི་དད་ལྡན་རྣམས་ལ་སྒྲོལ་དཀར་ཡིད་བཞིན་འཁོར་ལོའི་ཚེ་དབང་དང་། བྱང་སེམས་སྡོམ་པ་འབོགས་ཆོག་མཛད།
ཚེས་ ༢༡ ཉིན་གྱི་སྔ་དྲོ་ཆུ་ཚོད་ ༨།༤༥ ཙམ་ལ་ལ་དྭགས་རྒྱལ་ས་གླེ་ནས་ཐད་འཕུར་གནམ་གྲུ་བརྒྱུད་ཟངས་དཀར་ཐད་འཕུར་གནམ་ཐང་དུ་༸ཞབས་སོར་བདེ་བར་འཁོད་པ་དང་། ཚེས་ ༢༢ ཉིན་གྱི་སྔ་དྲོ་ཆུ་ཚོད་ ༩ ཐོག་ཟངས་དཀར་༸རྒྱལ་བའི་ཕོ་བྲང་དུ་ཟངས་དཀར་སེར་སྐྱ་མང་ཚོགས་རྣམས་ལ་རྗེ་ཙོང་ཁ་པ་ཆེན་པོས་མཛད་པའི་ལམ་རིམ་བསྡུས་དོན་གྱི་བཀའ་ཁྲིད་དབུ་འཛུགས་མཛད།
ཚེས་ ༢༣ ཉིན་ལ་དྭགས་ཟངས་དཀར་༸རྒྱལ་བའི་ཕོ་བྲང་དུ་སྤྱན་རས་གཟིགས་ཀྱི་བཀའ་དབང་དང་། ལམ་སྒྲོན་སློབ་གྲྭ་གཙོ་བོར་གྱུར་བའི་སློབ་ཕྲུག་རྣམས་ལ་གང་བློ་མའི་ལྗགས་ལུང་སྩལ་བསྟུན་ལ་དྭགས་སེར་སྐྱ་མང་ཚོགས་རྣམས་ཀྱིས་མགོན་པོ་མཆོག་ལ་བརྟན་བཞུགས་བསྟར་འབུལ་ཞུས་པ་རྗེས་ཟངས་དཀར་ཁུལ་གྱི་ནང་པ་དང་ཁ་ཆེའི་དབར་ལོ་དྲུག་བདུན་ཙམ་གོང་ནས་མི་མཐུན་པ་པའི་གནས་ཚུལ་ཕྲན་བུ་བྱུང་བར་ཕྱིན་ཆད་དེ་རིགས་རྩ་བ་ནས་མི་ཡོང་བ་དང་གཉིས་ཕན་ཚུན་མཛའ་བརྩེའི་འབྲེལ་ལམ་རྒྱུན་སྐྱོང་བྱ་རྒྱུའི་ཁས་ལེན་ཡིག་ཆ་ཞིག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཕྱག་ཏུ་འབུལ་ལམ་ཞུས་པར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་དགྱེས་ཚོར་དང་སྦྲགས་ཐོག་མར་ཕྱོགས་གཉིས་ཀྱི་སྐུ་ཚབ་འཐུས་མི་རྣམས་དང་ལྷན་སྐུ་པར་ལྷན་སྒྲོན་མཛད་རྗེས་བཀའ་སློབ་སྩལ།
ཚེས་ ༢༤ ཉིན་ཟངས་དཀར་གྱི་རྒྱལ་ས་པ་དུམ་ཁུལ་དུ་རྟེན་གཞི་བྱས་པའི་ཨན་ཇུ་མན་མོ་ཡིན་ཨུལ་ཨི་སི་ལམ་ Anjumane Moen UL Islam ཞེས་པའི་ཁ་ཆེའི་སློབ་གྲྭས་ཇི་ལྟར་སྔོན་ནས་གདན་ཞུ་གསོལ་འདེབས་ཞུས་དོན་ལྟར་ཆིབས་སྒྱུར་བསྐྱངས་སྟེ་བཀའ་སློབ་སྩལ་བ་དང་། དེ་རྗེས་ཟངས་དཀར་འཕྲོད་བསྟེན་སྨན་ཁང་དང་། གསོ་རིག་ཉམས་ཞིབ་ཁང་དུ་ཆིབས་སྒྱུར་བཀའ་དྲིན་བསྐྱངས་ནས་དད་ལྡན་མང་ཚོགས་རྣམས་ལ་བཀའ་སློབ་སྩལ། དེ་བཞིན་ཉིན་འདིར་ཨ་རིའི་ཕྱི་སྲིད་ལྷན་ཁང་གིས་གོ་སྒྲིག་གནང་བའི་ཕྱི་ལོ་ ༢༠༡༨ ཟླ་ ༧ ཚེས་ ༢༤ ནས་ ༢༦ བར་ཉིན་གྲངས་གསུམ་རིང་ཨ་རིའི་ཕྱི་སྲིད་ལས་ཁུངས་སུ་ཐེངས་དང་པོ་རྒྱལ་སྤྱིའི་བློན་ཆེན་རིམ་པའི་ཆོས་དད་རང་དབང་གི་ཚོགས་ཆེན་ཐོག་བརྙན་འཕྲིན་བརྒྱུད་བཀའ་སློབ་སྩལ།
ཚེས་ ༢༦ ཉིན་ཀར་གིལ་ Kargil གྲོང་ཁྱེར་གྱི་བཞུགས་གནས་གསོལ་མགྲོན་ཁང་དུ་གསར་འགོད་པ་ཁག་གཅིག་གི་དྲི་བར་བཀའ་ལན་མཛད་བསྟུན་དད་ལྡན་མི་མང་ ༣༠༠ ཙམ་ལ་མཇལ་ཁ་དང་བཀའ་སློབ་སྩལ། དེ་རྗེས་ཆུ་ཚོད་ ༡༠ ཙམ་ལ་ཝ་ཀ་མུལ་སྦེག་ Wakha-Mulbekh ཞེས་མི་འབོར་ལྔ་སྟོང་ཙམ་ཡོད་ས་དེར་སི་པི་རིང་དྲེལ་ཞེས་པའི་སློབ་གྲྭ་ Spring Dales Public School ཞེས་པའི་སློབ་གྲྭས་ཇི་ལྟར་སྔོན་ནས་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་ཆིབས་སྒྱུར་བཀའ་དྲིན་བསྐྱབས་ཏེ་བཀའ་སློབ་སྩལ། ཚེས་ ༢༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཁྲིག་རྩེ་དགོན་ཚུལ་ཁྲིམས་རྣམ་དག་གླིང་གི་དཔེ་མཛོད་ཁང་དང་། ཤེས་ཡོན་བསྟི་གནས་ཁང་དབུ་འབྱེད་རབ་གནས་མཛད།
ཟླ་ ༨ ཚེས་ ༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་བོད་ཁྱིམ་སློབ་གྲྭའི་ཐང་ཆེན་དུ་བསོད་ནམས་གླིང་མི་མང་དང་བོད་ཁྱིམ་དགེ་སློབ་ལས་བྱེད་ཡོངས་ལ་བཀའ་སློབ་བཀའ་དྲིན་སྩལ་བ་དང་། དེ་བཞིན་ཉིན་འདིར་ལ་དྭགས་ཞི་བའི་ཚལ་ཕོ་བྲང་དུ་ལ་དྭགས་གླེ་བསོད་ནམས་ནོར་བུ་དྲན་རྟེན་སྨན་ཁང་ཆེན་མོའི་སྨན་ཞབས་པ་རྣམས་ལ་དམིགས་བསལ་མཇལ་ཁ་དང་སྐུ་དཔར་ལྷན་བསྒྲོན་རྗེས་བཀའ་སློབ་སྩལ། ཚེས་ ༣ ཉིན་ལ་དྭགས་ཞི་བའི་ཚལ་ཕོ་བྲང་ཐང་ཆེན་དུ་ལ་དྭགས་ནང་ཚོགས་དང་དགོན་ཚོགས་ཐུན་མོང་ནས་གསོལ་སྟོན་ཟབ་རྒྱས་འདེགས་འབུལ་འབྲེལ་ཕྱི་ཟླ་ ༧ ཚེས་ ༣ ཉིན་ལ་དྭགས་སུ་༸ཞབས་སོར་བཀོད་པ་ཟླ་ ༨ ཚེས་ ༣ ཉིན་བར་ཟླ་བ་གཅིག་ཕྱིན་ཡོད་སྐོར་བཀའ་ཕེབས་པ་སོགས་ལ་དྭགས་ཀྱི་མཛད་འཕྲིན་རེ་ཞིག་ལེགས་པར་གྲུབ་ནས་རྒྱ་གར་གྱི་རྒྱལ་ས་ལྡི་ལིར་ཆིབས་བསྒྱུར་བསྐྱངས།
ཚེས་ ༧ ཉིན་གྱི་ཕྱེད་ཡོལ་ཆུ་ཚོད་ ༣།༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་རྒྱ་གར་ལྷོ་ཕྱོགས་གྷོ་བར་༸ཞབས་སོར་བདེ་བར་འཁོད་པ་དང་། ཚེས་ ༨ ཉིན་གྷོ་བ་ས་གནས་སུ་རྟེན་གཞི་བྱས་པའི་རྒྱ་གར་ནང་གི་ཚོང་དོན་སློབ་གྲྭ་གྲགས་ཅན་ Goa Institute of Management ཞེས་པས་ཇི་ལྟར་སྔོན་ནས་གདན་ཞུ་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ་སློབ་གཉེར་ཁང་དེ་ཉིད་དབུ་བརྙེས་ནས་ལོ་ ༢༥ འཁོར་བའི་དུས་དྲན་སྲུང་བརྩིའི་མཛད་སྒོར་དབུ་བཞུགས་ཀྱིས་དགེ་ལས་སློབ་ཕྲུག་རྣམས་ལ་དེང་གི་དུས་སུ་སེམས་དང་སེམས་ཀྱི་བྱེད་ལས་སྐོར་གྱི་རྒྱ་གར་གྱི་གནའ་བོའི་ལེགས་བཤད་ཀྱི་ཕན་ཐོགས་སྐོར་བཀའ་སློབ་སྩལ།
ཚེས་ ༩ ཉིན་གྱི་སྔ་དྲོ་ཆུ་ཚོད་ ༡༠།༣༠ ཙམ་ལ་རྒྱ་གར་ལྷོ་ཕྱོགས་གྷོ་བ་ནང་གི་མཛད་འཕྲིན་ལེགས་པར་གྲུབ་ནས་རྒྱ་གར་ལྷོ་ཕྱོགས་སྦེང་ལོར་གྲོང་ཁྱེར་དུ་༸ཞབས་སོར་འཁོད། ཕྱི་ཚེས་ ༡༠ ཉིན་ Taj West Hotel གསོལ་མགྲོན་ཁང་དུ་ཀར་ན་ཀྲ་ཀ་མངའ་སྡེའི་ཁྱབ་ཁོངས་སུ་གཏོགས་པའི་བོད་མི་རྣམས་ནས་མངའ་སྡེའི་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོར་དབུ་བཞུགས་དང་བཀའ་སློབ་སྩལ་བ་དང་། དེ་བཞིན་ཝ་ན་ཐེབས་རྩ་ཁང་གི་གོ་སྒྲིག་འོག་རྒྱ་གར་སློབ་ཕྲུག་རྣམས་ལ་དུས་རབས་ ༢༡ པའི་ནང་གི་བྱམས་བརྩེའི་ནུས་པ་དང་། རྒྱ་གར་གནའ་རབས་ཀྱི་རིག་གཞུང་ཞེས་པའི་བརྗོད་གཞིའི་ཐོག་བཀའ་སློབ་སྩལ། ཚེས་ ༡༣ ཉིན་རྒྱ་གར་ལྷོ་ཕྱོགས་ཀར་ནཱ་ཌ་གར་རྟེན་གཞི་བྱས་པའི་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ་དགེ་ལས་སློབ་ཕྲུག་དང་མི་མང་རྣམས་ལ་བཀའ་སློབ་བཀའ་དྲིན་སྩལ་བ་སོགས་མཛད་འཕྲིན་རྒྱ་ཆེར་བསྐྱངས་པ་དང་།
ཚེས་ ༡༤ ཉིན་གུང་གྷ་གྷལ་གནམ་ཐང་དུ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག དེ་བཞིན་བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག་སོགས་ཀྱིས་ཕེབས་བསུ་དང་འབྲེལ་བཞུགས་སྒར་ལ་ཆིབས་བསྒྱུར་བསྐྱངས་པ་དང་། ཕེབས་ལམ་གཡས་གཡོན་ཏུ་དད་ལྡན་སེར་སྐྱ་མི་མང་གིས་ལག་ཏུ་དཀར་གཙང་མཇལ་དར་དང་བདུག་སྤོས་ཐོགས་ཏེ་ཕེབས་བསུ་དང་བཅས་ཆུ་ཚོད་ ༡།༢༠ ཙམ་ལ་ཕོ་བྲང་དུ་༸ཞབས་སོར་འཁོད་ཡོད་པ་བཅས།།
